Printed edition: Ācārya 1931: Sūtrasthāna 1-31

Published in 2013-2016 by in .

Suśrutasaṃhitā (without commentaries) transcribed by Tsutomu Yamashita and Yasutaka Muroya on the basis of Y. T. Ācārya's 1931 and 1938 Bombay editions. The Suśrutasaṃhitā of Suśruta, with the Nibandhsangraha Commentary of Śrī Ḍalhaṇācārya. Yādavaśarman Trivikramātmaja Ācārya Pāndurang Jāvaji Bombay 1931 Revised second edition The sūtrasthāna (SS.1) and śārīrasthāna (SS.3) of this SARIT edition are mainly based on this edition. For sūtrasthāna 13 (leeches), the text of the 1938 vulgate is used in this file. This SARIT edition omits the commentarial material from this edition. Suśrutasamhitā of Suśruta with the Nibandhasaṅgraha Commentary of Śrī Ḍalhanāchārya and the Nyāyacandrikā Pañjikā of Śrī Gayadāsāchārya on Nidānasthāna, edited from the begining to the 9th ādhyāya of Cikitsāsthāna by Vaidya Jādavji Trikamji Āchārya and the rest by Nārāyaṇ Rām Āchārya Yādavaśarman Trivikramātmaja Ācāryā Nārāyaṇ Rām Āchārya Nirṇaya Sāgar Press Bombay 1938 Revised third edition Reprint edition Varanasi/Delhi: Chaukhambha Orientalia, 1992. The nidānasthāna (SS.2), cikitsāsthāna (SS.4) , kalpasthāna (SS.5) and uttaratantra (SS.6) are based on this edition. This SARIT edition omits the commentarial material from this edition.

Siglum: A

A

[Sūtrasthāna 1-31]

athāto vedotpattim adhyāyaṃ vyākhyāsyāmaḥ ||1||

yathovāca bhagavān dhanvantariḥ||2||

atha khalu bhagavantam amaravaram ṛṣigaṇaparivṛtam āśramasthaṃ kāśirājaṃ divodāsaṃ dhanvantarim aupadhenava vaitaraṇaurabhra pauṣkalāvata -karavīrya gopurarakṣita suśruta prabhṛtaya ūcuḥ ||3|| karavīra

bhagavan śārīramānasāgantuvyādhibhir vividhavedanābhighātopadrutān sanāthān apy anāthavad viceṣṭamānān vikrośataś ca mānavān abhisamīkṣya manasi naḥ pīḍā bhavati

teṣāṃ sukhaiṣiṇāṃ rogopaśamārtham ātmanaś ca prāṇayātrārthaṃ prajāhitahetor āyurvedaṃ śrotum icchāma ihopadiśyamānaṃ atrāyattam aihikam āmuṣmikaṃ ca śreyaḥ tad bhagavantam upapannāḥ smaḥ śiṣyatveneti ||

tān uvāca bhagavān svāgataṃ vaḥ sarva evāmīmāṃsyā adhyāpyāś ca bhavanto vatsāḥ ||

iha khalv āyurvedaṃ nāmopāṅgam atharvavedasyānutpādyaiva prajāḥ ślokaśatasahasram adhyāyasahasraṃ ca kṛtavān svayambhūḥ tato 'lpāyuṣṭvam alpamedhastvaṃ cālokya narāṇāṃ bhūyo 'ṣṭadhā praṇītavān ||

tad yathā śalyaṃ śālākyaṃ kāyacikitsā bhūtavidyā kaumārabhṛtyaṃ agadatantraṃ rasāyanatantraṃ vājīkaraṇatantram iti ||

athāsya pratyaṅgalakṣaṇasamāsaḥ |

tatra śalyaṃ nāma vividhatṛṇakāṣṭhapāṣāṇapāṃśulohaloṣṭāsthibālanakhapūyāsrāvaduṣṭavraṇāntargarbhaśalyoddharaṇārthaṃ yantraśastrakṣārāgnipraṇidhānavraṇaviniścayārthaṃ ca ||

śālākyaṃ nāmordhvajatrugatānāṃ śravaṇanayanavadanaghrāṇādisaṃśritānāṃ vyādhīnām upaśamanārtham ||

kāyacikītsā nāma sarvāṅgasaṃśritānāṃ vyādhīnāṃ jvararaktapittaśoṣonmādāpasmārakuṣṭhamehātisārādīnām upaśamanārtham ||

bhūtavidyā nāma devāsuragandharvayakṣarakṣaḥpitṛpiśācanāgagrahādyupasṛṣṭacetasāṃ śāntikarmabaloharaṇādigrahopaśamanārtham ||

kaumārabhṛtyaṃ nāma kumārabharaṇadhātrīkṣīradoṣasaṃśodhanārthaṃ duṣṭastanyagrahasamutthānāṃ ca vyādhīnām upaśamanārtham ||

agadatantraṃ nāma sarpakīṭalūtāmūśikādidaṣṭaviṣavyañjanārthaṃ vividhaviṣasaṃyogopaśamanārthaṃ ca ||

rasāyanatantraṃ nāma vayaḥsthāpanam āyurmedhābalakaraṃ rogāpaharaṇasamarthaṃ ca ||

vājīkaraṇatantraṃ nāmālpaduṣṭakṣīṇaviśuṣkaretasām āpyāyanaprasādopacayajanananimittaṃ praharṣajananārthaṃ ca ||

evam ayam āyurvedo 'ṣṭāṅga upadiśyate atra kasmai kim ucyatām iti ||

ta ūcuḥ asmākaṃ sarveṣām eva śalyajñānaṃ mūlaṃ kṛtvopadiśatu bhagavān iti ||

sa uvācaivam astv iti ||

ta ūcur bhūyo 'pi bhagavantam asmākam ekamatīnāṃ matam abhisamīkṣya suśruto bhagavantaṃ prakṣyati asmai copadiśyamānaṃ vayam apy upadhārayiṣyāmaḥ ||

sa hovācaivam astv iti ||

vatsa suśruta iha khalv āyurvedaprayojanaṃ vyādhyupasṛṣṭānāṃ vyādhiparimokṣaḥ svasthasya rakṣaṇaṃ ca || āyur asmin vidyate 'nena vā+āyur vindatīty āyurvedaḥ || tasyāṅgavaram ādyaṃ pratyakṣāgamānumānopamānair aviruddham ucyamānam upadharaya ||

etad dhy aṅgaṃ prathamaṃ prāg abhighātavraṇasaṃrohāt yajñaśiraḥsandhānāc ca | śrūyate hi yathā rudreṇa yajñasya śiraś chinnam iti tato devā aśvināv abhigamyocuḥ bhagavantau naḥ śreṣṭhatamau yuvāṃ bhaviṣyathaḥ bhavadbhyāṃ yajñasya śiraḥ sandhātavyam iti | tāv ūcatur evam astv iti | atha tayor arthe devā indraṃ yajñabhagena prāsādayan | tābhyāṃ yajñasya śiraḥ saṃhitam iti ||

aṣṭāsv api cāyurvedatantreṣv etad evādhikam abhimataṃ āmāśu kriyākaraṇād yantraśastrakṣārāgnipraṇidhānāt sarvatantrasāmānyāc ca ||

tad idaṃ śāśvataṃ puṇyaṃ svargyaṃ yaśasyamāyuṣyaṃ vṛttikaraṃ ceti ||

brahmā provāca tataḥ prajāpatir adhijage tasmād aśvinau aśvibhyām indraḥ indrād aḥaṃ mayā tv iha pradeyam arthibhyaḥ prajāhitahetoḥ ||

bhavati cātra | ahaṃ hi dhanvantarir ādidevo jarārujāmṛtyuharo 'marāṇām |
śalyāṅgam aṅgair aparair upetaṃ prāpto 'smi gāṃ bhūya ihopadeṣṭum ||

asmin śāstre pañcamahābhūtaśarīrisamavāyaḥ puruṣa ity ucyate | tasmin kriyā so 'dhiṣṭhānaṃ kasmāt lokasya dvaividhyāt loko hi dvividhaḥ sthāvaro jaṅgamaś ca dvividhātmaka evāgneyaḥ saumyaś ca tadbhūyastvāt pañcātmako vā tatra caturvidho bhūtagrāmaḥ saṃsvedajarāyujāṇḍajodbhijjasaṃjñaḥ tatra puruṣaḥ pradhānaṃ tasyopakaraṇam anyat tasmāt puruṣo 'dhiṣṭhānam ||

tadduḥkhasaṃyogā vyādhaya ucyante ||

te caturvidhāḥ āgantavaḥ śārīrāḥ mānasāḥ svābhāvikāś ceti ||

teṣām āgantavo 'bhighātanimittāḥ ||

śārīrās tv annapānamūlā vātapittakaphaśoṇitasannipātavaiṣamyanimittāḥ ||

mānasās tu krodhaśokabhayaharṣaviṣāderṣyābhyasūyādainyamātsaryakāmalobhaprabhṛtaya icchādveṣabhedair bhavanti ||

svābhāvikās tu kṣutpipāsājarāmṛtyunidrāprakṛtayaḥ ||

ta ete manaḥśarīrādhiṣṭhānāḥ ||

teṣāṃ saṃśodhanasaṃśamanāhārācārāḥ samyak prayuktā nigrahahetavaḥ ||

prāṇināṃ punar mūlam āhāro balavarṇaujasāṃ ca sa ṣaṭsu raseṣv āyattaḥ rasāḥ punar dravyāśrayāḥ dravyāṇi punar oṣadhayaḥ | tās tu dvividhāḥ sthāvarā jaṅgamāś ca ||

tāsāṃ sthāvarāś caturvidhāḥ vanaspatayo vṛkṣā vīrudha oṣadhaya iti | tāsu apuṣpāḥ phalavanto vanaspatayaḥ puṣpaphalavanto vṛkṣāḥ pratānavatyaḥ stambinyaś ca vīrudhaḥ phalapākaniṣṭhā oṣadhaya iti ||

jaṅgamāḥ khalv api caturvidhāḥ jarāyujāṇḍajasvedajodbhijjāḥ | tatra paśumanuṣyavyālādayo jarāyujāḥ khagasarpasarīsṛpaprabhṛtayo 'ṇḍajāḥ kṛmikīṭapipīlikāprabhṛtayaḥ svedajāḥ indragopamaṇḍūkaprabhṛtaya udbhijjāḥ ||

tatra sthāvarebhyas tvakpatrapuṣpaphalamūlakandaniryāsasvarasādayaḥ prayojanavantaḥ jaṅgamebhyaś carmanakharomarudhirādayaḥ ||

pārthivāḥ suvarṇarajatamaṇimuktāmanaḥśilāmṛtkapālādayaḥ ||

kālakṛtāḥ pravātanivātātapacchāyājyotsnātamaḥśītoṣṇavarṣāhorātrapakṣamāsartvayanādayaḥ saṃvatsaraviśeṣāḥ ||

ta ete svabhāvata eva doṣāṇāṃ sañcayaprakopapraśamapratīkārahetavaḥ prayojanavantaś ca ||

bhavanti cātra ślokāḥ
śārīrāṇāṃ vikārāṇām eṣa vargaś caturvidhaḥ |
prakope praśame caiva hetur uktaś cikitsakaiḥ ||

āgantavas tu ye rogās te dvidhā nipatanti hi |
manasy anye śarīre 'nye teṣāṃ tu dvividhā kriyā ||

śarīrapatitānāṃ tu śārīravad upakramaḥ |
mānasānāṃ tu śabdādir iṣṭo vargaḥ sukhāvahaḥ ||

evam etat puruṣo vyādhir auṣadhaṃ kriyā kāla iti catuṣṭayaṃ samāsena vyākhyātam | tatra puruṣagrahaṇāt tatsaṃbhavadravyasamūho bhūtādir uktas tadaṅgapratyaṅgavikalpāś ca tvaṅmāṃsāsthisirāsnāyuprabhṛtayaḥ vyādhigrahaṇād vātapittakaphaśoṇitasannipātavaiṣamyanimittāḥ sarva eva vyādhayo vyākhyātāḥ oṣadhagrahaṇād dravyarasaguṇavīryavipākānām ādeśaḥ kriyāgrahaṇāc chedyādīni snehādīni ca karmāṇi vyākhyātāni kālagrahaṇāt sarvakriyākālānām ādeśaḥ ||

bhavati cātra |
bījaṃ cikitsitasyaitat samāsena prakīrtitam |
saviṃśam adhyāyaśatam asya vyākhyā bhaviṣyati ||

tac ca saviṃśam adhyāyaśataṃ pañcasu sthāneṣu sūtranidānaśārīracikitsitakalpeṣv arthavaśāt saṃvibhajya uttare tantre śeṣān arthān vyākhyāsyāmaḥ ||

bhavati cātra |
svayambhuvā proktam idaṃ sanātanaṃ
paṭhed dhi yaḥ kāśipatiprakāśitam |
sa puṇyakarmā bhuvi pūjito nṛpair
asukṣaye śakrasalokatāṃ vrajet ||

iti suśrutasaṃhitāyāṃ sūtrasthāne vedotpattir nāma prathamo 'dhyāyaḥ ||

[dvitīyo 'dhyāyaḥ|]

athātaḥ śiṣyopanayanīyam adhyāyaṃ vyākhyāsyāmaḥ ||

yathovāca bhagavān dhanvantariḥ ||

brāhmaṇakṣatriyavaiśyānām anyatamam anvaya vayaḥśīla śaurya śaucācāra vinaya śakti bala medhā dhṛti smṛti mati pratipattiyuktaṃ tanu jihvauṣṭha dantāgram ṛjuvaktrākṣināsaṃ prasannacittavākceṣṭaṃ kleśasahaṃ ca bhiṣak śiṣyam upanayet ato viparītaguṇaṃ nopanayet ||

upanayanīyaṃ tu brāhmaṇaṃ praśasteṣu tithikaraṇamuhūrtanakṣatreṣu praśastāyāṃ diśi śucau same deśe caturhastaṃ caturasraṃ sthaṇḍilam upalipya gomayena darbhaiḥ saṃstīrya puṣpair lājabhaktai ratnaiś ca devatāḥ pūjayitvā viprān bhiṣajaś ca tatrollikhyābhyukṣya ca dakṣiṇato brahmāṇaṃ sthāpayitvā'gnim upasamādhāya khadirapalāśadevadārubilvānāṃ samidbhiś caturṇāṃ vā kṣīravṛkṣāṇāṃ (? nyagrodhodumbarāśvatthamadhūkānāṃ ) dadhimadhughṛtāktābhir dārvīhaumikena vidhinā sruveṇājyāhutīr juhuyāt sapraṇavābhir mahāvyahṛtibhiḥ tataḥ pratidaivatamṛṣīṃś ca svāhākāraṃ kuryāt śiṣyam api kārayet ||

brāhmaṇas trayāṇāṃ varṇānām upanayanaṃ kartum arhati rājanyo dvayasya vaiśyo vaiśyasyaiveti śūdram api kulaguṇasaṃpannaṃ mantravarjam anupanītam adhyāpayed ity eke ||

tato 'gniṃ triḥ pariṇīyāgnisākṣikaṃ śiṣyaṃ brūyāt kāmakrodhalobhamohamānāhaṇkārerṣyāpāruṣyapaiśunyānṛtālasyāyaśasyāni hitvā nīcanakharomṇā śucinā kaṣāyavāsasā satyavratabrahmacaryābhivādanatatpareṇā'vaśyaṃ bhavitavyaṃ madanumatasthānagamanaśayanāsanabhojanādhyayanapareṇa bhūtvā matpriyahiteṣu vartitavyaṃ ato 'nyathā te vartamānasyādharmo bhavati aphalā ca vidyā na ca prākāśyaṃ prāpnoti ||

ahaṃ vā tvayi samyagvartamāne yady anyathādarśī syām enobhāg bhaveyam aphalavidyaś ca ||

dvijagurudaridramitrapravrajitopanatasādhvanāthābhyupagatānāṃ cātmabāndhavānām iva svabhaiṣajaiḥ pratikartavyam evaṃ sādhu bhavati vyādhaśākunikapatitapāpakāriṇāṃ ca na pratikartavyaṃ evaṃ vidyā prakāśate mitra yaśo dharmārtha kāmāṃś ca prāpnoti ||

bhavataś cātra |

kṛṣṇe 'ṣṭamī tannidhane 'hanī dve
śukle tathā 'py evam ahar dvisandhyam |
akālavidyutstanayitnughoṣe
svatantrarāṣṭrakṣitipavyathāsu ||

śmaśānayānādyatanāhaveṣu
mahotsavautpātikadarśaneṣu |
nādhyeyam anyeṣu ca yeṣu vaprā
nādhīyate nāśucinā ca nityam ||

iti suśrutasaṃhitāyāṃ sūtrasthāne śiṣyopanayanīyo nāma dvitīyo 'dhyāyaḥ ||

tṛtīyo 'dhyāyaḥ |

athāto 'dhyayanasaṃpradānīyam adhyāyaṃ vyākhyāsyāmaḥ ||

yathovāca bhagavān dhanvantariḥ ||

prāgabhihitaṃ saviṃśam adhyāyaśataṃ pañcasu sthāneṣu | tatra sūtrasthānamadhyāyāḥ ṣaṭcatvāriṃśat ṣoḍśa nidānāni daśa śārīrāṇi catvāriṃśaccikitsitāni aṣṭau kalpāḥ taduttaraṃ ṣaṭsāṣṭiḥ ||

vedotpattiḥ śiṣyanayas tathā'dhyayanadānikaḥ |

prabhāṣaṇāgraharaṇāvṛtucaryātha yāntrikaḥ ||

śastrāvacāaraṇaṃ yogyā viśikhā kṣārakalpanam |

agnikarmajalaukākhyāvadhyāyau raktavarṇanam ||

doṣadhātumalādyānāṃ vijñānādhyāya eva ca |

karṇavyadhāmapakvaiṣāvālepo vraṇyupāsanam ||

hitāhito vraṇapraśno vraṇāsrāvaś ca yaḥ pṛthak |

kṛtyākṛtyavidhirvyādhisamuddeśīya eva ca ||

viniścayaḥ śastravidhau pranaṣṭajñānikas tathā |

śalyoddhṛtirvraṇajñānaṃ dūtasvapnanidarśanam ||

pañcendriyaṃ tathā chāyā svabhāvādvaikṛtaṃ tathā |

vāraṇo yuktasenīya āturakramabhūnikau ||

miśrakākhyo dravyagaṇaḥ saṃśuddhau śamane ca yaḥ |

dravyādīnāṃ ca vijñānaṃ viśeṣo dravyago 'paraḥ ||

rasajñānaṃ vamanārthamadhyāyo recanāya ca |

dravaddravyavidhistadvadannapānavidhis tathā ||

sūcanāt sūtraṇāccaiva savanāccārthasantateḥ |

ṣaṭcatvāriṃśadadhyāyaṃ sūtrasthānaṃ pracakṣate ||

vātavyādhikamarśāṃsi sāśmariś ca bhagandaraḥ |

kuṣṭhamehodarā mūḍho vidradhiḥ parisarpaṇam ||

granthivṛddhikṣudraśūkabhaknāś ca mukharogikam |

hetulakṣaṇanirdeśānnidānānīti ṣoḍaśa ||

bhūtacintā rajaḥśuddhirgarbhāvakrāntireva ca |

vyākaraṇaṃ ca garbhasya śarīrasya ca yatsmṛtam ||

pratyekaṃ marmanirdeśaḥ sirāvarṇanam eva ca |

sirāvyadho dhamanīnāṃ garbhiṇyā vyākṛtis tathā ||

nirdiṣṭāni daśaitāni śārīrāṇi maharṣiṇā |

vijñānārthaṃ śarīrasya bhiṣajāṃ yoginām api ||

dvivraṇīyo vraṇaḥ sadyo bhagnānāṃ vātarogikam |

mahāvātikamarśāṃsi sāśmariś ca bhagandaraḥ ||

kuṣṭhānāṃ mahatāṃ cāpi maihikaṃ paiḍakaṃ tathā |

makhumehacikitsā ca tathā codariṇām api ||

mūḍhagarbhacikitsā ca vidradhīnāṃ visarpiṇām |

granthivṛddhyupadaṃśānāṃ tathā ca kṣudrarogikam ||

śūkadoṣacikitsā ca tathā ca mukharogiṇām |

śophasyānāgatānāṃ ca niṣedho miśrakaṃ tathā ||

vājīkaraṃ ca yat kṣīṇe sarvābādhaśamo 'pi ca |

medhāyuṣkaraṇaṃ cāpi svabhāvavyādhivāraṇam ||

nivṛttasaṃtāpakaraṃ kīrtitaṃ ca rasāyanam |

snehopayaugikaḥ svedo vamane ca virecane ||

tayor vyāpaccikitsā ca netrabastivibhāgikaḥ |

netrabastivipatsiddhis tathā cottarabastikaḥ ||

nirūhakramasaṃjñaś ca tathaivāturasaṃjñakaḥ |

dhūmanasyavidhiś cāntyaś catvāriṃśad iti smṛtāḥ ||

prāyaścittaṃ praśamanaṃ cikitsā śāntikarma ca |

paryāyāstasya nirdeśāccikitsāsthānamucyate ||

annasya rakṣā vijñānaṃ sthāvarasyetarasya ca |

sarpadaṣṭaviṣajñānaṃ tasyaiva ca cikitsitam ||

dundubhermūṣikāṇāṃ ca kīṭānāṃ kalpa eva ca |

aṣṭau kalpāḥ samākhyātā viṣabheṣajakalpanāt ||

adhyāyānāṃ śataṃ viṃśamevam etad udīritam |

ataḥ paraṃ svanāmnaiva tantramuttaramucyate ||

adhikṛtya kṛtaṃ yasmāttantram etad upadravān |

opadravika ity eṣa tasyāgryatvān nirucyate ||

sandhau vartmani śukle ca kṛṣṇe sarvatra dṛṣṭiṣu |

saṃvijñānārthamadhyāyā gadānāṃ tu prati prati ||

cikitsāpravibhāgīyo vātābhiṣyandavāraṇaḥ |

paittasya ślaiṣmikasyāpi raudhirasya tathaiva ca |

lekhyabhedyaniṣedhau ca chedyānāṃ vartmadṛṣṭiṣu |

kriyākalpo 'bhighātaś ca karṇotthāstaccikitsitam ||

ghrāṇotthānāṃ ca vijñānaṃ tadgadapratiṣedhanam |

pratiśyāyaniṣedhaś ca śirogadavivecanam ||

cikitsā tadgadānāṃ ca śālākyaṃ tantramucyate |

navagrahākṛtijñānaṃ skandasya ca niṣedhanam ||

apasmāraśakunyoś ca revatyāś ca punaḥ pṛthak |

pūtanāyās tathā'ndhāyā maṇḍikā śītapūtanā ||

naigameśacikitsā ca grahotpattiḥ sayonijā |

kaumāratantram ity etac chārīreṣu ca kīrtitam ||

jvarātisāraśoṣāṇāṃ gulmahṛdrogiṇām api |

pāṇḍūnāṃ raktapittasya mūrcchāyāḥ pānajāś ca ye ||

tṛṣṇāyāś chardihikkānāṃ niṣedhaḥ śvāsakāsayoḥ |

svarabhedacikitsā ca kṛmyudāvartinoḥ prthak ||

visūcikārocakayor mūtrāghātavikṛcchrayoḥ |

iti kāyacikitsāyāḥ śeṣam atra prakīrtitam ||

amānuṣaniṣedhaś ca tathā+āpasmāriko 'paraḥ |

unmādapratiṣedhaś ca bhūtavidyā nirucyate ||

rasabhedāḥ svasthavṛttiryuktayastāntrikāś ca yāḥ |

doṣabhedā iti jñeyā adhyāyāstantrabhūṣaṇāḥ ||

śreṣṭhatvād uttaraṃ hy etat tantram āhur maharṣayaḥ |

bahvarthasaṃgrahāc chreṣṭham uttaraṃ cāpi paścimam ||

śālākyatantraṃ kaumāraṃ cikitsā kāyikī ca yā |

bhūtavidyeti catvāri tantre tūttarasaṃjñite ||

vājīkaraṃ cakitsāsu rasāyanavidhis tathā |

viṣatantraṃ punaḥ kalpāḥ śalyajñānaṃ samantataḥ ||

ity aṣṭāṅgam idaṃ tantram ādidevaprakāśitam |

vidhinā'dhītya yuñjānā bhavanti prāṇadā bhuvi ||

etad dhy avaśyam adhyeyaṃ adhītya ca karmāpy avaśyam upāsitavyaṃ ubhayajño hi bhiṣak rājārho bhavati ||

bhavanti cātra |

yas tu kevalaśāstrajñaḥ karmasvapariniṣṭhitaḥ |

sa muhyaty āturaṃ prāpya prāpya bhīrur ivāhavam ||

yas tu karmasu niṣṇāto dhārṣṭyāc chāstrabahiṣkṛtaḥ |

sa satsu pūjāṃ nāpnoti vadhaṃ cārhati rājataḥ ||

ubhāv etāv anipuṇāv asamarthau svakarmaṇi |

ardhavedadharāv etāv ekapakṣāv iva dvijau ||

oṣadhyo 'mṛtakalpās tu śastrāśaniviṣopamāḥ |

bhavanty ajñair upahṛtās tasmād etān vivarjayet ||

snehādiṣv anabhijñā ye chedyādiṣu ca karmasu |

te nihanti janaṃ lobhāt kuvaidyā nṛpadoṣataḥ ||

yas tūbhayajño matimān sa samartho 'rthasādhane |

āhave karma nirvoḍhuṃ dvicakraḥ syandano yathā ||

atha vatsa tad etad adhyeyaṃ tathā tathopadhāraya mayā procyamānaṃ atha śucaye kṛtottarāsaṅgāyāvyākulayopasthitāyādhyayanakāle śiṣyāya yathāśakti gurur upadiśet padaṃ pādaṃ ślokaṃ vā te ca padapādaślokābhūyaḥ krameṇānusaṃdheyāḥ evam ekaikaśo ghaṭayed ātmanā cānupaṭhet adrutam avilambitam aviśaṇkitam ananunāsikaṃ vyaktākṣram apīḍitavarṇam akṣibhruvauṣṭhahastair anabhinītaṃ susaṃskṛtaṃ nātyuccair nātinīcaiś ca svaraiḥ paṭhet | na cāntareṇa kaścid vrajet tayor adhīyānayoḥ ||

bhavataś cātra |

śucir guruparo dakṣas tandrānidrāvivarjitaḥ |

paṭhann etena vidhinā śiṣyaḥ śāstrāntam āpnuyāt ||

vāksauṣṭhave 'rthavijñāne prāgalbhye karmanaipuṇe |

tadabhyāse ca siddhau ca yatetādhyayanāntagaḥ ||

iti suśrutasaṃhitāhaṃ sūtrasthāne 'dhyayanasaṃpradānīyo nāma tṛtīyo 'dhyāyaḥ ||

caturtho 'dhyāyaḥ |

athātaḥ prabhāṣaṇīyam adhyāyaṃ vyākhyāsyāmaḥ ||

yāthovāca bhagavān dhanvantariḥ ||

adhigatam apy adhyayanam aprabhāṣitam arthataḥ kharasya candanabhāra iva kevalaṃ pariśramakaraṃ bhavati ||

bhavati cātra |
yathā kharaś candanabhāravāhī bhārasya vettā na tu candanasya |
evaṃ hi śāstrāṇi baḥūnyadhītya cārtheṣu mūḍhāḥ kharavadvahanti ||

tasmāt saviṃśam adhyāyaśatam anupadapādaślokam anuvarṇayitavyam anuśrotavyaṃ ca kasmāt sūkṣmā hi dravyarasaguṇavīryavipākadoṣadhātumalāśayamarmasirāsnāyusandhyasthigarbhasaṃbhavadravyasamūhavibhāgās tathā pranaṣṭaśalyoddharaṇavraṇaviniścayabhagnavikalpāḥ sādhyayāpy apratyākhyeyatā ca vikārāṇām evam ādayaś cānye sahasraśo viśeṣā ye vicintyamānā vimalavipulabuddher api buddhim ākulīkuryuḥ kiṃ punar alpabuddheḥ tasmād avaśyam anupadapādaślokam anuvarṇayitavyam anuśrotavyaṃ ca ||

anyaśāstropapannānāṃ cārthānām ihopanītānām arthavaśāt teṣāṃ tadvidyebhya eva vyākhyānam anuśrotavyaṃ kasmāt na hy ekasmin śāstre śakyaḥ sarvaśāstrāṇām avarodhaḥ kartum ||

bhavanti cātra |
ekaṃ śāstram adhīyāno na vidyāc chāstraniścayam |a
tasmād bahuśrutaḥ śāstraṃ vijānīyāc cikitsakaḥ ||

śāstraṃ gurumukhodbīrṇam ādāyopāsya cāsakṛt |
yaḥ karmakurute vaiyaḥ sa vaidyo 'nye tu taskarāḥ ||

aupadhenavam aurabhraṃ sauśrutaṃ pauṣkalāvatam |
śeṣāṇāṃ śalyatantrāṇāṃ mūlāny etāni nirdiśet ||

iti suśrutasaṃhitāyāṃ sūtrasthāne prabhāṣanīyo nāma caturtho 'dhyāyaḥ ||

pañcamo 'dhyāyaḥ |

athāto 'gropaharaṇīyam adhyāyaṃ vyākhyāsyāmaḥ ||

yathovāca bhagavān dhanvantariḥ ||

trividhaṃ karma pūrvakarma pradhānakarma paścātkarmeti tadvyādhīṃ prati pratyupadekṣyāmaḥ ||

asmin śāstre śāstrakarmaprākhānyācchastrakarmaiva tāvat pūrvam upadekṣyāmastatsambhārāṃś ca ||

tac ca śastrakarmā'ṣṭavidhaṃ tad yathā chedyaṃ bhedyaṃ lekhyaṃ vedhyaṃ eṣyaṃ āhāryaṃ visrāvyaṃ sīvyam iti ||

ato 'nyataṃ karma cikīrśatā vaidyena pūrvamevopakalpayitavyāni yantraśastrakṣārāgniśalākāśṛṅgajalaukālābūjāmbavauṣṭhapicuprotasūtrapatrapaṭṭamadhughṛtavasāpayastailatarpaṇakaṣāyālepanakalkavyajanaśītoṣṇodakakaṭāhādīni parikarmiṇaś ca snigdhāḥ sthirā balavantaḥ ||

tataḥ praśasteṣu tithikaraṇamuhūrtanakṣatreṣu dadhyakṣatānnapānaratnair agniṃ viprān miṣajaś cārcayitvā kṛtabalimaṅgalasvastivācanaṃ laghubhuktavantaṃ prāṅnukhamāturam upaveśya yantrayitvā pratyṅnukho vaidyo marmasirāsnāyusandhyasthidhamanīḥ pariharan anulomaṃ śastraṃ nidadhyādāpūyadarśanāt sakṛdevāpaharecchastramāśu ca mahatsv api ca pākeṣu dvyaṅgulāntaraṃ tryaṅgulāntaraṃ vā śastrapadamuktam ||

tatrāyato viṣālaḥ samaḥ suvibhakto nirāśraya iti vraṇaguṇāḥ

bhavatś cātra |

āyataś ca viśālaś ca suvibhakto nirāśrayaḥ |

prāptakālakṛtaś cāpi vraṇaḥ karmaṇi śasyate ||

śauryamāśukriyā śastrataikṣṇyamasvedavepathu |

asaṃmohaś ca vaidyasya śastrakarmaṇi śasyate ||

ekena vā vraṇenā'ṣudhyamāne nā'ntarā buddhyā'vekṣyāparān vraṇān kuryāt ||

bhavati cātra |

yato yato gatiṃ vidyādutsaṅgo yatra yatra ca |

tatra tatra vraṇaṃ kuryād yathā doṣo na niṣṭhati ||

tatra bhrūgaṇḍaśaṅkhalalāṭākṣipuṭauṣṭhadantaveṣṭakakṣākukṣivaṅkṣaṇeṣu tiyak cheda uktaḥ || (?

candramaṇḍalavacchedān pāṇipādeṣu kārayet |

ardhacandrākṛtīṃś cāpi gude meḍhre ca buddhimān ||)

anyathā tu sirāsnāyucchedanaṃ atimātraṃ vedanā cirādvraṇasaṃroho māṃsakandīprādurbhāvaś ceti ||

mūḍhagarbhodarārśo 'śmarībhagandaramukharogeṣv abhuktavataḥ karma kurvīta ||

tataḥ śastram avacārya śītābhir adbhir āturam āśvāsya samantāt paripīḍyāṅgulyā vraṇam abhimṛdya(ā.jya) prakṣālya kaṣāyeṇa protenodakam ādāya tilakalkamadhusarpiḥpragāḍhāmauṣadhayuktāṃ nātisnigdhāṃ nātirūkṣāṃ vartiṃ praṇidadhyāt tataḥ kalkenācchādya ghanāṃ kavalikāṃ dattvā vastrapaṭṭena badhnīyāt vedanārakṣoghnair dhūpair dhūpayet rakṣoghnaiś ca mantnrai rakṣāṃ kurvīta ||

tato guggulvagurusarjarasavacāgaurasarṣapacūrṇair lavaṇanimbapatravimiśrair ājyayuktair dhūpayet ājyaśeṣeṇa cāsya prāṇān samālabheta ||

udakumbhāc cāpo gṛhītvā prokṣayan rakṣākarma kuryāt || tad vakṣyāmaḥ

kṛtyānāṃ pratighātārthaṃ tathā rakṣobhayasya ca |

rakṣākarma kariṣyāmi brahmā tad anumanyatām ||

nāgāḥ piśācā gandharvāḥ pitaro yakṣarākṣasāḥ |

abhidravanti ye ye tvāṃ brahmādyā ghnantu tān sadā ||

pṛthivyām antarīkṣe ca ye caranti niśācarāḥ |

dikṣu vāstunivāsāś ca pāntu tvāṃ te namaskṛtāḥ ||

pāntu tvāṃ munayo brāhayā divyā rājarṣayas tathā |

parvatāś caiva nadyaś ca sarvāḥ sarve ca sāgarāḥ ||

sgnī rakṣatu te jihvāṃ prāṇān vāyus tathaiva ca |

somo vyānam apāna te parjanyaḥ parirakṣatu ||

udānaṃ vidyutaḥ pāntu samānaṃ stanayitnavaḥ |

balam indro balapatir manurmanye matiṃ tathā ||

kāmāṃs te pāntu gandharvāḥ sattvamindro 'bhir akṣatu |

prajñāṃ te varuṇo rājā samudro nābhimaṇḍalam ||

cakṣuḥ sūryo diśaḥ śrotre candramāḥ pātu te manaḥ |

nakṣatrāṇi sadā rūpaṃ chāyāṃ pāntu niśāstava ||

retastvāpyāyayantvāpo romāṇyoṣadhayas tathā |

ākāśaṃ khāni te pātu dehāṃ tava vasundharā ||

vaiṣvānaraḥ śiraḥ pātu viṣṇustava parākramam |

pauruśaṃ puruṣaśreṣṭho brahmā+ātmānaṃ dhruvo bhruvau ||

etā dehe viśeṣeṇa tava nityā hi devatāḥ |

etāstvāṃ satataṃ pāntu dīrghamāyuravāpnuhi ||

svasti te bhagavān brahmā svasti devāś ca kurvatām | [

svasti te candrasūryau ca svasti nāradaparvatau |]

svastyagniś caiva vāyuś ca svasti devāḥ sahendragāḥ ||

pitāmahakṛtā rakṣā svastyāyurvardhatāṃ tava |

ītayaste praśāmyantu sadā bhava gatavyathaḥ ||

iti svāhā ||

etair vedātmakair mantraiḥ iṛtyāvyādhivināśanaiḥ |

mayaivaṃ kṛtarakṣastvaṃ dīrghamāyuravāpnuhi ||

tataḥ kṛtarakṣamāturamāgāraṃ praveśya ācārikam ādiśet ||

tatastṛtīye 'hani vimucyaivam eva badhnīyād vastrapaṭṭena na cainaṃ tvaramāṇo 'paredyur mokṣayet ||

dvitīyadivasaparimokṣaṇād vigrathito vraṇaś cirād upasaṃrohati tīvrarujaś ca bhavati ||

ata ūrdhvaṃ doṣakālabalādīn avekṣya kaṣāyālepanabandhāhārācārān vedadhyāt ||

na cainaṃ tvaramāṇaḥ sāntardoṣaṃ ropayet sa hy alpenāpyapacāreṇābhyantaram utsaṅgaṃ kṛtvā bhūyo 'pi vikaroti |

bhavanti cātra ||

tasmād antarbahiś caiva suśuddhaṃ ropayed vraṇam |

rūḍhe 'pyajīrṇavyāyāmavyavāyādīn vivarjayet |

harṣaṃ krodhaṃ bhayaṃ cāpi yāvat sthairyopasaṃbhavāt ||

hemante śiśire caiva vasante cāpi mokṣayet |

tryahāddvyahāccharadgrīṣmavarṣāsv api ca buddhimān ||

atipātiṣu rogeṣu necchedvidhimimaṃ bhiṣak |

pradīptāgāravacchīghraṃ tatra kuryāt pratikriyām ||

yāvedanā śastranipātajātā tīvrā śarīraṃ pradunoti jantoḥ |

ghṛtena sā śāntim upaiti siktā koṣṇena yaṣṭīmadhukānvitena ||

iti suśrutasaṃhitāyāṃ sūtrsthāne 'gropaharaṇīyo nāma pañcamo 'dhyāyaḥ ||

śaṣṭho 'dhyāyaḥ |

athāta ṛtucaryam adhyāyaṃ vyākhyāsyāmaḥ ||

yathovāca bhagavān dhanvantariḥ ||

kālo hi nāma bhagavān svayambhur anādimadhyanidhano 'tra rasavyāpatsampattī jīvitamaraṇe ca manuṣyāṇām āyatte | sa sūkṣmām api kalāṃ na līyata iti kālaḥ saṃkalayati kālayati vā bhūtānīti kālaḥ ||

tasya saṃvatsarātmano bhagavān ādityo gativiśeṣeṇa nimeṣakāṣṭhākalāmuhūrtāhorātrapakṣamāsartvayanasaṃvatsarayugapravibhāgaṃ karoti ||

tatra laghvakṣaroccāraṇamātro 'kṣinimeṣaḥ pañcadaśā'kṣinimeṣāḥ kāṣṭhā triṃśatkāṣṭhāḥ kalā viṃśatikalo muhūrtaḥ kalādaśabhāgaś ca triṃśanmuhūrtam ahorātraṃ pañcadaśāhorātrāṇi pakṣaḥ sa ca dvividhaḥ śuklaḥ kṛṣṇaś ca tau māsaḥ ||

tatra māghādayo dvādaśa māsāḥ saṃvatsaraḥ dvimāsikam ṛtuṃ kṛtva ṣaḍṛtavo bhavanti te śiśiravasantagrīṣmavarṣāśaraddhemantāḥ teṣaṃ tapastapsyau śiśiraḥ madhumādhavau vasantaḥ śuciśukrau grīṣmaḥ nabhonabhasyau varśāḥ iṣorjau śarat sahaḥsahasyau hemanta iti ||

ta ete śītoṣṇavarṣalakṣaṇāś candrād ity ayoḥ kālavibhāgakaratvād ayane dve bhavato dakṣiṇam uttaraṃ ca | tayor dakṣiṇaṃ varṣāśaraddhemantāḥ teṣu bhagavān āpyāyate somaḥ amlalavaṇamadhurāś ca rasā balavanto bhavanti uttarottaraṃ ca sarvaprāṇināṃ balam abhivardhate | uttaraṃ ca śiśiravasantagrīṣmāḥ teṣu bhagavān āpyāyate 'rkaḥ tiktakaṣāyakaṭukāś ca rasā balavanto bhavanti uttarottaraṃ ca sarvaprāṇināṃ balam apahīyate ||

bhavati cātra |

śītāṃśuḥ kledayaty urvīṃ vivasvān śoṣayaty api |

tāv ubhāv api saṃśritya vāyuḥ pālayati prajāḥ ||

atha khalv ayane dve yugapat saṃvatsaro bhavati te tu pañca yugam iti saṃjñāṃ labhante sa eṣa nimeṣādir yugaparyantaḥ kālaś cakravat parivartamānaḥ kālacakram ucyata ity eke ||

iha tu varṣāśaraddhemantavasantagrīṣmaprāvṛṣaḥ ṣaḍṛtavo bhavanti doṣopacayaprakopopaśamanimittaṃ te tu bhādrapadādyena dvimāsikena vyākhyātāḥ tad yathā bhādrapadāśvayujau varṣāḥ kārtikamārgaśīrṣau śarat pauṣamāghau hemantaḥ phālgunacaitrau vasantaḥ vaiśākhajyeṣṭhau grīṣmaḥ āṣāḍhaśrāvaṇau prāvṛḍ iti ||

tatra varṣāsv oṣadhayas taruṇyo 'lpavīryā āpaś cāprasannāḥ kṣitimalaprāyāḥ tā upayujyamānā nabhasi meghāvatate jalapraklinnāyāṃ bhūmau klinnadehānāṃ prāṇināṃ śītavātaviṣṭambhitāgnīnāṃ vidahyante vidāhāt pittasaṃcayam āpādayanti sa saṃcayaḥ śaradi praviralameghe viyaty upaśuṣyati paṅke 'rkakiraṇapravilāyitaḥ paittikān vyādhīn janayati | tā evauṣadhayaḥ kālapariṇāmāt pariṇatavīryā balavatyo hemante bhavanty āpaś ca prasannāḥ snigdhā atyarthaṃ gurvyaś ca tā upayujyamānā mandakiraṇatvād bhānoḥ satuṣārapavanopastambhitadehānāṃ dehinām avidagdhāḥ snehāc chaityād gauravād upalepāc ca śleṣmasaṃcayam āpādayanti sa saṃcayo vasante 'rkraśmipravilāyita īṣatstabdhadehānāṃ dehināṃ ślaiṣmikān vyādhīn janayati | tā evauṣadhayo nidāghe niḥsārā rūkṣā atimātraṃ laghvyo bhavanty āpaś ca tā upayujyamānāḥ sūryapratāpopaśoṣitadehānāṃ dehināṃ raukṣyāl laghutvād vaiśadyāc ca vāyoḥ saṃcayam āpādyanti sa saṃcayaḥ prāvṛṣi cātyarthaṃ jalopaklinnāyāṃ bhūmau klinnadehānāṃ prāṇināṃ śītavātavarṣerito vātikān vyādhīn janayati | evam eṣa doṣāṇāṃ saṃcayaprakopahetur uktaḥ ||

tatra varśāhemantagrīṣmeṣu saṃcitānāṃ doṣāṇāṃ śaradvasantaprāvṛṭsu ca prakupitānāṃ nirharaṇaṃ kartavyam ||

tatra paittikānāṃ vyādhīnām upaśamo hemante ślaiṣmikāṇāṃ nidāghe vātikānāṃ śaradi svabhāvata eva ta ete saṃcayaprakopopaśamā vyākhyātāḥ ||

tatra pūrvāhṇe vasantasya liṅgaṃ madhyāhne grīṣmasya aparāhṇe prāvṛṣaḥ pradoṣe vārṣikāṃ śāradam ardharātre pratyuṣasi haimantam upalakṣayet evam ahorātram api varṣam iva śītoṣṇavarṣalakṣaṇaṃ doṣopacayaprakopopaśamair jānīyāt ||

tatra avyāpanneṣv ṛtuṣv avyāpannā oṣadhayo bhavanty āpaś ca tā upayujyamānāḥ prāṇāyurbalavīryaujaskaryo bhavanti ||

teṣāṃ punar vyāpado 'dṛṣṭakāritāḥ ṣītoṣṇavātavarṣāṇi khalu viparītāny oṣadhīr vyāpādayanty apaś ca ||

tāsām upayogād vividharogaprādurbhāvo marako vā bhaved iti ||

tatra avyāpannānām oṣadhīnām apāṃ copayogaḥ ||

kadācid avyāpanneṣv apy ṛtuṣu kṛtyābhiśāparakṣaḥkrodhādharmair upadhvasyante janapadāḥ viṣauṣadhipuṣpagandhena vāyunopanītenākramyate yo deśas tatra doṣaprakṛtyaviśeṣeṇa kāsaśvāsavamathupratiśyāyaśirorugjvarair upatapyante grahanakṣatracaritair vā gṛhadāraśayanāsanayānavāhanamaṇiratnopakaraṇagarhitalakṣaṇanimittaprādurbhāvair vā ||

tatra sthāna parityāga śāntikarma prāyaścitta maṅgala japa homopahārejyāñjali namaskāra tapo niyama dayā dāna dīkṣābhyupagama devatā brāhmaṇa guru parair bhavitavyaṃ evaṃ sādhu bhavati ||

ata ūrdhvam avyāpannānām ṛtūnāṃ lakṣaṇāny upadekṣyāmaḥ ||

vāyur vāty uttaraḥ śīto rajodhūmākulā diśaḥ |

channas tuṣāraiḥ saviyā himānaddhā jalāśayāḥ ||

darpitā dhvāṅkṣakhaṅgāhvamahiṣorabhrakuñjarāḥ |

rodhrapriyaṅgupunnāgāḥ puṣpitā himasāhvaye ||

śiśire śītam adhikaṃ vātavṛṣṭyākulā diśaḥ |

śeṣaṃ hemantavat sarvaṃ vijñeyaṃ lakṣaṇaṃ budhaiḥ ||

siddhavidyādharavadhūcaraṇālaktakāṅkite |

malaye candanalatāpariṣvaṅgādhivāsite ||

vāti kāmijanānandajanano 'naṅgadīpanaḥ |

dampatyor mānabhiduro vasante dakṣiṇo 'nilaḥ ||

diśo vasante vimalāḥ kānanair upaśobhitāḥ |

kiṃśukāmbhojabakulacūtāśokādipuṣpitaiḥ ||

kokilāṣaṭpadagaṇair upagītā manoharāḥ |

dakṣiṇānilasaṃvītāḥ sumukhāḥ pallavojjvalāḥ ||

grīṣme tīkṣṇāṃśur ādityo māruto nairṛto 'sukhaḥ |

bhūs taptā saritas tanvyo diśaḥ prajvalitā iva ||

bhrāntacakrāhvayugalāḥ payaḥpānākulā mṛgāḥ |

dhvastavīruttṛṇalatā viparṇāṅkitapādapāḥ ||

prāvṛṣy ambaram ānaddhaṃ paścimānilakarṣitaiḥ |

ambudair vidyududdyotaprasrutais tumulasvanaiḥ ||

komalaśyāmaśaṣpāḍhyā śakragopojjvalā mahī |

kadambanīpakuṭajasarjaketakibhūṣitā ||

tatra varṣasu nadyo 'mbhaśchanno{O.-t}khātataṭadrumāḥ |

vāpyaḥ protphullakumudanīlotpalavirājitāḥ ||

bhūr avyaktasthalaśvabhrā bahuśasyopaśobhitā |

nātigarjatsravanmeghaniruddhārkagrahaṃ nabhaḥ ||

babhrur uṣṇaḥ śarady arkaḥ śvetābhravimalaṃ nabhaḥ |

tathā sarāṃsy amburuhair bhānti haṃsāṃsaghaṭṭitaiḥ ||

paṅkaśuṣkadrumākīrṇā nimnonnatasameṣu bhūḥ |

bāṇasaptāhvabandhūkakāśāsanavirājitā ||

svaguṇair atiyukteṣu viparīteṣu vā punaḥ |
viṣameṣv api vā doṣāḥ kupyanty ṛtuṣu dehinām ||

hared vasante śleṣmāṇaṃ pittaṃ śaradi nirharet |

varṣāsu śamayed vāyuṃ prāgvikārasamucchrayāt ||

iti suśrutasaṃhitāyāṃ sūtrasthāne ṛtucaryā nāma ṣasṭho 'dhyāyaḥ ||

saptamo 'dhyāyaḥ |

athāto yantravidhim adhyāyaṃ vyākhyāsyāmaḥ ||

yathovāca bhagavān dhanvantariḥ ||

yantraśatam ekottaraṃ atra hastam eva pradhānatamaṃ yantrāṇām avagaccha (?.kiṃ kāraṇaṃ yasmād dhastād ṛte yantrāṇām apravṛttir eva ) tadadhīnatvād yantrakarmaṇām ||

tatra manaḥśarīrābādhakarāṇi śalyāni teṣām āharaṇopāyo yantrāṇi ||

tāni ṣaṭprakārāṇi tad yathā svastikayantrāṇi saṃdaṃśayantrāṇi tālayantrāṇi nāḍīyantrāṇi śalākāyantrāṇi upayantrāṇi ceti ||

tatra caturviṃśatiḥ svastikayantrāṇi dve saṃdaṃśayantre dve eva tālayantre viṃśatirnāḍyaḥ aṣṭāviṃśatiḥ śalākāḥ panñcaviṃśatirupayantrāṇi ||

tāni prāyaśo lauhāni bhavanti tatpratirūpakāṇi vā tadalābhe ||

tatra nānāprakārāṇāṃ vyālānāṃ mṛgapakṣiṇāṃ mukhair mukhāni yantrāṇāṃ prāyaśaḥ sadṛśāni tasmāt tatsārūpyādāgamādupadeśādanyayantradarśanādyuktitaś ca kārayet ||

samāhitāni yantrāṇi kharaślakṣṇamukhāni ca |

sudṛḍhāni surūpāṇi sugrahāṇi ca kārayet ||

tatra svastikayantrāṇi aṣṭādaśāṅgulapramāṇāni siṃhavyāghravṛkatarakṣvṛkṣadvīpimārjāraśṛgālamṛgair ivārukakākakaṅkakuraracāsabhāsaśaśaghātyulūkacilliśyenagṛdhrakrauñcabhṛṅgarājāñjalikarṇāvabhañjananandi(ā.ndī)mukhamukhāni masūrākṛtibhiḥ kīlair avabaddhāni mūle 'ṅkuśavadāvṛttavāraṅgāṇi asthividaṣṭaśalyoddharaṇārtham upadiśyante ||

sanigraho 'nigrahaś ca saṃdaṃśau ṣoḍaśāṅgulau bhvataḥ tau svaṅnāṃsasirāsnāyugataśalyoddharaṇārtham upadiśyete ||

tālayantre dvādaśāṅgule matsyatālavadekatāladvitālake karṇanāsānāḍīśalyānāmāharaṇārtham ||

nāḍīyantrāṇi apyanekaprakārāṇi anekaprayojanāni ekatomukhānyubhayatomukhāni ca tāni srotogataśalyoddharaṇārthaṃ rogadarśanārthaṃ ācūṣaṇārthaṃ kriyāsaukaryārthaṃ ceti tāni srotodvārapariṇāhāni yathāyogadīrghāṇi ca | tatra bhagandarārśovraṇabastyuttarabastimūtravṛddhidakodaradhūmaniruddhaprakaśasanniruddhagudayantrāṇy alābūśṛṅgayantrāṇi coprariṣṭād vakṣyāmaḥ ||

śalākāyantrāṇy api nānāprakārāṇi nānāprayojanāni yathāyogapariṇāhadīrghāṇi ca teṣāṃ gaṇḍūpadasarpaphaṇaśarapuṅkhabaḍiśamukhe dve dve eṣaṇavyūhanacālanāharaṇārtham upadiśyete masūradalamātramukhe dve kiṃcidānatāgre srotogataśalyoddharaṇārthaṃ ṣaṭ kārpāsakṛtoṣṇīṣāṇi pramārjanakriyāsu trīṇi darvyākṛtīni khallamukhāni kṣārauṣadhapraṇidhānārthaṃ trīṇyanyāni jāmbavavadanāni trīṇyaṅkuśavadanāni ṣaḍevāgnikarmasvabhipretāni nāsārbudaharaṇārthamekaṃ kolāsthidalamātramukhaṃ khallatīkṣṇoṣṭhaṃ añjanārthamekaṃ kalāyaparimaṇḍalamubhuyato mukulāgraṃ mūtramārgaviśodhanārthamekaṃ mālatīpuṣpavṛntāgrapramāṇaparimaṇḍalam iti ||

upayantrāṇyapi-rajjuveṇikāpaṭṭacarmāntavalkalalatāvastrāṣṭhīlāśmamudgarapāṇipādatalāṅgulijihvādantanakhamukhabālāśvakaṭakaśākhāṣṭhīvanapravāhaṇaharṣāyaskāntamayāni kṣārāgnibheṣajāni ceti ||

etāni dehe sarvasmin dehasyāvayave tathā |

saṃdhau koṣṭhe dhamanyāṃ ca yathāyogaṃ prayojayet ||

yantrakarmāṇi tu nirghātanapūraṇabandhanavyūhanavartanacālanavivartanavivaraṇapīḍanamārgaviśodhanavikarṣaṇāharaṇāñchanonnamanavinamanabhañjanonmathanācūṣaṇaiṣaṇadāraṇarjūkaraṇaprakṣālanapradhamanapramārjanāni caturviṃśatiḥ ||

svabuddhyā cāpi vibhajedyantrakarmāṇi buddhimān |

asaṃkhyeyavikalpatvāc chalyānām iti niścayaḥ ||

tatra atisthūlaṃ asāraṃ atidīrghaṃ atihrasvaṃ agrāhi viṣamagrāhi vakraṃ śithilaṃ atyunnataṃ mṛdukīlaṃ mṛdumukhaṃ mṛdupāśam iti dvādaśa yantradoṣāḥ ||

etair doṣair vinirmuktaṃ yantramaṣṭādaśāṅgulam |

praśastaṃ bhiṣajā jñeyaṃ taddhi karmasu yojayet ||

dṛśyaṃ siṃhamukhādyais tu gūḍhaṃ kaṅkamukhādibhiḥ |

nirharet tu śanaiḥ śalyaṃ śa(ā.śā)strayuktivyapekṣayā ||

ni(ā.vi)vartate sādhvavagāhate ca śalyaṃ nigṛhyoddharate ca yasmāt ||

yantreṣv ataḥ kaṅkamukhaṃ pradhānaṃ sthāneṣu sarveṣv adhi(ā.vi)kāri caiva ||

iti suśrutasaṃhitāyāṃ sūtrasthāne yantravidhirnāma saptamo 'dhyāyaḥ ||

aṣṭamo 'dhyāyaḥ |

athātaḥ śastrāvacāraṇīyam adhyāyaṃ vyākhyāsyāmaḥ ||

yathovāca bhagavān dhanvantariḥ ||

viṃśatiḥ śastrāṇi; tad yathā— maṇḍalāgrakarapatra vṛddhipatra nakhaśastra mudrikotpalapatrakārdhadhāra sūcī kuśapatrāṭīmukha śarārimukhāntarmukha trikūrcaka kuṭhārikā vrīhimukhārā vetasapatraka baḍiśa dantaśaṅkveṣaṇya iti ||

tatra maṇḍalāgrakarapatre syātāṃ chedane lekhane ca, vṛddhipatra nakhaśastra mudrikotpalapatrakārdhadhārāṇi chedane bhedane ca, sūcīkuśapatrāṭī(ṭā)mukhaśarārimukhāntarmukhatrikūrcakāni visrāvaṇe, kuṭhārikā vrīhimukhārā vetasapatrakāṇi vyadhane sūcī ca, baḍiśaṃ dantaśaṅkuś cāharaṇe, eṣaṇy eṣaṇe ānulomye ca sūcyaḥ sīvane; ity aṣṭavidhe karmaṇy upayogaḥ śastrāṇāṃ vyākkhyātaḥ ||

teṣām atha yathāyogaṃ grahaṇasamāsopāyaḥ karmasu vakṣyate— tatra vṛddhipatraṃ vṛntaphalasādhāraṇe bhāge gṛhṇīyāt, bhedanāny evaṃ sarvāṇi, vṛddhipatraṃ maṇḍalāgraṃ ca kiṃcid uttānena pāṇinā lekhane bahuśo 'vacāryaṃ, vṛntāgre visrāvaṇāni, viśeṣeṇa tu bālavṛddhasukumārabhīrunārīṇāṃ rājñāṃ rājamā(pu)trāṇāṃ ca trikūrcakena visrāvayet, talapracchādita vṛntam aṅguṣṭhapradeśinībhyāṃ vrīhimukhaṃ, kuṭhārikāṃ vāmahastanyastām itarahastamadhyamāṅgulyā'ṅguṣṭhaviṣṭabdhay 'bhihanyāt, ārākarapatraiṣaṇyo mūle, śeṣāṇi tu yathāyogaṃ gṛhṇīyāt ||

teṣāṃ nāmabhir evākṛtayaḥ prāyeṇa vyākhyātāḥ ||

tatra nakhaśastraiṣaṇyāv aṣṭāṅgule, sūcyo vakṣyante, (pradeśinyagraparvapradeśapramāṇā mudrikā, daśāṅgulā śarārimukhī sā ca (yā sā) kartarīti kathyate |), śeṣāṇi tu ṣaḍaṅgulāni || tāni sugrahāṇi sulohāni sudhārāṇi surūpāṇi susamāhitamukhāgrāṇi akarālāni ceti śastrasaṃpat ||

tatra vakraṃ, kuṇṭhaṃ, khaṇḍaṃ, kharadhāram, atisthūlam, atyalpam, atidīrgham, atihrasvam, ity aṣṭau śastradoṣāḥ | ato viparītaguṇam ādadīta, anyatra karapatrāt; tad dhi kharadhāram asthicchedanārtham ||

tatra dhārā bhedanānāṃ māsūrī, lekhanānām ardhamāsūrī, vyadhanānāṃ visrāvaṇānāṃ ca kaiśikī, chedanānām ardhakaiśikīti ||

baḍiśaṃ dantaśaṅkuś cānatāgre | tīkṣṇakaṇṭakaprathamayavapatramukhyeṣaṇī (gaṇḍūpadākāramukhī ca) ||

teṣāṃ pāyanā trividhā kśārodakataileṣu | tatra kṣārapāyitaṃ śaraśalyāsthicchedaneṣu udakapāyitaṃ māṃsacchedanabhedanapāṭaneṣu tailapāyitaṃ sirāvyadhanasnāyucchedaneṣu ||

teṣāṃ niśānārthaṃ ślakṣṇaśilā māṣavarṇā dhārāsaṃsthāpanārthaṃ śālmalīphalakam iti ||

bhavati cātra—

yadā suniśitaṃ śastraṃ romacchedi susaṃsthitam |
sugṛhītaṃ pramāṇena tadā karmasu yojayet ||

anuśastrāṇi tu tvaksāra sphaṭika kāca kuruvinda jalaukogni kṣāranakhagojīśephālikāśākapatrakarīrabālāṅgulaya iti ||
śiśūnāṃ śastrabhīrūṇāṃ śastrābhāve ca yojayet |
tvaksārādicaturvargaṃ chedye ca buddhimān ||

āhārya cchedya bhedyeṣu nakhaṃ śakyeṣu yojayet |
vidhiḥ pravakṣyate paścāt kṣāravahnijalaukasām ||

ye syur mukhagatā rogā netravartmagatāś ca ye |
gojī śephālikā śākapatrair visrāvayet tu tān ||

eṣyeṣv eṣaṇyalābhe tu bālāṅgulyaṅkurā hitāḥ ||
śastrāṇy etāni matimān śuddhaśaikyāyasāni tu ||
kārayet karaṇaprāptaṃ karmāraṃ karmakovidam ||

prayogajñasya vaidyasya siddhir bhavati nity aśaḥ |
tasmāt paricayaṃ kuryāc chastrāṇāṃ grahaṇe sadā ||

iti suśrutasaṃhitāyāṃ sūtrasthāne śastrāvacāraṇīyo nāmāṣṭamo 'dhyāyaḥ ||

navamo 'dhyāyaḥ |

athāto yogyāsūtrīyam adhyāyaṃ vyākhyāsyāmaḥ ||

yathovāca bhagavān dhanvantariḥ ||

adhigatasarvaśāstrārtham api śiṣyaṃ yogyāṃ kārayet | snehādiṣu chedyādīṣu ca karmapatham upadiśet | subahuśruto 'pyakṛtayogyaḥ karmasvayogyo bhavati ||

tatra puṣpaphalālābūkālindakatrapusai(ā.so)rvārukarkārukaprabhṛtiṣu chedyaviśeṣān darśayet utkartanaparikartanāni copadiśet dṛtibastiprasevakaprabhṛtiṣūdakapaṅkapūrṇeṣu bhedyayogyāṃ saromṇi carmaṇyātate lekhyasya mṛtapaśusirāsūtpalanāleṣu ca vedhyasya ghuṇopahatakāṣṭhaveṇunalanālīśuṣkālābūmukheṣveṣyasya panasabimbībilvaphalamajjamṛtapaśudanteṣvāhāryasya madhūcchiṣṭopalipte śālmalīphalake visrāvyasya sūkṣmaghanavastrāntayor mṛducarmāntayoś ca sīvyasya pustamayapuruśāṅgapratyaṅgaviśeṣeṣu bandhanayogyāṃ mṛducarmamāṃsapeśīṣūtpalanāleṣu ca karṇasandhibandhayogyāṃ mṛduṣu māṃsakhaṇḍeṣv agnikṣārayogyāṃ udakapūṇaghaṭapārśvasrotasyalābūmukhādiṣu ca netrapraṇidhānabastivraṇabastipīḍanayogyām iti ||

bhavataś cātra |

evam ādiṣu medhāvī yogyārheṣu yathāvidhi |

dravyeṣu yogyāṃ kurvāṇo na pramuhyati karmasu ||

tasmāt kauśalamanvicchan śastrakṣārāgnikarmasu |

yasya yatreha sādharmyaṃ tatra yogyāṃ samācaret ||

iti suśrutasaṃhitāyāṃ sūtrasthāne yogyāsūtrīyo nāma navamo 'dhyāyaḥ ||

daśamo 'dhyāyaḥ |

athāto viśikhānupraveśanīyam adhyāyaṃ vyākhyāsyāmaḥ ||

yathovāca bhagavān dhanvantariḥ ||

adhigatatantreṇopāsitatantrārthena dṛṣṭakarmaṇā kṛtayogyena śāstraṃ nigadatā rājānujñātena nīcanakharomṇā ṣucinā śuklavastraparihitena chatravatā daṇḍahastena sopānatkenānuddhataveśena sumanasā kalyāṇābhivyāhāreṇākuhakena bandhubhūtena bhūtānāṃ susahāyavatā vaidyena niśikhā'nupraveṣṭavyā ||

tato dūtanimittaśakunamaṅgalānulomyenāturagṛhamabhigamya upaviśya āturamabhipaśyet spṛśet pṛcchec ca tribhir etair vijñānopāyai rogāḥ prāyaśo veditavyā ity eke tat tu na samyak ṣaḍvidho hi rogāṇāṃ vijñānopāyaḥ tad yathā pañcabhiḥ śrotrādibhiḥ praśnena ceti ||

tatra śrotrendriyavijñeyā viśeṣā rogeṣu vraṇāsrāvanijñānīyādiṣu vakṣyante tatra saphenaṃ raktam īrayann anilaḥ saśabdo nirgacchati ity evam ādayaḥ sparśanendriyavijñeyāḥ śītoṣṇaślakṣṇakarkaśamṛdukaṭhinatvād ayaḥ sparśaviśeṣā jvaraśophādeṣu cakṣurindriyavijñeyāḥ śarīropacayāpacayāyurlakṣaṇabalavarṇavikārādayaḥ rasanendriyavijñeyāḥ pramehādiṣu rasaviśeṣāḥ ghrāṇendriyavijñeyā ariṣṭaliṅgādiṣu vraṇānāmavraṇānāṃ ca gandhaviśeṣāḥ praśnena ca vijānīyāddeśaṃ kālaṃ jātiṃ sātmyamātaṅkasamutpattiṃ vedanāsamucchrāyaṃ balamantaragniṃ vātamūtrapurīṣāṇāṃ pravṛttyapravṛttī kālaprakarṣādīṃś ca viśeṣān | ātmasadṛśeṣu vijñānābhyupāyeṣu tatsthānīyair jānīyāt ||

bhavati cātra |

mithyādṛṣṭā vikārā hi durākhyātās tathaiva ca |

tathā duṣparimṛṣṭāś ca mohayeyuś cikitsakam ||

yāpayet asādhyān nopakramet parisaṃvatsarotthitāṃś ca vikārān prāyaśo varjayet ||

tatra sādhyā api vyādhayaḥ prāyeṇaiṣāṃ duścikitsyatamā bhavanti | tad yathā śrotriyanṛpatistrībālavṛddhabhīrurājasevakakitavadrubalavaidyavidagdhavyādhigopakadaridrakṛpaṇakrodhanānāmanātmavatāmanāthānāṃ ca evaṃ nirūpya cikitsāṃ kurvan dharmārthakāmayaśāṃsi prāpnoti ||

bhavati cātra |

strībhiḥ sahāsyāṃ saṃvāsaṃ parihāsaṃ ca varjayet |

dattaṃ ca tābhyo nādeyam annād anyad bhiṣagvaraiḥ ||

iti suśrutasaṃhitāyāṃ sūtrasthāne viśikhānupraveśanīyo nāma daśamo 'dhyāyaḥ ||

ekādaśo 'dhyāyaḥ |

athātaḥ kṣārapākavidhim adhyāyaṃ vyākhyāsyāmaḥ ||

yathovāca bhagavān dhanvantariḥ ||

śastrānuśastrebhyaḥ kṣāraḥ pradhānatamaḥ chedyabhedyalekhyakaraṇāt tridoṣaghnatvād viśeṣakriyāvacāraṇāc ca ||

tatra kṣaraṇāt kṣaṇanād vā kṣāraḥ ||

nānauṣadhisamavāyāt tridoṣaghnaḥ śuklatvāt saumyaḥ tasya saumyasyāpi sato dahanapacanadāraṇādiśaktiraviruddhā sa khalv āgneyauṣadhiguṇabhūyiṣṭhatvāt kaṭuka uṣṇastīkṣṇaḥ pa(ā.pā)cano vilayanaḥ śodhano ropaṇaḥ śoṣaṇaḥ stambhano lekhanaḥ kṛmyāmakaphakuṣṭhaviṣamedasām upahantā puṃstvasya cātisevitaḥ ||

sa dvividhaḥ pratisāraṇīyaḥ pānīyaś ca ||

tatra pratisāraṇīyaḥ kuṣṭhakiṭibhadadrumaṇḍalakilāsabhagandarārbudārśoduṣṭavraṇanāḍīcarmakīlatilakālakanyacchavyaṅgamaśakabāhyavidradhikṛmiviṣādiṣūpadiśyate saptasu ca mukharogeṣūpajihvādhijihvopakuśadantavaidarbheṣu tisṛṣu ca rohiṇīṣu eteṣv evānuśastrapraṇidhānam uktam ||

pānīyas tu garagulmodarāgnisaṅgājīrṇārocakānāhaśarkarāśmaryābhyantaravidradhikṛmiviṣārśaḥsūpayujyate ||

ahitastu raktapitta(ā.tti)jvaritapittaprakṛtibālavṛddhadurbalabhramamadamūrcchātimiraparītebhyo 'nyebhyaś caivaṃvidhebhyaḥ ||

taṃ cetarakṣāravad dagdhvā parisrāvayet tasya vistaro 'nyatra ||

athetaras trividho mṛdurmadhyastīkṣṇaś ca | taṃ cikīrṣuḥ śaradi girisānujaṃ śucir upoṣya praśaste 'hani praśastadeśajātam anupahataṃ madhyamavayasaṃ mahāntamasitamuṣkakamadhivāsyāparedyuḥ pāṭayitvā svaṇḍaśaḥ prakalpyāvapāṭya nirvāte deśe nicitiṃ kṛtvā sudhāśarkarāś ca prakṣipya nilanālair ādīpayet | athopaśānte 'gnau tadbhasma pṛthaggṛhṇīyādbhasmaśarkarāś ca | athānenaiva vidhānena kuṭajapalāśāśvakarṇapāribhadrakabibhītakāragvadhatilvakārkasnuhyapāmārgapāṭalānaktamālavṛṣakadalīcitrakapūtīkendravṛkṣāsphotāśvamārakasaptacchadāgnimanthaguñjāś catasraś ca kośātakīḥ samūlaphalapatraśākhā dahet | tataḥ kṣāradroṇam udakadroṇaiḥ ṣaḍbhir āloḍya mūtrair vā yathoktair ekaviṃśatikṛtvaḥ parisrāvya mahati kaṭāhe śanair darvyāvaghaṭṭayan vipacet | sa yadā bhavaty accho raktas tīkṣṇaḥ picchilaś ca tamādāya mahati vastre parisrāvyetaraṃ vibhajya punar agnāv adhiśrayet | tata eva cakṣārodakāt kuḍavamadhyardhaṃ vā'panayet | tataḥ kaṭaśarkarābhasmaśarkarākṣīrapākaśaṅkhanābhīragnivarṇāḥ kṛtvā+āyase pātre tasminn eva kṣārodake niṣicya piṣṭvā tenaiva dvidroṇe 'ṣṭapalasaṃmitaṃ śaṅkhānābhyādīnāṃ pramāṇaṃ prativāpya satatam aprmattaś cainam avaghaṭṭayan vipacet | sa yathā nātisāndro nātidravaś ca bhavati tathā prayateta | athainam āgatapākam avatāryānuguptam āyase kumbhe saṃvṛtamukhe nidadhyād eṣa madhyamaḥ ||

eṣa evāpratīvāpaḥ pakvaḥ saṃvyūhimo sṛduḥ ||

pratīvāpe yathālābhaṃ dantīdravantīcitrakalāṅgalakīpūtikapravālatālapatrīviḍasuvarcikākanakakṣīrīhiṅguvacātiviṣāḥ samāḥ ślakṣṇacūrṇāḥ śuktipramāṇāḥ pratīvāpaḥ | sa eva sapratīvāpaḥ pakvaḥ pākyastīkṣṇaḥ ||

teṣāṃ yathāvyādhibalam upayogaḥ ||

kṣīṇabale tu kṣārodakamāvapedbalakaraṇārtham ||

bhavataś cātra |

naivātitīkṣṇo na mṛduḥ śuklaḥ ślakṣṇo 'tha picchilaḥ |

aviṣyandī śivaḥ śīghraḥ kṣāro hy aṣṭaguṇaḥ smṛtaḥ ||

atimārdavaśvaityauṣṇyataikṣṇyapaicchilyasarpitāḥ |

sāndratāpakvatā hīnadravyatā doṣa ucyate ||

tatra kṣārasādhyavyādhivyādhitam upaveśya nivātātape deśe 'saṃbādhe 'gropaharaṇīyoktena vidhānenopasaṃbhṛtasaṃbhāraṃ tato 'sya tamavakāśaṃ nirīkṣyāvaghṛṣyāvalikhya pracchayitvā śalākayā kṣāraṃ pratisārayet dattvā vākśatamātramupekṣeta ||

tasminnipatite vyādhau kṛṣṇatā dagdhalakṣaṇam |

tatrāmlavargaḥ śamanaḥ sarpirmadhukasaṃyutaḥ ||

atha cet sthiramūlatvāt kṣāradagdhaṃ ca śīryate |

idamālepanaṃ tatra samagramavacārayet ||

amlakāñjikabījāni tilān madhukam eva ca |

prapeṣya samabhāgāni tenainamanulepayet ||

tilakalkaḥ samadhuko ghṛtākto vraṇaropaṇaḥ |

rasenāmlena tīkṣṇena vīryoṣṇena ca yojitaḥ ||

āgneyenāgninā tulyaḥ kathaṃ kṣāraḥ praśāmyati |

evaṃ cen manyase vatsa procyamānaṃ nibodha me ||

kaṭukas tatra bhūyiṣṭho lavaṇo 'nurasas tathā |

amlena saha saṃyuktaḥ satīkṣṇalavaṇo rasaḥ ||

mādhuyaṃ bhajate 'tyarthaṃ tīkṣṇabhāvaṃ vimuñcati |

mādhuryācchamamāpnoti vahniradbhir ivāplutaḥ ||

tatra samyagdagdhe vikāropaśamo lāghavamanāsrāvaś ca || hīnadagdhe todakaṇḍujāḍyāni vyādhivṛddhiś ca || atidagdhe dāhapākarāgasrāvāṅgamardaklamapipāsāmūrcchāḥ syur maraṇaṃ vā ||

kṣāradagdhavraṇaṃ tu yathādoṣaṃ yathādoṣaṃ yathāvyādhi copakramet ||

atha naite kṣārakṛtyāḥ tad yathā durbalabālasthavirabhīrusarvāṅgaśūnodariraktapittigarbhiṇyṛtumatīpravṛddhajvaripramehirūkṣakṣatakṣīṇatṛṣṇāmūrcchopadrutaklībāpavṛttodvṛttaphalayonayaḥ ||

tathā marmasirāsnāyusandhitaruṇāsthisevanīdhamanīgalanābhinakhāntaḥśephaḥsrotaḥsvalpamāṃseṣu ca pradeśeṣv akṣṇoś ca na dadyādanyatra vartmarogāt ||

tatra kṣārasādhyeṣv api vyādhiṣu śūnagātramasthiśūlinamannadveṣiṇaṃ hṛdayasandhipīḍopadrutaṃ ca kṣāro na sādhayati ||

bhavati cātra |

viṣāgniśastrāśanimṛtyukalpaḥ kṣāro bhavatyalpamatiprayuktaḥ |

sa dhīmatā samyaganuprayukto rogānnihanyādacireṇa ghorān ||

iti śrīsuśrutasaṃhitāyāṃ sūtrasthāne kṣārapākavidhirnāmaikādaśo 'dhyāyaḥ ||

dvādaśo 'dhyāyaḥ |

athāto 'gnikarmavidhim adhyāyaṃ vyākhyāsyāmaḥ ||

yathovāca bhagavān dhanvantariḥ ||

kṣārādagnirgarīyān kriyāsu vyākhyātaḥ taddagdhānāṃ rogāṇāmapunarbhāvādbheṣajaśastrakṣārair asādhyānāṃ satsādhyatvāc ca ||

athemāni dahanopakaraṇāni tad yathā pippalyajāśakṛdgodantaśaraśalākājāmbavauṣṭhetaralauhāḥ kṣaudraguḍasnehāś ca | tatra pippalyajāśakṛdgodantaśaraśalākāstvaggatānāṃ jāmbavauṣṭhetaralauhā māṃsagatānāṃ kṣaudraguḍasnehāḥ sirāsnāyusandhyasthigatānām ||

tatrāgnikarma sarvartuṣu kuryād anyatra śaradgrīṣmābhyāṃ tatrāpyātyayike 'gnikarmasādhye vyādhau tatpratyanīkaṃ vidhiṃ kṛtvā ||

sarvavyādhiṣvṛtuṣu ca picchilamannaṃ bhuktavataḥ (? karma kurvīta) aśmarībhagandarārśomukharogeṣv abhuktavataḥ ||

tatra dvividhamagnikarmāhureke tvagdagdhaṃ māṃsadagdhaṃ ca iha tu sirāsnāyusandhyasthiṣv api va pratiṣiddho 'gniḥ ||

tatra śabdaprādurbhāvo durgandhatā tvaksaṃkocaś ca tvagdagdhe kapotavarṇatā'lpaśvayathuvedanā śuṣkasaṃkucitavraṇatā ca māṃsadagdhe kṛṣṇonnatavraṇatā srāvasannirodhaś ca sirāsnāyudagdhe rūkṣāruṇatā karkaśasthiravraṇatā ca sandhyasthidagdhe ||

tatra śirorogādhimanthayor bhrūlalāṭaśaṅkhapradeśeṣu dahet vartmarogeṣvārdrālaktakapraticchannāṃ dṛṣṭiṃ kṛvā vartmaromakūpān (? dahet ) ||

tvaṅnāṃsasirāsnāyusandhyasthisthite 'tyugraruji vāyāvucchritakaṭhinasupramāṃse vraṇe granthyarśo 'rbudabhagandarāpacīślīpadacarmakīlatilakālakāntravṛddhisandhisirācchedanādiṣu nāḍīśoṇitātipravṛttiṣu cāgnikarma kuryāt ||

tatra valaya-bindu-vilekhā-pratisāraṇānīti dahanaviśeṣāḥ ||

bhavati cātra |

rogasya saṃsthānamavekṣya samyaṅgarasya marmāṇi balābalaṃ ca |

vyādhiṃ tathartuṃ ca samīkṣya samyak tato vyavasyed bhiṣagagnikarma ||

tatra samyagdagdhe madhusarpirbhyāmabhyaṅgaḥ ||

athemānagninā pariharet pittaprakṛtimantaḥśoṇitaṃ bhinnakoṣṭhamanuddhṛtaśalyaṃ durbalaṃ bālaṃ vṛddhaṃ bhīrumanekavraṇapīḍitamasvedyāṃś ceti ||

ata ūrdhvamitarathādagdhalakṣaṇaṃ vakṣyāmaḥ | tatra snigdhaṃ rūkṣaṃ va+āśritya dravyam agnir dahati agnisaṃtapto hi snehaḥ sūkṣmasirānusāritvāt tvagādīn anupraviśyāśu dahati tasmāt snehadagdhe 'dhikā rujo bhavanti ||

tatra pluṣṭaṃ durdagdhaṃ samyagdagdhamatidagdhaṃ ceti caturvidhamagnidagdham | tatra yadvivarṇaṃ pluṣyate 'timātraṃ tat pluṣṭaṃ yatrottiṣṭhanti sphoṭāstīvrāś coṣadāharāgapākavedanāś cirāccopaśāmyanti taddrudagdhaṃ samyagdgdhamanavagāḍhaṃ tālaphalavarṇaṃ susaṃsthitaṃ pūrvalakṣaṇayuktaṃ ca atidagdhe māṃsāvalambanaṃ gātraviśleṣaḥ sirāsnāyusandhyasthivyāpādanamatimātraṃ jvaradāhapipāsāmūrcchāś copadravā bhavanti vraṇaś cāsya cireṇa rohati rūḍhaś ca vivarṇo bhavati | tadetaccaturvidhamagnidagdhalakṣaṇamātmakarmaprasādhakaṃ(ā.naṃ)bhavati ||

bhavati cātra |

agninā kopitaṃ raktaṃ bhṛśaṃ jantoḥ prakupyati |

tatas tenaiva vegena pittam asyābhyudīryate ||

tulyavīrye ubhe hyete rasato dravyatas tathā |

tenāsya vedanāstīvrāḥ prakṛtyā ca vidahyate |

sphoṭāḥ śīghraṃ prajāyante jvarastṛṣṇā ca vardhate ||

dagdhasyopaśamārthāya cikitsā saṃpravakṣyate ||

pluṣṭasyāgnipratapanaṃ kāryamuṣṇaṃ tathauṣadham |

śarīre svinnabhūyiṣṭhe svinnaṃ bhavati śoṇitam ||

prakṛtyā hyudakaṃ śītaṃ skandayatyatiśoṇitam |

tasmāt sukhayati hyuṣṇaṃ natu śītaṃ kathaṃcana ||

śītāmuṣṇāṃ ca durdagdhe kriyāṃ kuryād bhiṣak punaḥ |

ghṛtālepanasekāṃs tu śītānevāsya kārayet ||

samyagdagdhe tugākṣīrīplakṣacandanagairikaiḥ |

sāmṛtaiḥ sarpiṣā snigdhair ālepaṃ kārayed bhiṣak ||

grāmyānūpaudakaiś cainaṃ piṣṭair māṃsaiḥ pralepayet |

pittavidradhivaccainaṃ santatoṣmāṇamācaret ||

atidagdhe viśīrṇāni māṃsānyuddhṛtya śītalām |

kriyāṃ kuryād bhiṣak paś cācchālitaṇḍulakaṇḍanaiḥ ||

tindukītvakkapālair vā ghṛtamiśraiḥ pralepayet |

vraṇaṃ guḍūcīpatrair vā chādayed athavaudakaiḥ ||

kriyāṃ ca nikhilāṃ kuryād bhiṣak pittavisarpavat |

madhūcchiṣṭaṃ samadhukaṃ rodhraṃ sarjarasaṃ tathā ||

mañjiṣṭhāṃ cadanaṃ mūrvāṃ piṣṭvā sarpir vipācayet |

sarveṣāmagnidagdhānām etad ropaṇam uttamam ||

snehadagdhe kriyāṃ rūkṣāṃ viśeṣeṇāvacārayet |

ata ūrdhvaṃ pravakṣyāmi dhūmopahatalakṣaṇam ||

śvasiti kṣauti cātyarthamatyādhamati kāsate |

cakṣuṣoḥ paridāhaś ca rāgaś caivopajāyate ||

sadhūmakaṃ niśvasiti ghreyamanyanna vetti ca |

tathaiva ca rasān sarvān śrutiś cāsyopahanyate ||

tṛṣṇādāhajvarayutaḥ sīdatyatha ca mūrcchati |

dhūmopahata ity evaṃ śṛṇu tasya cikitsitam ||

sarpirikṣurasaṃ drākṣāṃ payo vā śarkarāmbu vā |

madhurāmlau rasau vā'pi vamanāya pradāpayet ||

vamataḥ koṣṭhaśuddhiḥ syāddhūmagandhaś ca naśyati |

vidhinā'nena śāmyanti sadanakṣavathujvarāḥ ||

dāhamūrcchātṛḍādhmānaśvāsakāsāś ca dāruṇāḥ |

madhurair lavaṇāmlaiś ca kaṭukaiḥ kavalagrahaiḥ ||

samyaggṛhṇātīndriyārthān manaś cāsya prasīdati |

śirovirecanaṃ cāsmai dadyādyogena śāstravit ||

dṛṣṭirviśudhyate cāsya śirogrīvaṃ ca dehinaḥ |

avidāhi laghu snigdhamāhāraṃ cāsya kalpayet ||

uṣṇavātātapair dagdhe śītaḥ kāryo vidhiḥ sadā |

śītavarṣānilair dagdhe snigdhamuṣṇaṃ ca śasyate ||

tathā'titejasā dagdhe siddhirnāsti kathaṃcan |

indravajrāgnidaghe 'pi jīvati pratikārayet ||

iti śrīsuśrutasaṃhitāyāṃ sūtrasthāne 'gnikarmavidhair nāma dvādaśo 'dhyāyaḥ ||

trayodaśo 'dhyāyaḥ |

The vulgate text here in adhyāya 13 is transcribed from the 1938 edition, not the 1931 edition.

1938 ed. 1.13.1 athāto jalaukāvacāraṇīyam adhyāyaṃ vyākhyāsyāmaḥ ||

1938 ed. 1.13.2 yathovāca bhagavān dhanvantariḥ ||

1938 ed. 1.13.3 nṛpāḍhya bāla sthavira bhīru durbala nārī sukumārāṇām anugrahārthaṃ paramasukumāro 'yaṃ śoṇitāvasecanopāyo 'bhihito jalaukasaḥ ||

1938 ed. 1.13.4 tatra vātapittakaphaduṣṭaśoṇitaṃ yathāsaṃkhyaṃ śṛṅgajalaukālābubhir avasecayet sarvāṇi sarvair vā (viśeṣas tu visrāvyaṃ śṛṅgajalaukālābubhir gṛhṇīyāt) ||

1938 ed. 1.13.5ab bhavanti cātra ślokāḥ |
uṣṇaṃ samadhuraṃ snigdhaṃ gavāṃ śṛṅgaṃ prakīrtitam |
tasmād vātopasṛṣṭe tu hitaṃ tad avasecane ||

1938 ed. 1.13.6 śītādhivāsā madhurā jalaukā vārisaṃbhavā |
tasmāt pittopasṛṣṭe tu hitā sā tv avasecane ||

1938 ed. 1.13.7 alābu kaṭukaṃ rūkṣaṃ tīkṣṇaṃ ca parikīrtitam |
tasmāc chleṣmopasṛṣṭe tu hitaṃ tad avasecane ||

1938 ed. 1.13.8 tatra pracchite tanu basti paṭalāvanaddhena śṛṅgeṇa śoṇitam avasecayed ācūṣaṇāt sāntardīpayā 'lābvā | (jalāyukā vakṣyante) ||

1938 ed. 1.13.9 jalam āsām āyur iti jalāyukāḥ jalam āsām oka iti jalaukasaḥ ||

1938 ed. 1.13.10 tā dvādaśa tāsāṃ saviṣāḥ ṣaṭ tāvatya eva nirviṣāḥ ||

1938 ed. 1.13.11 tatra saviṣāḥ kṛṣṇā karburā alagardā indrāyudhā sāmudrikā gocandanā ceti | tāsu añjanacūrṇavarṇā pṛthuśirāḥ kṛṣṇā varmimatsyavad āyatā chinnonnatakukṣiḥ karburā romaśā mahāpārśvā kṛṣṇamukhī alagardā indrāyudhavad ūrdhvarājibhiś citritā indrāyudhā īṣadasitapītikā vicitrapuṣpākṛticitrā sāmudrikāḥ govṛṣaṇavad adhobhāge dvidhābhūtākṛtir aṇumukhī gocandaneti | tābhir daṣṭe puruṣe daṃśe śvayathur atimātraṃ kaṇḍūrmūrcchā jvaro dāhaś chardir madaḥ sadanam iti liṅgāni bhavanti | tatra mahāgadaḥ pānālepananasya karmādiṣūpayojyaḥ | indrāyudhādaṣṭam asādhyam | ity etāḥ saviṣāḥ sacikitsitā vyākhyātāḥ ||

1938 ed. 1.13.12 atha nirviṣāḥ kapilā piṅgalā śaṅkumukhī mūṣikā puṇḍarīkamukhī sāvarikā ceti | tatra manaḥśilārañjitābhyām iva pārśvābhyāṃ pṛṣṭhe snigdhā mudgavarṇā kapilā kiṃcidraktā vṛttakāyā piṅgalā ''śugā ca piṅgalā yakṛdvarṇā śīghrapāyinī dīrghatīkṣṇamukhī śaṅkumukhīḥ mūṣikākṛtivarṇā 'niṣṭagandhā ca mūṣikā mudgavarṇā puṇḍarīkatulyavaktrā puṇḍarīkamukhī snigdhā padmapatravarṇā 'ṣṭādaśāṅgulapramāṇā sāvarikā sā ca paśvarthe ity etā aviṣā vyākhyātāḥ ||

1938 ed. 1.13.13 tāsāṃ yavanapāṇḍyasahya pautanādīni kṣetrāṇi teṣu mahāśarīrā balavatyaḥ śīghrapāyinyo mahāśanā nirviṣāś ca viśeṣeṇa bhavanti |

1938 ed. 1.13.14 tatra saviṣa matsya kīṭa dardura mūtra purīṣa kothajātāḥ kaluṣeṣv ambhaḥsu ca saviṣāḥ padmotpala nalina kumuda saugandhika kuvalaya puṇḍarīka śaivala kotha jātā vimaleṣv ambhaḥsu ca nirviṣāḥ ||

1938 ed. 1.13.15 bhavati cātra |
kṣetreṣu vicaranty etāḥ salilāḍhyasugandhiṣu |
na ca saṃkīrṇacāriṇyo na ca paṅkeśayāḥ sukhāḥ ||

1938 ed. 1.13.16 tāsāṃ grahaṇam ārdracarmaṇā, anyair vā prayogair gṛhṇīyāt ||

1938 ed. 1.13.17 athaināṃ nave mahati ghaṭe sarastaḍāgodakapaṅkam āvāpya nidadhyāt bhakṣyārthe cāsām upaharec chaivalaṃ vallūram audakāṃś ca kandāṃś cūrṇīkṛtya śayyārthaṃ tṛṇam audakāni ca patrāṇi tryahāt tryahāc cābhyo 'nyaj jalaṃ bhakṣyaṃ ca dadyāt saptarātrāt saptarātrāc ca ghaṭam anyaṃ saṃkrāmayet ||

1938 ed. 1.13.18 bhavati cātra |
sthūlamadhyāḥ parikliṣṭāḥ pṛthvyo mandaviceṣṭitāḥ |
agrāhiṇyo 'lpapāyinyaḥ saviṣāś ca na pūjitāḥ ||

1938 ed. 1.13.19 atha jalauko 'vasekasādhyavyādhitam upaveśya saṃveśya vā virūkṣya cāsya tam avakāśaṃ mṛdgomayacūrṇair yady arujaḥ syāt | gṛhītāś ca tāḥ sarṣaparajanī kalkodaka pradigdha gātrīḥ salilasarakamadhye muhūrtasthitā vigataklamā jñātvā tābhī rogaṃ grāhayet | ślakṣṇaśuklārdrapicuprotāvacchannāṃ kṛtvā mukham apāvṛṇuyāt agṛhṇantyai kṣīrabinduṃ śoṇitabinduṃ vā dadyāt, śastrapadāni vā kurvīta yady evam api na gṛhṇīyāt tadā'nyāṃ grāhayet ||

1938 ed. 1.13.20 yadā ca niviśate 'śvakhuravad ānanaṃ kṛtvonnamya ca skandhaṃ tadā jānīyād gṛhṇātīti gṛhṇantīṃ cārdravastrāvacchannāṃ kṛtvā dhārayet ||

1938 ed. 1.13.21 daṃśe toda kaṇḍu prādur bhāvair jānīyāc chuddham iyam ādatta iti śuddham ādadānām apanayet atha śoṇitagandhena na muñcen mukham asyāḥ saindhavacūrṇenāvakiret ||

1938 ed. 1.13.22 atha patitāṃ taṇḍula kaṇḍana pradigdhagātrīṃ tailalavaṇābhyaktamukhīṃ vāmahastāṅguṣṭhāṅgulībhyāṃ gṛhītapucchāṃ dakṣiṇahastāṅguṣṭhāṅgulibhyāṃ śanaiḥ śanair anulomam anumārjayed ā mukhāt vāmayet tāvad yāvat samyagvāntaliṅgānīti | samyagvāntā salilasarake nyastā bhoktukāmā satī caret | yā sīdatī na ceṣṭate sā durvāntā tāṃ punaḥ samyag vāmayet | durvāntāyā vyādhir asādhya indramado nāma bhavati | atha suvāntāṃ pūrvavat sannidadhyāt ||

1938 ed. 1.13.23 śoṇitasya yogāyogān avekṣya śatadhautaghṛtābhyaṅgas tat picudhāraṇaṃ vāi jalaukovraṇān madhunā'vaghaṭṭayet śitābhir adbhiś pariṣecayed badhnīta vā kaṣāyamadhurasnigdhaśītaiś ca pradehaiḥ pradihyād iti ||

1938 ed. 1.13.24 bhavati cātra | kṣetrāṇi grahaṇaṃ jātīḥ poṣaṇaṃ sāvacāraṇam |
jalaukasāṃ ca yo vetti tat sādhyān sa jayed gadān ||

iti suśrutasaṃhitāyāṃ sūtrasthāne jalaukāvacāraṇīyo nāma trayodaśo 'dhyāyaḥ ||

caturdaśo 'dhyāyaḥ |

athātaḥ śoṇitavarṇanīyam adhyāyaṃ vyākhyāsyāmaḥ ||

yathovāca bhagavān dhanvantariḥ ||

tatra pāñcabhautikasya caturvidhasya ṣaḍrasasya dvividhavīryasyāṣṭavidhāvīryasya vā'nekaguṇasyopayuktasyāhārasya samyakpariṇatasya yas tejobhūtaḥ sāraḥ paramasūkṣmaḥ sa rasa ity ucyate tasya ca hṛdayaṃ sthānaṃ sa hṛdayāc caturviṃśati dhamanīr anupraviśyor dhvagā daśa daśa cādhogāminyaś catasraś ca tiryaggāḥ kṛtsnaṃ śarīram aharahas tarpayati vardhayati dhārayati yāpayati cādṛṣṭahetukena karmaṇā | tasya śarīram anusarato 'numānād gatir upalakṣayitavyā kṣayavṛddhivaikṛtaiḥ | tasmin sarvaśarīrāvayavadoṣadhātumalāśayānusāriṇi rase jijñāsā kim ayaṃ saumyas taijasa iti | atrocyate sa khalu dravānusārī snehanajīvanatarpaṇadhāraṇādibhir viśeṣaiḥ saumya ity avagamyate ||

sa khalv āpyo raso yakṛtplīhānau prāpya rāgam upaiti ||

bhavataś cātra |
rañjitās tejasā tv āpaḥ śarīrasthena dehinām |
avyāpannāḥ prasannena raktam ity abhidhīyate ||

rasād eva striyā raktaṃ rajaḥsaṃjñaṃ pravartate | tad varṣād dvyādaśād ūrdhvaṃ yāti pañcāśataḥ kṣayam ||

ārtavaṃ śoṇitaṃ tv āgneyaṃ agnīṣomīyatvād garbhasya ||

pāñcabhautikaṃ tv apare jīvaraktam āhur ācāryāḥ ||

vesratā dravatā rāgaḥ spandanaṃ laghutā tathā |
bhūmyādīnāṃ guṇā hyete dṛśyante cātra śoṇite ||

rasād raktaṃ tato māṃsaṃ māṃsān medaḥ prajāyate |
medaso 'sthi tato majjā majjñaḥ śukraṃ tu jāyate ||

tatraiṣāṃ (? sarva ) dhātūnām annapānarasaḥ prīṇayitā ||

rasajaṃ puruṣaṃ vidyād rasaṃ rakṣet prayatnaḥ | annāt pānāc ca matimān ācārāc cāpy atandritaḥ ||

tatra rasa gatau dhātuḥ ahar ahar gacchatīty ato rasaḥ ||

sa khalu trīṇi trīṇi kalāsahasrāṇi pañcadaśa ca kalā ekaikasmin dhātāv avatiṣṭhate evaṃ māsena rasaḥ śukrībhavati strīṇāṃ cārtavam ||

bhavati cātra |
aṣṭādaśasahasrāṇi saṅkhyā hy asmin samuccaye |
kalānāṃ navatiḥ proktā svatantraparatantrayoḥ ||

sa śabdārcirjalasantānavad aṇunā viśeṣeṇānudhāvaty evaṃ śarīraṃ kevalam ||

vājīkaraṇyas tv oṣadhayaḥ svabalaguṇotkarṣād virecanavad upayuktāḥ śukraṃ virecayanti ||

yathā hi puṣpamukulastho gandho na śakyam ihāstīti vaktum atho naivā(ā.naiva cā)stīti athavā'(? ca)sti satāṃ bhāvānām abhivyaktir iti kṛ(ā.jñā)tvā kevalaṃ saukṣmyān nābhivyajyate sa eva puṣpe vivṛtapatrakeśare kālāntareṇābhivyaktiṃ gacchati evaṃ bālānām api vayaḥpariṇāmāc chukraprādurbhāvo bhavati romarājyādayaś ca viśeṣā nārīṇām | (? rajasi copacīyamāne śanaiḥ śanaiḥ stanagarbhāśayayonyabhivṛddhir bhavati ||

sa evānnaraso vṛddhānāṃ (? jarā)paripakvaśarīratvād aprīṇano bhavati ||

ta ete śrīradhāraṇād dhātava ity ucyante ||

teṣāṃ kṣayavṛddhī śoṇitanimitte tasmāt tad adhikṛtya vakṣyāmaḥ | tatra phanilamaruṇaṃ kṛṣṇaṃ parūṣaṃ tanu śīghragamaskandi ca vātena duṣṭaṃ nīlaṃ pītaṃ haritaṃ śyāvaṃ visramaniṣṭaṃ pipīlikāmakṣikāṇāmaskandi ca pittaduṣṭaṃ gairikodakapratīkāśaṃ snigdhaṃ śītalaṃ bahalaṃ picchilaṃ cirasrāvi māṃsapeśīprabhaṃ ca śleṣmaduṣṭaṃ sarvalakṣaṇasaṃyuktaṃ kāñjikābhaṃ viśeṣato durgandhi ca sannipātaduṣṭaṃ (? pittavadraktenātikṛṣṇaṃ ca) dvidoṣaliṅgaṃ saṃsṛṣṭaṃ | (? jīvaśoṇitamanyatra vakṣyāmaḥ )//

indragopakapratīkāśamasaṃhatamavivarṇaṃ ca prakṛtisthaṃ jānīyāt ||

visrāvyāṇyanyatra vakṣyāmaḥ ||

athāvisrāvyāḥ sarvāṅgaśophaḥ kṣīṇasya cāmlabhojananimittaḥ pāṇdurogyarśasodariśoṣigarbhiṇīnāṃ ca śvayathavaḥ ||

tatra śastravisrāvaṇaṃ dvividhaṃ pracchānaṃ sirāvyadhanaṃ ca ||

tatra ṛjvasaṃkīrṇaṃ sūkṣmaṃ samam anavagāḍham anuttānam āśu ca śastraṃ pātayen marmasirāsnāyusandhīnāṃ cānupaghāti ||

tatra durvine durviddhe śītavātayor asvinne bhuktamātre skandatvāc choṇitaṃ na sravaty alpaṃ vā sravati ||

madamūrcchāśramārtānāṃ vāta viṇ mūtrasaṃginām |
nidrābhibhūtabhītānāṃ nṛṇāṃ nāsṛk pravartate ||

tad duṣṭaṃ śoṇitamanirhriyamāṇaṃ kaṇḍūśopharāgadāhapākavedanā janayet ||

atyuṣṇe 'tisvinne 'tividdhe 'jñair vasrāvitamatipravartate tad atipravṛttaṃ śiro 'bhitāpamāndhyamadhimanthatimiraprādurbhāvaṃ dhātukṣayamākṣepakaṃ pakṣāghātamekāṅgavikāraṃ tṛṣṇādāhau hikkāṃ kāsaṃ śvāsaṃ pāṇḍurogaṃ maraṇaṃ cāpādayati ||

bhavanti cātra |

tasmānna śite nātyuṣṇe nāsvinne nātitāpite |
yavāgūṃ pratipītasya śoṇitaṃ mokṣayed bhiṣak ||

samyaggatvā yadā raktaṃ svayamevāvatiṣṭhate |

śuddhaṃ tadā vijānīyāt samyagvisrāvitaṃ ca tat ||

lāghavaṃ vedanāśāntirvyādhervegaparikṣayaḥ |

samyagvisrāvite liṅgaṃ prasādo manasas tathā ||

tvagdoṣā granthayaḥ śophā rogāḥ śoṇitajāś ca ye |

raktamokṣaṇaśīlānāṃ na bhavanti kadācana ||

atha khalvapravartamāne rakte elāśītaśivakuṣṭhatagarapāṭhābhadradāruviḍaṅgacitrakatrikaṭukāgāradhūmaharidrārkāṅkuranaktamālaphalair yathālābhaṃ tribhiś caturbhiḥ samastair vā cūrṇīkṛtair lavanātailapragāḍhair vraṇamukham avagharṣayed evaṃ samyak pravartate ||

athātipravṛtte rodhramadhukapriyaṅgupattaṅgagairikasarjarasarasāñjanaśālmalīpuṣpaśaṅkhaśuktimāṣayavagodhūmacūrṇaiḥ śanaiḥ śanair vraṇamukham avacūrṇyāṅgulyagreṇāvapīḍayet sālasarjārjūnārimedameṣaśṛnṅgadhavadhanvantvagbhir vā cūrṇitābhiḥ kṣaumeṇa vā dhmāpitena samudraphenalākṣācūrṇair vā yathoktair vraṇabandhanadravyair gāḍhaṃ badhnīyāt śītāccchādanabhojanāgāraiḥ śītaiḥ pariṣekapradehaiś copācaret kṣārenāgninā vā dahedyathoktaṃ vyadhanādanantaraṃ vā tāmevātipravṛttāṃ sirāṃ vidhyet kākolyādikvāthaṃ vā śarkarāmadhumadhuraṃ pāyayet eṇahariṇorabhraśaśamahiṣavarāhāṇāṃ vā rudhiraṃ kṣirayūṣarasaiḥ susnigdhaiś cāśnīyāt upadravāṃś ca yathāsvam upacaret ||

dhātukṣayāt srute rakte mandaḥ saṃjāyate 'nalaḥ |

pavanaś ca paraṃ lopaṃ yāti tasmāt prayatnaḥ ||

taṃ nātiśītair laghubhiḥ snigdhaiḥ śoṇitavardhanaiḥ |

īṣadamlair anamlair vā bhojanaiḥ samupācaret ||

caturvidhaṃ yad etad dhi rudhirasya nivāraṇam |

saṃdhānaṃ skandanaṃ caiva pācanaṃ dahanaṃ tathā ||

vraṇaṃ kaṣāyaḥ saṃdhatte raktaṃ skandayate himam |

tathā saṃpācayed bhasma dāhaḥ saṃkocayet sirāḥ ||

askandamāne rudhire saṃdhānāni prayojayet |

saṃdhāne bhraśyamāne tu pācanaiḥ samupācaret |

kalpair etais tribhir vaidyaḥ prayateta yathāvidhi |

asiddhimatsu caiteṣu dāhaḥ parama iṣyate |

śeṣadoṣe yato rakte na vyādhirativartate |

sāvaśeṣe tataḥ stheyaṃ na tu kuryād atikramam ||

dehasya rudhiraṃ mūlaṃ rudhireṇaiva dhāryate |

tasmād yatnena saṃrakṣyaṃ raktaṃ jīva iti sthitiḥ ||

srutaraktasya sekādyaiḥ śītaiḥ prakupite 'nile |

śophaṃ satodaṃ loṣṇena sarpiṣā pariṣecayet ||

iti suśrutasaṃhitāyāṃ sūtrasthāne śoṇitavarṇanīyo nāma caturdaśo 'dhyāyaḥ ||

pañcadaśo 'dhyāyaḥ |

athāto doṣadhātumalakṣayavṛddhivijñānīyam adhyāyaṃ vyākhyāsyāmaḥ ||

yathovāca bhagavān dhanvantariḥ ||

doṣadhātumalamūlaṃ hi śarīraṃ tasmād eteṣāṃ lakṣaṇamucyamānam upadhāraya ||

tatra praspandanodvahanapūranāvivekadhāraṇalakṣaṇo vāyuḥ pañcadhā pravibhaktaḥ śarīraṃ dhārayati ||

rāgapaktyojastejomedhoṣmakṛtpittaṃ pañcadhā pravibhaktam agnikarmaṇānugrahaṃ karoti ||

sandhisaṃśleṣaṇasnehanaropaṇapūraṇabalasthairyakṛcchleṣmā pañcadhā pravibhakta udakakarmaṇā'nugrahaṃ karoti ||

rasas tuṣṭiṃ prīṇanaṃ raktapuṣṭiṃ ca karoti raktaṃ varṇaprasādaṃ māṃsapuṣṭiṃ jīvayati ca māṃsaṃ śarīrapuṣṭiṃ medasaś ca medaḥ snehasvedau dṛḍhatvaṃ puṣṭim asthnāṃ ca asthīni dehadhāraṇaṃ majjñaḥ puṣṭiṃ ca majjā prītiṃ snehaṃ balaṃ śukrapuṣṭiṃ pūraṇam asthnāṃ ca karoti śukraṃ dhairyaṃ cyavanaṃ prītiṃ dehabalaṃ harṣaṃ bījārthaṃ ca ||

purīṣam upastambhaṃ vāyvagnidhāraṇaṃ ca bastipūraṇavikledakṛn mūtraṃ svedaḥ kledatvaksaukumāryakṛt ||

raktalakṣaṇam ārtavaṃ garbhakṛc ca garbho garbhalakṣaṇaṃ stanyaṃ stanayor āpīnatvajananaṃ jīvanaṃ ceti ||

tatra vidhivat parirakṣaṇaṃ kurvīta ||

ata ūrdhvam eṣāṃ kṣīṇalakṣaṇaṃ vakṣyāmaḥ tatra vātakṣaye mandaceṣṭatā'lpāvāktvam apraharṣo mūḍhasaṃjñatā ca pittakṣaye mandoṣmāgnitā niṣprabhatvaṃ(ā.tā) ca śleṣmakṣaye rūkṣatā'ntardāha āmāśayetaraśleṣmāśayaśūnyatā sandhiśaithilyaṃ tṛṣṇā daurbalyaṃ prajāgaraṇaṃ ca ||

tatra svayonivardhanāny eva pratīkāraḥ ||

rasakṣaye hṛtpīḍā kampaśūnyātās tṛṣṇā ca śoṇitakṣaye tvakpāruṣyam amlaśītaprārthanā sirāśaithilyaṃ ca māṃsakṣaye sphiggaṇḍauṣṭhopasthoruvakṣaḥ kakṣāpiṇḍikodaragrīvāśuṣkatā raukṣyatodau gātrāṇāṃ sadanaṃ dhamanīśaithilyaṃ ca medaḥkṣaye plīhābhivṛddhiḥ sandhiśūnyatā raukṣyaṃ meduramāṃsaprārthanā ca asthikṣaye 'sthiśūlaṃ dantanakhabhaṅgo raukṣyaṃ ca majjakṣaye 'lpaśukratā parvabhedo 'sthinistodo 'sthiśūnyatā ca śukrakṣaye meḍhravṛṣaṇavedanā'śaktirmaithune cirād vā prasekaḥ praseke cālparaktaśukradarśanam ||

tatrāpi svayonivardhanadravyopayogaḥ pratīkāraḥ ||

purīṣakṣaye hṛdayapārśvapīḍā saśabdasya ca vāyor ūrdhvagamanaṃ kukṣau saṃcaraṇaṃ ca mūtrakṣaye bastitodo 'lpamūtratā ca atrāpi svayonivardhanadravyāṇi pratīkāraḥ | svedakṣaye stabdharomakūpatā tvakśoṣaḥ sparśavaiguṇyaṃ svedanāśaś ca tatrābhyaṅgaḥ svedopayogaś ca ||

ārtavakṣaye yathocitakālādarśanamalpatā vā yonivedanā ca tatra saṃśodhanamāgneyānāṃ ca dravyāṇāṃ vidhivadupayogaḥ | stanyakṣaye stnayor mlānatā stanyāsaṃbhavo 'lpatā vā tatra śleṣmavardhanadravyopayogaḥ | garbhakṣaye garbhāspandanamanunnatakukṣitā ca tatra prāptabastikālāyāḥ kṣīrabastiprayogo medhyānnopayogaś ceti ||

ata ūrdhvam ativṛddhānāṃ doṣadhātumalānāṃ lakṣaṇaṃ vakṣyāmaḥ | vṛddhiḥ punar eṣāṃ svayonivardhanātyupasevanād bhavati | tatra vātavṛddhau vākpāruṣyaṃ kārśyaṃ kārṣṇyaṃ gātrasphuraṇam uṣṇakāmitā nidrānāśo 'lpabalatvaṃ gāḍhavarcastvaṃ ca pittavṛddhau pītāvabhāsatā saṃtāpaḥ śītakāmitvam alpanidratā mūrcchā balahānir indriyadaurbalyaṃ pītaviṇmūtranetratvaṃ ca śleṣmavṛddhau śauklyaṃ śaityaṃ sthairyaṃ gauravam avasādas tandrā nidrā sandhyasthiviśleṣaś ca ||

raso 'tivṛddho hṛdayotkledaṃ prasekaṃ cāpādayati raktaṃ raktāṅgākṣitāṃ sirāpūrṇatvaṃ ca māṃsaṃ sphiggaṇḍauṣṭhopasthorubāhujaṅghāsu vṛddhiṃ gurugātratāṃ ca medaḥ snigdhāṅgatāmudarapārśvavṛddhiṃ kāsaśvāsādīn daurgandhyaṃ ca asthyadhyasthīnyadhidantāṃś ca majjā sarvāṅganetragauravaṃ ca śukraṃ śukrāśmarīmatiprādurbhāvaṃ ca ||

purīṣamāṭopaṃ kukṣau śūlaṃ ca mūtraṃ mūtravṛddhiṃ muhurmuhuḥ pravṛttiṃ bastitodamādhmānaṃ ca svedastvaco daugandhyaṃ kaṇḍūṃ ca ||

ārtavam aṅgamardam atipravṛttiṃ daurgandhyaṃ ca stanyaṃ stanayor āpīnatvaṃ muhur muhuḥ pravṛttiṃ todaṃ ca garbho jaṭharābhivṛddhiṃ svedaṃ ca ||

teṣāṃ yathāsvaṃ saṃśodhanaṃ kṣapaṇaṃ ca kṣayād aviruddhaiḥ kriyāviśeṣaiḥ prakurvīt ||

pūrvaḥ pūrvo 'tivṛddhatvād vardhayed dhi paraṃ param |

tasam ātipravṛddhānāṃ dhātūnāṃ hrāsanaṃ hitam ||

balalakṣaṇaṃ balakṣayalakṣaṇaṃ cāta ūrdhvam upadekṣyāmaḥ | tatra rasādīnāṃ śukrāntānāṃ dhātūnāṃ yatparaṃ tejastat khalvojastad eva balam ity ucyate svaśāstrasiddhāntāt ||

tatra balena sthiropacitamāṃsatā sarvaceṣṭāsvapratighātaḥ svaravarṇaprasādo bāhyānām ābhyantarāṇāṃ ca karaṇānām ātmakāryapratipattir bhavati ||

bhavanti cātra |

ojaḥ somātmakaṃ snigdhaṃ śuklaṃ śītaṃ sthiraṃ saram |

viviktaṃ mṛdu mṛtsnaṃ ca prāṇāyatanamutttamam ||

dehaḥ sāvayavas tena vyāpto bhavati dehinām |

tadabhāvāc ca śīryante śarīrāṇi śarīriṇām ||

abhighātāt kṣayāt kopāc chokādd hyānāc chramāt kṣudhaḥ |

ojaḥ saṃkṣīyate hy ebhyo dhātugrahaṇaniḥsṛtam |

tejaḥ samīritaṃ tasmād visraṃsayate dehinaḥ ||

tasya visraṃso vyāpat kṣaya iti liṅgāni vyāpannasya bhavanti sandhiviśleṣo gātrāṇāṃ sadanaṃ doṣacyavanaṃ kriyā'(O.kriyā)sannirodhaś ca visraṃse stabdhagurugātratā vātaśopho varṇabhedo glānistandrā nidrā ca vyāpanne mūrcchā māṃsakṣayo mohaḥ pralāpo maraṇam iti ca kṣaye ||

bhavanti cātra |

trayo doṣā balasyoktā vyāpadvisraṃsanakṣayāḥ |

viśleṣasādau gātrāṇāṃ doṣavisraṃsanaṃ śramaḥ |

aprācuryaṃ kriyānāṃ ca balavisraṃsalakṣaṇam ||

gurutvaṃ stabdhatā'ṇgeṣu glānirvarṇasya bhedanam |

tandrā nidrā vātaśopho balavyāpadi lakṣaṇam ||

mūrcchā māṃsakṣāyo mohaḥ pralāpo 'jñānam eva ca |

pūrvoktāni ca liṅgāni maraṇaṃ ca balakṣaye ||

tatra visraṃse vyāpanne ca kriyāviśeṣair aviruddhair balamāpyāyayet itaraṃ tu mūḍhasaṃjñaṃ varjayet ||

doṣadhātumalakṣīṇo balakṣīṇi'pi vā naraḥ |

svayonivardhanaṃ yattadannapānaṃ prakāṅkṣati ||

yadyadāhārajātaṃ tu kṣīṇaḥ prārthayate naraḥ |

tasya tasya sa lābhe tu taṃ taṃ kṣayamapohati ||

yasya dhātukṣayādvāyuḥ saṃjñāṃ karma ca nāśayet |

prakṣiṇaṃ ca balaṃ yasya nāsu śakyaś cikitsitum ||

rasanimittam eva sthaulyaṃ kārśyaṃ ca | tatra śleṣmalāhārasevino 'dhyaśanaśīlasyāvyāyāmino divāsvapnaratasya cāma evānnaraso madhurataraś ca śarīramanukrāmannatisnehānmedo janayati tadatisthaulyamāpādayati tamatisthūlaṃ kṣudraśvāsapipāsākṣutsvapnasvedagātradaurgandhyakrathanagātrasādagadgadatvāni kṣipramevāviśanti saukumāryānmedasaḥ sarvakriyāsvasamarthaḥ kaphamedoniruddhamārgartvāccālpavyavāyo bhavati āvṛtamārgatvād eva śeṣā dhātavo nāpyāyante 'tyarthamato 'lpaprāṇo bhavati pramehapīḍakājvarabhagandaravidradhivātavikārāṇāmanyataṃ prāpya pañcatvam upayāti sarva eva cāsya rogā balavanto bhavantyāvṛtamārgatvāt srotasāṃ atas tasyotpattihetuṃ pariharet | utpanne tu śilājatuguggulugomūtratriphalāloharajorasāñjanamadhuyavamudgakoradūṣakaśyāmākoddālakādīnāṃ virūkṣaṇacchedanīyānāṃ dravyāṇaṃ vidhivadupayogo vyāyāmo lekhanabastyupayogaś ceti ||

tatra punar vātalāhārasevino 'tivyāyāmavyavāyādhyayanabhayaśokadhyānarātrijāgaraṇapipāsākṣutkaṣāyālpāśanaprabhṛtibhir upaśoṣito rasadhātuḥ śarīram ananukrāman nalpatvān na prīṇāti tasmād atikārśyaṃ bhavati so 'tikṛśaḥ kṣutpipāsāśītoṣṇavātavarṣabhārādāneṣv asahiṣṇur vātarogaprāyo 'lpaprāṇaś ca kriyāsu bhavati śvāsakāsaśoṣaplīhodarāgnisādagulmaraktapittānām anyatamam āsādya maraṇam upayāti sarva eva cāsya rogā balavanto bhavanty alpaprāṇatvāt atas tasyotpattihetuṃ pariharet | utpanne tu payasyāśvagandhāvidārigandhāśatāvarībalātibalānāgabalānāṃ madhurāṇām anyāsaṃ cauṣadhīnām upayogaḥ kṣīradadhighṛtamāṃsaśāliṣaṣṭikayavagodhūmānāṃ ca divāsvapnabrahmacaryāvyāyāmabṛhaṇabastyupayogaś ceti ||

yaḥ punar ubhayasādhāraṇāny āseveta tasyān narasaḥ śarīram anukrāman samān dhātūn upacinoti samadhātutvān madhyaśarīro bhavati sarvakriyāsu samarthaḥ kṣutpipāsāśītoṣṇavarṣātapasaho balavāṃś ca sa satatam anupālayitavya iti ||

bhavanti cātra |

atyantagarhitāv etau sadā sthūlakṛśau narau |

śreṣṭho madhyaśarīras tu kṛśaḥ sthūlāt tu pūjitaḥ ||

doṣaḥ prakupito dhātūn kṣapayaty ātmatejasā |

iddhaḥ svatejasā vahnir ukhāgatam ivodakam ||

vailakṣaṇyāc charīrāṇām asthāyitvāt tathaiva ca |

doṣadhātumalānāṃ tu parimāṇaṃ na vidyate ||

eṣāṃ samatvaṃ yac cāpi bhiṣagbhir avadhāryate |

na tat svāsthyādṛte śakyaṃ vaktum anyena hetunā ||

doṣādīnāṃ tv asamatām anumānena lakṣayet |

aprasannendriyaṃ vīkṣya puruṣaṃ kuśalo bhiṣak ||

svasthasya rakṣaṇaṃ kuryād asvasthasya tu buddhimān |

kṣapayed bṛṃhayec cāpi doṣadhātumalān bhiṣak |

tāvad yāvad arogaḥ syād etat sāmyasya lakṣaṇam ||

samadoṣaḥ samāgniś ca samadhātumalakriyaḥ |

prasannātmendriyamanāḥ svasthā ity abhidhīyate ||

iti suśrutasaṃhitāyāṃ sūtrasthāne doṣadhātumalakṣayavṛddhivijñānīyo nāma pañcadaśo 'dhyāyaḥ ||

ṣoḍaśo 'dhyāyaḥ |

athātaḥ karṇavyadha bandha vidhim adhyāyaṃ vyākhyāsyāmaḥ ||

yathovāca bhagavān dhanavatariḥ ||

rakṣābhūṣaṇanimittaṃ bālasya karṇau vidhyete | tau ṣaṣṭhe māsi saptame vā śuklapakṣe praśasteṣu tithikaraṇamuhūrtanakṣatreṣu kṛtamaṅgalasvastivācanaṃ dhātryaṅke kumāradharāṅke vā kumāram upaveśya bālakrīḍanakaiḥ pralobhyābhisāntvayan bhiṣag vāmahastenākṛṣya karṇaṃ daivakṛte chidra ādityakarāvabhāsite śanaiḥ śanair dakṣiṇahastena rju vidhyet pratanukaṃ sūcyā bahalam ārayā pūrvaṃ dakṣiṇaṃ kumārasya vāmaṃ kumāryāḥ tataḥ picuvartiṃ praveśayet ||

śoṇita bahutvena vedanayā cānyadeśaviddham iti jānīyāt nirupadravatayā taddeśaviddham iti ||

tatrājñena yadṛcchayā viddhāsu sirāsu kālikāmarmarikālohitikāsūpadravā bhavanti | tatra kālikāyāṃ jvaro dāhaḥ śvayathur vedanā ca bhavati marmarikāyāṃ vedanā jvaro granthayaś ca lohitikāyāṃ manyāstambhāpatānakaśirograhakarṇaśūlāni bhavanti | teṣu yathāsvaṃ pratikurvīta ||

kliṣṭajihmāpraśastasūcīvyadhād gāḍhataravartitvād doṣasamudāyād apraśastavyadhād vā yatra saṃrambho vedanā vā bhavati tatra vartim upahṛtyāśu madhukairaṇḍa mūla mañjiṣṭhā yava tila kalkair madhughṛtapragāḍhair ālepayet tāvad yāvat surūḍha iti surūḍhaṃ cainaṃ punar vidhyet vidhānaṃ tu pūrvoktam eva ||

tatra samyagviddham āmatailena pariṣecayet tryahāt tryahāc ca vartiṃ sthūlatarāṃ dadyāt pariṣekaṃ ca tam eva ||

atha vyapagatadoṣopadrave karṇe vardhanārthaṃ laghuvardhanakaṃ kuryāt ||

evaṃ vivardhitaḥ karṇaś chidyate tu dvidhā nṛṇām |
doṣato vā'bhighātād vā sandhānaṃ tasya me śṛṇu ||

tatra samāsena pañcadaśakarṇabandhākṛtayaḥ | tad yathā nemisandhānaka utpalabhedyako vallūraka āsaṅgimo gaṇḍakarṇa āhāryo nirvedhimo vyāyojimaḥ kapāṭasandhiko 'rdhakapāṭasandhikaḥ saṃkṣipto hīnakarṇo vallīkarṇo yaṣṭikarṇaḥ kākauṣṭhaka iti | teṣu pṛthulāyatasamobhayapālir nemisandhānakaḥ vṛttāyatasamobhayapālir utpalabhedyakaḥ hrasvavṛttasamobhayapālir vallūrakaḥ abhyantaradīrghaikapālir āsaṅgimaḥ bāhya dīrghaikapālir gaṇḍakarṇaḥ | apālir ubhayato 'py āhāryaḥ pīṭhopamapālir ubhayataḥ kṣīṇaputrikāśrito nirvedhimaḥ | sthūlāṇusamaviṣamapālir vyāyojimaḥ | abhyantaradīrghaikapālir itarālpapāliḥ | kapāṭasandhikaḥ bāhyadīrghaikapālir itarālpapālir ardhakapāṭasandhikaḥ | tatra daśaite karṇabandhavikalpāḥ sādhyāḥ teṣāṃ svanāmabhir evākṛtayaḥ prāyeṇa vyākhyātāḥ | saṃkṣiptādayaḥ pañcāsādhyāḥ | tatra śuṣkaśaṣkulir utsannapālir itarālpapāliḥ saṃkṣiptaḥ anadhiṣṭhānapāliḥ paryantayoḥ kṣīṇamāṃso hīnakarṇaḥ tanuviṣamālpapālir vallīkarṇaḥ grathitamāṃsastabdhasirāsaṃtatasūkṣmapālir yaṣṭikarṇaḥ nirmāṃsasaṃkṣiptāgrālpaśoṇitapāliḥ kākauṣṭhaka iti | baddheṣv api tu śopha dāha rāga pāka piḍakā srāva yuktā na siddhim upayānti ||

bhavanti cātra |*

notes▲
- These verses in A (from bhavanti cātra to śāstravit) are absent from the Nepalese MSS and were probably absent in the version of the Suśrutasaṃhitā commented on by Cakrapāṇi, who cited them in his commentary as being "read by some" in regard to the joins (sandhāna) they describe.

yasya pālidvayam api karṇasya na bhaved iha |

karṇapīṭhaṃ same madhye tasya viddhvā vivardhayet ||

bāhyāyām iha dīrghāyāṃ sandhir ābhyantaro bhavet |

ābhyantarāyāṃ dīrghāyāṃ bāhyasandhir udāhṛtaḥ ||

ekaiva tu bhavet pāliḥ sthūlā pṛthvī sthirā ca yā |

tāṃ dvidhā pāṭayitvā tu chittvā copari sandhayet ||

gaṇḍād utpāṭya māṃsena sānubandhena jīvatā |

karṇapālīm āpāles tu kuryān nirlikhya śāstravit ||

ato nyatamaṃ bandhaṃ cikīrṣur agropaharaṇīyoktopasaṃbhṛtasaṃbhāraṃ viśeṣataś cātropaharet surāmaṇḍaṃ kṣīram udakaṃ dhānyāmlaṃ kapālacūrṇaṃ ceti | tato 'ṅganāṃ puruṣaṃ vā grathitakeśāntaṃ laghubhuktavantam āptaiḥ suparigṛhītaṃ ca kṛtvā bandham upadhārya chedyabhedyalekhyavyadhanair upapannair upapādya karṇaśoṇitam avekṣya duṣṭam aduṣṭaṃ veti tatra vātaduṣṭe dhānyāmloṣṇodakābhyāṃ pittaduṣṭe śītodakapayobhyāṃ śleṣmaduṣṭe surāmaṇḍoṣṇodakābhyāṃ prakṣālya karṇau punar avalikhyānunnatam ahīnam aviṣamaṃ ca karṇasandhiṃ sanniveśya sthitaraktaṃ sandadhyāt | tato madhughṛtenābhyajya picuprotayor anyatareṇāvaguṇṭhya sūtreṇānavagāḍhaman atiśithilaṃ ca baddhvā kapālacūrṇenāvakīryācārikam upadiśed dvivraṇīyoktena ca vidhānenopacaret ||

bhavati cātra |

vighaṭṭanaṃ divāsvapnaṃ vyāyāmam atibhojanam |
vyavāyam agnisaṃtāpaṃ vākśramaṃ ca vivarjayet ||

(?āmatailaparīṣekaṃ trirātramavacārayet |

tatas tailena saṃsṛṣṭaṃ tryahādapanayet picum ||)

na cāśuddharaktam atipravṛttaraktaṃ kṣīṇaraktaṃ vā saṃdadhyāt | sa hi vātaduṣṭe rakte rūḍho 'pi paripuṭanavān pittaduṣṭe dāhapākarāgavedanāvān śleṣmaduṣṭe stabdhaḥ kaṇḍūmān atipravṛttarakte śyāvaśophavān kṣīṇo 'lpamāṃso na vṛddhim upaiti ||

āmatailena trirātraṃ pariṣecayet trirātrāc ca picuṃ parivartayet | sa yadā surūḍho nirupadravaḥ savarṇo bhavati tadainaṃ śanaiś śanair abhivardhayet | ato 'nyathā saṃrambhadāhapākarāgavedanāvān punaś chidyate vā ||

athāsyāpraduṣṭasyābhivardhanārtham abhyaṅgaḥ | tad yathā godhāpratudaviṣkirānūpaudakavasāmajjānau payaḥ sarpis tailaṃ gaurasarṣapajaṃ ca yathālābhaṃ saṃbhṛtyārkālarkabalātibalānantāpāmārgāśvagandhāvidārigandhākṣīraśuklājalaśūkamadhuravargapayasyāprativāpaṃ tailaṃ vā pācayitvā svanuguptaṃ nidadhyāt ||

sveditonmarditaṃ karṇaṃ snehenaitena yojayet |
ato 'nupadravaḥ samyag balavāṃś ca vivardhate ||

yavāśvagandhāyaṣṭyāhvais tilaiś codvartanaṃ hitam |
śatāvaryaśvagandhābhyāṃ payasyair aṇḍajīvanaiḥ ||

tailaṃ vipakvaṃ sakṣīram abhyaṅgāt pālivardhanam |
ye tu karṇā na vardhante svedasnehopapāditāḥ ||

teṣām apāṅgadeśe tu kuryāt pracchānam eva tu |

bāhyacchedaṃ na kurvīta vyāpadaḥ syus tato dhruvāḥ ||

baddhamātraṃ tu yaḥ karṇaṃ sahasaivābhivardhayet |
āmakośī samādhmātaḥ kṣipram eva vimucyate ||

jātaromā suvartmā ca śliṣṭasandhiḥ samaḥ sthiraḥ |
surūḍho 'vedano yaś ca taṃ karṇaṃ vardhayec chanaiḥ ||

amitāḥ karṇabandhās tu vijñeyāḥ kuśalair iha |
yo yathā suviśiṣṭaḥ syāt taṃ tathā viniyojayet ||

(karṇapālyāmayān nṝṇāṃ punar vakṣyāmi suśruta |
karṇapalyāṃ prakupaitā vātapittakaphās trayaḥ ||

dvidhā vāpy atha saṃsṛṣṭāḥ kurvanti vividhā rujaḥ |
visphoṭaḥ stabdhatā śophaḥ pālyāṃ doṣe tu vātike ||
dāhavisphoṭajananaṃ śophaḥ pākaś ca paittike |
kaṇḍūḥ saśvayathuḥ stambho gurutvaṃ ca kaphātmake ||

yathādoṣaṃ ca saṃśodhya kuryāt teṣāṃ cikitsitam |
svedābhyaṅgaparīṣekaiḥ pralepāsṛgvimokṣaṇaiḥ ||

mṛdvīṃ kriyāṃ bṛṃhaṇīyair yathāsvaṃ bhojanais tathā |
ya evaṃ vetti doṣāṇāṃ cikitsāṃ kartum arhati ||

ata ūrdhvaṃ nāmaliṅgair vakṣye pālyām upadravān |
atpāṭakaś cotpuṭakaḥ śyāvaḥ kaṇḍūyuto bhṛśam ||

avamanthaḥ sakaṇḍūko granthiko jambulas tathā |
srāvī ca dāhavāṃś caiva śṛṇveṣāṃ kramaśaḥ kriyām ||

apāmārgaḥ sarjarasaḥ pāṭalālakucatvacau |
utpāṭake pralepaḥ syāt tailam ebhiś ca pācayet ||

śampākaśigrupūtīkān godhāmedo 'tha tadvasām |
vārāhaṃ gavyam aiṇeyaṃ pittaṃ sarpiś ca saṃsṛjet ||

lepam utpuṭake dadyāt tailam ebhiś ca sādhitam |
gaurīṃ sugandhāṃ saśyāmām anantāṃ taṇḍulīyakam |

śyāve pralepanaṃ dadyāt tailam ebhiś ca sādhitam |
pāṭhāṃ rasāñjanaṃ kṣaudraṃ tathā syād uṣṇakāñjikam ||

dadyāl lepaṃ sakaṇḍūke tailam ebhiś ca sādhitam |
vraṇībhūtasya deyaṃ syād idaṃ tailaṃ vijānatā ||

madhukakṣīrakākolījīvakādyair vipācitam |
godhāvarāhasarpāṇāṃ vasāḥ syuḥ kṛtabṛṃhaṇe ||

pralepanam idaṃ dadyād avasicyāvamanthake |
prapauṇḍarīkaṃ madhukaṃ samaṅgāṃ dhavam eva ca ||

tailam ebhiś ca saṃpakvaṃ śṛṇu kaṇḍūmataḥ kriyām |
sahadevā viśvadevā ajākṣīraṃ sasaindhavam |
etair ālepanaṃ dadyāt tailam ebhiś ca sādhitam ||

granthike guṭikāṃ pūrvaṃ srāvayed avapāṭya tu |
tataḥ saindhavacūrṇaṃ tu ghṛṣṭvā lepaṃ pradāpayet ||

likhitvā tatsrutaṃ ghṛṣṭvā cūrṇair lodhrasya jambule |
kṣīreṇa pratisāryainaṃ śuddhaṃ saṃropayet tataḥ ||

madhuparṇī madhūkaṃ ca ma madhukaṃ madhunā saha |
lepaḥ srāviṇi dātavyas tailam ebhiś ca sādhitam ||

pañcavalkaiḥ samadhukaiḥ piṣṭais taiś ca ghṛtānvitaiḥ |
jīvakādyaiḥ sasarpiṣkair dahyamānaṃ pralepayet ||)

viśleṣitāyās tv atha nāsikāyā
vakṣyāmi sandhānavidhiṃ yathāvat |
nāsāpramāṇaṃ pṛthivīruhāṇāṃ
patraṃ gṛhītvā tv avalambi tasya ||

tena pramāṇena hi gaṇḍapārśvād
utkṛtya baddhaṃ tv atha nāsikāgram |
vilikhya cāśu pratisaṃdadhīta
tat sādhubandhair bhiṣag apramattaḥ ||

susaṃhitaṃ samyag ato yathāvan
nāḍīdvayenābhisamīkṣya baddhvā |
pronnamya cainām avacūrṇayet tu
pataṅgayaṣṭīmadhukāñjanaiś ca ||

saṃchādya samyak picunā sitena
tailena siñced asakṛt tilānām |
ghṛtaṃ ca pāyyaḥ sa naraḥ sujīrṇe
snigdho virecyaḥ sa yathopadeśam ||

rūḍhaṃ ca sandhānam upāgataṃ syāt
tad ardhaśeṣaṃ tu punar nikṛntet |
hīnāṃ punar vardhayituṃ yateta
samāṃ ca kuryād ativṛddhamāṃsām ||

nāḍīyogaṃ vinauṣṭhasya nāsāsandhānavad vidhim |
ya evam eva jānīyāt sa rājñaḥ kartum arhati ||

iti śrīsuśrutasaṃhitāyāṃ sūtrasthāne karṇavyadhabandhavidhirnāma ṣoḍaśo 'dhyāyaḥ ||

saptadaśo 'dhyāyaḥ |

athāta āmapakvaiṣaṇīyam adhyāyaṃ vyākhyāsyāmaḥ ||

yathovāca bhagavān dhanvantariḥ ||

śophasamutthānā granthividradhyalajīprabhṛtayaḥ prāyeṇa vyādhayo 'bhihitā anekākṛtayaḥ tair vilakṣaṇaḥ pṛthurgrathitaḥ samo viṣamo vā tvaṅnāṃsasthāyī doṣasaṃghātaḥ śarīraikadeśotthitaḥ śopha ity ucyate ||

sa ṣaḍvidho vātapittakaphaśoṇitasannipātāgantunimittaḥ | tasya doṣarūpavyañjanair lakṣaṇāni vyākhyāsyāmaḥ | tatra vātaśopho 'ruṇaḥ kṛṣṇo vā paruṣo mṛduranavasthitāstodāyaś cātra vedanāviśeṣā bhavanti pittaśophaḥ pīto mṛduḥ sarakto vā śīghrānusāryoṣādayaś cātra vedanāviśeṣā bhavanti śleṣmaśophaḥ pāṇḍuḥ śuklo vā kaṭhinaḥ śitaḥ snigdho mandānusārī kaṇḍvādayaś cātra vedanāviśeṣā bhavanti sarvavarṇavedanaḥ sannipātajaḥ pittavacchoṇitajo 'tikṛṣṇaś ca pittaraktalakṣaṇa āganturlohitāvabhāsaś ca ||

sa yadā bāhyābhyantaraiḥ kriyāviśeṣair na saṃbhāvitaḥ praśamayituṃ kriyāviparyayādbahutvād vā doṣāṇāṃ tadā pākābhimukho bhavati | tasyāmsya pacyamānasya pakvasya ca lakṣaṇamucyamānam upadhāraya | tatra mandoṣmatā tvaksavarṇatā śītaśophatā sthairyaṃ mandavedanatā'lpaśophatā cāmalakṣaṇamuddiṣṭaṃ sūcibhir iva nistudyate daśyata iva pipīlikābhis tābhiś ca saṃsarpyata iva chidyata iva śastreṇa bhidyata iva śaktibhis tāḍyata iva daṇḍena pīḍyata iva pāṇinā ghaṭyata iva cāṅgulyā dahyate pacyata iva cāgnikṣārābhyāṃ oṣacoṣaparīdāhāś ca bhavanti vṛś cikaviddha iva ca sthānāsanaśayaneṣu na śāntim upaiti ādhmātabastirivātataś ca śopho bhavati tvagvaivarṇyaṃ śophābhivṛddhirjvaradāhapipāsā bhaktāruciś ca pacyamānaliṅgaṃ vedanopaśāntiḥ pāṇḍutā'lpaśophatā valīprādurbhāvastvakparipuṭanaṃ nimnadarśanamaṅgulyā'vapīḍite pratyunnamanaṃ bastāvivodakasaṃcaraṇaṃ pūyasya prapīḍayatyekamantamante vā'vapīḍite muhurmuhustodaḥ kaṇḍūrunnatatā vyādherupadravaśāntirbhaktābhikāṅkṣā ca pakvaliṅgam ||

kaphajeṣu tu rogeṣu gambhīragatitvād abhighātajeṣu vā keṣucid asamastaṃ pakvalakṣaṇaṃ dṛṣṭvā pakvam apakvam iti manyamāno bhiṣaṅnoham upaiti | yatra hi tvaksavarṇatā śītaśophatā sthaulyamalparujatā'śmavac ca ghanatā na tatra moham upeyād iti ||

bhavanti cātra |

āmaṃ vipacyamānaṃ ca samyak pakvaṃ ca yo bhiṣak |

jānīyāt sa bhavedvaidyaḥ śeṣāstaskaravṛttayaḥ ||

vātādṛte nāsti rujā na pākaḥ pittādṛte nāsti kaphāc ca pūyaḥ |

tasmāt samastāḥ paripākakāle pacanti śophāṃstraya eva doṣāḥ ||

kālāntareṇābhyuditaṃ tu pittaṃ kṛtvā vaśe vātakaphau prasahya |

pacaty ataḥ śoṇitam eva pāko mato 'pareṣāṃ viduṣāṃ dvitīyaḥ ||

tatra āmacchede māṃsasirāsnāyvasthisandhivyāpādanam atimātraṃ śoṇitātipravṛttir vedanāprādurbhāvo 'vadaraṇam anekopadravadarśanaṃ kṣatavidradhirvā bhavati | sa yadā bhayamohābhyāṃ pakvam apy apakvam iti manyamānaś ciram upekṣate vyādhiṃ vaidyas tadā gambhīrānugato dvāram alabhamānaḥ pūyaḥ svam āśrayam avadā(ā.dī)ryotasaṅgaṃ mahāntam avakāśaṃ kṛtvā nāḍīṃ janayitvā kṛcchrasādhyo bhavaty asādhyo veti ||

bhavanti cātra |

yaś chinatty āmam ajñānād yaś ca pakvam upekṣate |

śvapacāv iva mantavyau tāv aniścitakāriṇau ||

prāk śastrakarmaṇaś ceṣṭaṃ bhojayed āturaṃ bhiṣak |

madyapaṃ pāyayen madyaṃ tīkṣṇaṃ yo vedanāsahaḥ ||

na mūrcchaty annasaṃyogān mattaḥ śastraṃ na budhyate |

tasmād avaśyaṃ bhoktavyaṃ rogeṣūkteṣu karmaṇi ||

prāṇo hy ābhyantaro nṇṇāṃ bāhyaprāṇaguṇānvitaḥ |

dhārayaty avirodhena śarīraṃ pāñcabhautikam ||

alpo mahān vā kriyayā vinā yaḥ samucchritaḥ pākam upaiti śophaḥ |

viśālamūlo viṣamo vidagdhaḥ sa kṛcchritāṃ yāty avagāḍhadoṣaḥ ||

ālepavisrāvaṇaśodhanais tu samyak prayukair yadi nopaśāmyet |

pacyet śīghraṃ samam alpamūlaḥ sa piṇḍitaś copari connataḥ syāt ||

kakṣaṃ samāsādya yathaiva vahnir vāte(ā.yvī)ritaḥ saṃdahati prasahya |

tathaiva pūyo 'py aviniḥsṛto hi māṃsaṃ sirāḥ snāyu ca khādatīha ||

ādau vimlāpanaṃ kuryād dvitīyam avasecanam |

tṛtīyam upanāhaṃ tu caturthīṃ pāṭanakriyām ||

pañcamaṃ śodhanaṃ kuryāt ṣaṣṭhaṃ ropaṇam iṣyate |

ete kramā vraṇasyoktāḥ saptamaṃ vaikṛtāpaham ||

iti suśrutasaṃhitāyāṃ sūtrasthāne āmapakvaiṣaṇīyo 'nāma saptadaśo 'dhyāyaḥ ||

aṣṭādaśo 'dhyāyaḥ |

athāto vraṇālepanabandhavidhim adhyāyaṃ vyākhyāsyāmaḥ ||

yathovāca bhagavān dhanvantariḥ ||

ālipa ādya upakramaḥ eṣa sarvaśophānāṃ sāmānyaḥ pradhānatamaś ca taṃ ca pratirogaṃ vakṣyāmaḥ tato bandhaḥ pradhānaṃ tena śuddhirvraṇaropaṇamasthisaṃdhisthairyaṃ ca ||

tatra pratilomamālimpennānulomam | pratilome hi samyagauṣadhamavatiṣṭhate 'nupraviśati romakūpān svedavāhibhiś ca sirāmukhairvīryaṃ prāpnoti ||

na ca śuṣyamāṇamupekṣeta anyatra pīḍayitavyāt śuṣko hy apārthako rukkaraś ca ||

sa trividhaḥ pralepaḥ pradeha ālepaś ca | teṣām antaraṃ pralepaḥ śītas tanur aviśoṣī viśoṣī ca pradehas tūṣṇaḥ śīto vā bahalo 'bahur aviśoṣī ca madhaymo 'trālepaḥ | tatra raktapittaprasādakṛd ālepaḥ pradeho vātaśleṣmapraśamanaḥ saṃdhānaḥ śodhano ropaṇaḥ śophavedanāpahaś ca tasyopayogaḥ kṣatākṣateṣu yas tu kṣateṣūpayujyate sa bhūyaḥ kalka iti saṃjñāṃ labhate niruddālepanasaṃjñaḥ tenāsrāvasannirodho mṛdutā pūtimāṃsāpakarṣaṇam anantardoṣatā vraṇaśuddhiś ca bhavati ||

avidagdheṣu śopheṣu hitam ālepanaṃ bhavet |

yathāsvaṃ doṣaśamanaṃ dāhakaṇḍūrujāpaham ||

tvakprasādanam evāgryaṃ māṃsaraktaprasādanam |

dāhapraśamanaṃ śreṣṭhaṃ todakaṇḍūvināśanam ||

marmadeśeṣu ye togā guhyeṣv api tathā nṛām |

saṃśodhanāya teṣāṃ hi kuryād ālepanaṃ bhiṣak ||

(?ṣaḍbhāgaṃ paittike snehaṃ catrubhāgaṃ tu vātike |

aṣṭabhāgaṃ tu kaphaje snehamātrāṃ pradāpayet ||)

tasya pramāṇamārdramāhiṣacarmotsedham upadiśanti ||

na cālepaṃ rātrau prayuñjīta mābhūc chaityapihitoṣmaṇas tad anirgamād vikārapravṛtti(ā.ddhi)r iti ||

pradehasādhye vyādhau tu hitam ālepanaṃ divā |

pittaraktābhighātotthe saviṣe ca viśeṣataḥ ||

na ca paryuṣitaṃ lepaṃ kadācidavacārayet |

uparyupari lepaṃ tu na kadācit pradāpayet ||

ūṣmāṇaṃ vedanāṃ dāhaṃ ghanatvājjanayet sa hi |

na ca tenaiva lepena pradehaṃ dāpayet punaḥ |

śuṣkabhāvāt sa nirvīryo yukto 'pi syād apārthakaḥ ||

ata ūrdhvaṃ vraṇabandhanadravyāṇy upadekṣyāmaḥ tad yathā kṣaumakārpāsāvikadukūlakauśeyapatrorṇacīnapaṭṭacarmāntarvalkalālābūśakalalatāvidalarajjutūlaphalasantānikālauhānīti teṣaṃ vyādhiṃ kālaṃ cāvekṣyopayogaḥ prakaraṇataś caiṣām ādeśaḥ ||

tatra kośadāmasvastikānuvellitapra(ā.mu)tolīmaṇḍalasthagikāyamakakhaṭvācīnavibandhavitānagophaṇāḥ pañcāṅgī ceti caturdaśa bandhaviśeṣāḥ | teṣāṃ nāmabhir evākṛtayaḥ prāyeṇa vyākhyātāḥ ||

tatra kośamaṅguṣṭhāṅguliparvasu vidadhyāt dāmasaṃbādhe 'ṅge sandhikūrcakabhrūstanāntaratalakarṇeṣu svastikaṃ anuvellitaṃ tu śākhāsu grīvāmeḍhrayoḥ pratolīṃ vṛtte 'ṅge maṇḍalaṃ aṅguṣṭhāṅgulimeḍhrāgreṣu sthagikāṃ yamalavraṇayor yamakaṃ hanuśaṅkhagaṇḍeṣu khaṭvāṃ apāṅgayoś cīnaṃ pṛṣṭhodaroraḥsu vibandhaṃ mūrdhani vitānaṃ cibukanāsauṣṭhāṃsabastiṣu gophaṇāṃ jatruṇa ūrdhvaṃ pañcāṅgīm iti yo vā yasmin śarīrapradeśe suniviṣṭo bhavati taṃ tasmin vidadhyāt ||

yantraṇam ūrdhvamadhistiryak ca ||

tatra ghanāṃ kavalikāṃ dattvā vāmahastaparikṣepamṛjum anāviddham asaṃkucitaṃ mṛdu paṭṭaṃ niveśya badhnīyāt | na ca vraṇasyopari kuryād granthim ābādhakaraṃ ca ||

na ca vikeśikauṣadhe 'tisnigdhe 'tirūkṣe viṣame vā kurvīta yasmād atisnehāt kledo raukṣyāc chedo durnyāsāhraṇavartmāvagharṣaṇam iti ||

tatra vraṇayatanaviśeṣād bandhaviśeṣas trividho bhavati gāḍhaḥ samaḥ śithila iti ||

pīḍayannarujo gāḍhaḥ socchvāsaḥ śithilaḥ smṛtaḥ |

naiva gāḍho na śithilaḥ samo bandhaḥ prakīrtitaḥ ||

tatra sphikkukṣikakṣāvaṅkṣaṇoruśiraḥsu gāḍhaḥ śākhāvadanakarṇakaṇṭhameḍhramuṣkapṛṣṭhapārśvodaroraḥsu samaḥ akṣṇoḥ sandhiṣu ca śithila ti ||

tatra paittikaṃ gāḍhasthāne samaṃ badhnīyāt samasthāne śithilaṃ śithilasthāne naiva evaṃ śoṇitaduṣṭaṃ ca ślaiṣmikaṃ śithilasthāne samaṃ samasthāne gāḍhaṃ gāḍhasthāne gāḍhataraṃ evaṃ vātaduṣṭaṃ ca ||

tatra paittikaṃ śaradi grīṣme dvirahno badhnīyāt raktopadrutamapyevaṃ ślaiṣmikaṃ hemantavasantayostryahāt vātopadrutamapyevam | evamabhyūhya bandhaviparyayaṃ ca kuryāt ||

tatra samaśithilasthāneṣu gāḍhaṃ baddhe vikeśikauṣadhanair arthakyaṃ śophavedanāprādurbhāvaś ca gāḍhasamasthāneṣu śithilaṃ baddhe vikeśikauṣadhapatanaṃ paṭṭasaṃcārāhraṇavartmāvagharṣanam iti gāḍhaśithilasthāneṣu samaṃ baddhe ca guṇābhāva iti ||

aviparītabandhe vedanopaśāntir asṛkprasādo mārdavaṃ ca ||

abadhyamāno daṃśamaśakatṛṇakāṣṭhopalapāṃśuśītavātātapaprabhṛtibhir viśeṣair abhihanyate vraṇo vividhavedanopadrutaś ca duṣṭatām upaity ālepanādīni cāsya viśoṣam upayānti ||

cūrṇitaṃ mathitaṃ bhagnaṃ viśliṣṭam atipātitam |

asthisnāyusirācchinnam āśu bandhena rohati ||

sukham evaṃ vraṇī śete sukhaṃ gacchati tiṣṭhati |

sukhaṃ śayyāsanasthasya kṣipraṃ saṃrohati vraṇaḥ ||

abandhyāḥ pittaraktābhighātaviṣanimittā yadā ca śophadāhapākarāgatodavedanābhibhūtāḥ kṣārāgnidagdhāḥ pākāt prakuthitapraśīrṇamāṃsāś ca bhavanti ||

kuṣṭhinām agnidagdhānāṃ piḍakā madhumehinām |

karṇikāś conduruviṣe viṣajuṣṭavraṇāś ca ye ||

māṃsāpāke na badhyante gudapāke ca dāruṇe |

svabuddhyā cāpi vibhajet kṛtyākṛtyāṃś ca buddhimān ||

deśaṃ doṣaṃ ca vijñāya vraṇaṃ ca vraṇakovidaḥ |

ṛtūṃś ca parisaṃkhyāya tato bandhān niveśayet ||

ūrdhvaṃ tiryagadhastāc ca yantraṇā trividhā smṛtā |

yathā ca badhyate bandhas tathā vakṣyāmyaśeṣataḥ ||

ghanāṃ kavalikāṃ dattvā mṛdu caivāpi paṭṭakam |

vikeśikāmauṣadhaṃ ca nātisnigdhaṃ samācaret ||

prakledayatyatisnigdhā tathā rūkṣā kṣiṇoti ca |

yuktasnehā ropayati durnyastā vartma gharṣati ||

viṣamaṃ ca vraṇaṃ kuryāt stambhayet srāvayet tathā |

yathāvraṇaṃ viditvā tu yogaṃ vaidyaḥ prayojayet ||

pittaje raktaje vā'pi sakṛteva parikṣipet |

asakṛt kaphaje vā'pi vātaje ca vicakṣaṇaḥ ||

talena pratipīḍyātha srāvayed anulomataḥ |

sarvāṃś ca bandhān gūḍhāntān sandhīṃś ca viniveśayet ||

oṣṭhasyāpyeṣa sandhāne yathoddiṣṭo vidhiḥ smṛtaḥ |

buddhyotprekṣyābhiyuktena tathā cāsthiṣu jānatā ||

uttiṣṭhato niṣaṇṇasya śayanaṃ vā'dhigacchataḥ |

gacchato vividhair yānair nāsya duṣyati sa vraṇaḥ ||

ye ca syur māṃsasaṃsthā vai tvaggatāś ca tathā vraṇāḥ |

sandhyasthikoṣṭhaprāptāś ca sirāsnāyugatās tathā ||

tathā'vagāḍhagambhīrāḥ sarvato viṣamasthitāḥ |

naite sādhayituṃ śakyā ṛte bandhādbhavanti hi ||

iti suśrutasaṃhitāyāṃ sūtrasthāne vraṇālepanabandhavidhirnāmāṣṭādaśo 'dhyāyaḥ ||

ekonaviṃśo 'dhyāyaḥ |

athāto vraṇitopāsanīyam adhyāyaṃ vyākhyāsyāmaḥ ||

yathovāca bhagavān dhanvantriḥ ||

vraṇitasya prathamamevāgāramanvicchet taccāgāraṃ praśastavāstvād ikaṃ karyam ||

praśastavāstuni gṛhe śucāvātapavarjite |

nivāte na ca rogāḥ syuḥ śārīrāgantumānasāḥ ||

tasmin śayanamasaṃbādhaṃ svāstīrṇaṃ manojñaṃ prākśiraskaṃ saśastraṃ kurvīt ||

sukhaceṣṭāpracāraḥ syāt svāstīrṇe śayane vraṇī |

prācyāṃ diśi sthitā devāstatpūjārthaṃ ca tacchiraḥ ||

tasmin suhṛdbhir anukūlaiḥ priyaṃvadair upāsyamāno yatheṣṭamāsīt ||

suhṛdo vikṣipantyāśu kathābhir vraṇavedanāḥ |

āśvāsayanto bahuśastvanukūlāḥ priyaṃvadāḥ ||

na ca divānidrāvaśagaḥ syāt ||

divāsvapnāddraṇe kaṇḍūrgātrāṇāṃ gauravaṃ tathā |

śvayathurvedanā rāgaḥ srāvaś caiva bhṛśaṃ bhavet ||//

utthānasaṃveśanaparivartanacaṅkramaṇoccair bhāṣaṇādyāsvātmaceṣṭāsvapramatto vraṇaṃ saṃrakṣet ||

sthānāsanaṃ caṅkramaṇaṃ divāsvapnaṃ tathaiva ca |

vraṇito na niṣeveta śaktimān api mānavaḥ ||

utthānādyāsanaṃ sthānaṃ śayyā cātiniṣevitā |

prāpnuyānmārutādaṅge rujastasmād vivarjayet ||

gamyānāṃ ca strīṇāṃ saṃdarśanasaṃbhāṣaṇasaṃsparśanāni dūrataḥ pariharet ||

strīdarśanādibhiḥ śukraṃ kadāciccalitaṃ sravet |

grāmyadharmakṛtāndoṣān so 'saṃsarge 'pyavāpnuyāt ||

navadhānyamāṣatilakalāyakulatthaniṣpāvaharitakaśākāmlalavaṇakaṭukaguḍapiṣṭavikṛtivallūraśuṣkaśākājāvikānūpaudakamāṃsavasāśītodakakṛśarāpāyasadadhidugdhatakraprabhṛtīn pariharet ||

takrānto navadhānyādiryo 'yaṃ varga udāhṛtaḥ |

doṣasaṃjanano hyeṣa vijñeyaḥ pūyavardhanaḥ ||

madyapaś ca maireyāriṣṭāsavaśīdhusurāvikārān pariharet ||

madyamamlaṃ tathā rūkṣaṃ tīkṣṇamuṣṇaṃ ca vīryataḥ |

āśukāri ca tat pītaṃ kṣipraṃ vyāpādayed draṇam ||

vātātaparajodhūmāvaśyāyātisevanātibhojanāniṣṭabhojanāśravaṇadarśanerṣyāmarṣabhayakrodhaśokadhyānarātrijāgaraṇaviṣamāśanaśayanopavāsavāgvyāyāmasthānacaṅkramaṇaśītavātaviruddhādhyaśanājīrṇamakṣikādyā bādhāḥ pariharet ||

vraṇinaḥ saṃprataptasya kāraṇair evam ādibhiḥ |

kṣīṇaśoṇitamāṃsasya bhuktaṃ samyaṅga jīryati ||

ajīrṇāt pavanādīnāṃ vibhramo balavān bhavet |

tataḥ śopharujāsrāvadāhapākānavāpnuyāt ||

sadā nīcanakharomṇā śucinā śuklavāsasā śāntimaṅgaladevatābrāhmaṇagurupareṇa bhavitavyam iti | tat kasya hetoḥ hiṃsāvihārāṇi hi mahāvīryāṇi rakṣāṃsi paśupatikuberakumārānucarāṇi māṃsaśoṇitapriyatvāt kṣatajanimittaṃ vraṇinam upasarpanti satkārārthaṃ jighāṃsūni vā kadācit ||

bhavati cātra |

teṣāṃ satkārakāmānāṃ prayatetāntarātmanā |

dhūpabalyupahārāṃś ca bhakṣyāṃś caivopahārayet ||

te tu saṃtarpitā ātmavantamk na hiṃsyuḥ | tasmāt satatamatandrito janaparivṛto nityaṃ dīpodakaśastrasragdāmapuṣpalājādyalaṅkṛte veśmani sāṃpanmaṅgalamano 'nukūlāḥ kathāḥ śṛṇvannāsīta ||

saṃpadādyanukūlābhiḥ kathābhiḥ prītamānasaḥ |

āśāvān vyādhimokṣāya kṣipraṃ sukhamavāpnuyāt ||

ṛgyajuḥsāmātharvavedābhihitair aparaiś cāśīrvidhānair upādhyāyā bhiṣajaś ca sandhyayo rakṣāṃ kuryuḥ ||

sarṣapāriṣṭapatrābhyāṃ sarpiṣā lavaṇena ca |

dvirahnaḥ kārayed dhūpaṃ daśarātramatandritaḥ ||

chatrāmaticchatrāṃ lāṅgū(ā.ṅga)līṃ jaṭilāṃ brahmacāriṇīṃ lakṣmīṃ guhāmatiguhāṃ vacāmativiṣāṃ śatavīryāṃ sahasravīryāṃ siddhārthakāṃś ca śirasā dhārayet ||

vyajyeta bālavyajanair vraṇaṃ na ca vighaṭṭayet |
na tuden na ca kaṇḍūyec chayānaḥ paripālayet ||

anena vidhinā yuktam ādāv eva niśācarāḥ |
vanaṃ keśāriṇā+ākrāntaṃ varjayanti mṛgā iva ||

jīrṇaśālyodanaṃ snigdhamalpamuṣṇaṃ dravottaram |
bhuñjāno jāṅgalair māṃsaiḥ śīghraṃ vraṇam apohati ||

taṇḍulīyakajīvantīsuniṣaṇṇakavāstukaiḥ |
bālamūlakavātārkapaṭolaiḥ kāravellakaiḥ ||

sadāḍimaiḥ sāmalakair ghṛtabhṛṣṭaiḥ sasaindhavaiḥ |
anyair evaṃguṇair vā'pi mudgādīnāṃ rasena vā ||
śaktūn vilepīṃ kulmāṣaṃ jalaṃ cāpi śṛtaṃ pibet |

divā na nidrāvaśago nivātagṛhagocaraḥ ||
vraṇī vaidyavaśe tiṣṭhan śīghraṃ vraṇamapohati |

vraṇe śvayathurāyāsāt sa ca rāgaś ca jāgarāt |
tau ca ruk ca divāsvāpāt tāś ca mṛtyuś ca maithunāt ||

evaṃvṛttasamācāro vraṇī saṃpadyate sukhī |
āyuś ca dīrgham āpnoti dhanvantarivaco yathā ||

iti śrīsuśrutasaṃhitāyāṃ sūtrasthāne vraṇitopāsanīyo namaikonaviṃśo 'dhyāyaḥ ||

viṃśatitamo 'dhyāyaḥ |

athāto hitāhitīyam adhyāyaṃ vyākhyāsyāmaḥ ||

yathovāca bhagavān dhanvantariḥ ||

yadvāyoḥ pathyaṃ tat pittasyāpathyam ity anena hetunā na kiṃcid dravyam ekāntena hitam ahitaṃ vā'stīti kecid ācāryā bruvate | tat tu na samyak | iha khalu yasmād dravyāṇi svabhāvataḥ saṃyogataś caikāntahitāny ekāntāhitāni hitāhitāni ca bhavanti ||

tatra ekāntahitāni jātisātmyāt salilaghṛtadugdhaudanaprabhṛtīni ekāntāhitāni tu dahanapacanamāraṇādiṣu pravṛttānyagnikṣāraviṣādīni saṃyogādaparāṇi viṣatulyāni bhavanti hitāhitāni tu yadvāyoḥ pathyaṃ tatpittasyāpathyam iti ||

ataḥ sarvaprāṇināmayamāhārārthaṃ varga upadiśyate tad yathā raktaśaliṣaṣṭikakaṅgukamukundakapāṇḍukapītakapramodakakālakāsanapuṣpakakardamakaśakunāhṛtasugandhakakalamanīvārakodravoddālakaśyāmākagodhūmaveṇuyavādaya eṇahariṇakuraṅgamṛgamātṛkāśvadaṃṣṭrākarālakrakarakapotalāvatittirikapiñjalavartīravartikādīnāṃ māṃsāni mudgavanamudgamakuṣṭhakalāyamasūramaṅgalyacaṇakahareṇvāḍhakīsatīnāḥ cillivāstukasuniṣaṇṇakajīvantītaṇḍulīyakamaṇḍūkaparṇyaḥ gavyaṃ ghṛtaṃ saindhavadāḍimāmalakam ity eṣa vargaḥ sarvaprāṇināṃ sāmānyataḥ pathyatamaḥ ||

tathā brahmacaryanivātaśayanoṣṇodakasnānaniśāsvapnavyāyāmāś caikāntataḥ pathyatamāḥ ||

ekāntahitānyekāntāhitāni ca prāgupadiṣṭāni hitāhitāni tu yadvāyoḥ pathyaṃ tatpittasyāpathyam iti ||

saṃyogatastvaparāṇi viṣatulyāni bhavanti | tad yathā vallīphalakavakakarīrāmlaphalalavaṇakulatthapiṇyākadadhitailavirohipiṣṭaśuṣkaśākājāvikamāṃsamadyajāmbavacilicimamatsyagodhāvarāhāṃś ca naikadhyamaśnīyāt payasā ||

rogaṃ sātmyaṃ ca deśaṃ ca kālaṃ dehaṃ ca buddhimān |

avekṣyāgnyādikān bhāvān rogavṛtteḥ prayojayet ||

avasthāntarabāhulyādrogādīnāṃ vyavasthitam |

dravyaṃ necchanti bhiṣaja icchanti svastharakṣaṇe ||

dvayor anyatarādāne vadanti viṣadugdhayoḥ |

dugdhasyaikāntahitatāṃ viṣamekāntato 'hitam ||

evaṃ yuktaraseṣveṣu dravyeṣu salilādiṣu |

ekāntahitatāṃ viddhi vatsa suśrta nānyathā ||

ato 'nyāny api saṃyogādahitāni vakṣyāmaḥ na vavirūḍhadhānyair vasāmadhupayoguḍamāṣair vā grāmyānūpaudakapiśitādīni nābhyavaharet na payomadhubhyāṃ rohiṇīśākaṃ jātukaśākaṃ vā'śnīyāt balākāṃ vāruṇīkulmāṣābhyāṃ kākamācīṃ pippalīmaricābhyāṃ nāḍībhaṅgaśākakukkuṭadadhīni ca naikadhyaṃ madhu coṣṇodakānupānaṃ pittena cāmamāṃsāni surākṛśarāpāyasāṃś ca naikadhyaṃ sauvīrakeṇa saha tilaśaṣkulīṃ matsyaiḥ sahekṣuvikārān guḍena kākamācīṃ madhunā mūlakaṃ guḍena vārāhaṃ madhunā ca saha viruddhaṃ kṣīreṇa mūlakamāmrajāmbavaśvāvicchūkaragodhāś ca sarvāṃś ca matsyān payasā viśeṣeṇa cilicimaṃ kadalīphalaṃ tālaphalena payasā dadhnā takreṇa vā lakucaphalaṃ payasā dadhnā māṣasūpena vā prāk payasaḥ payaso 'nte vā ||

ataḥ karmaviruddhān vakṣyāmaḥ kapotān sarṣapatailabhṛṣṭānnādyāt kapiñjalamayūralāvatittirigodhāś cairaṇḍadārvyagnisiddhā eraṇḍatailasiddhā vā nādyāt kāṃsyabhājane daśarātraparyuṣitaṃ sarpiḥ madhu coṣṇair uṣṇe vā matsyaparipacane śrṇgaveraparipacane vā siddhāṃ kākamācīṃ tilakalkasiddhamupodikāśākaṃ nārikelena varāhavasā paribhṛṣṭāṃ balākāṃ bhāsamaṅgāraśūlyaṃ nāśnīyād iti ||

ato mānaviruddhān vakṣyāmaḥ madhvambunī madhusarpiṣī mānatastulye nāśnīyāt snehau madhusnehau jalasnehau vā viśeṣādāntarīkṣodakānupānau ||

ata ūrdhvaṃ rasadvandvāni rasato vīryato vipākataś ca viruddhāni vakṣyāmaḥ tatra madhurāmlau rasavīryaviruddhau madhuralavaṇau ca madhurakaṭukau ca sarvataḥ madhuratiktau rasavipākābhyāṃ madhurakaṣāyau ca amlalavaṇau rasataḥ amlakaṭukau rasavipākābhyāṃ amlatiktāvamlakaṣāyau ca sarvataḥ lavaṇakaṭukau rasavipākābhyāṃ lavaṇatiktau lavaṇakaṣāyau ca sarvataḥ kaṭutiktau rasavīryābhyāṃ kaṭukaṣāyau ca tiktakaṣāyau rasataḥ ||

taratamayogayuktāṃś ca bhāvānatirūkṣānatisnigdhānatyuṣṇānatiśītānity evam ādīn vivarjayet ||

bhavanti cātra |

viruddhānyevamādīni vīryato yāni kāni ca |

tānyekāntāhitānyeva śeṣaṃ vidyāddhitāhitam ||

vyādhimindriyadaurbalyaṃ maraṇaṃ cādhigacchati |

viruddharasavīryāṇi bhuñjāno 'nātmavān naraḥ ||

yatkiṃciddoṣamutkleśya bhuktaṃ kāyānna nirharet |

rasādiṣvayathārthaṃ vā tadvikārāya kalpate ||

viruddhāśanajān rogān pratihanti virecanam |

vamanaṃ śamanaṃ vā'pi pūrvaṃ vā hitasevanam ||

sātymyato 'lpatayā vā'pi dīptāgnestaruṇasya ca |

snigdhavyāyāmabalināṃ viruddhaṃ vitathaṃ bhavet ||

atha vātaguṇān vakṣyāmaḥ

pūrvaḥ samadhuraḥ snigdho lavaṇaś caiva mārutaḥ |

gururvidāhajanano raktapittābhivardhanaḥ ||

kṣatānāṃ viṣajuṣṭānāṃ vraṇinaḥ śleṣmalāś ca |

teṣām eva viśeṣeṇa sadā rogavivardhanaḥ ||

vātalānāṃ praśastaś ca śrāntānāṃ kaphaśoṣiṇām |

teṣām eva viśeṣeṇa vraṇakledavivardhanaḥ ||

madhuraś cāvidāhī ca kaṣāyānuraso laghuḥ |

dakṣiṇo mārutaḥ śreṣṭhaś cakṣuṣyo balavardhanaḥ ||

raktapittapraśamano na ca vātaprakopaṇaḥ |

viśado rūkṣaparuṣaḥ kharaḥ snehabalāpahaḥ ||

paścimo mārutastīkṣṇaḥ kaphamedoviśoṣaṇaḥ |

sadyaḥ prāṇakṣayakaraḥ śoṣaṇas tu śarīriṇām ||

uttaro mārutaḥ snigdho mṛdurmadhura eva ca |

kaṣāyānurasaḥ śīto doṣāṇāṃ cāprakopaṇaḥ ||

tasmāc ca prakṛtisthānāṃ kledano balavardhanaḥ |

kṣīṇakṣayaviṣārtānāṃ viśeṣeṇa tu pūjitaḥ ||

iti suśrutasaṃhitāyāṃ sūtrasthāne hitāhitīyo nāma viṃśo 'dhyāyaḥ ||

ekaviṃśatitamo 'dhyāyaḥ |

athāto vraṇapraśnam adhyāyaṃ vyākhyāsyāmaḥ ||

yathovāca bhagavān dhanvantariḥ ||

vātapittaśleṣmāṇa eva dehasaṃbhavahetavaḥ | tair evāvyāpannair adhomadhyor dhvasanniviṣṭaiḥ śarīramidaṃ dhāryate 'gāram iva sthūṇābhis tisṛbhir ataś ca tristhūṇamāhureke | ta eva ca vyāpannāḥ pralayahetavaḥ | tadebhir eva śoṇitacaturthaiḥ saṃbhavasth itipralayeṣv apyavirahitaṃ śarīraṃ bhavati ||

bhavati cātra |

narte dehaḥ kaphādasti na pittānna ca mārutāt |

śoṇitād api vā nityaṃ deha etais tu dhāryate ||

tatra vā gatigandhanayor iti dhātuḥ tapa santāpe śliṣa āliṅgane eteṣāṃ kṛdvihitaiḥ pratyayair vātaḥ pittaṃ śleṣmeti ca rūpāṇi bhavanti ||

doṣasthānānyata ūrdhvaṃ vakṣyāmaḥ tatra samāsena vātaḥ śroṇigudasaṃśrayaḥ taduparyadho nābheḥ pakvāśayaḥ pakvāmāśayamadhyaṃ pittasya āmāśayaḥ śleṣmaṇaḥ ||

ataḥ paraṃ pañcadhā vibhajyante | tatra vātasya vātavyādhau vakṣyāmaḥ pittasya yakṛtplīhānau hṛdayaṃ dṛṣtistvak pūrvoktaṃ ca śleṣmaṇastūraḥśiraḥkaṇṭhasandhaya iti pūrvoktaṃ ca etāni khalu doṣāṇāṃ sthānānyavyāpannānām ||

visargādānavikṣepaiḥ somasūryānilā yathā |

dhārayanti jagaddehaṃ kaphapittānilās tathā ||

tatra jijñāsyaṃ kiṃ pittavyatirekādanyo 'gniḥ āhosvit pittamevāgnir iti | atrocyate na khalu pittavyatirekādanyo 'gnirupalabhyate āgneyatvāt pitte dahanapacanādiṣvabhipravartamāneṣv agnivadupacāraḥ kriyate 'ntaragnir iti kṣiṇe hy agniguṇe tatsamānadravyopayogādativṛddhe śītakriyopayogādāgamāc ca paśyāmo na khalu pittavyatirekādanyo 'gnir iti ||

taccādṛṣṭahetukena viśeṣeṇa pakvāmāśayamadhyasthaṃ pittaṃ caturvidhamannapānaṃ pacati vivecayati ca doṣarasamūtrapurīṣāṇi tatrastham eva cātmaśaktyā śeṣāṇāṃ pittasthānānāṃ śarīrasya cāgnikarmaṇā'nugrahaṃ karoti tasmin pitte pācako 'gnir iti saṃjñā yat tu yakṛtplīhnoḥ pittaṃ tasmin rañjako 'gnir iti saṃjñā sa rasasya rāgakṛduktaḥ yat pittaṃ hṛdayasaṃsthaṃ tasmin sādhako 'gnir iti saṃjñā so 'bhiprārthitamanorathasādhanakṛduktaḥ yaddṛṣṭyāṃ pittaṃ tasminnālocako 'gnir iti saṃjñā sa rūpagrahaṇādhikṛtaḥ yat tu tvaci pittaṃ tasmin bhrājako 'gnir iti saṃjñā so 'bhyaṅgapariṣekāvagāhāvalepanādīnāṃ kriyādravyāṇāṃ paktā chāyānāṃ ca prakāśakaḥ ||

pittaṃ tīkṣṇaṃ dravam pūti nīlaṃ pītaṃ tathaiva ca |

uṣṇaṃ kaṭurasaṃ caiva vidagdhaṃ cāmlam eva ca ||

ata ūrdhvaṃ śleṣmasthānānyanuvyākhyāsyāmaḥ | tatra āmāśayaḥ pittāśayasyopariṣṭhāttatpratyanīkatvād ūrdhvagatitvāt tejasaś candra iva ādityasya sa caturvidhasyāhārasyādhāraḥ sa ca tatraudakair guṇair āhāraḥ praklinno bhinnasaṃghātaḥ sukhajaraś ca bhavati ||

mādhuryāt picchilatvāc ca prakleditvāt tathaiva ca |

āmāśaye saṃbhavati śleṣmā madhuraśītalaḥ ||

sa tatrastha eva svaśaktyā śeṣāṇāṃ śleṣmasthānānāṃ śarīrasya codakakarmaṇā'nugrahaṃ karoti uraḥsthastrikasandhāraṇamātmavīryeṇānnarasasahitena hṛdayāvalambanaṃ karoti jihvāmūlakaṇṭhastho jihvendriyasya saumyatvāt samyagrasajñāne vartate śiḥrasthaḥ snehasaṃtarpaṇādhikṛtatvād indriyāṇāmātmavīryeṇānugrahaṃ karoti sandhisthas tu śleṣmā sarvasandhisaṃśleṣāt sarvasandhyagranuhaṃ karoti ||

śleṣmā śveto guruḥ snigdhaḥ picchilaḥ śīta eva ca |

madhurastvavigdhaḥ syādvidagdho lavaṇaḥ srṃtaḥ ||

śoṇitasya sthānaṃ yakṛtplīhānau tac ca prāgabhihitaṃ tatrastham eva śeṣāṇāṃ śoṇitasthānānāmanugrahaṃ karoti ||

anuṣṇaśītaṃ madhuraṃ snigdhaṃ raktaṃ ca varṇataḥ |

śoṇitaṃ guru visraṃ syādvidāhaś cāsya pittavat ||

etāni khalu doṣasthānāni eṣu saṃcīyante doṣāḥ | prāk saṃcayahetur uktaḥ | tatra saṃcitānāṃ khalu doṣāṇāṃ stabdhapūrṇakoṣṭhatā pītāvabhāsatā mandoṣmatā cāṅgānāṃ gauravamālasyaṃ cayakāraṇavidveṣaś ceti liṅgāni bhavanti | tatra prathamaḥ kriyākālaḥ ||

ata ūrdhvaṃ prakopaṇāni vakṣyāmaḥ | tatra balavadvigrahātivyāyāmavyavāyādhyayanaprapatanapradhāvanaprapīḍanābhighātalaṅghanaplavanataraṇarātrijāgaraṇabhāraharaṇagajaturagarathapadāticaryākaṭukaṣāyatiktarūkṣalaghuśītavīryaśuṣkaśākavallūravarakoddālakakoradūṣaśyāmākanīvāramudgamasūrāḍhakīhareṇukalāyaniṣpāvānaśanaviṣamāśanādhyaśanavātamūtrapurīṣaśukracchardikṣavathūdgārabāṣpavegavighātādibhir viśeṣair vāyuḥ prakopamāpadyate ||

sa śītābhrapravāteṣu gharmānte ca viśeṣataḥ |

pratyūṣasyaparāhṇe tu jīrṇe 'nne ca prakupyati ||

krodhaśokabhayāyāsopavāsavidagdhamaithunopagamanakaṭvamlalavaṇatīkṣṇoṣṇalaghuvidāhitilatailapiṇyākakulatthasarṣapātasīharitakaśākagodhāmatsyājāvikamāṃsadadhitakrakūrcikāmastusauvīrakasurāvikārāmlaphalakaṭvaraprabhṛtibhiḥ pittaṃ prakopamāpadyate ||

taduṣṇair uṣṇakāle ca meghānte ca viṣeśataḥ |

madhyāhne cārdharātre ca jīryatyanne ca kupyati ||

divāsvapnāvyāyāmālasyamadhurāmlalavaṇaśītasnigdhagurupicchilābhiṣyandihāyanakayavakanaiṣadhetkaṭamāṣamahāmāṣagodhūma-tila-piṣṭa-vikṛtidadhidugdhakṛśarāpāyasekṣu-vikārānūpaudakamāṃsavasābisamṛṇālakaserukaśṛṅgāṭakamadhura-vallī-phalasamaśanādhyaśanaprabhṛtibhiḥ śleṣmā prakopamāpadyate ||

sa śītaiḥ śītakāle ca vasante ca viśeṣataḥ |

pūrvāhṇe ca pradoṣe ca bhuktamātre prakupyati ||

pittaprakopaṇair eva cābhīkṣṇaṃ dravasnigdhagurubhir āhārair divāsvapnakrodhānalātapaśramābhighātājīrṇaviruddhādhyaśanādibhir viśeṣair asṛk prakopamāpadyate ||

yasmādraktmaṃ vinā doṣair nā kadācit prakupyati |

tasmāt tasya yathādoṣaṃ kālaṃ vidyātprakopaṇe ||

teṣāṃ prakopāt koṣṭhatodasaṃcaraṇāmlikāpipāsāparidāhānnadveṣahṛdayotkledāś ca jāyante | tatra dvitīyaḥ kriyākālaḥ ||

ata ūrdhvaṃ prasaraṃ vakṣyāmaḥ teṣām ebhir ātaṅkaviśeṣaiḥ prakupitānāṃ (paryuṣita) kiṇvodakapiṣṭasamavāya ivodriktānāṃ prasaro bhavati | teṣāṃ vāyur gatimattvāt prasaraṇahetuḥ saty apy acaitanye | sa hi rajobhūyiṣṭhaḥ rajaś ca pravartakaṃ sarvabhāvānām | yathā mahānudakasaṃcayo 'tivṛddhaḥ setumavadāryāpareṇodakena vyāmiśraḥ sarvataḥ pradhāvati evaṃ doṣāḥ kadācidekaśo dviśaḥ samastāḥ śoṇitasahitā vā'nekadhā prasaranti | tad yathā vātaḥ pittaṃ śleṣmā śoṇitaṃ vātapitte vātaśleṣmāṇau pittaśleṣmāṇau vātaśoṇite pittaśoṇite śleṣmaśoṇite vātapittaśoṇitāni vātaśleṣmaśoṇitāni pittaśleṣmaśoṇitāni vātapittakaphāḥ vātapittakaphaśoṇitāni ity evaṃ pañcadaśadhā prasanti ||

kṛtsne 'rdhe 'vayave vā'pi yatrāṅge kupito bhṛśam |

doṣo vikāraṃ nabhasi meghavattatra varṣati ||

nātyarthaṃ kupitaś cāpi līno mārgeṣu tiṣṭhati |

niṣpratyanīkaḥ kālena hetumāsādya kupyati ||

tatra vāyoḥ pittasthānagatasya pittavat pratīkāraḥ pittasya ca kaphasthānagatasya kaphavat kaphasya ca vātasthānagatasya vātavat eṣa kriyāvibhāgaḥ ||

evaṃ prakupitānāṃ prasaratāṃ ca vāyor vimārgagamanāṭopau oṣacoṣaparidāhadhūmāyanāni pittasya arocakāvipākāṅgasādāś chardiś ceti śleṣmaṇo liṅgāni bavanti tatra tṛtīyaḥ kriyākālaḥ ||

ata ūrdhvaṃ sthānasaṃśrayaṃ | evaṃ prakupitāḥ tāṃstān śarīrapradeśānāgamya tāṃstān vyādhīn janayanti | te yadodarasanniveśaṃ kurvanti tadā gulmavidradhyudarāgnisaṅgānāhavisūcikātisāraprabhṛtīn janayanti bastigatāḥ pramehāśmarīmūtrāghātamūtradoṣaprabhṛtīn vṛṣaṇagatā vṛddhīḥ meḍhragatā niruddhaprakaśopadaṃśaśūkadoṣaprabhṛtīn gudagatā bhagandarārśaḥprabhṛtīn ūrdhvajatrugatāstūrdhvajān tavaṅnāṃsaśoṇitasthāḥ kṣudrarogān kuṣṭhāni visarpāṃś ca medogatā granthyapacyarbudagalagaṇḍālajīprabhṛtīn asthigatā vidradhyanuśayīprabhṛtīn pādagatāḥ ślīpadavātaśoṇitavātakaṇṭakaprabhṛtīn sarvāṅgāgatā jvarasaravāṅgarogaprabhṛtīn teṣāmevamabhiniviṣṭānāṃ pūrvarūpaprādurbhāvaḥ taṃ pratirogaṃ vakṣyāmaḥ | tatra pūrvarūpagateṣu caturthaḥ kriyākālaḥ ||

ata ūrdhvaṃ vyādherdarśanaṃ vakṣyāmaḥ śophārbudagranthividradhivisarpaprabhṛtīnāṃ pravyaktalakṣaṇatā jvarātīsāraprabhṛtīnāṃ ca | tatra pañcamaḥ kriyākālaḥ ||

ata ūrdhvameteṣāmavadīrṇānāṃ braṇabhāvamāpannānāṃ ṣaṣṭhaḥ kriyākālaḥ jvarātisāraprabhṛtīnāṃ ca dīrghakālānubandhaḥ | tatrāpratikriyamāṇe 'sādhyatām upayānti ||

bhavanti cātra |

saṃcayaṃ ca prakopaṃ ca prasaraṃ sthānasaṃśrayam |

vyaktiṃ bhedaṃ ca yo vetti doṣāṇāṃ sa bhavedbhiṣak ||

saṃcaye 'pahṛtā doṣā labhante nottarā gatīḥ |

te tūttarāsu gatiṣu bhavanti balavattarāḥ ||

sarvair bhāvais tribhir vā'pi dvābhyāmekena vā punaḥ |

saṃsarge kupitaḥ kruddhaṃ doṣaṃ doṣo 'nudhāvati ||

saṃsarge yo garīyān syādupakramyaḥ sa vai bhavet |

śeṣadoṣāvirodhena sannipāte tathaiva ca ||

vṛṇoti yasmāt rūḍhe 'pi vraṇavas tu na naśyati |

ādehadhāraṇāttasmād draṇa ity ucyate budhaiḥ ||

iti suśrutasaṃhitāyāṃ sūtrashtāne vraṇapraśnādhyāyo nāmaikaviṃśodhyāyaḥ

dvāviṃśatitamo 'dhyāyaḥ |

athāto vraṇāsrāvavijñānīyam adhyāyaṃ vyākhyāsyamaḥ ||

yathovāca bhagavān dhanvantariḥ ||

tvaṅnāṃsasirāsnāyvasthisandhikoṣṭhamarmāṇītyaṣṭau vraṇavastūni | atra sarvavraṇasanniveśaḥ ||

tatra ādyaikavastusanniveśī tvagbhedī vraṇaḥ sūpacaraḥ śeṣāḥ svayamavaddīryamāṇā durupacārāḥ ||

tatrāyataś caturasro vṛttastripuṭaka iti vraṇākṛtisamāsaḥ śeṣās tu vikṛtākṛtayo durupakramā bhavanti ||

sarva eva vraṇāḥ kṣipraṃ saṃrohantyātmavatāṃ subhiṣagbhiś copakrāntāḥ anātmavatāmajñaiś copakrāntāḥ praduṣyanti pravṛddhatvāc ca doṣāṇāṃ ||

tatrātisaṃvṛto 'tivivṛto 'tikaṭhino 'timṛdurutsanno 'vasanno 'tiśīto 'tyuṣṇaḥ kṛṣṇaraktapītaśuklādīnāṃ varṇānām anyatamavarṇo bhairavaḥ pūtipūyamāṃsasirāsnāyuprabhṛtibhiḥ pūrṇaḥ pūtipūyāsrāvyunmārgyutsaṅgyamanojñadarśanagandho 'tyarthaṃ vedanāvān dāhapākarāgakaṇḍūśophapiḍakopadruto 'tyarthaṃ duṣṭaśoṇitāsrāvī dīrghakālānubandhī ceti duṣṭavraṇaliṅgāni | tasya doṣocchrāyeṇa ṣaṭtvaṃ vibhajya yathāsvaṃ pratīkāre prayateta ||

ata ūrdhvaṃ sarvasrāvān vakṣyāmaḥ tatra ghṛṣṭāsu chinnāsu vā tvakṣu sphoṭeṣu bhinneṣu vidāriteṣu vā salilaprakāśo bhavatyāsrāvaḥ kiṃcidvisraḥ pītāvabhāsaś ca māṃsagataḥ sadyaś chinnāsu sirāsu raktātipravṛttiḥ pakvāsu ca toyanāḍībhir iva toyāgamanaṃ pūyasya āsrāvaś cātra tanur vicchinnaḥ picchilo 'valambī śyāvo 'vaśyāyapratimaś ca snāyugataḥ snigdho ghanaḥ siṃghāṇakapratimaḥ saraktaś ca asthigato 'sthanyabhihate sphuṭite bhinne doṣāvadārite vā doṣabhakṣitatvād asthi niḥsāraṃ śuktidhautamivābhāti āsrāvaś cātra majjamiśraḥ sarudhiraḥ snigdhaś ca saṃdhigataḥ pīḍyamāno na pravartate ākuñcanaprasāraṇonnamanavinamanapradhāvanotkāsanapravāhaṇaiś ca sravati āsrāvaś cātra picchilo 'valambī saphenapūyarudhironmathitaś ca koṣṭhagato 'sṛṅnūtrapurīṣapūyodakāni sravati marmagatastvagādiṣvavaruddhatvānnocyate | tatra tvagādigatānāmāsrāvāṇāṃ yathākramaṃ pāruṣyaśyāvāvaśyāyadadhimastukṣārodakamāṃsadhāvanapulākodakasannibhatvāni mārutādbhavanti pittād gomedagomūtrabhasmaśaṅkhakaṣāyodakamādhvīkatailasannibhatvāni pittavadraktādativisratvaṃ ca kaphānnavanītakāsīsamajjapiṣṭatilanārikelodakavarāhavasāsannibhatvāni sannipātānnārikelodakair vārukarasakāñjikaprasādārukodakapriyaṅguphalayakṛnmudgayūṣasavarṇatvānīti ||

ślokau cātra bhavataḥ |

pakvāśayādasādhyas tu pulākodakasannibhiḥ |

kṣārodakanibhaḥ srāvo varjyo raktāśayātsravan ||

āmāśayāt kalāyāmbhonibhaś ca trikasandhijaḥ |

srāvānetān parīkṣyādau tataḥ karmācaredbhiṣak ||

ata ūrdhvaṃ sarvavraṇavedanā vakṣyāmaḥ todanabhedanatāḍanacchedanāyamanamanthanavikṣepaṇacum cumāyananirdahanāvabhañjanasphoṭanavidāraṇotpāṭanakampanavividhaśūlaviśleṣaṇavikiraṇapūraṇastambhanasvapnākuñcanāṅkuśikāḥ saṃbhavanti animittavividhavedanāprādurbhāvo vā muhurmuhur yatrāgacchanti vedanāviśeṣāstaṃ vātikam iti vidyāt oṣacoṣaparidāhadhūmāyanāni yatra gātramaṅgārāvakīrṇam iva pacyate yatra coṣmābhivṛddhiḥ kṣate kṣārāvasiktavac ca vedanāviśeṣāstaṃ paittikam iti vidyāt pittavadraktasamutthaṃ jānīyāt kaṇḍūrgurutvaṃ suptatvam upadeho 'lpavedanatvaṃ stambhaḥ śaityaṃ ca yatra taṃ ślaiṣmikam iti vidyāt yatra sarvāsāṃ vedanānām utpattis taṃ sānnipātikam iti vidyāt ||

ata ūrdhvaṃ vraṇavarṇān vakṣyāmaḥ bhasmakapotāsthivarṇaḥ paruṣo 'ruṇaḥ kṛṣṇa iti mārutajasya nīlaḥ pīto haritaḥ śyāvaḥ kṛṣṇo raktaḥ kapilaḥ piṅgala iti raktapittasamutthayoḥ śvetaḥ snigdhaḥ pāṇḍur iti śleṣmajasya sarvavarṇopetaḥ sānnipātika iti ||

bhavati cātra |

na kevalaṃ vraṇeṣūkto vedanāvarṇasaṃgrahaḥ |

sarvaśophavikāreṣu vraṇaval lakṣayed bhiṣak ||

trayoviṃśatitamo 'dhyāyaḥ |

athātaḥ kṛtyākṛtyavidhim adhyāyaṃ vyākhyāsyāmaḥ ||

yathovāca bhagavān dhanantariḥ ||

tatra vayaḥsthānāṃ dṛḍhānāṃ prāṇavatāṃ sattvavatāṃ ca sucikitsyā vraṇāḥekasmin vā puruṣe yatraitad guṇacatuṣṭayaṃ tasya sukhasādhanīyatamāḥ | tatra vayaḥsthānāṃ pratyagradhātutvād āśu vraṇā rohanti dṛḍhānāṃ sthirabahumāṃsatvāc chastram avacāryamāṇaṃ sirāsnāyvādiviśeṣān na prāpnoti prāṇavatāṃ vedanābhighātāhārayantraṇādibhir na glānir utpadyate sattvavatāṃ dāruṇair api kriyāviśeṣair na vyathā bhavati tasmād eteṣāṃ sukhasādhanīyatamāḥ ||

ta eva viparītaguṇā vṛddhakṛśālpaprāṇabhīruṣu draṣṭavyāḥ ||

sphikpāyuprajananalalāṭagaṇḍauṣṭhapṛṣṭhakarṇaphalakoṣodarajatrumukhābhyantarasaṃsthāḥ sukharopaṇīyā vraṇāḥ ||

akṣidantanāsāpāṅgaśrotranābhijaṭharasevanīnitambapārśvakukṣivakṣaḥkakṣāstanasandhibhāgagatāḥ saphenapūyaraktānilavāhino 'ntaḥśalyāś ca duścikitsyāḥ adhobhāgāś cordhvabhāganirvāhiṇo romāntopanakhamarmajaṅghāsthisaṃśritāś ca bhagandaram api cāntarmukhaṃ sevanīkuṭakāsthisaṃśritam ||

kuṣṭhināṃ viṣajuṣṭānāṃ śoṣiṇāṃ madhumehinām |

vraṇāḥ kṛcchreṇa sidhyanti yeṣāṃ cāpi vraṇe vraṇāḥ ||

avapāṭikāniruddhaprakaśasanniruddhagudajaṭharagranthikṣatakrimayaḥ pratiśyāyajāḥ koṣṭhajāś ca tvagdoṣiṇāṃ pramehiṇāṃ vā ye parikṣateṣu dṛśyante śarkarā sikatāmeho vātakuṇḍalikā'ṣṭhīlā dantaśarkaropakuśaḥ kaṇṭhaśālūkaṃ niṣkoṣaṇadūṣitāś ca dantaveṣṭā visarpāsthikṣatoraḥkṣatavraṇagranthiprabhṛtayaś ca yāpyāḥ ||

sādhyā yāpyatvam āyānti yāpyāś cāsādhyatāṃ tathā |

ghnanti prāṇān asādhyās tu narāṇām akriyāvatām ||

yāpanīyaṃ vijānīyāt kriyā dhārayate tu yam |

kriyāyāṃ tu nivṛttāyāṃ sadya eva vinaśyati ||

prāptā kriyā dhārayati yāpyavayādhitam āturam |

prapatiṣyadivāgāraṃ viṣkambhaḥ sādhuyoajitaḥ ||

ata ūrdhvam asādhyān vakṣyāmaḥ māṃsapiṇḍavad udgatāḥ prasekino 'ntaḥpūyavedanāvanto 'śvāpānavad udvṛttauṣṭhāḥ kecit kaṭhinā gośṛṅgavad unnatamṛdumāṃsaprarohāḥ apare duṣṭarudhirāsrāviṇastanuśītapicchilasrāviṇo vā madhyonnatāḥ kecid avasannaśuṣiraparyantāḥ śaṇatūlavat snāyujālavanto durdarśanāḥ vasāmedomajjamastuluṅgasrāviṇaś ca doṣasamutthāḥ pītāsitamūtrapurīṣavātavāhinaś ca koṣṭhasthāḥ ta evobhayatobhāgavraṇamukheṣu pūyaraktanirvāhiṇaḥ (ā.kṣīṇamāṃsānāṃ ca) sarvato gatayaś cāṇumukhā māṃsabudbudavantaḥ saśabdavātavāhinaś ca śiraḥkaṇṭhasthāḥ kṣīṇamāṃsānāṃ ca pūyaraktanirvāhiṇo 'rocakāvipākakāsaśvāsopadravayuktāḥ bhinne vā śiraḥkapāle yatra mastuluṅgadarśanaṃ tridoṣaliṅgaprādurbhāvaḥ kāsaśvāsau vā yasyeti ||

bhavanti cātra |

vasāṃ medo 'tha majjānaṃ mastuluṅgaṃ ca yaḥ sravet |

āgantus tu vraṇaḥ sidhyen na sidhyed doṣasaṃbhavaḥ ||

amarmopahite deśe sirāsandhyasthivarjite |

vikāro yo 'nuparyeti tad asādhyasya lakṣaṇam ||

krameṇopacayaṃ prāpya dhatūn anugataḥ śanaiḥ |

na śakya unmūlayituṃ vṛddho vṛkṣa ivāmayaḥ ||

sa sthiratvān mahattvāc ca dhātvanukramaṇena ca |

nihantyauṣadhavīryāṇi mantrān duṣṭagraho yathā ||

ato yo viparītaḥ syāt sukhasādhyaḥ sa ucyate |

abaddhamūlaḥ kṣupako yadvad utpāṭane sukhaḥ ||

tribhir doṣair anākrāntaḥ śyāvauṣṭhaḥ piḍakī samaḥ |

avedano nirāsrāvo vraṇaḥ śuddha ihocyate ||

kapotavarṇapratimā yasyāntāḥ kledavarjitāḥ |

sthirāś cipiṭikāvanto rohatīti tam ādiśet ||

rūḍhavartmānam agranthim aśūnam arujaṃ vraṇam |

tvaksavarṇaṃ samatalaṃ samyag rūḍhaṃ vinirdiśet ||

doṣaprakopād vyāyāmādabhighātādajīrṇataḥ |

harṣāt krodhād bhayād vā 'pi vraṇo rūḍho 'pi dīryate ||

iti suśrutasaṃhitāyāṃ sūtrasthāne kṛtyākṛtyavidhirnāma trayoviṃśo 'dhyāyaḥ ||

caturviṃśatitamo 'dhyāyaḥ |

athāto vyādhisamuddeśīyam adhyāyaṃ vyākhyāsyāmaḥ ||

yathovāca bhagavān dhanvantariḥ ||

dvividhās tu vyādhayaḥ śastrasādhyāḥ snehādikriyāsādhyāś ca | tatra śastrasādhyeṣu snehādikriyā na pratiṣidhyate snehādikriyāsādhyeṣu śastrakarma na kriyate ||

asmin punaḥ śāstre sarvatantrasāmānyāt sarveṣāṃ vyādhīnāṃ yathāsthūlam avarodhaḥ kriyate | prāgabhihitaṃ tadduḥkhasaṃyogā vyādhaya iti | tac ca duḥkhaṃ trividhaṃ ādhyātmikaṃ ādhibhautikaṃ ādhidaivikam iti | tat tu saptavidhe vyādhāv upanipatati | te punaḥ saptavidhā vyādhayaḥ tad yathā ādibalapravṛttāḥ janmabalapravṛttāḥ doṣabalapravṛttāḥ saṃghātabalapravṛttāḥ kālabalapravṛttāḥ daivabalapravṛttāḥ svabhāvabalapravṛttā iti ||

tatrādibalapravṛttā ye śukraśoṇitadoṣānvayāḥ kuṣṭhārśaḥprabhṛtayaḥ te 'pi dvividhāḥ mātṛjāḥ pitṛjāś ca | janmabalapravṛttā ye māturapacārāt paṅgujātyandhabadhiramūkaminminavāmanaprabhṛtayo jāyante te 'pi dvividhā rasakṛtāḥ dauhṛdāpacārakṛtāś ca | doṣabalapravṛttā ya ātaṅkasamutpannā mithyāhārācārakṛtāś ca te 'pi dvividhāḥ āmāśayasamutthāḥ pakvāśayasamutthāś ca | punaś ca dvividhāḥ śārīrā mānasāś ca | ta ete ādhyātmikāḥ ||

saṃghātabalapravṛttā ya āgantavo durbalasya balavadvigrahāt te 'pi dvividhāḥ śastrakṛtā vyālakṛtāś ca | ete ādhibhautikāḥ ||

kālabalapravṛttā ye śītoṣṇavātavarṣāprabhṛtinimittāḥ te 'pi dvividhāḥ vyāpannartukṛtā avyāpannartukṛtāś ca |

daivabalapravṛttā ye devadrohādabhiśastakā atharvaṇakṛtā upasargajāś ca te 'pi dvividhāḥ vidyudaśanikrtāḥ piśācādikṛtāś ca punaś ca dvividhāḥ saṃsargajā ākasmikāś ca | svabhāvabalapravṛttāḥ kṣutpipāsājarāmṛtyunidrāprabhṛtayaḥ te 'pi dvividhāḥ kālakṛtā akālakṛtāś ca tatra parirakṣaṇakṛtāḥ kālakṛtāḥ aparirakṣaṇakṛtā akālakṛtāḥ | ete ādhidaivikāḥ | atra sarvavyādhyavarodhaḥ ||

sarveṣāṃ ca vyādhīnāṃ vātapittaśleṣmāṇa eva mūlaṃ talliṅgatvād dṛṣṭaphalatvād āgamāc ca | yathā hi kṛtsnaṃ vikārajātaṃ viśvarūpeṇāvasthitaṃ sattva rajas tamāṃsi na vyatiricyante evam eva kṛtsnaṃ vikārajātaṃ viśvarūpeṇāvasthitam avyatiricya vātapittaśleṣmāṇo vartante | doṣadhātumalasaṃsargād āyatanaviśeṣān nimittataś caiṣāṃ vikalpaḥ | doṣadūṣiteṣv atyarthaṃ dhātuṣu saṃjñā kriyate rasajo 'yaṃ śoṇitajo 'yaṃ māṃsajo 'yaṃ medojo 'yaṃ asthijo 'yaṃ majjajo 'yaṃ śukrajo 'yam vyādhir iti ||

tatra annāśraddhārocakāvipākāṅgamardajvarahṛllāsatṛptigauravahṛtpāṇḍurogamārgoparodhakārśyavairasyāṅgasādākālavalipalitadarśanaprabhṛtayo rasadoṣajā vikārāḥ kuṣṭhavisarpapiḍakāmaśakanīlikātilakālakanyacchavyaṅgendraluptaplīhavidradhigulmavātaśoṇitārśo 'rbudāṅgamardāsṛgdararaktapittaprabhṛtayo raktadoṣajāḥ gudamukhameḍhrapākāś ca adhimāṃsārbudārśo 'dhijihvopajihvopakuśagalaśuṇḍikālajīmāṃsasaṃghātauṣṭhaprakopagalagaṇḍagaṇḍamālāprabhṛtayo māṃsadoṣajāḥ granthivṛddhigalagaṇḍārbudamedojauṣṭhaprakopamadhumehātisthaulyātisvedaprabhṛtayo medodoṣajāḥ adhyasthyadhidantāsthitodaśūlakunakhaprabhṭayo 'sthidoṣajāḥ tamodarśanamūrcchābhramaparvasthūlamūlārurjanmanetrābhisyandaprabhṛtayo majjadoṣajāḥ klaibyāpraharṣaśukrāśmarīśukramehaśukradoṣādayaś ca taddoṣajāḥ tvagdoṣāḥ saṅgo 'tipravṛttirayathāpravṛttir vā malāyatanadoṣāḥ indriyāṇām apravṛttir ayathā pravṛttir vendriyāyatanadoṣāḥ ity eṣa samāsa uktaḥ vistaraṃ nimittāni caiṣāṃ pratirogaṃ vakṣyāmaḥ ||

bhavati cātra |

kupitānāṃ hi doṣāṇāṃ śarīre paridhāvatām |

yatra saṅgaḥ khavaiguṇyād vyādhis tatropajāyate ||

bhūyo 'tra jijñāsyaṃ kiṃ vātādīnāṃ jvarādīnāṃ ca nityaḥ saṃśleṣaḥ paricchedo vā iti yadi nityaḥ saṃśleṣaḥ syāt tarhi nityāturāḥ sarva eva prāṇinaḥ syuḥ athāpy anyathā vātādīnāṃ jvarādīnāṃ cānyatra vartamānānām anyatra liṅgaṃ na bhavatīti kṛtvā yad ucyate vātādayo jvarādīnāṃ mūlānīti tan na | atrocyate doṣān pratyākhyāya jvarādayo na bhavanti atha ca na nityaḥ saṃbandhaḥ yathā hi vidyudvātāśanivarṣāṇyākāśaṃ pratyākhyāya na bhavanti saty apy ākāśe kadācin na bhavanti atha ca nimittatas tata evotpattir iti taraṅgabudbudādayaś codakaviśeṣāḥ eva vātādīnāṃ jvarādīnāṃ ca nāpy evam saṃśleṣo na paricchedaḥ śāśvatikaḥ atha ca nimittata evotpattir iti ||

bhavati cātra |

vikāraparimāṇaṃ ca saṃkhyā caiṣāṃ pṛthak pṛthak |

vistareṇottare tantre sarvā bādhāś ca vakṣyate ||

iti suśrutasaṃhitāyāṃ sūtrasthāne vyādhisamuddeśīyo nāma caturviṃśo 'dhyāyaḥ ||

pañcaviṃśatitamo 'dhyāyaḥ |

athāto 'ṣṭavidhaśastrakarmīyam adhyāyaṃ vyākhyāsyāmaḥ ||

yathovāca bhagavān dhanvantariḥ |

chedyā bhagandarā granthiḥ ślaiṣmikastilakālakaḥ |
vraṇavartmārbudānyarśaś carmakīlo 'sthimāṃsagam ||

śalyaṃ jatumaṇirmāṃsasaṃghāto galaśuṇḍikā |
srāyumāṃsasirākotho valmīkaṃ śataponakaḥ ||

adhruṣaś copadaṃśāś ca māṃsakandyadhimāṃsakaḥ |
bhedyā vidradhayo 'nyatra sarvajād granthayastrayaḥ ||

ādito ye visarpāś ca vṛddhayaḥ savidārikāḥ |
pramehapiḍakāśophastanarogāvamanthakāḥ ||

kumbhīkānuśayīnāḍyo vṛndau puṣkarikālajī |
prāyaśaḥ kṣudrarogāś ca puppuṭau tāludantajau ||

tuṇḍikerī gilāyuś ca pūrvaṃ ye ca prapākiṇaḥ |
bastis tathā'śmarīhetormedojā ye ca kecana ||

lekhyāś catasro rohiṇyaḥ kilāsamupajihvikā |
medojo dantavaidarbho granthirvartmādhijihvikā ||

arśāṃsi maṇḍalaṃ māṃsakandī māṃsonnatis tathā |
vedhyāḥ sirā bahuvidhā mūtravṛddhirdakodaram ||

eṣyā nāḍyaḥ saśalyāś ca vraṇā unmārgiṇaś ca |
āhāryāḥ śarkarāstisro dantakarṇamalo 'śmarī ||

śalyāni mūḍhagarbhāś ca varcaś ca nicitaṃ gude |
srāvyā vidradhayaḥ pañca bhaveyuḥ sarvajādṛte ||

kuṣṭhāni vāyuḥ sarujaḥ śopho yaś caikadeśajaḥ |
pālyāmayāḥ ślīpadāni viṣajuṣṭaṃ ca śoṇitam ||

arbudāni visarpāś ca granthayaś cāditas tu ye |
trayas trayaś copadaṃśāḥ stanarogā vidārikā ||

suṣiro galaśālūkaṃ kaṇṭakāḥ kṛmidantakaḥ |
dantaveṣṭaḥ sopakuśaḥ śītādo dantapuppuṭaḥ ||

pittāsṛkkaphajāś cauṣṭhyāḥ kṣudrarogāś ca bhūyaśaḥ |
sīvyā medaḥsamutthāś ca bhinnāḥ sulikhitā gadāḥ ||

sadyovraṇāś ca ye caiva calasandhivyapāśritāḥ |
na kṣārāgniviṣair juṣṭā na ca mārutavāhinaḥ ||

nāntarlohitaśalyāś ca teṣu samyagviśodhanam |
pāṃśuromanakhādīni calamasthi bhavec ca yat ||

ahṛtāni yato 'mūni pācayeyurbhṛśaṃ vraṇam |
rujaś ca vividhāḥ kuryustasmād etān viśodhayet ||

tato vraṇaṃ samunnamya sthāpayitvā yathāsthitam |
sīvyet sūkṣmeṇa sūtreṇa valkenāśmantakasya vā ||

śaṇajakṣaumasūtrābhyāṃ snāyvā bālena vā punaḥ |
mūrvāguḍūcītānair vā sīvyed vellitakaṃ śanaiḥ ||

sīvyed gophaṇikāṃ vā'pi sīvyed vā tunnasevanīm |
ṛjugranthim atho vā'pi yathāyogam athāpi vā ||

deśe 'lpamāṃse sandhau ca sūcī vṛttā'ṅguladvayam |
āyatā tryaṅgulā tryasrā māṃsale vā'pi pūjitā ||

dhanurvakrā hitā marmaphalakośodaropari |
ity etās trividhāḥ sūcīs tīkṣṇāgrāḥ susamāhitāḥ ||

kārayenmālatīpuṣpavṛntāgraparimaṇḍalāḥ |
nātidūre nikṛṣṭe vā sūcīṃ karmaṇi pātayet ||

dūrādrujo vraṇauṣṭhasya sannikṛṣṭe 'valuñcanam ||
atha kṣaumapicucchannaṃ susyūtaṃ pratisārayet |

priyaṅgvañjanayaṣṭyāhvarodhracūrnaiḥ samantataḥ ||

śallakīphalacūrnṇair vā kṣaumadhyāmena vā punaḥ |
tato vraṇaṃ yathāyogaṃ baddhvā+ācārikam ādiśet ||

etad aṣṭavidhaṃ karma samāsena prakīrtitam |
cikitsiteṣu kārtsnyena vistaras tasya vakṣyate ||

hīnātiriktaṃ tiryak ca gātracchedanamātmanaḥ |
etāś catasro 'ṣṭavidhe karmaṇi vyāpadaḥ smṛtāḥ |

ajñānalobhāhitavākyayoga
bhayapramohair aparaiś ca bhāvaiḥ |
yadā prayuñjīta bhiṣak kuśastraṃ
tadā sa śeṣān kurute vikārān ||

taṃ kṣāraśastrāgnibhir auṣadhaiś ca
bhūyo 'bhiyuñjānam ayuktiyuktam |
jijīviṣur dūrata eva vaidyaṃ
vivarjayed ugraviṣāhitulyam ||

tad eva yuktaṃ tv atimarmasandhīn
hiṃsyāt sirāḥ snāyum athāsthi caiva |
mūrkhaprayuktaṃ puruṣaṃ kṣaṇena
prāṇair viyuñjyādathavā kathaṃcit ||

bhramaḥ pralāpaḥ patanaṃ pramoho
viceṣṭanaṃ saṃlayanoṣṇate ca |
srastāṅgatā mūrcchanam ūrdhvavāta
s tīvrā rujo vātakṛtāś ca tās tāḥ ||

māṃsodakābhaṃ rudhiraṃ ca gacchet
sarvendriyārthoparamas tathaiva |
daśārdhasaṃkhyeṣv api hi kṣateṣu sāmānyato marmasu liṅgam uktam ||

surendragopapratimaṃ prabhūtaṃ
raktaṃ sraved vai kṣatataś ca vāyuḥ |
karoti rogān vividhān yathoktāṃś
chinnāsu bhinnāsv athavā sirāsu ||

kaubjyaṃ śarīrāvayavāvasādaḥ
kriyāsv aśaktis tumulā rujaś ca |
cirād vraṇo rohati yasya cāpi
taṃ snāyuviddhaṃ manujaṃ vyavasyet ||

śophātivṛddhis tumulā rujaś ca
balakṣayaḥ parvasu bhedaśophau |
kṣateṣu sandhiṣv acalācaleṣu syāt
sandhikarmoparatiś ca liṅgam ||

ghorā rujo yasya niśādineṣu
sarvāsv avasthāsu na śāntir asti |
tṛṣṇā'ṅgasādau śvayathuś ca rukṣaḥ
tam asthividdhaṃ manujaṃ vyavasyet ||

yathāsvam etāni vibhāvayeyur
liṅgāni marmasv abhitāḍiteṣu |
sparśaṃ na jānāti vipāṇḍuvarṇo
yo māṃsamarmaṇy abhitāḍitaḥ syāt ||

ātmānamevātha jaghanyakārī śastreṇa yo hanti hi karma kurvan |
tamātmāvānātmahanaṃ kuvaidyaṃ vivarjayed āyurabhīpsamānaḥ ||

tiryakpraṇihite śastre doṣāḥ purvamudāhṛtāḥ |
tasmāt pariharan doṣān kuruyācchastranipātanam ||

mātaraṃ pitaraṃ putrān bāndhavānapi cāturaḥ |
apyetānabhiśaṅketa vaidye viśvāsameti ca ||

visṛjatyātmanā+ātmānaṃ na cainaṃ pariśaṅkate |
tasmāt putravadevainaṃ pālayed āturaṃ bhiṣak ||

dharmārthau kīrtim ity arthaṃ satāṃ grahaṇam uttamam |
prāpnuyāt svargavāsaṃ ca hitamārabhya karmaṇā ||

karmaṇā kaścidekena dvābhyāṃ kaścittribhis tathā |
vikāraḥ sādhyate kaścic caturbhir api karmabhiḥ ||

iti suśrutasaṃhitāyāṃ sūtrasthāne 'ṣṭavidhaśastrakarmaṇyo nāma pañcaviṃśo 'dhyāyaḥ ||

ṣaḍviṃśatitamo 'dhyāyaḥ |

athātaḥ pranaṣṭaśalyavijñānīyam adhyāyaṃ vyākhyāsyāmaḥ ||

yathovāca bhagavān dhanvantiriḥ ||

śala śvala āśugamane dhātuḥ tasya śalyam iti rūpam ||

tad dvividhaṃ śārīram āgantukaṃ ca ||

sarvaśarīrābādhakaraṃ śalyaṃ tadihopadiśyata ity ataḥ śalyaśāstram ||

tatra śārīraṃ romanakhādi dhātavo 'nnamalā doṣāś ca duṣṭāḥ āgantv api śārīraśalyavyatirekeṇa yāvanto bhāvā duḥkham utpādayanti ||

adhikāro hi lohaveṇuvṛkṣatṛṇaśṛṅgāsthimayeṣu tatrāpi viśeṣato loheṣveva viśasanārthopapannatvāllohasya lohānām api durvāratvād aṇumukhatvād dūraprayojanakaratvāc ca śara evādhikṛtaḥ | sa dvividhaḥ karṇī ślakṣṇaś ca prāyeṇa vividhavṛkṣapatrapuṣpaphalatulyākṛtayo vyākhyātā vyālamṛgapakṣivaktrasadṛśāś ca ||

sarvaśalyānāṃ tu mahatāmaṇūnāṃ vā pañcavidho gativiśeṣa ūrdhvamadho 'rvācīnastiryagṛjur iti ||

tāni vegakṣayāt pratighātād vā tvagādiṣu vraṇavastuṣv avatiṣṭhante dhamanīsroto 'sthivivarapeśīprabhṛtiṣu vā śarīrapradeśeṣu || 1931 ed. 1.26.10 tatra śalyalakṣaṇam ucyamānam upadhāraya | tat tu dvividhaṃ sāmānyaṃ vaiśeṣikaṃ ca | śyāvaṃ piḍakācitaṃ śophavedanāvantaṃ muhurmuhuḥ śoṇitāsrāviṇaṃ budbudavad unnataṃ mṛdumāṃsaṃ ca vraṇaṃ jānīyāt saśalyo 'yam iti | sāmānyam etal lakṣaṇam uktam | vaiśeṣikaṃ tu tvaggate vivarṇaḥ śopho bhavaty āyataḥ kaṭhinaś ca māṃsagate śophābhivṛddhiḥ śalyamārgānupasaṃrohaḥ pīḍanāsahiṣṇutā coṣapākau ca peśyantarasthe 'py etad eva coṣaśophavarjaṃ sirāgate sirādhmānam sirāśūlaṃ sirāśophaś ca snāyugate snāyujālotkṣepaṇaṃ saṃrambhaś cogrā ruk ca srotogate srotasāṃ svakarmaguṇahāniḥ; dhamanīsthe saphenaṃ raktam īrayann anilaḥ saśabdo nirgacchaty aṅgamardaḥ pipāsā hṛllāsaś ca asthigate vividhavedanāprādurbhāvaḥ śophaś ca asthivivaragate 'sthipūrṇatā'sthitodaḥ saṃharṣo balavāṃś ca sandhigate 'sthivacceṣṭoparamaś ca koṣṭhagata āṭopānāhau mūtrapurīṣāhāradarśanaṃ ca vraṇamukhāt marmagate marmaviddhāvac ceṣṭate | sūkṣmagatiṣu śalyeṣv etāny eva lakṣaṇāny aspaṣṭāni bhavanti ||

mahānty alpāni vā śuddhadehānām anulomasanniviṣṭāni rohanti viśeṣataḥ kaṇṭhasrotaḥsirātvakpeśyasthivivareṣu doṣaprakopavyāyāmābhighātājīrṇebhyaḥ pracalitāni punarbādhante ||

tatra tvakpranaṣṭe snigdhasvinnāyāṃ mṛnmāṣayavagodhūmagomayamṛditāyāṃ tvaci yatra saṃrambho vedanā vā bhavati tatra śalyaṃ vijānīyāt styānaghṛtamṛccandanakalkair vā pradigdhāyāṃ śalyoṣmaṇā+āśu visarati ghṛtam upaśuṣyati vā lepo yatra tatra śalyaṃ vijānīyāt māṃsapranaṣṭe snehasvedādibhiḥ kriyāviśeṣair aviruddair āturam upapādayet karśitasya tu śithilībhūtam anavabaddhaṃ kṣubhyamāṇaṃ yatra saṃrambhaṃ vedanāṃ vā janayati tatra śalyaṃ vijānīyāt koṣṭhāsthisandhipeśīvivareṣv avasthitam evam eva parīkṣeta sirādhamanīsrotaḥsnāyupranaṣṭe khaṇḍacakrasaṃyukte yāne vyādhitam āropyāśu viṣame 'dhvani yāyād yatra saṃrambho vedanā vā bhavati tatra śalyaṃ jānīyāt asthipranaṣṭe snehasvedopapannānyasthīni bandhanapīḍanābhyāṃ bhṛśam upācared yatra saṃrambho vedanā vā bhavati tatra śalyaṃ jānīyāt sandhipranaṣṭe snehasvedopapannān sandhīn prasaraṇākuñcanabandhanapīḍanair bhṛśam upācaret yatra saṃrambho vedanā vā bhavati tatra śalyaṃ vijānīyāt marmapranaṣṭe tv ananyabhāvān marmaṇām uktaṃ parīkṣaṇaṃ bhavati ||

sāmānyalakṣaṇam api ca hastiskandhāśvapṛṣṭhaparvatadrumārohaṇadhanurvyāyāmadrutayānaniyuddhādhvagamanalaṅghanaprataraṇaplavanavyāyāmair jṛmbhodgārakāsakṣavathuṣṭhīvanahasanaprāṇāyāmair vātamūtrapurīṣaśukrotsargair vā yatra saṃrambho vedanā vā bhavati tatra śalyaṃ jānīyāt ||

bhavanti cātra |
yasmiṃstodādayo deśo suptatā gurutā'pi ca |
ghaṭṭate bahuśo yatra srūyate tudyate 'pi ca ||

āturaś cāpi yaṃ deśam abhīkṣṇaṃ parirakṣati |
saṃvāhyamāno bahuśas tatra śalyaṃ vinirdiśet ||

alpābādham aśūnaṃ ca nīrujaṃ nirupadravam |
prasannaṃ mṛduparyantaṃ nirāghaṭṭamanunnatam ||

eṣaṇyā sarvato dṛṣṭvā yathāmārgaṃ cikitsakaḥ |
prasārākuñcanān nūnaṃ niḥśalyam iti nirdiśet ||

asthyātmakaṃ bhajyate tu śalyamantaś ca śīryate |
prāyo nirbhujyate śārṅgam āyasaṃ ceti niścayaḥ ||

vārkṣavaiṇavatārṇāni nirhrayante tu no yadi |
pacanti raktaṃ māṃsaṃ ca kṣipram etāni dehinām ||

kānakaṃ rājataṃ tāmraṃ raitikaṃ trapusīsakam |
cirasthānād vilīyante pittatejaḥpratāpanāt ||

svabhāvaśītā mṛdavo ye cānye 'pīdṛśā matāḥ |
dravībhūtāḥ śarīre 'sminn ekatvaṃ yānti dhātubhiḥ ||

viṣāṇadantakeśāsthiveṇudārūpalāni tu |
śalyāni na viśīryante śarīre mṛnmayāni ca ||

dvividhaṃ pañcagatimattvagādivraṇavastuṣu |
viśliṣṭaṃ vetti yaḥ śalyaṃ sa rājñaḥ kartum arhati ||

iti suśrtasaṃhitāyāṃ sūtrasthāne pranaṣṭaśalyavijñānīyo nāma ṣaḍviṃśatitamo 'dhyāyaḥ ||

saptaviṃśatitamo 'dhyāyaḥ |

athātaḥ śalyāpanayanīyam adhyāyaṃ vyākhyāsyāmaḥ ||

yathovāca bhagavān dhanvantariḥ ||

śalyaṃ dvividhamavabaddhamanavabaddhaṃ ca ||

tatra samāsenānavabaddhaśalyoddharaṇārthaṃ pañcadaśa hetūn vakṣyāmaḥ | tad yathā svabhāvaḥ pācanaṃ bhedanaṃ dāraṇaṃ pīḍanaṃ pramārjanaṃ nirdhmāpanaṃ vamanaṃ virecanaṃ prakṣālanaṃ pratimarśaḥ pravāhaṇaṃ ācūṣaṇaṃ ayaskānto harṣaś ceti ||

tatrāśrukṣavathūdgārakāsamūtrapurīṣānilaiḥ svabhāvabalapravṛttair nayanādibhyaḥ patati māṃsāvagāḍhaṃ śalyamavidahyamānaṃ pācayitvā prakothā(ā.pā)ttasya pūyaśoṇitavegād gauravād vā patati | pakvamabhidyamānaṃ bhedayed dārayed vā | bhinnamanirasyamānaṃ pīḍanīyaiḥ pīḍayet pāṇibhir vā | aṇūny akṣaśalyāni pariṣecanādhmāpanair bālavastrapāṇibhiḥ pramārjayet | āhāraśeṣaśleṣmahīnāṇuśalyāni śvasanotkāsanapradhamanair nirdhamet | annaśalyāni vamanāṅgulipratimarśaprabhṛtibhiḥ | virecanaiḥ pakvāśayagatāni | vraṇadoṣāśayagatāni prakṣālanaiḥ | vātamūtrapurīṣagarbhasaṅgeṣu pravāhaṇamuktaṃ | mārutodakasaviṣarudhiraduṣṭastanyeṣv ācūṣaṇam āsyena viṣāṇair vā | anulomam anavabaddham akarṇam analpavraṇamukham ayaskāntena | hṛdy avasthitam anekakāraṇotpannaṃ śokaśalyaṃ harṣeṇeti ||

sarvaśalyānāṃ tu mahatām aṇūnāṃ vā dvāv evāharaṇahetū bhavataḥ pratilomo 'nulomaś ca ||

tatra pratilomamarvācīnamānayet anulomaṃ parācīnam || 1931 ed. 1.27.8 uttuṇḍitaṃ chitvā nirghātayecchedanīyamukham ||

chedanīyamukhānyapi kukṣivakṣaḥkakṣāvaṃkṣaṇaparśukāntarapatitāni ca hastaśakyaṃ yathāmārgeṇa hastenaivāpahartuṃ prayateta ||

hastenāpahartum aśakyaṃ viśasya śastreṇa yantreṇāpaharet ||

bhavati cātra |
śītalena jalenainaṃ mūrcchantam avasecayet |
saṃrakṣedasya marmāṇi muhur āśvāsayec ca tam ||

tataḥ śalyam uddhṛtya nirlohitaṃ vraṇaṃ kṛtvā svedārham agnighṛtaprabhṛtibhiḥ saṃsvedya vidahya pradihya sarpirmadhubhyāṃ baddhvā+ācārikam upadiśet | (? sirāsnāyuvilagnaṃ śalākādibhir vimocyāpanayet śvayathugrastavāraṅgaṃ samavapīḍya śvayathuṃ durbalavāraṅgaṃ kuśādibhir baddhvā |)

hṛdayamabhito vartamānaṃ śalyaṃ śītajalādibhir udvejitasyāpahared yathāmārgaṃ durupaharamanyato 'pabādhyamānaṃ pāṭayitvoddharet ||

asthivivarapraviṣṭam asthividaṣṭaṃ vā'vagṛhya pādābhyāṃ yantreṇāpaharet aśakyamevaṃ vā balavadbhiḥ suparigṛhītasya yantreṇa grāhayitvā śalyavāraṅgaṃ pravibhujya dhanurguṇair baddhaikataś cāsya pañcāṅgyām upasaṃyatasyāśvasya vaktrakavike badhnīyāt athainaṃ kaśayā tāḍayed yathonnamayan śiro vegena śalyam uddharati dṛḍhāṃ vā vṛkṣaśākhām avanamya tasyāṃ pūrvavad baddhvoddharet ||

adeśottuṇḍitamaṣṭhīlāśmamudgarāṇāmnyatamasya prahāreṇa vicālya yathāmārgam eva yantreṇa ||

(? yantreṇa ) vimṛditakarṇāni karṇavantyanābādhakaradeśottuṇḍitāni purastādeva ||

jātuṣe kaṇṭhāsakte kaṇṭhe nāḍīṃ praveśyāgnitaptāṃ ca śalākāṃ tayā 'vagṛhya śītābhir adbhiḥ pariṣicya sthirībhūtām uddharet ||

ajātuṣaṃ jatumadhūcchiṣṭapraliptayā śalākayā pūrvakalpenetyeke || 1931 ed. 1.27.19 asthiśalyamanyadvā tiryakkaṇṭhāsaktamavekṣya keśoṇḍukaṃ dṛḍhaikasūtrabaddhaṃ dravabhaktopahitaṃ pāyayed ākaṇṭhāt pūrṇakoṣṭhaṃ ca vāmayet vamataś ca śalyaikadeśasaktaṃ jñātvā sūtraṃ sahasā tvākṣipet mṛdunā vā dantadhāvanakūrcakenāpaharet praṇudedvā'ntaḥ | kṣatakaṇṭhāya ca madhusarpiṣī leḍhuṃ prayacchettriphalācūrṇaṃ vā madhuśarkarāvimiśram || 1931 ed. 1.27.20 udakapūrṇodaramavākśirasamavapīḍayed dhunīyādvāmayed vā bhasmarāśau vā nikhanedāmukhāt || 1931 ed. 1.27.21 grāsaśalye tu kaṇṭhāsakte niḥśaṅkamanavabuddhaṃ skandhe muṣṭinā'bhihanyāt snehaṃ madyaṃ pānīyaṃ vā pāyayet ||

bāhurajjulatāpāśaiḥ kaṇṭhapīḍanādvāyuḥ prakupitaḥ śleṣmāṇaṃ kopayitvā sroto niruṇaddhi lālāsrāvaṃ phenāgamanaṃ saṃjñānāśaṃ cāpādayati tamabhyajya saṃsvedya śirovirecanaṃ tasmai tīkṣṇaṃ dadyādrasaṃ ca vātaghnaṃ vidadhyād iti ||

bhavanti cātra |
śalyākṛtiviśeṣāṃś ca sthānānyāvekṣya buddhimān |
tathā yantrapṛthaktvaṃ ca samyak śalyamathāharet ||

karṇavanti tu śalyāni duḥkhāhāryāṇi yāni ca |
ādadīta bhiṣak tasmāt tāni yuktyā samāhitaḥ ||

etair upāyaiḥ śalyaṃ tu naiva niryātyate yadi |
matyā nipuṇayā vaidyo yantrayogaiś ca nirharet ||

śothapākau rujaś cogrāḥ kuryāc chalyam anirhṛtam |
vaikalyaṃ maraṇaṃ cā'pi tasmād yatnād vinirharet ||

iti suśrutasaṃhitāyāṃ sūtrasthāne śalyāpanayanīyo nāma saptaviṃśatitamo 'dhyāyaḥ ||

aṣṭāviṃśatitamo 'dhyāyaḥ |

athāto viparītāviparītavraṇavijñānīyam adhyāyaṃ vyākhyāsyāmaḥ ||

yathovāca bhagavān dhanvantariḥ ||

phalāgnijalavṛṣṭīnāṃ puṣpadhūmāmbudā yathā |
khyāpayanti bhaviṣyatvaṃ tathā riṣṭāni pañcatām ||

tāni saukṣmyāt pramādād vā tathaivāśu vyatikramāt |
gṛhyante nodgatāny ajñair mumūrṣor na tv asaṃbhavāt ||

dhruvaṃ tu maraṇaṃ riṣṭe brāhmaṇais tat kilāmalaiḥ |
rasāyanatapojapyatatparair vā nivāryate ||

nakṣatrapīḍā bahudhā yathā kālād vipacyate |
tathaivāriṣṭapākaṃ ca bruvate bahavo janāḥ ||

asiddhim āpnuyāl loke pratikurvan gatāyuṣaḥ |
ato 'riṣṭani yatnena lakṣayet kuśalo bhiṣak ||

gandhavarṇarasādīnāṃ viśeṣāṇāṃ svabhāvataḥ |
vaikṛtaṃ yat tad ācaṣṭe vraṇinaḥ pakvalakṣaṇam ||

kaṭus tīkṣṇaś ca visraś ca gandhas tu pavanādibhiḥ |
lohagandhis tu raktena vyāmiśraḥ sānnipātikaḥ ||

lājātasītailasamāḥ kiṃcidvisrāś ca gandhataḥ |
jñeyāḥ prakṛtigandhāḥ syur ato 'nyad gandhavaikṛtam ||

madhyāgurvājyasumanaḥpadmacandanacampakaiḥ |
sagandhā divyagandhāś ca mumūrṣūṇāṃ vraṇāḥ smṛtāḥ ||

śvavājimūṣikadhvāṅkṣapūtivallūramatkuṇaiḥ |
sagandhāḥ paṅkagandhāś ca bhūmigandhāś ca garhitāḥ ||

dhyāmakuṅkumakaṅkuṣṭhasavarṇāḥ pittakopataḥ |
na dahyante na cūṣyante bhiṣak tān parivarjayet ||

kaṇḍūmantaḥ sthirāḥ śvetāḥ snigdhāḥ kaphanimittataḥ |
dūyante vā'pi dahyante bhiṣak tān parivarjayet ||

kṛṣṇās tu ye tanusrāvā vātajā marmatāpinaḥ |
svalpām api na kurvanti rujaṃ tān parivarjayet ||

kṣveḍanti ghurghurāyante jvalantīva ca ye vraṇāḥ |
tvaṅmāṃsasthāś ca pavanaṃ saśabdaṃ visṛjanti ye ||

ye ca marmasvasaṃbhūtā bhavanty atyarthavedanāḥ |
dahyante cāntaratyarthaṃ bahiḥ śītāś ca ye vraṇāḥ ||

dahyante bahir atyarthaṃ bhavanty antaś ca śītalāḥ |
śaktidhvajarathā kuntavājivāraṇagovṛṣāḥ ||

yeṣu cāpy avabhāseran prāsādākṛtayas tathā |
cūrṇāvakīrṇā iva ye bhānti vā na ca cūrṇitāḥ ||

prāṇamāṃsakṣayaśvāsakāsārocakapīḍitāḥ |
pravṛddhapūyarudhirā vraṇā yeṣāṃ ca marmasu ||

kriyābhiḥ samyag ārabdhā na sidhyanti ca ye vraṇāḥ |
varjayet tān bhiṣak prājñaḥ saṃrakṣannātmano yaśaḥ ||

iti suśrutasaṃhitāyāṃ sūtrasthāne viparītāviparītavraṇavijñānīyo nāmāṣṭaviṃśatitamo 'dhyāyaḥ ||

ekonatriṃśattamo 'dhyāyaḥ |

athāto viparītāviparītasvapnanidarśanīyam adhyāyaṃ vyākhyāsyāmaḥ ||

yathovāca bhagavān dhanvantariḥ ||

dūtadarśanasaṃbhāṣā veṣāś ceṣṭitam eva ca |
ṛkṣaṃ velā tithiś caiva nimittaṃ śakuno 'nilaḥ ||

deśo vaidyasya vāgdehamanasāṃ ca viceṣṭitam |
kathayanty āturagataṃ śubhaṃ vā yadi vā'śubham ||

pākhaṇḍāśramavarṇānāṃ sapakṣāḥ karmasiddhaye |
ta eva viparītāḥ syur dūtāḥ karmavipattaye ||

napuṃsakaṃ strī bahavo naikakāryā asūyakāḥ |
gardabhoṣṭrarathaprāptāḥ prāptā vā syuḥ paramparāḥ ||

vaidyaṃ ya upasarpanti dūtāste cāpi garhitāḥ |
pāśadaṇḍāyudhadharāḥ pāṇḍuretaravāsasaḥ ||

ārdrajīrṇāpasavyaikamalinoddhvastavāsasaḥ |
nyūnādhikāṅgā udvignā vikṛtā raudrarūpiṇaḥ ||

rūkṣaniṣṭhuravādāś cāpy amāṅgalyābhidhāyinaḥ |
chindantas tṛṇakāṣṭhāni spṛśanto nāsikāṃ stanam ||

vastrāntānāmikākeśanakharomadaśāspṛśaḥ |
srotovarodhahṛdgaṇḍamūrdhoraḥkukṣipāṇayaḥ ||

kapālopalabhasmāsthituṣāṅgārakarāś ca ye |
vilikhanto mahīṃ kiṃcin muñcanto loṣṭabhedinaḥ ||

tailakardamadigdhāṅgā raktasraganulepanāḥ |
phalaṃ pakvam asāraṃ vā gṛhītvā'nyac ca tadvidham ||

nakhair nakhāntaraṃ vā'pi kareṇa caraṇaṃ tathā |
upānaccarmahastā vā vikṛtavyādhipīḍitāḥ ||

vāmācārā rudantaś ca śvāsino vikṛtekṣaṇāḥ |
yāmyāṃ diśaṃ prāñjalayo viṣamaikapade sthitāḥ ||

vaidyaṃ ya upasarpanti dūtās te cāpi garhitāḥ |
dakṣiṇābhimukhaṃ deśe tvaśucau vā hutāśanam | ^

jvalayantaṃ pacantaṃ vā krūrakarmaṇi codyatam ||

nagnaṃ bhūmau śayānaṃ vā vegotsargeṣu vā'śucim |
prakīrṇākeśam abhyaktaṃ svinnaṃ viklavam eva vā ||

vaidyaṃ ya upasarpanti dūtās te cāpi garhitāḥ |
vaidyasya paitrye daive vā kārye cotpātadarśane ||

madhyāhne cārdharātre vā sandhyayoḥ kṛttikāsu ca |
ārdrāśleṣāmaghāmūlapūrvāsu bharaṇīṣu ca ||

caturthyāṃ vā navamyāṃ vā ṣaṣṭhyāṃ sandhidineṣu ca |
vaidyaṃ ya upasarpanti dūtāste cāpi garhitāḥ ||

svinnābhitaptā madhyāhne jvalanasya samīpataḥ |
garhitāḥ pittarogeṣu dūtā vaidyamupāgatāḥ ||

ta eva kapharogeṣu karmasiddhikarāḥ smṛtāḥ |
etena śeṣaṃ vyākhyātaṃ buddhvā saṃvibhajet tu tat ||

raktapittātisāreṣu prameheṣu tathaiva ca |
praśasto jalarodheṣu dūtavaidyasamāgamaḥ ||

vijñāyaivaṃ vibhāgaṃ tu śeṣaṃ budhyeta paṇḍitaḥ |
śuklavāsāḥ śucir gauraḥ śyāmo vā priyadarśanaḥ ||

svasyām jātau svagotro vā dūtaḥ kāryakaraḥ smṛtaḥ |
goyānenāgatas tuṣṭaḥ pādābhyāṃ śubhaceṣṭitaḥ ||

smṛtimān vidhikālajñaḥ svatantraḥ pratipattimān |
alaṅkṛto maṅgalavān dūtaḥ kāryakaraḥ smṛtaḥ ||

svasthaṃ prāṅmukham āsīnaṃ same deśe śucau śucim |
upasarpati yo vaidyaṃ sa ca kāryakaraḥ smṛtaḥ ||

māṃsodakumbhātapatravipravāraṇagovṛṣāḥ |
śuklavarṇāś ca pūjyante prasthāne darśanaṃ gatāḥ ||

strī putriṇī savatsā gaur vardhamānam alaṅkṛtā |
kanyā matsyāḥ phalaṃ cāmaṃ svastikaṃ modakā dadhi ||

hiraṇyākṣatapātraṃ vā ratnāni sumano nṛpaḥ |
apraśānto 'nalo vājī haṃsaś cāṣaḥ śikhī tathā ||

brahmadundubhijīmūtaśaṅkhaveṇurathasvanāḥ |
siṃhagovṛṣanādāś ca hreṣitaṃ gajabṛṃhitam ||

śastaṃ haṃsarutaṃ nṝṇāṃ kauśikaṃ caiva vāmataḥ |
prasthāne yāyinaḥ śreṣṭhā vācaś ca hṛdayaṅgamāḥ ||

patrapuṣpaphalopetān sakṣīrānnīrujo drumān |
āśritā vā nabhoveśmadhvajatoraṇavedikāḥ ||

dikṣu śāntāsu vaktāro madhuraṃ pṛṣṭhato 'nugāḥ |
vāmā vā dakṣiṇā vā'pi śakunāḥ karmasiddhaye ||

śuṣke 'śanihate 'patre vallīnaddhe sakaṇṭake |
vṛkṣe 'thavā'śmabhasmāsthiviṭtuṣāṅgārapāṃśuṣu ||

caityavalmīkaviṣamasthitā dīptakharasvarāḥ |
purato dikṣu dīptāsu vaktāro nārthasādhakāḥ ||

punnāmānaḥ khagā vāmāḥ strīsaṃjñā dakṣiṇāḥ śubhāḥ |
dakṣiṇād vāmagamanaṃ praśastaṃ śvaśṛgālayoḥ | ^

vāmaṃ nakulacāṣāṇāṃ nobhayaṃ śaśasarpayoḥ ||

bhāsakauśikayoś caiva na praśastaṃ kilobhayam |
darśanaṃ vā rutaṃ cāpi na godhākṛkalāsayoḥ ||

dūtair aniṣṭais tulyānāmaś castaṃ darśanaṃ nṛṇām |
kulatthatilakārpāsatuṣapāṣāṇabhasmanām ||

pātraṃ neṣṭaṃ tathā'ṅgāratailakardamapūritam |
prasannetaramadyānāṃ pūrṇaṃ vā raktasarṣapaiḥ ||

śavakāṣṭhapalāśānāṃ śuṣkāṇāṃ pathi saṅgamāḥ |
neṣyante patitāntasthadīnāndharipavas tathā ||

mṛduḥ śīto 'nukūlaś ca sugandhiś cānilaḥ śubhaḥ |
kharoṣṇo 'niṣṭagandhaś ca pratilomaś ca garhitaḥ ||

granthyarbudādiṣu sadā chedaśabdas tu pūjitaḥ |
vidradhyudaragulmeṣu bhedaśabdas tathaiva ca ||

raktapittātisāreṣu ruddhaśabdaḥ praśasyate |
evaṃ vyādhiviśeṣeṇa nimittam upadhārayet ||

tathaivākruṣṭahākaṣṭamākrandaruditasvanāḥ |
chardyāṃ vātapurīṣāṇāṃ śabdo vai gardabhoṣṭrayoḥ ||

pratiṣiddhaṃ tathā bhagnaṃ kṣutaṃ skhalitam āhatam |
daurmanasyaṃ ca vaidyasya yātrāyāṃ na praśasyate ||

praveśe 'py etad uddeśād avekṣyaṃ ca tathā+āture |
pratidvāraṃ gṛhe vā'sya punaretanna gaṇyate ||

keśabhasmāsthikāṣṭhāśmatuṣakārpāsakaṇṭakāḥ |
khaṭvordhvapādā madyāpo vasā tailaṃ tilāstṛṇam ||

napuṃsakavyaṅgabhagnanagnamuṇḍāsitāmbarāḥ |
prasthāne vā praveśe vā neṣyante darśanaṃ gatāḥ ||

bhāṇḍānāṃ saṃkarasthānāṃ sthānāt saṃcaraṇaṃ tathā |
nikhātotpāṭanaṃ bhaṅgaḥ patanaṃ nirgamas tathā ||

vaidyāsanāvasādo vā rogī vā syādadhomukhaḥ |
vaidyaṃ saṃbhāṣamāṇo 'ṅgaṃ kuḍyamā staraṇāni vā ||

pramṛjyādvā dhunīyād vā karau pṛṣṭhaṃ śiras tathā |
hastaṃ cākṛṣya vaidyasya nyasec chirasi corasi ||

yo vaidyamunmukhaḥ pṛcchedunmārṣṭi svāṅgamāturaḥ |
na sa sidhyati vaidyo vā gṛhe yasya na pūjyate ||

bhavane pūjyate vā'pi yasya vaidyaḥ sa sidhyati |
śubhaṃ śubheṣu dūtādiṣv aśubhaṃ hy aśubheṣu ca ||

āturasya dhruvaṃ tasmād dūtādīn lakṣayed bhiṣak |
svapnān ataḥ pravakṣyāmi maraṇāya śubhāya ca ||

suhṛdo yāṃ ś ca paśyanti vyādhito vā svayaṃ tathā |
snehābhyaktaśarīras tu karabhavyālagardabhaiḥ ||

varāhair mahiṣair vā'pi yo yāyāddakṣiṇāmukhaḥ |
raktāmbaradharā kṛṣṇā hasantī muktamūrdhajā ||

yaṃ vā karṣati baddhvā strī nṛtyantī dakṣiṇāmukham |
antāvasāyibhir yo vā+ākṛṣyate dakṣiṇāmukhaḥ ||

pariṣvajeran yaṃ vā'pi pretāḥ pravrajitās tathā |
muhur āghrāyate yas tu śvāpadair vikṛtānanaiḥ ||

piben madhu ca tailaṃ ca yo vā paṅke 'vasīdati |
paṅkapradigdhagātro vā pranṛtyet prahasettathā ||

nirambaraś ca yo raktāṃ dhārayec chirasi srajam |
yasya vaṃśo nalo vā'pi tālo vorasi jāyate ||

yaṃ vā matsyo grased yo vā jananīṃ praviśen naraḥ |
parvatāgrāt pated yo vā śvabhre vā tamasā+āvṛte ||

hriyate srotasā yo vā yo vā mauṇḍyam avāpnuyāt |
parājīyeta badhyeta kākādyair vā'bhibhūyate ||

patanaṃ tārakādīnāṃ praṇāśaṃ dīpacakṣuṣoḥ |
yaḥ paśyed devatānāṃ ca (ā.vā) prakampam avanes tathā ||

yasya chardir vireko vā daśanāḥ prapatanti vā |
śālmalīṃ kiṃśukaṃ yūpaṃ valmīkaṃ pāribhadrakam ||

puṣpāḍhyaṃ kovidāraṃ vā citāṃ vā yo 'dhirohati |
kārpāsatailapiṇyākalohāni lavaṇaṃ tilān ||

labhetāśnīta vā pakvam annaṃ yaś ca pibet surām |
svasthaḥ sa labhate vyādhiṃ vyādhito mṛtyum ṛcchati ||

yathāsvaṃ prakṛtisvapno vismṛto vihatas tathā |
cintākṛto divā dṛṣto bhavanty aphaladās tu te ||

jvaritānāṃ śunā sakhyaṃ kapisakhyaṃ tu śoṣiṇām |
unmāde rākṣasaiḥ pretair apasmāre pravartanam ||

mehātisāriṇāṃ toyapānaṃ snehasya kuṣṭhinām |
gulmeṣu sthāvarotpattiḥ koṣṭhe mūrdhni śiroruji ||

śaṣkulībhakṣaṇaṃ chardyāmadhvā śvāsapipāsayoḥ |
haridraṃ bhojanaṃ vā'pi yasya syāt pāṇḍurogiṇaḥ ||

raktapittī pibed yas tu śoṇitaṃ sa vinaśyati |
svapnānevaṃvidhān dṛṣṭvā prātarutthāya yatnavān ||

dadyānmāṣāṃstilāṃllohaṃ viprebhyaḥ kāñcanaṃ tathā |
japec cāpi śubhān mantrān gāyatrīṃ tripadāṃ tathā ||

dṛṣṭvā tu prathame yāme svapyād dhyātvā punaḥ śubham |
japedvā'nyatamaṃ vede brahmacārī samāhitaḥ ||

devatāyatane caiva vasedrātritrayaṃ tathā |
viprāṃś ca pūjayennityaṃ duḥsvapnāt pravimucyate ||

ata ūrdhvaṃ pravakṣyāmi praśastaṃ svapnadarśanam |
devān dvijān govṛṣabhān jīvataḥ suhṛdo nṛpān ||

samiddham agniṃ sādhūṃś ca nirmalāni jalāni ca |
paśyet kalyāṇalābhāya vyādher apagamāya ca ||

māṃsaṃ matsyān srajaḥ śvetā vāsāṃsi ca phalāni ca |
labhante dhanalābhāya vyādher apagamāya ca ||

mahāprāsādasaphalavṛkṣavāraṇaparvatān |
āroheddravyalābhāya vyādherapagamāya ca ||

nadīnadasamudrāṃś ca kṣubhitān kaluṣodakān |
taret kalyāṇalābhāya vyādher apagamāya ca ||

urago vā jalauko vā bhramaro vā'pi yaṃ daśet |
ārogyaṃ nirdiśettasya dhanalābhaṃ ca buddhimān ||

evaṃrūpān śubhān svapnān yaḥ paśyed vyādhito naraḥ |
sa dīrghāyur iti jñeyas tasmai karma samācaret ||

iti suśrutasaṃhitāyāṃ sūtrasthāne viparītāviparītasvapnanidarśanīyo nāmaikonatriṃśattamo 'dhyāyaḥ ||

triṃśattamo 'dhyāyaḥ |

athātaḥ pañcendriyārthavipratipattim adhyāyaṃ vyākhyāsyāmaḥ ||

yathovāca bhagavān dhanvantariḥ ||

śarīraśīlayor yasya prakṛter vikṛtir bhavet |
tat tva riṣṭaṃ samāsena vyāsatas tu nibodha me ||

śṛṇoti vividhān śabdān yo divyānām abhāvataḥ |
samudrapurameghānām asaṃpattau ca niḥsvanān ||

tān svanānnāvagṛhṇāti manyate cānyaśabdavat |
grāmyāraṇyasvanāṃś cāpi viparītān śṛṇoti ca ||

dviṣacchabdeṣu ramate suhṛcchabdeṣu kupyati |
na śṛṇoti ca yo 'kasmāttaṃ bruvanti gatāyuṣam ||

yas tūṣṇam iva gṛhṇāti śītamuṣṇaṃ ca śītavat |
saṃjātaśītapiḍako yaś ca dāhena pīḍyate ||

uṣṇagātro 'timātraṃ ca yaḥ śītena pravepate |
prahārān nābhijānāti yo 'ṅgacchedamathāpi vā ||

pāṃśunevāvakīrṇāni yaś ca gātrāṇi manyate |
varṇānyatā vā rājyo vā yasya gātre bhavanti hi ||

snātānuliptaṃ yaṃ cāpi bhajante nīlamakṣikāḥ |
sugandhirvā'ti yo 'kasmāt taṃ bruvanti gatāyuṣam ||

viparītena gṛhṇāti rasān yaś copayojitān |
upayuktāḥ kramādyasya rasā doṣābhivṛddhaye ||

yasya doṣāgnisāmyaṃ ca kuryur mithyopayojitāḥ |
yo vā rasān na saṃvetti gatāsuṃ taṃ pracakṣate ||

sugandhaṃ vetti durgandhaṃ durgandhasya sugandhitām |
gṛhṇīte vā 'nyathā gandhaṃ śānte dīpe ca nīrujaḥ ||

yo vā gandhān na jānāti gatāsuṃ taṃ vinirdiśet |
dvandvānyuṣṇahimādīni kālāvasthā diśas tathā ||

viparītena gṛhṇāti bhāvān anyāṃś ca yo naraḥ |
divā jyotīṃṣi yaś cāpi jvalitānīva paśyati ||

rātrau sūryaṃ jvalantaṃ vā divā vā candravarcasam |
ameghopaplave yaś ca śakracāpataḍidguṇān ||

taḍittvato 'sitān yo vā nirmale gagane ghanān |
vimānayānaprāsādair yaś ca saṃkulamambaram ||

yaś cānilaṃ mūrtimantam antarikṣaṃ ca paśyati |
dhūmanīhāravāsobhir āvṛtām iva medinīm ||

pradīptam iva lokaṃ ca yo vā plutam ivāmbhasā |
bhūmim aṣṭāpadākārāṃ lekhābhir yaś ca paśyati ||

na paśyati sanakṣatrāṃ yaś cā devīm arundhatīm |
dhruvam ākāśagaṅgāṃ vā taṃ vadanti gatāyuṣam ||

jyotsnādarśoṣṇatoyeṣu chāyāṃ yaś ca na paśyati |
paśyaty ekāṅgahīnāṃ vā vikṛtāṃ vā'nyasattvajām ||

śvakākakaṅkagṛdhrāṇāṃ pretānāṃ yakṣarakṣasām |
piśācoraganāgānāṃ bhūtānāṃ vikṛtām api ||

yo vā mayūrakaṇṭhābhaṃ vidhūmaṃ vahnim īkṣate |
āturasya bhavenmṛtyuḥ svastho vyādhimāvāpnuyāt ||

iti suśrutasaṃhitāyāṃ sūtrasthāne pañcendriyārthavipratipattir nāma triṃśo 'dhyāyaḥ ||

ekatriṃśattamo 'dhyāyaḥ |

athātaś chāyāvipratipattim adhyāyaṃ vyākhyāsyāmaḥ ||

yathovāca bhagavān dhanvantariḥ ||

śyāvā lohitikā nīlā pītikā vā'pi mānavam |
abhidravanti yaṃ chāyāḥ sa parāsur asaṃśayam ||

hrīr apakramate yasya prabhādhṛtismṛtiśriyaḥ |
akasmād yaṃ bhajante vā sa parāsur asaṃśayam ||

yasyādharauṣṭhaḥ patitaḥ kṣiptaś cordhvaṃ tathottaraḥ |
ubhau vā jāmbavābhāsau durlabhaṃ tasya jīvitam ||

āraktā daśanā yasya śyāvā vā syuḥ patanti vā |
khañjanapratimā vā'pi taṃ gatāyuṣam ādiśet ||

kṛṣṇā stabdhā'valiptā vā jihvā śūnā ca yasya vai |
karkaśā vā bhavedyasya so 'cirād vijahāty asūn ||

kuṭilā sphuṭitā vā'pi śuṣkā vā yasya nāsikā |
avasphūrjati magnā vā na sa jīvati mānavaḥ ||

saṃkṣipte viṣame stabdhe rakte sraste ca locane |
syātāṃ vā prasrute yasya sa gatāyurnaro dhruvam ||

keśāḥ sīmantino yasya saṃkṣipte vinate bhruvau |
lunanti cākṣipakṣmāṇi so 'cirādyāti mṛtyave ||

nāharaty annam āsyasthaṃ na dhārayati yaḥ śiraḥ |
ekāgradṛṣṭir mūḍhātmā sadyaḥ prāṇān jahāti saḥ ||

balavān durbalo vā'pi saṃmohaṃ yo 'dhigacchati |
utthāpyamāno bahuśastaṃ pakvaṃ bhiṣagādiśet ||

uttānaḥ sarvadā śete pādau vikurute ca yaḥ |
viprasāraṇaśīlo vā na sa jīvati mānavaḥ ||

śītapādakarocchvāsaś chinnocchvāsaś ca yo bhavet |
kākocchvāsaś ca yo martyas taṃ dhīraḥ parivarjayet ||

nidrā na chidyate yasya yo vā jāgarti sarvadā |
muhyed vā vaktukāmaś ca pratyākhyeyaḥ sa jānatā ||

uttarauṣṭhaṃ ca yo lihyād utkārāṃś ca karoti yaḥ |
pretair vā bhāṣate sārdhaṃ pretarūpaṃ tam ādiśet ||

svebhyaḥ saromakūpebhyo yasya raktaṃ pravartate |
puruṣasyāviṣārtasya sadyo jahyāt sa jīvitam ||

vātāṣṭhīlā tu hṛdaye yasyor dhvam anuyāyinī |
rujā'nnavidveṣakarī sa parāsur asaṃśayam ||

ananyopadravakṛtaḥ śophaḥ pādasamutthitaḥ |
puruṣaṃ hanti nārīṃ tu mukhajo guhyajo dvayam ||

atisāro jvaro hikkā chardiḥ śūnāṇḍameḍhratā |
śvāsinaḥ kāsino vā'pi yasya taṃ kṣīṇam ādiśet ||

svedo dāhaś ca balavān hikkā śvāsaś ca mānavam |
balavantam api prāṇair viyuñjanti na saṃśayaḥ ||

śyāvā jihvā bhaved yasya savyaṃ cākṣi nimajjati |
mukhaṃ ca jāyate pūti yasya taṃ parivarjayet ||

vaktram āpūryate 'śrubhiḥ svidyataś caraṇāv ubhau |
cakṣuś cākulatāṃ yāti yamarāṣṭraṃ gamiṣyataḥ ||

atimātraṃ laghūni syur gātrāṇi gurukāṇi vā |
yasyākasmāt sa vijñeyo gantā vaivasvatālayam ||

paṅkamatsyavasātailaghṛtagandhāṃś ca ye narāḥ |
mṛṣṭagandhāṃś ca ye vānti gantāras te yamālayam ||

yūkā lalāṭam āyānti baliṃ nāśnanti vāyasāḥ |
yeṣāṃ vā'pi ratir nāsti yātāras te yamālayam ||

jvarātisāraśophāḥ syur yasyānyonyāvasādinaḥ |
prakṣīṇabalamāṃsasya nāsau śakyaś cikitsitum ||

kṣīṇasya yasya kṣuttṛṣṇe hṛdyair miṣṭair hitais tathā |
na śāmyato 'nnapānaiś ca tasya mṛtyur upasthitaḥ ||

pravāhikā śiraḥśūlaṃ koṣṭhaśūlaṃ ca dāruṇam |
pipāsā balahāniś ca tasya mṛtyur upasthitaḥ ||

viṣameṇopacāreṇa karmabhiś ca purākṛtaiḥ |
anityatvāc ca jantūnāṃ jīvitaṃ nidhanaṃ vrajet ||

pretā bhūtāḥ piśācāś ca rakṣāṃsi vividhāni ca |
maraṇābhimukhaṃ nityam upasarpanti mānavam ||

tāni bheṣajavīryāṇi pratighnanti jighāṃsayā |
tasmān moghāḥ kriyāḥ sarvā bhavanty eva gatāyuṣām ||

iti suśrutasaṃhitāyāṃ sūtrasthāne chāyāvipratipattirnāmaikatriṃśattamo 'dhyāyaḥ ||

	Select all
	K MS Kathmandu KL 699: Sūtrasthāna 1-31
	N MS Kathmandu NAK 1-1079: Sūtrasthāna 1-31
	H MS Kathmandu NAK 5-333: Sūtrasthāna 1-31
	NE The Nepalese Version of the Suśrutasaṃhitā, Sūtrasthāna 1-31, based on the Nepalese MSS

<pc>
<abbr>
<add>
<cb>
<choice>
<corr>
<del>
<damage>
<emph>
<ex>
<expan>
<foreign>
<gap>
<head>
<hi>
<l>
<label>
<lb>
<lg>
<milestone>
<note>
<num>
<pb>
<ptr>
<seg>
<unclear>
<g>
<anchor>
<locus>
<metamark>
<orig>
<retrace>
<sic>
<space>
<subst>
<supplied>
<surplus>
<caesura>
<sub>
<sup>
<app>
<lem>
<rdg>
comments

	ignore abbreviation sign ⌜॰⌟
	ignore addition sign
	ignore avagrahas ⌜'⌟
	ignore brackets
	ignore commas
	ignore daṇḍas
	ignore empty śirorekhā ⌜¯⌟
	ignore exclamation mark ⌜!⌟
	ignore explicit hiatus ⌜_⌟
	ignore hyphens and dashes
	ignore line fillers ⌜¦꣹𑑛𑑎⌟
	ignore middot ⌜·⌟
	ignore numbers
	ignore puṣpikās ⌜꣸❈⌟
	ignore periods/ellipses
	ignore question mark
	ignore quotation marks
	ignore colon
	ignore semi-colon
	ignore slashes

	filter geminated t
	filter geminated consonants after r
	filter geminated m after h
	filter geminated aspirated consonants
	filter ṭh written as ṭ (some scripts)
	filter final nasal variants
	filter internal nasal variants
	filter visarga āḥ variants
	filter visarga aḥ before voiced consonants
	filter visarga aḥ before vowels
	filter other visarga variants
	filter internal visarga variants
	filter Vedic visarga variants
	filter final au/āv
	filter selected final anusvāra variants
	filter all final anusvāra variants (Malayālam, etc.)
	filter sth written as sch (some scripts)
	filter kcch/kś
	filter cch/ch/cś/tś
	filter final t + voiced syllable
	filter final t + n/m
	filter final t + c/j
	filter sya,tra,ma before iti
	filter a a/ā
	filter -ena,-sya + u-
	filter i i/ī
	filter ā + iti
	filter e/a + i
	filter i/y + vowel
	filter l and ḻ
	filter pṛṣṭhamātrā e (Devanāgarī)
	filter pṛṣṭhamātrā ai (Devanāgarī)
	filter pṛṣṭhamātrā o (Devanāgarī)
	filter pṛṣṭhamātrā au (Devanāgarī)
	filter b written as v (some scripts)
	filter dbh written as bhd (some scripts)
	filter śa written as sa (some scripts)
	filter valapalagilaka (Telugu)

User Tools

Printed edition: Ācārya 1931: Sūtrasthāna 1-31

[Sūtrasthāna 1-31]

[dvitīyo 'dhyāyaḥ|]

tṛtīyo 'dhyāyaḥ |

caturtho 'dhyāyaḥ |

pañcamo 'dhyāyaḥ |

śaṣṭho 'dhyāyaḥ |

saptamo 'dhyāyaḥ |

aṣṭamo 'dhyāyaḥ |

navamo 'dhyāyaḥ |

daśamo 'dhyāyaḥ |

ekādaśo 'dhyāyaḥ |

dvādaśo 'dhyāyaḥ |

trayodaśo 'dhyāyaḥ |

caturdaśo 'dhyāyaḥ |

pañcadaśo 'dhyāyaḥ |

ṣoḍaśo 'dhyāyaḥ |

saptadaśo 'dhyāyaḥ |

aṣṭādaśo 'dhyāyaḥ |

ekonaviṃśo 'dhyāyaḥ |

viṃśatitamo 'dhyāyaḥ |

ekaviṃśatitamo 'dhyāyaḥ |

dvāviṃśatitamo 'dhyāyaḥ |

trayoviṃśatitamo 'dhyāyaḥ |

caturviṃśatitamo 'dhyāyaḥ |

pañcaviṃśatitamo 'dhyāyaḥ |

ṣaḍviṃśatitamo 'dhyāyaḥ |

saptaviṃśatitamo 'dhyāyaḥ |

aṣṭāviṃśatitamo 'dhyāyaḥ |

ekonatriṃśattamo 'dhyāyaḥ |

triṃśattamo 'dhyāyaḥ |

ekatriṃśattamo 'dhyāyaḥ |

Page Tools

saktumIva