Dau.Vṛ.1.1.1 siddhaḥ khalu varṇānāṃ samāmnāyo veditavyaḥ | na punar anyathopadeṣṭavya ity arthaḥ || siddhaśabdo 'tra nityārtho niṣpannārthaḥ prasiddhārtho vā | yathā siddham ākāśam | siddham annam | kāmpilyaḥ siddha iti || varṇā akārādayaḥ | teṣāṃ samāmnāyaḥ pāṭhakramaḥ ||

Dau.Vṛ.1.1.2 tasmin varṇasamāmnāyaviṣaya ādau ye caturdaśa varṇās te svarasaṃjñā bhavanti | a ā i ī u ū ṛ ṝ ḷ ḹ e ai o au || yathānukaraṇe hrasva ḷkāro 'sti tathā dīrgho 'py astīti matam || svarapradeśāḥ | svaro 'varṇavarjo nāmī ity evamādayaḥ ||

Dau.Vṛ.1.1.3 tasmin varṇasamāmnāyaviṣaya ādau ye daśa varṇās te samānasaṃjñā bhavanti | a ā i ī u ū ṛ ṝ ḷ ḹ || samānapradeśāḥ | samānaḥ savarṇe dīrghībhavati paraś ca lopam ity evamādayaḥ ||

Dau.Vṛ.1.1.4 teṣām eva daśānāṃ yau dvau dvau varṇau tāv anyonyasya savarṇasaṃjñakau bhavataḥ | a ā i ī u ū ṛ ṝ ḷ ḹ || teṣāṃ grahaṇaṃ vyaktyartham | tena hrasvayor dvayor dīrghayoś ca savarṇasaṃjñā siddheti|| savarṇapradeśāḥ | samānaḥ savarṇe dīrghībhavati paraś ca lopam ity evamādayaḥ ||

Dau.Vṛ.samānasaṃjñako varṇaḥ savarṇe pare dīrghībhavati | paraś ca lopam āpadyate | daṇḍāgram | sāgatā | dadhīdam | nadīha te | madhūdakam | vadhūḍham | pitṝṣabhaḥ | kṝkāraḥ | kḹkāreṇa || hotṝkāra iti vaktavyam | samānagrahaṇam aśrutād api dīrghāt samānāt savarṇasya lopārtham | tena vṛkṣāḥ ||

Dau.Vṛ.avarṇa ivarṇe pare er bhavati paraś ca lopam āpadyate | varṇagrahaṇe savarṇagrahaṇam | tavehā | seyam || cakārādhikāro 'nukramam uccayārthaḥ | tena kvacit pūrvo 'pi lupyate | halīṣā | lāṅgalīṣā | manasa īṣā manīṣā ||

Dau.Vṛ.avarṇa uvarṇe pare or bhavati paraś ca lopam āpadyate | tavohanam | gaṅgodakam ||

Dau.Vṛ.avarṇa ṛvarṇe pare ar bhavati paraś ca lopam āpadyate | tavarkāraḥ | sarkāreṇa || ṛṇapravasanavatsatarakambaladaśānām ṛṇe kvacid aro ’pi dīrghatā | ṛṇārṇam | prāṇam ity evamādayaḥ || ṛte ca tṛtīyāsamāse | śītena ṛtaḥ | śītārtaḥ || ṛti dhātor upasargasya | prārchati || nāmadhātor vā | prārṣabhīyati | prarṣabhīyati ||

Dau.Vṛ.avarṇa ḷvarṇe pare al bhavati paraś ca lopam āpadyate | tavalkāraḥ | salkāreṇa || upasargasya vā ḷti dhātor alo dīrghaḥ | upālkārīyati | upalkārīyati ||

Dau.Vṛ.avarṇa ekāre aikāre ca pare air bhavati paraś ca lopam āpadyate | tavaiṣā | saindrī || cakārādhikārāt kvacit pūrvo 'pi lupyate | eve cāniyoge | adyeva | iheva || niyoge tu adyaiva gaccha | ihaiva niṣṭha || svasyādaitvam īreriṇor api vaktavyam | svairam | svairī ||

Dau.Vṛ.avarṇa okāre aukāre ca pare aur bhavati paraś ca lopam āpadyate | tavaudanam | saupagavī || cakārādhikārād upasargāvarṇalopo dhātor edotoḥ | prelayati | parokhati || iṇedhatyor na | upaiti | upaidhate || nāmadhātor vā | upekīyati | upaikīyati | proṣadhīyati | prauṣadhīyati || oṣṭhotvoḥ samāse vā | bimboṣṭhaḥ | bimbauṣṭhaḥ | sthūlotuḥ | sthūlautuḥ || samāsa iti kim | he chātrauṣṭhaṃ paśya | adyautuṃ paśya || omi ca nityam | adyom | som ity avocat || akṣasyautvam ūhinyām | akṣauhiṇī senā || prasyoḍhoḍhyoś ca | prauḍhaḥ | prauḍhi || eṣaiṣyayor aitvaṃ lopasyāpavādaḥ | praiṣaḥ | praiṣyaḥ | īṣes tu preṣaḥ | preṣyaḥ ||

Dau.Vṛ.ivarṇo yam āpadyate 'savarṇe na ca paro lopyaḥ | dadhy atra | nady eṣā || ivarṇa iti kim | pacati || asavarṇa iti kim | dadhi ||

Dau.Vṛ.uvarṇo vam āpadyate 'savarṇe na ca paro lopyaḥ | madhv atra | vadhvāsanam ||

Dau.Vṛ.ṛvarṇo ram āpadyate 'savarṇe na ca paro lopyaḥ | pitrarthaḥ | krarthaḥ ||

Dau.Vṛ.ḷvarṇo lam āpadyate 'savarṇe na ca paro lopyaḥ | lanubandhaḥ | lākṛtiḥ ||

ekāro 'y bhavati na ca paro lopyaḥ | nayati | agnaye ||

aikāra āy bhavati na ca paro lopyaḥ | nāyakaḥ | rāyaindrī |

okāro 'v bhavati na ca paro lopyaḥ | lavaṇam | paṭav otuḥ ||

Dau.Vṛ.aukāra āv bhavati na ca paro lopyaḥ | gāvau | gāvaḥ || eteṣu visandhiḥ pṛthagyogaś ca spaṣṭārthaḥ | vivakṣitaś ca sandhir bhavati | gavājinam | go 'jinam iti svare vibhāṣā | gavākṣaḥ | gavendra iti nityam akāravarṇāgamaḥ ||

Dau.Vṛ.ay ity evamādīnāṃ padānte vartamānānāṃ yavayor lopo bhavati na vā | lope tu prakṛtiḥ svabhāvo bhavati | ta āhuḥ | tay āhuḥ | tasmā āsanam | tasmāy āsanam | paṭa iha | paṭav iha | asā induḥ | asāv induḥ || ayādīnām iti kim | dadhy atra | madhv atra || padānta iti kim | nayanam | nāyakaḥ ||

Dau.Vṛ. edodbhyāṃ paro 'kāraḥ padānte vartamāno lopam āpadyate | te 'tra | paṭo 'tra | edodbhyām iti kim | tāv atra || padāntagrahaṇaṃ padāntādhikāranivṛttyartham | tena citam | stutam ||

Dau.Vṛ. na khalu vyañjane pare svarāḥ sandhānīyā bhavanti | devīgṛham | paṭuhastam | mātṛmaṇḍalam | jale padmam | raidhṛtiḥ | vāyo gatiḥ | nauyānam || nañā nirdiṣṭam anityam | tena pitryam | gavyūtiḥ | adhvamāne saṃjñeyam ||

|| iti daurgasiṃhyāṃ vṛttau sandhau dvitīyaḥ pādaḥ samāptaḥ ||

Dau.Vṛ.odantā nipātā aiuāś ca kevalāḥ svare pare prakṛtyā tiṣṭhanti | no atra | aho āscaryaṃ | atho evam | a apehi | i indraṃ paśya | u uttiṣṭha | ā evaṃ kiṃ (Liebich: nu) manyase | ā evaṃ nu (Liebich: kila) tat || evam iti kim | na vā u || antagrahaṇam akārādīnāṃ kevalārtham | tena cetītīha nanv iti veti || nipātā iti kim | paṭa iha | paṭav iha | īṣatuḥ | ūṣatuḥ | āṭatuḥ ||

Dau.Vṛ.dvivacanaṃ yad anaubhūtaṃ tat svare pare prakṛtyā tiṣṭhati | aukārarūpaṃ parityajya rūpāntaraṃ prāptam ity arthaḥ | agnī etau | paṭū imau | śāle ete | māle ime || dvivacanam iti kim | citranv atra || paryudāsaḥ kim | ayajāva hy āvām | devayor atra || anaubhūtam iti kim | tāv atra ||

Dau.Vṛ. bahuvacanaṃ yad amīrūpaṃ tat svare pare prakṛtyā tiṣṭhati | amī aśvāḥ | amī eḍakāḥ || bahuvacanam iti kim | amy atra || amīrūpam iti kim | tay āhuḥ ||

Dau.Vṛ.ye cākṣarasamāmnāyaviṣate vyatyā nopadiṣṭā jātyā tu svarasaṃjñitāḥ plutās te svare pare prakṛtyā tiṣṭhanti | āgaccha bho devadatta3 atra | tiṣṭha bho yajñadatta3 iha || dūrāhvāne gāne rodane ca plutās te lokataḥ siddhāḥ ||

|| iti daurgasiṃhyāṃ vṛttau sandhau tṛtīyaḥ pādaḥ samāptaḥ ||

Dau.Vṛ. vargaprathamāḥ padāntāḥ svaraghoṣavatsu tṛtīyān āpadyante | vāg atra | ṣaḍ gacchanti || vargaprathamā iti kim | bhavān āha || padāntā iti kim | śakanīyam || svaraghoṣavatsv iti kim | vāk pūtā | ṣaṭ kurvanti ||

Dau.Vṛ. vargaprathamāḥ padāntāḥ pañcame pare pañcamān āpadyante | tṛtīyān na vā | vāṅmatī | vāgmatī | ṣaṇ mukhāni | ṣaḍ mukhāni | tannayanam | tadnayanam | triṣṭum minoti | triṣṭub minoti || padānte dhuṭāṃ prathame sati | dṛśan nayanam | jñānabhun nātho vā || vyavasthitavibhāṣayā pratyayapañcame nityaṃ pañcamo bhāṣāyām | vāṅmayam | yanmātram ||

Dau.Vṛ. vargaprathamebhyaḥ padāntebhyaḥ paraḥ śakāraḥ svarayavaraparaś chakāram āpadyate na vā || vākchūraḥ | vākśūraḥ | ṣaṭ chyāmāḥ | ṣaṭ śyāmāḥ | tac chvetam | tac śvetam | triṣṭupchrutam | triṣṭupśrutam || vargaprathamebhya iti kim | prāṅ śete || svarayavapara iti kim | vākślakṣṇaḥ | tac śmaśānam || lānunāsikeṣv apīcchanty anye ||

Dau.Vṛ. tebhya eva vargaprathamebhyaḥ padāntebhyaḥ paro hakāraḥ pūrvacaturtham āpadyate na vā | vāgghīnaḥ | vāg_hīnaḥ | ajjhalau | aj_halau | ṣaḍḍhalāni | ṣaḍ halāni | tad dhitam | tad hitam | kakubbhāsaḥ | kakub_hāsaḥ || hakāra iti kim | tat kṛtam || tebhyo-grahaṇaṃ svarayavaraparanivṛttyartham | tena vāg ghlādayati || eveti tṛtīyamatavyavacchedārtham ||

Dau.Vṛ. takāraḥ padānto lacaṭavargeṣu parataḥ pararūpam āpadyate | tal lunāti | tac carati | tac chādayati | taj janayati | taj jhāmayati | taññakāreṇa | taṭ ṭīkate | taṭṭhakāreṇa | taḍḍīnam | taḍ ḍhaukate | taṇṇakāreṇa || padānte dhuṭāṃ prathame sati | tajjayaḥ | dṛśallekhā | jñānam uṭṭīkanam iti || lacaṭavargeṣv iti kim | tat pacati ||

Dau.Vṛ. takāraḥ padāntaḥ śe pare cam āpadyate | tacślakṣṇaḥ | tac śmaśānam || acchatvapakṣe vacanam idam ||

Dau.Vṛ. ṅaṇanāḥ padāntā hrasvopadhāḥ svare pare dvir bhavanti | kruṅṅ atra | sugaṇṇ atra | pacann atra || ṅaṇanā iti kim | kim atra || padāntā iti kim | vṛtrahaṇau || hrasvopadhā iti kim | prāṅ āste ||

Dau.Vṛ. nakāraḥ padāntaś cachayoḥ parayoḥ śakāram āpadyate 'nusvārapūrvam | bhavāṃś carati | bhavāṃś chādayati | bhavāṃś cyavate | bhavāṃś chyati || vyavasthitavāsmaraṇāt praśāñ carati | evam uttaratrāpi || tathānto viratir iti tena tvan tarasi ||

Dau.Vṛ. nakāraḥ padāntaṣ ṭaṭhayoḥ parayoḥ ṣakāram āpadyate 'nusvārapūrvam | bhavāṃṣ ṭīkate | bhavāṃṣ ṭhakāreṇa ||

Dau.Vṛ. nakāraḥ padāntas tathayoḥ parayoḥ sakāram āpadyate 'nusvārapūrvam | bhavāṃs tarati | bhavāṃs thuḍati ||
puṃskokilaḥ | puṃskhananam | puṃścakoraḥ | puṃśchatram | puṃṣṭiṭṭibhaḥ | supuṃś carati || puṃso 'śiṭy aghoṣaviṣaye saṃyogāntalopasyānityatvāt | yathā prāptam eva || aśiṭīti kim | puṃsaraḥ ||

Dau.Vṛ. nakāraḥ padānto le pare lam āpadyate 'nusvārahīnam | bhavālm̐ lunāti | bhavālm̐ likhati || kārahīnatvād ananunāsikam ||

Dau.Vṛ. nakāraḥ padānto jajhañaśakāreṣu parato ñakāram āpadyate | bhavāñ jayati | bhavāñ jhāṣayati | bhavāñ ñakāreṇa | bhavāñ śete || padamadhye ca ṭavargādeśa iti jajhañeṣu ñakāravidhānam ||

Dau.Vṛ. nakāraḥ padāntaḥ śi pare ncau vā prāpnoti ñakāraṃ vā | bhavāñ chūraḥ | bhavāñc śūraḥ | bhavāñ śūraḥ | kurvañ chūraḥ | kurvañc śūraḥ | kurvañ śūraḥ | praśāñ chayanam | praśāñc śayanam | praśāñ śayanam || ṇatvaṃ gatvaṃ ca na syāt | anusvāro vargāntaś ca syād eva || vātra samuccaye ||

Dau.Vṛ.ḍaḍhaṇāḥ pare 'smād iti ḍaḍhaṇaparaḥ | ḍaḍhaṇaparo nakāro ṇam āpadyate | bhavāṇ ḍīnam | bhavāṇ ḍhaukate | bhavāṇ ṇakāreṇa || tuśabdo vānivṛttyarthaḥ ||

Dau.Vṛ. makāraḥ punar anto vyañjane pare'nusvāram āpadyate | tvaṃ yāsi | tvaṃ ramase || anta iti kim | gamyate || anusvāra iti saṃjñāpūrvako vidhir anityaḥ | tena samrāṭ | samrājau ||

Dau.Vṛ. anto 'nusvāro varge pare tadvargapañcamaṃ vāpadyate | tvaṅ karoṣi | tvaṃ karoṣi | tvañ carasi | tvaṃ carasi | pumbhyām | puṃbhyām || varga iti kim | tvaṃ lunāsi ||

|| iti daurgasiṃhyāṃ vṛttau sandhau caturthaḥ pādaḥ samāptaḥ ||

Dau.Vṛ. avyayībhāvasamāsād akārāntād vibhaktīnāṃ sthāne 'm bhavati | apañcamyāḥ | upakumbham || avyayībhāvād iti kim | kaṣṭaśritaḥ || vibhaktīnām iti kim | upakumbhatā || apañcamyā iti kim | upakumbhāt ||

Dau.Vṛ. kartā yat kriyate tat kārakaṃ karmasaṃjñaṃ bhavati | kaṭaṃ karoti | odanaṃ pacati | ādityaṃ paśyati | tathā | ahiṃ laṅghayati | grāmaṃ gacchan vṛkṣamūlāny upasarpati | tathā | stokaṃ pacati | gāṃ dogdhi payaḥ | pauravaṃ gāṃ yācate | vṛkṣam avacinoti phalāni | śiṣyaṃ dharmaṃ brūte | śiṣyaṃ dharmam anuśāsti | ajāṃ nayati grāmam | grāmaṃ vahati bhāram | harate kumbhaṃ bhāram | grāmaṃ chātraśataṃ jayati | gargāñ śataṃ daṇḍayati | grāmam adhiśete | grāmam adhitiṣṭhati | vṛkṣam adhyāste | dharmam abhiniviśate | trirātam upavasati | grāmam anuvasati | parvatam adhivasati | āvasatham āvasati | akṣān dīvyati | akṣair dīvyatīti karaṇavivakṣā | māsaṃ guḍadhānāḥ | krośaṃ kuṭilā nadī | bhavater gamyamānatvāt || karmapradeśāḥ | karmaṇi dvitīyety evamādayaḥ||

Dau.Vṛ.athāntarāṇi tyādīni syāmahi paryantāni parasmaipadasaṃjñakāni bhavanti | nava parāṇy ātmana ity uktibādhayā pūrvāṇi navaiva vacanāni sarvāsāṃ vibhaktīnām iti || arthasya vibhañjanād vibhaktaya iti | ti tas anti | si thas tha | mi vas mas | evaṃ sarvatra || parasmaipadapradeśāḥ | śeṣāt kartari parasmaipadam (3|2|47) ity evamādayaḥ||

Dau.Vṛ.atha parāṇi nava nava vacanāny ātmanepadasaṃjñakāni bhavanti | padānīti gamyate || te āte ante | se āthe dhve | e vahe mahe | evaṃ sarvatra || ātmanepadapradeśāḥ | ātmanepadāni bhāvakarmaṇoḥ (3|2|40) ity evamādayaḥ ||

Dau.Vṛ.parasmaipadānām ātmanepadānāṃ ca trīṇi trīṇi vacanāni prathamamadhyamottamasaṃjñakāni bhavanti yathāsaṅkhyam | ti | tas | anti | iti prathamaḥ || si | thas | tha | iti madhyamaḥ || mi | vas | mas | ity uttamaḥ || te | āte | ante | iti prathamaḥ || se | āthe | dhve | iti madhyamaḥ || e | vahe | mahe | ity uttamaḥ || evaṃ sarvatra || saṃjñāpradeśāḥ | nāmni prayujyamāne 'pi prathamaḥ | yuṣmadi madhyamaḥ | asmady uttamaḥ (3|1|5-7|) ity evamādayaḥ ||

Dau.Vṛ. yugapad ekakālārthaḥ | yugapadvacana ekakriyākālābhidhāne puruṣāṇāṃ madhye yaḥ paraḥ sa bhavati | sa ca tvaṃ cāhaṃ ca pacāmaḥ | sa ca tvaṃ cāhaṃ cāpākṣma | sa ca tvaṃ cāhaṃ ca pakṣyāmaḥ || vacanam atantram | sa ca tvaṃ ca pacathaḥ | taṃ cāhaṃ ca pacāvaḥ || yugapadvacanam iti kim | sa pacati | tvaṃ pakṣyasi | aham apākṣam iti bhinnakāloktau vayam apākṣmeti mā bhūt || vacanagrahaṇaṃ yugapadviṣaye mā bhūt | sa pacati | taṃ pacasi | ahaṃ pacāmīty evaṃ prāpnoti || apravṛttau paryāye vā prāpte paribhāṣeyam ||

Dau.Vṛ. nāmni prayujyamāne 'prayujyamāne 'pi prathamaḥ puruṣo bhavati | sa pacati | tau pacataḥ | te pacanti | sa pacate | tau pacete | te pacante | evaṃ pacyate ghaṭaḥ | pacyete ghaṭau | pacyante ghaṭāḥ || aprayujyamāne 'pi | pacati | pacataḥ | pacanti | evaṃ sarvatra || prayujyamānagrahaṇaṃ kim | dhātunā yukte yathā syāt | tena devadattena hanyase tvam | madhyama eva yuṣmadyogāt ||

Dau.Vṛ. yuṣmadi prayujyamāne 'prayujyamāne 'pi madhyamaḥ puruṣo bhavati | tvaṃ pacasi | yuvāṃ pacathaḥ | yūyaṃ pacatha | aprayujyamāne 'pi | pacasi | pacathaḥ | pacatha | evaṃ sarvatra || prayujyamānagrahaṇaṃ kim | tvayā pacyata odanaḥ ||