prathamo 'dhyāyaḥ | ut.1.1 athāta aupadravikam adhyāyaṃ vyākhyāsyāmaḥ || ut.1.2 yathovāca bhagavān dhanvantariḥ || ut.1.3 adhyāyānāṃ śate viṃśe yad uktam asakṛn mayā | vakṣyāmi bahudhā samyag uttare 'rthān imān iti || ut.1.4 idānīṃ tat pravakṣyāmi tantram uttaram uttamam | nikhilenopadiśyante yatra rogāḥ pṛthagvidhāḥ || ut.1.5 śālākyatantrābhihitā videhādhipakīrtitāḥ | ye ca vistarato dṛṣṭāḥ kumārābādhahetavaḥ || ut.1.6 ṣaṭsu kāyacikitsāsu ye coktāḥ paramarṣibhiḥ | upasargādayo rogā ye cāpy āgantavaḥ smṛtāḥ || ut.1.7 triṣaṣṭī rasasaṃsargāḥ svasthavṛttaṃ tathaiva ca | yuktārthā yuktayaś caiva doṣabhedās tathaiva ca || ut.1.8 yatroktā vividhā arthā rogasādhanahetavaḥ | mahatas tasya tantrasya durgādhasyāmbudher iva || ut.1.9 ādāv evottamāṅgasthān rogān abhidadhāmy aham | saṅkhyayā lakṣaṇaiś cāpi sādhyāsādhyakrameṇa ca || ut.1.10 vidyāddvayaṅgulabāhulyaṃ svāṅguṣṭhodarasaṃmitam | dvyaṅgulaṃ sarvataḥ sārdhaṃ bhiṣaṅnayanabudbudam || ut.1.11 suvṛttaṃ gostanākāraṃ sarvabhūtaguṇodbhavam | palaṃ bhuvo 'gnito raktaṃ vātāt kṛṣṇaṃ sitaṃ jalāt || ut.1.12 ākāśādaśrumārgāś ca jāyante netrabudbude | dṛṣṭiṃ cātra tathā vakṣye yathā brūyād viśāradaḥ || ut.1.13 netrāyāmatribhāgaṃ tu kṛṣṇamaṇḍalamucyate | kṛṣṇāt saptamam icchanti dṛṣṭiṃ dṛṣṭiviśāradāḥ || ut.1.14 maṇḍalāni ca sandhīṃś ca paṭalāni ca locane | yathākramaṃ vijānīyāt pañca ṣaṭ ca ṣaḍeva ca || ut.1.15 pakṣmavartmaśvetakṛṣṇadṛṣṭīnāṃ maṇḍalāni tu | anupūrvaṃ tu te madhyāś catvāro 'ntyā yathottaram || ut.1.16 pakṣmavartmagataḥ sandhirvartmaśuklagato 'paraḥ | śuklakṛṣṇagatastvanyaḥ kṛṣṇadṛṣṭigato 'paraḥ | tataḥ kanīnakagataḥ ṣaṣṭhaś cāpāṅgagaḥ smṛtaḥ || ut.1.17 dve vartmapaṭale vidyāc catvāryanyāni cākṣiṇi | jāyate timiraṃ yeṣu vyādhiḥ paramadāruṇaḥ || ut.1.18 tejojalāśritaṃ bāhyaṃ teṣv anyat piśitāśritam | medastṛtīyaṃ paṭalamāśritaṃ tvasthi cāparam || ut.1.19 pañcamāṃśasamaṃ dṛṣṭesteṣāṃ bāhulpamiṣyate | sirāṇāṃ kaṇḍarāṇāṃ ca medasaḥ kālakasya ca || ut.1.20 guṇāḥ kālāt paraḥ śleṣmā bandhane 'kṣṇoḥ sirāyutaḥ | sirānusāribhir doṣair viguṇair ūrdhvamāgataiḥ || ut.1.21 jāyante netrabhāgeṣu rogāḥ paramadāruṇāḥ | tatrāvilaṃ sasaṃrambhamaśrukaṇḍūpadehavat || ut.1.22 gurūṣātodarāgādyairjuṣṭaṃ cāvyaktalakṣaṇaiḥ | saśūlaṃ vartmakoṣeṣu śūkapūrṇābham eva ca || ut.1.23 vihanyamānaṃ rūpe vā kriyāsvakṣi yathā purā | dṛṣṭvaiva dhīmān budhyeta doṣeṇādhiṣṭhitaṃ tu tat || ut.1.24 tatra saṃbhavamāsādya yathādoṣaṃ bhiṣagjitam | vidadhyānnetrajā rogā balavantaḥ syuranyathā || ut.1.25 saṅkṣepataḥ kriyāyogo nidānaparivarjanam | vātādīnāṃ pratīghātaḥ prokto vistarataḥ punaḥ || ut.1.26 uṣṇābhitaptasya jalapraveśāddūrekṣaṇāt svapnaviparyayāc ca | prasaktasaṃrodanakopaśokakleśābhighātādatimaithunāc ca || ut.1.27 śuktāranālāmlakulatthamāṣaniṣevaṇādvegavinigrahāc ca | svedādatho dhūmaniṣevaṇāc ca chardervighātādvamanātiyogāt | bāṣpagrahāt sūkṣmanirīkṣaṇāc ca netre vikārān janayanti doṣāḥ || ut.1.28 vātāddaśa tathā pittāt kaphāc caiva trayodaśa | raktāt ṣoḍaśa vijñeyāḥ sarvajāḥ pañcaviṃśatiḥ || ut.1.29 tathā bāhyau punardvau ca rogāḥ ṣaṭsaptatiḥ smṛtāḥ | hatādhimantho nimiṣo dṛṣṭirgambhīrikā ca yā || ut.1.30 yac ca vātahataṃ vartma na te sidhyanti vātajāḥ | yāpyo 'tha tanmayaḥ kācaḥ sādhyāḥ syuḥsānyamārutāḥ || ut.1.31 śuṣkākṣipākādhīmanthasyandamārutapryayāḥ | asādhyo hrasvajāḍyo yo jalasrāvaś ca paittikaḥ || ut.1.32 parimlāyī ca nīlaś ca yāpyaḥ kāco 'tha tanmayaḥ | abhiṣyando 'dhimantho 'mlādhyuṣitaṃ śuktikā ca yā || ut.1.33 dṛṣṭiḥ pittavidagdhā ca dhūmadarśī ca sidhyati | asādhyaḥ kaphajaḥ srāvo yāpyaḥ kācaś ca tanmayaḥ || ut.1.34 abhiṣyando 'dhimanthaś ca balāsagrathitaṃ ca yat | dṛṣṭiḥ śleṣmavidagdhā ca pothakyo lagaṇaś ca yaḥ || ut.1.35krimigranthipariklinnavartmaśuklārmapiṣṭakāḥ | śleṣmopanāhaḥ sādhyās tu kathitāḥ śleṣmajeṣu tu || ut.1.36 raktasrāvo 'jakājātaṃ śoṇitārśovraṇānvitam | śukraṃ na sādhyaṃ kācaś ca yāpyastajjaḥ prakīrtitaḥ || ut.1.37 manthasyandau kliṣṭavartma harṣotpātau tathaiva ca | sirājātāñjanākhyā ca sirājālaṃ ca yat smṛtam || ut.1.38 parvaṇyathāvraṇaṃ śukraṃ śoṇitārmārjunaś ca yaḥ | ete sādhyā vikāreṣu raktajeṣu bhavanti hi || ut.1.39 pūyāsrāvo nākulāndhyamakṣipākātyayo 'lajī | asādhyāḥ sarvajā yāpyaḥ kācaḥ kopaś ca pakṣmaṇaḥ || ut.1.40 vartmāvabandho yo vyādhiḥ sirāsu piḍakā ca yā | prastāryarmādhimāṃsārma snāyvarmotsaṅginī ca yā || ut.1.41 pūyālasaś cārbudaṃ ca śyāvakardamavartmanī | tathārśovartma śuṣkārśaḥ śarkarāvartma yac ca vai || ut.1.42 saśophaś cāpy aśophaś ca pāko bahalavartma ca | aklinnavartma kumbhīkā bisavartma ca sidhyati || ut.1.43 sanimitto 'nimittaś ca dvāv asādhyau tu bāhyajau | ṣaṭsaptatir vikārāṇām eṣā saṃgrahakīrtitā || ut.1.44 nava sandhyāśrayās teṣu vartmajās tv ekaviṃśatiḥ | śuklabhāge daśaikaś ca catvāraḥ kṛṣṇabhāgajāḥ || ut.1.45 sarvāśrayāḥ saptadaśa dṛṣṭijā dvādaśaiva tu | bāhyajau dvau samākhyātau rogau paramadāruṇau | bhūya etān pravakṣyāmi saṅkhyārūpacikitsitaiḥ ||

iti suśrutasaṃhitāyām uttaratantrāntargate śālākyatantre aupadraviko nāma prathamo 'dhyāyaḥ ||1 ||

dvitīyo 'dhyāyaḥ | ut.2.1 athātaḥ sandhigatarogavijñānīyam adhyāyaṃ vyākhyāsyāmaḥ || ut.2.2 yathovāca bhagavān dhanvantariḥ || ut.2.3 pūyālasaḥ sopanāhaḥ srāvāḥ parvaṇikālajī | krimigranthiś ca vijñeyā rogāḥ sandhigatā nava || ut.2.4 pakvaḥ śophaḥ sandhijaḥ saṃsravedyaḥ sāndraṃ pūyaṃ pūti pūyālasaḥ saḥ | granthirnālpo dṛṣṭisandhāvapākaḥ kaṇḍūprāyo nīrujastūpanāhaḥ || ut.2.5 gatvā sandhīnaśrumārgeṇa doṣāḥ kuryuḥ srāvān rugvihīnān kanīnāt | tān vai srāvān netranāḍīm athaike tasyā liṅgaṃ kīrtayiṣye caturdhā || ut.2.6 pākaḥ sandhau saṃsravedyaś ca pūyaṃ pūyāsrāvo naikarūpaḥ pradiṣṭaḥ | śvetaṃ sāndraṃ picchilaṃ saṃsravedyaḥ śleṣmāsrāvo nīrujaḥ sa pradiṣṭaḥ || ut.2.7 raktāsrāvaḥ śoṇitotthaḥ saraktamuṣṇaṃ nālpaṃ saṃsravennātisāndram | pītābhāsaṃ nīlamuṣṇaṃ jalābhaṃ pittāsrāvaḥ saṃsravet sandhimadhyāt || ut.2.8 tāmrā tanvī dāhaśūlopapannā raktājjñeyā parvaṇī vṛttaśophā | jātā sandhau kṛṣṇaśukle 'lajī syāt tasminn eva khyāpitā pūrvaliṅgaiḥ || ut.2.9 krimigranthirvartmanaḥ pakṣmaṇaś ca kaṇḍūṃ kuryuḥ krimayaḥ sandhijātāḥ | nānārūpā vartmaśuklasya sandhau caranto 'ntarnayanaṃ dūṣayanti ||

iti suśrutasaṃhitāyām uttaratantre sandhigatarogavijñānīyo nāma dvitīyo 'dhyāyaḥ ||2 ||

tṛtīyo 'dhyāyaḥ | ut.3.1 athāto vartmagatarogavijñānīyam adhyāyaṃ vyākhyāsyāmaḥ || ut.3.2 yathovāca bhagavān dhanvantariḥ || ut.3.3 pṛthagdoṣāḥ samastā vā yadā vartmavyapāśrayāḥ | sirā vyāpyāvatiṣṭhante vartmasvadhikamūrcchitāḥ || ut.3.4 vivardhya māṃsaṃ raktaṃ ca tadā vartmavyapāśrayān | vikārāñjanayanty āśu nāmatas tān nibodhata || ut.3.5 utsaṅginyatha kumbhīkā pothakyo vartmaśarkarā | tathārśovartma śuṣkārśastathaivāñjananāmikā || ut.3.6 bahalaṃ vartma yaccāpi vyādhirvartmāvabandhakaḥ | kliṣṭakardamavartmākhyau śyāvavartma tathaiva ca || ut.3.7 praklinnamapariklinnaṃ vartma vātahataṃ tu yat | arbudaṃ nimiṣaś cāpi śoṇitārśaś ca yat smṛtam || ut.3.8 lagaṇo biśanāmā ca pakṣmakopas tathaiva ca | ekaviṃśatirityete vikārā vartmasaṃśrayāḥ || ut.3.9 nāmabhis te samuddiṣṭā lakṣaṇaistān pracakṣmahe | abhyantaramukhī bāhyotsaṅge 'dho vartmanaś ca yā || ut.3.10 vijñeyotsaṅginī nāma tadrūpapiḍakācitā | kumbhīkabījapratimāḥ piḍakā yās tu vartmajāḥ || ut.3.11 ādhmāpayanti bhinnā yāḥ kumbhīkapiḍakās tu tāḥ | srāviṇyaḥ kaṇḍurā gurvyo raktasarṣapasannibhāḥ | piḍakāś ca rujāvatyaḥ pothakya iti saṃjñitāḥ || ut.3.12 piḍakābhiḥ susūkṣmābhir ghanābhir abhisaṃvṛtā | piḍakā yā kharā sthūlā sā jñeyā vartmaśarkarā || ut.3.13 ervārubījapratimāḥ piḍakā mandavedanāḥ | sūkṣmāḥ kharāś ca vartmasthāstadarśovartma kīrtyate || ut.3.14 dīrgho 'ṅkuraḥ kharaḥ stabdho dāruṇo vartmasaṃbhavaḥ | vyādhireṣa samākhyātaḥ śuṣkārśa iti saṃjñitaḥ || ut.3.15 dāhatodavatī tāmrā piḍakā vartmasaṃbhavā | mṛdvī mandarujā sūkṣmā jñeyā sāñjananāmikā || ut.3.16 vartmopacīyate yasya piḍakābhiḥ samantataḥ | savarṇābhiḥ samābhiś ca vidyādbahalavartma tat || ut.3.17 kaṇḍūmatālpatodena vartmaśophena yo naraḥ | na samaṃ chādayed akṣi bhavedbandhaḥ sa vartmanaḥ || ut.3.18 mṛdvalpavedanaṃ tāmraṃ yadvartma samam eva ca | akasmāc ca bhaved raktaṃ kliṣṭavartma tad ādiśet || ut.3.19 kliṣṭaṃ punaḥ pittayutaṃ vidahec choṇitaṃ yadā | tadā klinnatvam āpannam ucyate vartmakardamaḥ || ut.3.20 yad vartma bāhyato 'nyaś ca śyāvaṃ śūnaṃ savedanam | dāhakaṇḍūparikledi śyāvavartmeti tan matam || ut.3.21 arujaṃ bāhyataḥ śūnamantaḥ klinnaṃ sravaty api | kaṇḍūnis todabhūyiṣṭhaṃ klinnavartma tad ucyate || ut.3.22 yasya dhautāni dhautāni saṃbadhyante punaḥ punaḥ | vartmānyaparipakvāni vidyādaklinnavartma tat || ut.3.23 vimuktasandhi niś ceṣṭaṃ vartma yasya na mīlyate | etadvātahataṃ vidyāt sarujaṃ yadi vārujam || ut.3.24 vartmāntarasthaṃ viṣamaṃ granthibhūtamavedanam | vijñeyamarbudaṃ puṃsāṃ saraktamavalambitam || ut.3.25 nimeṣaṇīḥ sirā vāyuḥ praviṣṭo vartmasaṃśrayāḥ | cālayatyati vartmāni nimeṣaḥ sa gado mataḥ || ut.3.26 chinnāś chinā vivardhante vartmasthā mṛdavo 'ṅkurāḥ | dāhakaṇḍūrujopetāste 'rśaḥ śoṇitasaṃbhavāḥ || ut.3.27 apākaḥ kaṭhinaḥ sthūlo granthirvartmabhavo 'rujaḥ | sakaṇḍūḥ picchilaḥ kolapramāṇo lagaṇas tu saḥ || ut.3.28 śūnaṃ yadvartma bahubhiḥ sūkṣmaiś chidraiḥ samanvitam | bisamantarjala iva bisavartmeti tanmatam || ut.3.29 doṣāḥ pakṣmāśayagatāstīkṣṇāgrāṇi kharāṇi ca | nirvartayanti pakṣmāṇi tairghuṣṭaṃ cākṣi dūyate || ut.3.30 uddhṛtair uddhṛtaiḥ śāntiḥ pakṣmabhiś copajāyate | vātātapānaladveṣī pakṣmakopaḥ sa ucyate ||

iti suśrutasaṃhitāyām uttaratantre vartmagatarogavijñānīyo nāma tṛtīyo 'dhyāyaḥ ||3 ||

caturtho 'dhyāyaḥ | ut.4.1 athātaḥ śuklagatarogavijñānīyam adhyāyaṃ vyākhyāsyāmaḥ || ut.4.2 athovāca bhagavān dhanvantariḥ || ut.4.3 prastāriśuklakṣatajādhimāṃsasrāyvarmasaṃjñāḥ khalu pañcarogāḥ | syuḥ śuktikā cārjunapiṣṭakau ca jālaṃ sirāṇāṃ piḍakāś ca yāḥ syuḥ || ut.4.4 rogā balāsagrathitena sārdham ekādaśākṣṇoḥ khalu śuklabhāge | prastāri prathitam ihārma śuklabhāge vistīrṇaṃ tanu rudhiraprabhaṃ sanīlam || ut.4.5 śuklākhyaṃ mṛdu kathayanti śuklabhāge saśvetaṃ samam iha vardhate cireṇa | yan māṃsaṃ pracayam upaiti śuklabhāge padmābhaṃ tad upadiśanti lohitārma || ut.4.6 vistīrṇaṃ mṛdu bahalaṃ yakṛtprakāśaṃ śyāvaṃ vā tad adhikamāṃsajārma vidyāt | śukle yat piśitam upaiti vṛddhim etat snāyvarmety abhipaṭhitaṃ kharaṃ prapāṇḍu || ut.4.7 śyāvāḥ syuḥ piśitanibhāś ca bindavo ye śuktyābhāḥ sitanayane sa śuktisaṃjñaḥ | eko yaḥ śaśarudhiropamas tu binduḥ śuklastho bhavati tam arjunaṃ vadanti || ut.4.8 utsannaḥ salilanibho 'tha piṣṭaśuklo bindur yo bhavati sa piṣṭakaḥ suvṛttaḥ | jālābhaḥ kaṭhinasiro mahān saraktaḥ santānaḥ smṛta iha jālasaṃjñitas tu || ut.4.9 śuklasthāḥ sitapiḍakāḥ sirāvṛtā yās tā vidyād asitasamīpajāḥ sirājāḥ | kāṃsyābho bhavati site 'mbubindutulyaḥ sa jñeyo 'mṛdurarujo balāsakākhyaḥ ||

iti suśrutasaṃhitāyām uttaratantre śuklagatarogavijñānīyo nāma caturtho 'dhyāyaḥ ||4 ||

pañcamo 'dhyāyaḥ | ut.5.1 athātaḥ kṛṣṇagatarogavijñānīyam adhyāyaṃ vyākhyāsyāmaḥ || ut.5.2 yathovāca bhagavān dhanvantariḥ || ut.5.3 yat savraṇaṃ śukla(śukra)mathāvraṇaṃ vā pākātyayaś cāpy ajakā tathaiva | catvāra ete 'bhihitā vikārāḥ kṛṣṇāśrayāḥ saṃgrahataḥ purastāt || ut.5.4 nimagnarūpaṃ hi bhavet tu kṛṣṇe sūcyeva viddhaṃ pratibhāti yadvai | srāvaṃ sraveduṣṇamatīva ruk ca tat savraṇaṃ śukra(śukla)mudāharanti || ut.5.5 dṛṣṭeḥ samīpe na bhavet tu yac ca na cāvagāḍhaṃ na ca saṃsraveddhi | avedanāvan na ca yugmaśukraṃ tatsiddhimāpnoti kadācideva || ut.5.6 vicchinnamadhyaṃ piśitāvṛtaṃ vā calaṃ sirāsaktamadṛṣṭikṛc ca | dvitvaggataṃ lohitamantataś ca cirotthitaṃ cāpi vivarjanīyam || ut.5.7 uṣṇāśrupātaḥ piḍakā ca kṛṣṇe yasmin bhaven mudganibhaṃ ca śukram | tad apy asādhyaṃ pravadanti kecidanyac ca yat tittiripakṣatulyam || ut.5.8 sitaṃ yadā bhāty asitapradeśe syandātmakaṃ nātirugaśruyuktam | vihāyasīvāc chaghanānukāri tad avraṇaṃ sādhyatamaṃ vadanti || ut.5.9 gambhīrajātaṃ bahalaṃ ca śukraṃ cirotthitaṃ cāpi vadanti kṛcchram | saṃcchādyate śvetanibhena sarvaṃ doṣeṇa yasyāsitamaṇḍalaṃ tu || ut.5.10 tamakṣipākātyayamakṣikopasamutthitaṃ tīvrarujaṃ vadanti | ajāpurīṣapratimo rujāvān salohito lohitapicchilāśruḥ | vidārya kṛṣṇaṃ pracayo 'bhyupaiti taṃ cājakājātam iti vyavasyet ||

iti suśrutasaṃhitāyām uttaratantre kṛṣṇagatarogavijñānīyo nāma pañcamo 'dhyāyaḥ ||5 ||

ṣaṣṭho 'dhyāyaḥ | ut.6.1 athātaḥ sarvagatarogavijñānīyam adhyāyaṃ vyākhyāsyāmaḥ || ut.6.2 yathovāca bhagavān dhanvantariḥ || ut.6.3 syandās tu catvāra ihopadiṣṭāstāvanta eveha tathādhimanthāḥ | śophānvito 'śophayutaś ca pākāv ity evam ete daśa saṃpradiṣṭāḥ || ut.6.4 hatādhimantho 'nilaparyayaś ca śuṣkākṣipāko 'nyata eva vātaḥ | dṛṣṭistatathāmlādhyuṣitā sirāṇāmutpātaharṣāvapi sarvabhāgāḥ || ut.6.5 prāyeṇa sarve nayanāmayāstu bhavantyabhiṣyandanimittamūlāḥ | tasmād abhiṣyandamudīryamāṇamupācaredāśu hitāya dhīmān || ut.6.6 nistodanaṃ stambhanaromaharṣasaṅgharṣapāruṣyaśirobhitāpāḥ | viśuṣkabhāvaḥ śiśirāśrutā ca vātābhipanne nayane bhavanti || ut.6.7 dāhaprapākau śiśirābhinandā dhūmāyanaṃ bāṣpasamucchrayaś ca | uṣṇāśrutā pītakanetratā ca pittābhipanne nayane bhavanti || ut.6.8 uṣṇābhinandā gurutākṣiśophaḥ kaṇḍūpadehau sitatātiśaityam | srāvo muhuḥ picchila eva cāpi kaphābhipanne nayane bhavanti || ut.6.9 tāmrāśrutā lohitanetratā ca rājyaḥ samantādatilohitāś ca | pittasya liṅgāni ca yāni tāni raktābhipanne nayane bhavanti || ut.6.10 vṛddhairetairabhiṣyandairnarāṇāmakriyāvatām | tāvantastvadhimanthāḥ syurnayane tīvravedanāḥ || ut.6.11 utpāṭyata ivātyarthaṃ netraṃ nirmathyate tathā | śiraso 'rdhaṃ ca taṃ vidyādadhimanthaṃ svalakṣaṇaiḥ || ut.6.12 netramutpāṭyata iva mathyate 'raṇivac ca yat | saṅgharṣatodanirbhedamāṃsasaṃrabdhamāvilam || ut.6.13 kuñcanāsphoṭanādhmānavepathuvyathanairyutam | śiraso 'rdhaṃ ca yena syādadhimanthaḥ sa mārutāt || ut.6.14 raktarājicitaṃ srāvi vahninevāvadahyate | yakṛtpiṇḍopamaṃ dāhi kṣāreṇāktamiva kṣatam || ut.6.15 prapakvocchūnavartmāntaṃ sasvedaṃ pītadarśanam | mūrcchāśirodāhayutaṃ pittenākṣyadhimanthitam || ut.6.16 śophavannātisaṃrabdhaṃ srāvakaṇḍūsamanvitam | śaityagauravapaicchilyadūṣikāharṣaṇānvitam || ut.6.17 rūpaṃ paśyati duḥkhena pāṃśupūrṇamivāvilam | nāsādhmānaśiroduḥkhayutaṃ śleṣmādhimanthitam || ut.6.18 bandhujīvapratīkāśaṃ tāmyati sparśanākṣamam | raktāsrāvaṃ sanistodaṃ paśyaty agninibhā diśaḥ || ut.6.19 raktāmagnāriṣṭavac ca kṛṣṇabhāgaś ca lakṣyate | yad dīptaṃ raktaparyantaṃ tad raktenādhimanthitam || ut.6.20 hanyādṛṣṭiṃ saptarātrāt kaphottho 'dhīmantho 'sṛksaṃbhavaḥ pañcarātrāt | ṣaḍrātrādvau mārutottho nihanyān mithyācārāt paittikaḥ sadya eva || ut.6.21 kaṇḍūpadehāśruyutaḥ pakvodumbarasannibhaḥ | dāhasaṃharṣatāmratvaśophanistodagauravaiḥ || ut.6.22 juṣṭo muhuḥ sravec cāsram uṣṇaśītāmbu picchilam | saṃrambhī pacyate yaś ca netrapākaḥ saśophajaḥ || ut.6.23 śophahīnāni liṅgāni netrapāke tv aśophaje | upekṣaṇādakṣi yadādhimantho vātātmakaḥ sādayati prasahya | rujābhir ugrābhir asādhya eṣa hatādhimanthaḥ khalu nāma rogaḥ || ut.6.24 antaḥsirāṇāṃ śvasanaḥ sthito dṛṣṭiṃ pratikṣipan | hatādhimanthaṃ janayet tam asādhyaṃ vidur budhāḥ || ut.6.25 pakṣmadvayākṣibhruvamāśritastu yannānilaḥ saṃcarati praduṣṭaḥ | paryāyaśaś cāpi rujaḥ karoti taṃ vātaparyāyamudāharanti || ut.6.26 yat kūṇitaṃ dāruṇarūkṣavartma vilokane cāviladarśanaṃ yat | sudāruṇaṃ yat pratibodhane ca śuṣkākṣipākopahataṃ tadakṣi || ut.6.27 yasyāvaṭūkarṇaśirohanustho manyāgato vāpyanilo 'nyato vā | kuryād rujo 'ti bhruvi locane vā tamanyatovātamudāharanti || ut.6.28 amlena bhuktena vidāhinā ca saṃchādyate sarvata eva netram | śophānvitaṃ lohitakaiḥ sanīlairetādṛgamlādhyuṣitaṃ vadanti || ut.6.29 avedanā vāpi savedanā vā yasyākṣirājyo hi bhavanti tāmrāḥ | muhurvirajyanti ca tāḥ samantād vyādhiḥ sirotpāta iti pradiṣṭaḥ || ut.6.30 mohāt sirotpāta upekṣitas tu jāyeta rogas tu sirāpraharṣaḥ | tāmrācchamasraṃ sravati pragāḍhaṃ tathā na śaknotyabhivīkṣituṃ ca ||

iti suśrutasaṃhitāyām uttaratantre sarvagatarogavijñānīyo nāma ṣaṣṭho 'dhyāyaḥ ||6 ||

saptamo 'dhyāyaḥ | ut.7.1 athāto dṛṣṭigatarogavijñānīyam adhyāyaṃ vyākhyāsyāmaḥ || ut.7.2 yathovāca bhagavān dhanvantariḥ || ut.7.3 marūradalamātrāṃ tu pañcabhūtaprasādajām | khadyotavisphuliṅgābhāmiddhāṃ tejobhir avyayaiḥ || ut.7.4 āvṛtāṃ paṭalenākṣṇorbāhyena vivarākṛtim | śītasātmyāṃ nṛṇāṃ dṛṣṭimāhurnayanacintakāḥ || ut.7.5 rogāṃstadāśrayān ghorān ṣaṭ ca ṣaṭ ca pracakṣmahe | paṭalānupraviṣṭasya timirasya ca lakṣaṇam || ut.7.6 sirābhir abhisaṃprāpya viguṇo 'bhyantare bhṛśam | prathame paṭale doṣo yasya dṛṣṭau vyavathitaḥ || ut.7.7 avyaktāni sa rūpāṇi sarvāṇyeva prapaśyati | dṛṣṭirbhṛśaṃ vihvalati dvitīyaṃ paṭalaṃ gate || ut.7.8 makṣikā maśakān keśāñjālakāni ca paśyati | maṇḍalāni patākāṃś ca marīcīḥ kuṇḍalāni ca || ut.7.9 pariplavāṃś ca vividhān varṣamabhraṃ tamāṃsi ca | dūrasthāny api rūpāṇi manyate ca samīpataḥ || ut.7.10 samīpasthāni dūre ca dṛṣṭergocaravibhramāt | yatnavānapi cātyarthaṃ sūcīpāśaṃ na paśyati || ut.7.11 ūrdhvaṃ paśyati gādhastāttṛtīyaṃ paṭalaṃ gate | mahānty api ca rūpāṇi cchāditānīva vāsasā || ut.7.12 karṇanāsākṣiyuktāni viparītāni vīkṣate | yathādoṣaṃ ca rajyeta dṛṣṭirdoṣe balīyasi || ut.7.13 adhaḥsthite samīpasthaṃ dūrasthaṃ coparisthite | pārśvasthite tathā doṣe pārśvasthāni na paśyati || ut.7.14 samantataḥ sthite doṣe saṅkulānīva paśyati | dṛṣṭimadhyagate doṣe sa ekaṃ manyate dvidhā || ut.7.15 dvidhāsthite tridhā paśyed bahudhā cānavasthite | timirākhyaḥ sa vai doṣaḥ caturthaṃ paṭalaṃ gataḥ || ut.7.16 ruṇaddhi sarvato dṛṣṭiṃ liṅganāśaḥ sa ucyate | tasminnapi tamobhūte nātirūḍhe mahāgade || ut.7.17 candrādityau sanakṣatrāvantarīkṣe ca vidyutaḥ | nirmalāni ca tejāṃsi bhrājiṣṇūni ca paśyati || ut.7.18 sa eva liṅganāśastu nīlikākācasaṃjñitaḥ | tatra vātena rūpāṇi bhramantīva sa paśyati || ut.7.19 āvilānyaruṇābhāni vyāviddhāni ca mānavaḥ | pittenādityakhadyotaśakracāpataḍidguṇān || ut.7.20 śikhibarhavicitrāṇi nīlakṛṣṇāni paśyati | kaphena paśyed rūpāṇi snigdhāni ca sitāni ca || ut.7.21 gauracāmaragaurāṇi śvetābhrapratimāni ca | paśyed asūkṣmāṇy atyarthaṃ vyabhre caivābhrasaṃplavam || ut.7.22 salilaplāvitānīva parijāḍyāni mānavaḥ || tathā raktena raktāni tamāṃsi vividhāni ca || ut.7.23 haritaśyāvakṛṣṇāni dhūmadhūmrāṇi cekṣate | sannipātena citrāṇi viplutāni ca paśyati || ut.7.24 bahudhā vā dvidhā vāpi sarvāṇyeva samantataḥ | hīnādhikāṅgānyathavā jyotīṃṣy api ca paśyati || ut.7.25 pittaṃ kuryāt parimlāyi mūrcchitaṃ raktatejasā | pītā diśastathodyantamādityamiva paśyati || ut.7.26 vikīryamāṇān khadyotair vṛkṣāṃs tejobhir eva ca | vakṣyāmi ṣaḍvidhaṃ rāgair liṅganāśam ataḥ param || ut.7.27 rāgo 'ruṇo mārutajaḥ pradiṣṭaḥ pittāt parimlāyyathavāpi nīlaḥ | kaphāt sitaḥ śoṇitajas tu raktaḥ samastadoṣo 'tha vicitrarūpaḥ || ut.7.28 raktajaṃ maṇḍalaṃ dṛṣṭau sthūlakācānalaprabham | parimlāyini roge syān mlāyyānīlaṃ ca maṇḍalam || ut.7.29 doṣakṣayāt kadācit syāt svayaṃ tatra ca darśanam | aruṇaṃ maṇḍalaṃ vātāc cañcalaṃ paruṣaṃ tathā || ut.7.30 pittān maṇḍalam ānīlaṃ kāṃsyābhaṃ pītam eva vā | śleṣmaṇā bahalaṃ snigdhaṃ śaṅkhakundendupāṇḍuram || ut.7.31 calatpadmapalāśasthaḥ śuklo bindur ivāmbhasaḥ | (saṃkucaty ātape 'ty arthaṃ chāyāyāṃ vistṛto bhavet ||) ut.7.32 mṛdyamāne ca nayane maṇḍalaṃ tad visarpati | pravālapadmapatrābhaṃ maṇḍalaṃ śoṇitātmakam || ut.7.33 dṛṣṭirāgo bhavec citro liṅganāśe tridoṣaje | yathāsvaṃ doṣaliṅgāni sarveṣv eva bhavanti hi || ut.7.34 ṣaḍ liṅganāśāḥ ṣaḍime ca rogā dṛṣṭyāśrayāḥ ṣaṭ ca ṣaḍ eva ca syuḥ | tathā naraḥ pittavidagdhadṛṣṭiḥ kaphena cānyas tv atha dhūmadarśī || ut.7.35 yo hrasvajāḍyo(hrasvajātyo) nakulāndhatā ca gambhīrasaṃjñā ca tathaiva dṛṣṭiḥ | pittena duṣṭena gatena dṛṣṭiṃ pītā bhaved yasya narasya dṛṣṭiḥ || ut.7.36 pītāni rūpāṇi ca manyate yaḥ sa mānavaḥ pittavidagdhadṛṣṭiḥ | prāpte tṛtīyaṃ paṭalaṃ tu doṣe divā na paśyen niśi vīkṣate ca || ut.7.37 (rātrau sa śītānugṛhītadṛṣṭiḥ pittālpabhāvādapi tāni paśyet) | tathā naraḥ śleṣmavidagdhadṛṣṭistānyeva śuklāni hi manyate tu || ut.7.38 triṣu sthitolpaḥ paṭaleṣu doṣo naktāndhyamāpādayati prasahya | divā sa sūryānugṛhītacakṣurīkṣeta rūpāṇi kaphālpabhāvāt || ut.7.39 śokajvarāyāsaśirobhitāpairabhyāhatā yasya narasya dṛṣṭiḥ | sadhūmakān paśyati sarvabhāvāṃstaṃ dhūmadarśīti vadanti rogam || ut.7.40 sa hrasvajāḍyo divaseṣu kṛcchrāddhrasvāni rūpāṇi ca yena paśyet | vidyotate yena narasya dṛṣṭirdoṣābhipannā nakulasya yadvat || ut.7.41 citrāṇi rūpāṇi divā sa paśyet sa vai vikāro nakulāndhyasaṃjñaḥ | dṛṣṭirvirūpā śvasanopasṛṣṭā saṅkucyate 'bhyantarataś ca yāti || ut.7.42 rujāvagāḍhā ca tamakṣirogaṃ gambhīriketi pravadanti tajjñāḥ | bāhyau punardvāviha saṃpradiṣṭau nimittataś cāpy animittataś ca || ut.7.43 nimittatas tatra śirobhitāpājjñeyastvabhiṣyandanidarśanaiś ca | surarṣigandharvamahoragāṇāṃ sandarśanenāpi ca bhāsvarāṇām || ut.7.44 hanyeta dṛṣṭirmanujasya yasya sa liṅganāśastvanimittasaṃjñaḥ | tatrākṣi vispaṣṭamivāvabhāti vaidūryavarṇā vimalā ca dṛṣṭiḥ || ut.7.45 vidīryate sīdati hīyate vā nṛṇāmabhīghātahatā tu dṛṣṭiḥ || ut.7.46 ityete nayanagatā mayā vikārāḥ saṃkhyātāḥ pṛthagiha ṣaṭ ca saptatiś ca | eteṣāṃ pṛthagiha vistareṇa sarvaṃ vakṣye 'haṃ tadanu cikitsitaṃ yathāvat ||

iti suśrutasaṃhitāyām uttaratantrāntargate śālākyatantre dṛṣṭigatarogavijñānīyo nāma saptamo 'dhyāyaḥ ||7 ||

aṣṭamo 'dhyāyaḥ | ut.8.1 athātaś cikitsitapravibhāgavijñānīyam adhyāyaṃ vyākhyāsyāmaḥ || ut.8.2 yathovāca bhagavān dhanvantariḥ (suśrutāya) || ut.8.3 ṣaṭsaptatirye 'bhihitā vyādhayo nāmalakṣaṇaiḥ | cikitsitamidaṃ teṣāṃ samāsavyāsataḥ śṛṇu || ut.8.4 chedyāsteṣu daśaikaś ca nava lekhyāḥ prakīrtitāḥ | bhedyāḥ pañca vikārāḥ syurvyadhyāḥ pañcadaśaiva tu || ut.8.5 dvādaśāśastrakṛtyāś ca yāpyāḥ sapta bhavanti hi | rogā varjayitavyāḥ syurdaśa pañca ca jānatā | asādhyau vā bhavetāṃ tu yāpyau cāgantusaṃjñitau || ut.8.6 arśo 'nvitaṃ bhavati vartma tu yattathārśaḥ śuṣkaṃ tathārbudamatho piḍakāḥ sirājāḥ | jālaṃ sirājam api pañcavidhaṃ tathārma chedyā bhavanti saha parvaṇikāmayena || ut.8.7 utsaṅginī bahalakardamavartmanī ca śyāvaṃ ca yac ca paṭhitaṃ tviha baddhavartma | kliṣṭaṃ ca pothakiyutaṃ khalu yac ca vartma kumbhīkinī ca saha śarkarayā ca lekhyāḥ || ut.8.8 śleṣmopanāhalagaṇau ca bisaṃ ca bhedyā granthiś ca yaḥ kṛmikṛto 'ñjananāmikā ca | ādau sirā nigaditās tu yayoḥ prayoge pākau ca yau nayanayoḥ pavano 'nyataś ca || ut.8.9 pūyālasānilaviparyayamanthasaṃjñāḥ syandās tu yantyupaśamaṃ hi sirāvyadhena | śuṣkākṣipākakaphapittavidagdhadṛṣṭiṣvamlākhyaśukrasahitārjunapiṣṭakeṣu || ut.8.10 aklinnavartmahutabhugdhvajadarśiśuktipraklinnavartmasu tathaiva balāsasaṃjñe | āgantunāmayayugena ca dūṣitāyāṃ dṛṣṭau na śastrapatanaṃ pravadanti tajjñāḥ || ut.8.11 saṃpaśyataḥ ṣaḍapi ye 'bhihitāstu kācāste pakṣmakopasahitās tu bhavanti yāpyāḥ | catvāra eva pavanaprabhavāstvasādhyā dvau pittajau kaphanimittaja eka eva | aṣṭārdhakā rudhirajāś ca gadāstridoṣāstāvanta eva gaditāvapi bāhyajau dvau ||

iti suśrutasaṃhitāyām uttaratantrāntargate śālākyatantre cikitsitapravibhāgavijñānīyo nāmāṣṭamo 'dhyāyaḥ ||8 ||

navamo 'dhyāyaḥ | ut.9.1 athāto vātābhiṣyandapratiṣedhaṃ vyākhyāsyāmaḥ || ut.9.2 yathovāca bhagavān dhanvantariḥ || ut.9.3 purāṇasarpiṣā snigdhau syandādhīmanthapīḍitau | svedayitvā yathānyāyaṃ sirāmokṣeṇa yojayet || ut.9.4 saṃpādayed bastibhis tu samyak snehavirecitau | tarpaṇaiḥ puṭapākaiś ca dhūmairāś cyotanais tathā || ut.9.5 nasyasnehaparīṣekaiḥ śirobastibhir eva ca | vātaghnanūpajalajamāṃsāmlakvāthasecanaiḥ || ut.9.6 snehaiś caturbhir uṣṇaiś ca tatpītāmbaradhāraṇaiḥ | payobhir vesavāraiś ca sālvaṇaiḥ pāyasais tathā || ut.9.7 bhiṣak saṃpādayed etāvupanāhaiś ca pūjitaiḥ | grāmyānūpaudakarasaiḥ snigdhaiḥ phalarasānvitaiḥ || ut.9.8 susaṃskṛtaiḥ payobhiś ca tayor āhāra iṣyate | tathā copari bhaktasya sarpiḥpānaṃ(pāne) praśasyate || ut.9.9 triphalākvāthasaṃsiddhaṃ kevalaṃ jīrṇam eva vā | siddhaṃ vātaharaiḥ kṣīraṃ prathamena gaṇena vā || ut.9.10 snehāstailādvinā siddhā vātaghnais tarpaṇe hitāḥ | snaihikaḥ puṭapākaś ca dhūmo nasyaṃ ca tadvidham || ut.9.11 nasyādiṣu sthirākṣīramadhurais tailamiṣyate | eraṇḍapallave mūle tvaci vājaṃ payaḥ śṛtam || ut.9.12 kaṇṭakāryāś ca mūleṣu sukhoṣṇaṃ secane hitam | saindhavodīcyayaṣṭyāhvapippalībhiḥ śṛtaṃ payaḥ || ut.9.13 hitamardhodakaṃ seke tathāś cyotanam eva ca | hrīberavakramañjiṣṭhodumbaratvakṣu sādhitam || ut.9.14 sāmbhaś chāgaṃ payo vāpi śūlāś cyotanam uttamam | madhukaṃ rajanīṃ pathyāṃ devadāruṃ ca peṣayet || ut.9.15 ājena payasā śreṣṭhamabhiṣyande tad añjanam | gairikaṃ saindhavaṃ kṛṣṇāṃ nāgaraṃ ca yathottaram || ut.9.16 dviguṇaṃ piṣṭamadbhis tu guṭikāñjanamiṣyate | snehāñjanaṃ hitaṃ cātra vakṣyate tadyathāvidhi || ut.9.17 rogo yaś cānyatovāto yaś ca mārutaparyayaḥ | anenaiva vidhānena bhiṣak tāvapi sādhayet || ut.9.18 pūrvabhaktaṃ hitaṃ sarpiḥ kṣīraṃ vāpyatha bhojane | vṛkṣādanyāṃ kapitthe ca pañcamūle mahatyapi || ut.9.19 sakṣīraṃ karkaṭarase siddhaṃ cātra ghṛtaṃ pibet | siddhaṃ vā hitamatrāhuḥ pattūrārtagalāgnikaiḥ || ut.9.20 sakṣīraṃ meṣaśṛṅgyā vā sarpirvīratareṇa vā | saindhavaṃ dāru śuṇṭhī ca mātuluṅgaraso ghṛtam || ut.9.21 stanyodakābhyāṃ kartavyaṃ śuṣkapāke tad añjanam | pūjitaṃ sarpiṣaś cātra pānamakṣṇoś ca tarpaṇam || ut.9.22 ghṛtena jīvanīyena nasyaṃ tailena cāṇunā | pariṣeke hitaṃ cātra payaḥ śītaṃ sasaindhavam || ut.9.23 rajanīdārusiddhaṃ vā saindhavena samāyutam | sarpiryutaṃ stanyaghṛṣṭam añjanaṃ vā mahauṣadham || ut.9.24 vasā vānūpajalajā saindhavena samāyutā | nāgaronmiśritā kiñcicchuṣkapāke tad añjanam || ut.9.25 pavanaprabhavā rogā ye keciddṛṣṭināśanāḥ | bījenānena matimān teṣu karma prayojayet ||

iti suśrutasaṃhitāyām uttratantrāntargate śālākyatantre vātābhiṣyandapratiṣedho nāma navamo 'dhyāyaḥ ||9 ||

daśamo 'dhyāyaḥ | ut.10.1 athātaḥ pittābhiṣyandapratiṣedhaṃ vyākhyāsyāmaḥ || ut.10.2 yathovāca bhagavān dhanvantariḥ || ut.10.3 pittasyande paittike cādhimanthe raktāsrāvaḥ sraṃsanaṃ cāpi kāryam | akṣṇoḥ sekālepanasyāñjanāni paitte ca syādyadvisarpe vidhānam || ut.10.4 gundrāṃ śāliṃ śaivalaṃ śailabhedaṃ dārvīmelāmutpalaṃ rodhramabhram | padmātpatraṃ śarkarā darbhamikṣuṃ tālaṃ rodhraṃ vetasaṃ padmakaṃ ca || ut.10.5 drākṣāṃ kṣaudraṃ candanaṃ yaṣṭikāhvaṃ yoṣitkṣīraṃ rātryanante ca piṣṭvā | sarpiḥsiddhaṃ tarpaṇe sekanasye śastaṃ kṣīraṃ siddhameteṣu cājam || ut.10.6 yojyo vargo vyasta eṣo 'nyathā vā samyaṅnasye 'ṣṭārdhasaṃkhye 'pi nityam | kriyāḥ sarvāḥ pittaharyaḥ praśastāstryahāccordhvaṃ kṣīrasarpiś ca nasyam || ut.10.7 pālāśaṃ syācchoṇitaṃ cāñjanārthe śallakyā vā śarkarākṣaudrayuktam | rasakriyāṃ śarkarākṣaudrayuktāṃ pālindyāṃ vā madhuke vāpi kuryāt || ut.10.8 mustā phenaḥ sāgarasyotpalaṃ ca kṛmighnailādhātribījādrasaś ca | tālīśailāgairikośīraśaṅkhair eva ṃ yuñjyādañjanaṃ stanyapiṣṭaiḥ || ut.10.9 cūrṇaṃ kuryād añjanārthe raso vā stanyopeto dhātakīsyandanābhyām | yoṣitstanyaṃ śātakumbhaṃ vighṛṣṭaṃ kṣaudropetaṃ kaiśukaṃ cāpi puṣpam || ut.10.10 rodhraṃ drākṣāṃ śarkarāmutpalaṃ ca nāryāḥ kṣīre yaṣṭikāhvaṃ vacāṃ ca | piṣṭvā kṣīre varṇakasya tvacaṃ ca toyonmiśre candanodumbare ca || ut.10.11 kāryaḥ phenaḥ sāgarasyāñjanārthe nārīstanye mākṣike cāpi ghṛṣṭaḥ | yoṣitstanye sthāpitaṃ yaṣṭikāhvaṃ rodhraṃ drākṣāṃ śarkarāmutpalaṃ ca || ut.10.12 kṣaumābaddhaṃ pathyamāś cyotane vā sarpirghṛṣṭaṃ yaṣṭikāhvaṃ sarodhram | toyonmiśrāḥ kāśmarīdhātripathyāstadvaccāhuḥ kaṭphalaṃ cāmbunaiva || ut.10.13 eṣo 'mlākhye 'nukramaś cāpi śuktau kāryaḥ sarvaḥ syātsirāmokṣavarjyaḥ || ut.10.14 sarpiḥ peyaṃ traiphalaṃ tailvakaṃ vā peyaṃ vā syāt kevalaṃ yat purāṇam | doṣe 'dhastācchuktikāyāmapāste śītairdravyairañjanaṃ kāryamāśu || ut.10.15 vaidūryaṃ yat sphāṭikaṃ vaidrumaṃ ca mauktaṃ śāṅkhaṃ rājataṃ śātakumbham | cūrṇaṃ sūkṣmaṃ śarkarākṣaudrayuktaṃ śuktiṃ hanyādañjanaṃ caitadāśu || ut.10.16 yuñjyāt sarpirdhūmadarśī narastu śeṣaṃ kuryād raktapitte vidhānam | yac caivānyat pittahṛc cāpi sarvaṃ yadvīsarpe paittike vai vidhānam ||

iti śrīsuśrutasaṃhitāyām uttaratantrāntargate śālākyatantre pittābhiṣyandapratiṣedho nāma daśamo 'dhyāyaḥ ||10 ||

ekādaśo 'dhyāyaḥ | ut.11.1 athātaḥ śleṣmābhiṣyandapratiṣedhaṃ vyākhyāsyāmaḥ || ut.11.2 yathovāca bhagavān dhanvantariḥ || ut.11.3 syandādhimanthau kaphajau pravṛddhau jayet sirāṇāmatha mokṣaṇena | svedāvapīḍāñjanadhūmasekapralepayogaiḥ kavalagrahaiś ca || ut.11.4 rūkṣais tathāś cyotanasaṃvidhānais tathaiva rūksaiḥ puṭapākayogaiḥ | tryahāt tryahāc cāpy apatarpaṇānte prātastayostiktaghṛtaṃ praśastam || ut.11.5 tad annapānaṃ ca samācared dhi yac chleṣmaṇo naiva karoti vṛddhim | kuṭannaṭāsphoṭaphaṇijjñabilvapattūrapilvarkakapitthabhaṅgaiḥ || ut.11.6 svedaṃ vidadhyāt athavānulepaṃ barhiṣṭhaśuṇṭhīsurakāṣṭhakuṣṭhaiḥ | sindhūtthahiṅgutriphalāmadhūkaprapauṇḍarīkāñjanatutthatāmraiḥ || ut.11.7 piṣṭairjalenāñjanavartayaḥ syuḥ pathyāharidrāmadhukāñjanair vā | trīṇyūṣaṇāni triphalā haridrā viḍaṅgasāraś ca samāni ca syuḥ || ut.11.8 barhiṣṭhakuṣṭhāmarakāṣṭhaśaṅkhapāṭhāmalavyoṣamanaḥśilāś ca | piṣṭvāmbunā vā kusumāni jātikarañjaśobhāñjanajāni yuñjyāt || ut.11.9 phalaṃ prakīryādathavāpi śigroḥ puṣpaṃ ca tulyaṃ bṛhatīdvayasya | rasāñjanaṃ saindhavacandanaṃ ca manaḥśilāle laśunaṃ ca tulyam || ut.11.10 piṣṭvāñjanārthe kaphajeṣu dhīmān vartīrvidadhyānnayanāmayeṣu | roge balāsagrathite 'ñjanaṃ jñaiḥ kartavyametat suviśuddhakāye || ut.11.11 nīlān yavān gavyapayo 'nupītān śalākinaḥ śuṣkatanūn vidahya | tathārjakāsphotakapitthabilvanirguṇḍijātīkusumāni caiva || ut.11.12 tatkṣāravatsaindhavatuttharocanaṃ pakvaṃ vidadhyādatha lohanāḍyām | etadbalāsagrathite 'ñjanaṃ syādeṣo 'nukalpas tu phaṇijjñakādau || ut.11.13 mahauṣadhaṃ māgadhikāṃ ca mustāṃ sasaindhavaṃ yanmaricaṃ ca śuklam | tanmātuluṅgasvarasena piṣṭaṃ netrāñjanaṃ piṣṭakamāśu hanyāt || ut.11.14 phale bṛhatyā magadhodbhavānā nidhāya kalkaṃ phalapākakāle | srotojayuktaṃ ca tad uddhṛtaṃ syāt tadvat tu piṣṭe vidhir eṣa cāpi || ut.11.15 vārtākaśigrvindrasurāpaṭolakirātatiktāmalakīphaleṣu | kāsīsasāmudrarasāñjanāni jātyās tathā kṣārakam(korakam)eva cāpi || ut.11.16 praklinnavartmanyupadiśyate tu yogāñjanaṃ tanmadhunāvaghṛṣṭam | nādeyamagryaṃ maricaṃ ca śuklaṃ nepālajātā ca samapramāṇā || ut.11.17 samātuluṅgadrava eṣa yogaḥ kaṇḍūṃ nihanyāt sakṛdañjanena | saśṛṅgaveraṃ suradāru mustaṃ sindhuprabhūtaṃ(prasūtaṃ) mukulāni jātyāḥ || ut.11.18 surāprapiṣṭaṃ tv idam añjanaṃ hi kaṇḍvāṃ ca śophe ca hitaṃ vadanti | syandādhimanthakramamācarec ca sarveṣu caiteṣu sadāpramattaḥ || (viśeṣato nāvanam eva kāryaṃ saṃsarjanaṃ cāpi yathopadiṣṭam)

iti suśrutasaṃhitāyām uttaratantrāntargate śālākyatantre kaphābhiṣyandapratiṣedho nāmaikādaśo 'dhyāyaḥ ||11 ||

dvādaśo 'dhyāyaḥ | ut.12.1 athāto raktābhiṣyandapratiṣedhaṃ vyākhyāsyāmaḥ || ut.12.2 yathovāca bhagavān dhanvantariḥ || ut.12.3 manthaṃ syandaṃ sirotpātaṃ sirāharṣaṃ ca raktajam | ekenaiva vidhānena cikitsec caturo gadān || ut.12.4 vyādhyārtāṃś caturo 'pyetān snigdhānkaumbhena sarpiṣā | rasair udārair athavā sirāmokṣeṇa yojayet || ut.12.5 viriktānāṃ prakāmaṃ ca śirāṃsy eṣāṃ viśodhayet | vairecanikasiddhena sitāyuktena sarpiṣā || (majjñā vā tadvimiśreṇa medasā tacchṛtena vā | ) ut.12.6 tataḥ pradehāḥ pariṣecanāni nasyāni dhūmāś ca yathāsvam eva | āś cyotanābhyañjanatarpaṇāni snigdhāś ca kāryāḥ puṭapākayogāḥ || ut.12.7 nīlotpalośīrakaṭaṅkaṭerīkālīyayaṣṭīmadhumustarodhraiḥ | sapadmakairdhautaghṛtapradigdhairakṣṇoḥ pralepaṃ paritaḥ pra kuryāt || ut.12.8 rujāyāṃ cāpy atibhṛśaṃ svedāś ca mṛdavo hitāḥ | akṣṇoḥ samantataḥ kāryaṃ pātanaṃ ca jalaukasām || ut.12.9 ghṛtasya mahatī mātrā pītā cārtiṃ niyacchati | pittābhiṣyandaśamano vidhiś cāpy upapāditaḥ || ut.12.10 kaśerumadhukābhyāṃ vā cūrṇamambarasaṃvṛtam | nyastamapsvāntarikṣāsu hitamāś cyotanaṃ bhavet || ut.12.11 pāṭalyarjunaśrīparṇīdhātakīdhātribilvataḥ | puṣpāṇyatha bṛhatyoś ca bimbīloṭāc ca tulyaśaḥ || ut.12.12 samañjiṣṭhāni madhunā piṣṭānīkṣurasena vā | raktābhiṣyandaśāntyartham etad añjanam iṣyate || ut.12.13 candanaṃ kumudaṃ patraṃ śilājatu sakuṅkumam | ayastāmrarajastutthaṃ nimbaniryāsam añjanam || ut.12.14 trapu kāṃsyamalaṃ cāpi piṣṭvā puṣparasena tu | vipulā yāḥ kṛtā vartyaḥ pūjitāś cāñjane sadā || ut.12.15 syādañjanaṃ ghṛtaṃ kṣaudraṃ sirotpātasya bheṣajam | tadvatsaindhavakāsīsaṃ stanyaghṛṣṭaṃ ca pūjitam || ut.12.16 madhunā śaṅkhanaipālītutthadārvyaḥ sasaindhavāḥ | rasaḥ śirīṣapuṣpāc ca surāmaricamākṣikaiḥ || ut.12.17 yuktaṃ tu madhunā vāpi gairikaṃ hitamañjane | sirāharṣe 'ñjanaṃ kuryāt phaṇitaṃ madhusaṃyutam || ut.12.18 madhunā tārkṣyajaṃ vāpi kāsīaṃ vā sasaidhavam | vetrāmlastanyasaṃyuktaṃ phāṇitaṃ ca sasaindhavam || ut.12.19 paittaṃ vidhimaśeṣeṇa kuryād arjunaśāntaye | ikṣukṣaudrasitāstanyadārvīmadhukasaindhavaiḥ || ut.12.20 sekāñjanaṃ cātra hitamamlairāś cyotanaṃ tathā | sitāmadhukakaṭvaṅgamastukṣaudrāmlasaindhavaiḥ || ut.12.21 bījapūrakakolāmladāḍimāmlaiś ca yuktitaḥ | ekaśo vā dviśo vāpi yojitaṃ vā tribhis tribhiḥ || ut.12.22 sphaṭikaṃ vidrumaṃ śaṅkho madhukaṃ kadhu caiva hi | śaṅkhakṣaudrasitāyuktaḥ sāmudraḥ phena eva vā || ut.12.23 dvāvimau vihitau yogāvañjane 'rjunanāśanau | saindhavakṣaudrakatakāḥ sakṣaudraṃ vā rasāñjanam || ut.12.24 kāsīsaṃ madhunā vāpi yojyamatrāñjane sadā | lohacūrṇāni sarvāṇi dhātavo lavaṇāni ca || ut.12.25 ratnāni dantāḥ śṛṅgāṇi gaṇaś cāpy avasādanaḥ | kukkuṭāṇḍakapālāni laśunaṃ kaṭukatrayam || ut.12.26 karañjabījamelā ca lekhyāñjanamidaṃ smṛtam | puṭapākāvasānena raktavisrāvaṇādinā || ut.12.27 saṃpāditasya vidhinā kṛtsnena syandaghātinā | anenāpaharec chukramavraṇaṃ kuśalo bhiṣak || ut.12.28 uttānamavagāḍhaṃ vā karkaśaṃ vāpi savraṇam | śirīṣabījamaricapippalīsaindhavair api || ut.12.29 śukrasya gharṣaṇaṃ kāryamathavā saindhavena tu | kuryāt tāmrarajaḥśaṅkhaśilāmaricasaindhavaiḥ || ut.12.30 antyāddviguṇitairebhir añjanaṃ śukranāśanam | kuryād añjanayogau vā samyak ślokārdhikāvimau || ut.12.31 śaṅkhakolāsthikatakadrāksāmadhukamākṣikaiḥ | kṣaudradantārṇavamalaśirīṣakusumair api || ut.12.32 kṣārāñjanaṃ vā vitaredbalāsagrathitāpaham | mudgān vā nistuṣān bhṛṣṭān śaṅkhakṣaudrasitāyutān || ut.12.33 madhūkasāraṃ madhunā yojayeccāñjane sadā | bibhītakāsthimajjā vā sakṣaudraḥ śukranāśanaḥ || ut.12.34 śaṅkhaśuktimadhudrākṣāmadhukaṃ katakāni ca | dvitvaggate saśūle vā vātaghnaṃ tarpaṇaṃ hitam || ut.12.35 vaṃśajāruṣkarau tālaṃ nārikelaṃ ca dāhayet | visrāvya ksāravaccūrṇaṃ bhāvayetkarabhāsthijam || ut.12.36 bahuśo 'ñjanametatsyācchukravaivarṇyanāśanam | ajakāṃ pārśvato viddhvā sūcyā visrāvya codakam || ut.12.37 vraṇaṃ gomāṃsacūrṇena pūrayet sarpiṣā saha | bahuśo 'valikhec cāpi vartmāsyopagataṃ yadi || ut.12.38 saśophaś cāpy aśophaś ca dvau pākau yau prakīrtitau | snehasvedopapannasya tatra viddhvā sirāṃ bhiṣak || ut.12.39 sekāś cyotananasyāni puṭapākāṃś ca kārayet | sarvataś cāpi śuddhasya kartavyam idam añjanam || ut.12.40 tāmrapātrasthitaṃ māsaṃ sarpiḥ saindhavasaṃyutam | maireyaṃ vāpi dadhyevaṃ dadhyuttarakam eva vā || ut.12.41 ghṛtaṃ kāṃsyamalopetaṃ stanyaṃ vāpi sasaindhavam | madhūkasāraṃ madhunā tulyāṃśaṃ gairikeṇa vā || ut.12.42 sarpiḥsaindhavatāmrāṇi yoṣitstanyayutāni vā | dāḍimārevatāśmantakolāmlaiś ca sasaindhavām | rasakriyāṃ vā vitaretsamyakpākajighāṃsayā || ut.12.43 māsaṃ saindhavasaṃyuktaṃ sthitaṃ sarpiṣi nāgaram | āś cyotanāñjanaṃ yojyamabalākṣīrasaṃyutam || ut.12.44 jātyāḥ puṣpaṃ saindhavaṃ śṛṅgaveraṃ kṛṣṇābījaṃ kīṭaśatroś ca sāram | etat piṣṭaṃ netrapāke 'ñjanārthaṃ kṣaudropetaṃ nirviśaṅkaṃ prayojyam || ut.12.45 pūyālase śoṇitamokṣaṇaṃ ca hitaṃ tathaivāpyupanāhanaṃ ca | kṛtsno vidhiś cekṣaṇapākaghātī yathāvidhānaṃ bhiṣajā prayojyaḥ || ut.12.46 kāsīsasindhuprabhavārdrakaistu hitaṃ bhaved añjanam eva cātra | kṣaudrānvitair ebhir athopayuñjyād anyat tu tāmrāyasacūrṇayuktaiḥ || ut.12.47 snehādibhiḥ samyag apāsya doṣāṃstṛptiṃ vidhāyātha yathāsvam eva | praklinnavartmānam upakrameta sekāñjanāś cyotananasyadhūmaiḥ || ut.12.48 mustāharidrāmadhukapriyaṅgusiddhārtharodhrotpalasārivābhiḥ | kṣuṇṇābhir āś cyotanam eva kāryamatrāñjanaṃ cāñjanamākṣikaṃ syāt || ut.12.49 patraṃ phalaṃ cāmalakasya paktvā kriyāṃ vidadhyādathavāñjanārthe | vaṃśasya bhūlena rasakriyāṃ vā vartīkṛtāṃ tāmrakapālapakvām || ut.12.50 rasakriyāṃ vā triphalāvipakvāṃ palāśapuṣpaiḥ svaramañjarervā | piṣṭvā chagalyāḥ payasā malaṃ vā kāṃsasya dagdhvā saha tāntavena || ut.12.51 pratyañjanaṃ tan maricair upetaṃ cūrṇena tāmrasya sahopayojyam | samudraphenaṃ lavaṇottamaṃ ca śaṅkho 'tha mudgo maricaṃ ca śuklam || ut.12.52 cūrṇāñjanaṃ jāḍyam athāpi kaṇḍūm aklinnavartmāny upahanti śīghram | praklinnavartmany api caita eva yogāḥ prayojyāś ca samīkṣya doṣam || ut.12.53 sakajjalaṃ tāmraghaṭe ca ghṛṣṭaṃ sarpiryutaṃ tulthakam añjanaṃ ca ||

iti suśrutasaṃhitāyām uttaratantrāntargate śālākyatantre raktābhiṣyandapratiṣedho nāma dvādaśo 'dhyāyaḥ ||12 ||

trayodaśo 'dhyāyaḥ | ut.13.1 athāto lekhyarogapratiṣedhaṃ vyākhyāsyāmaḥ || ut.13.2 yathovāca bhagavān dhanvantariḥ || ut.13.3 nava ye 'bhihitā lekhyāḥ sāmānyasteṣv ayaṃ vidhiḥ | snigdhavāntaviriktasya nivātātapasadmani || ut.13.4 (āptair dṛḍhaṃ gṛhītasya veśmany uttānaśāyinaḥ |) sukhodakaprataptena vāsasā susamāhitaḥ | svedayed vartma nirbhujya vāmāṅguṣṭhāṅgulishtitam || ut.13.5 aṅgulyaṅguṣṭhakābhyāṃ tu nirbhugnaṃ vartma yatnataḥ | plotāntarābhyāṃ na yathā calati sraṃsate 'pi vā || ut.13.6 tataḥ pramṛjya plotena vartma śastrapadāṅkitam | likhec chastreṇa patrair vā tato rakte sthite punaḥ || ut.13.7 svinnaṃ manohvākāsīsavyoṣārdrāñjanasaindhavaiḥ | ślakṣṇapiṣṭaiḥ samākṣīkaiḥ pratisāryoṣṇavāriṇā || ut.13.8 prakṣālya haviṣā siktaṃ vraṇavat samupācaret | svedāvapīḍaprabhṛtīṃs tryahād ūrdhvaṃ prayojayet || ut.13.9 vyāsataste samuddiṣṭaṃ vidhānaṃ lekhyakarmaṇi | asṛgāsrāvarahitaṃ kaṇḍūśophavivarjitam || ut.13.10 samaṃ nakhanibhaṃ vartma likhitaṃ samyag iṣyate | raktam akṣi sravet skannaṃ kṣatāc chastrakṛtād dhruvam || ut.13.11 rāgaśophaparisrāvās timiraṃ vyādhyanirjayaḥ | vartma śyāvaṃ guru stabdhaṃ kaṇḍūharṣopadehavat || ut.13.12 netrapākam udīrṇaṃ vā kurvītāpratikāriṇaḥ | etad durlikhitaṃ jñeyaṃ snehayitvā punar likhet || ut.13.13 vyāvartate yadā vartma pakṣma cāpi vimuhyati | syāt saruk srāvabahulaṃ tadatisrāvitaṃ viduḥ || ut.13.14 snehasvedādiriṣṭaḥ syāt kramastatrānilāpahaḥ | vartmāvabandhaṃ kliṣṭaṃ ca bahalaṃ yac ca kīrtitam || ut.13.15 pothakīś cāpy avalikhet pracchayitvāgrataḥ śanaiḥ | samaṃ likhet tu medhāvī śyāvakardamavartmanī || ut.13.16 kumbhīkinīṃ śarkarāṃ ca tathaivotsaṅginīm api | kalpayitvā tu śastreṇa likhet paś cād atandritaḥ || ut.13.17 bhaveyurvartmasu ca yāḥ piḍakāḥ kaṭhinā bhṛśam | hrasvāstāmrāś ca tāḥ pakvā bhindyādbhinnā likhedapi || ut.13.18 taruṇīś cālpasaṃrambhā piḍakā bāhyavartmajāḥ | viditvaitāḥ praśamayet svedālepanaśodhanaiḥ ||

iti suśrutasaṃhitāyām uttaratantrāntargate śālākyatantre lekhyarogapratiṣedho nāma trayodaśo 'dhyāyaḥ ||13 ||

caturdaśo 'dhyāyaḥ | ut.14.1 athāto bhedyarogapratiṣedhaṃ vyākhyāsyāmaḥ || ut.14.2 yathovāca bhagavān dhanvantariḥ || ut.14.3 svedayitvā bisagranthiṃ chidrāṇyasya nirāśayam | pakvaṃ bhittvā tu śastreṇa sindhavenāvacūrṇayet || ut.14.4 kāsīsamāgadhīpuṣpanepālyelāyutena tu | tataḥ kṣaudraghṛtaṃ dattvā samyag bandhamathācaret || ut.14.5 rocanākṣāratutthāni pippalyaḥ kṣaudram eva ca | pratisāraṇamekaikaṃ bhinne lagaṇa iṣyate || ut.14.6 mahaty api ca yuñjīta kṣārāgnī vidhikovidaḥ | svinnāṃ bhinnāṃ viniṣpīḍya bhiṣagañjananāmikām || ut.14.7 śilailānatasindhūtthaiḥ sakṣaudraiḥ pratisārayet | rasāñjanamadhubhyāṃ tu bhittvā vā śastrakarmavit || ut.14.8 pratisāryāñjanair yuñjyā duṣṇair dīpaśikhodbhavaiḥ | samyaksvinne kṛmigranthau bhinne syāt pratisāraṇam || ut.14.9 triphalātutthakāsīsasaindhavaiś ca rasakriyā | bhittvopanāhaṃ kaphajaṃ pippalīmadhusaindhavaiḥ || ut.14.10 lekhayen maṇḍalāgreṇa samantāt pracchayed api | saṃsnehya patrabhaṅgaiś ca svedayitvā yathāsukham || ut.14.11 sarveṣveteṣu vihitaṃ vidhānaṃ snehapūrvakam | saṃpakve prayato bhūtvā kurvīta vraṇaropaṇam ||

iti suśrutasaṃhitāyām uttaratantrāntargate śālākyatantre bhedyarogapratiṣedho nāma caturdaśo 'dhyāyaḥ ||14 ||

pañcadaśo 'dhyāyaḥ | ut.15.1 athātaś chedyarogapratiṣedhaṃ vyākhyāsyāmaḥ || ut.15.2 yathovāca bhagavān dhanvantariḥ || ut.15.3 snigdhaṃ bhuktavato hy annam upaviṣṭasya yatnataḥ | saṃroṣayet tu nayanaṃ bhiṣak cūrṇais tu lāvaṇaiḥ || ut.15.4 tataḥ saṃroṣitaṃ tūrṇaṃ susvinnaṃ paridhaṭṭitam | arma yatra valījātaṃ tatraitallagayed bhiṣak || ut.15.5 apāṅgaṃ prekṣamāṇasya baḍiśena samāhitaḥ | mucuṇḍyādāya medhāvī sūcīsūtreṇa vā punaḥ || ut.15.6 na cotthāpayatā kṣipraṃ kāryamabhyunnataṃ tu tat | śastrābādhabhayāccāsya vartmanī grāhayed dṛḍham || ut.15.7 tataḥ praśithilībhūtaṃ tribhir eva vilambitam | ullikhanmaṇḍalāgreṇa tīkṣṇena pariśodhayet || ut.15.8 vimuktaṃ sarvataś cāpi kṛṣṇācchuklāc ca maṇḍalāt | nītvā kanīnakopāntaṃ chindyānnātikanīnakam || ut.15.9 caturbhāgasthite māṃse nākṣi vyāpattimṛcchati | kanīnakavadhādasraṃ nāḍī vāpyupajāyate || ut.15.10 hīnacchedāt punarvṛddhiṃ śīgramevādhigacchati | arma yajjālavadvyāpi tadapyunmārjya lambitam || ut.15.11 chindyādvakreṇa śastreṇa vartmaśuklāntamāthitam | pratisāraṇamakṣṇos tu tataḥ kāryamanantaram || ut.15.12 yāvanālasya cūrṇena trikaṭorlavaṇasya ca | svedayitvā tataḥ paś cādbadhnīyāt kuśalo bhiṣak || ut.15.13 doṣartubalakālajñaḥ snehaṃ dattvā yathāhitam | vraṇavat saṃvidhānaṃ tu tasya kuryād ataḥ param || ut.15.14 tryahānmuktvā karasvedaṃ dattvā śodhanamācaret | karañjabījāmalakamadhukaiḥ sādhitaṃ payaḥ || ut.15.15 hitamāś cyotanaṃ śūle dvirahnaḥ kṣaudrasaṃyutam | madhukotpalakiñjalkadūrvākalkaiś ca mūrdhani || ut.15.16 pralepaḥ saghṛtaḥ śītaḥ kṣīrapiṣṭaḥ praśasyate | lekhyāñjanair apahared armaśeṣaṃ bhaved yadi || ut.15.17 arma cālpaṃ dadhinibhaṃ nīlaṃ raktam athāpi vā | dhūsaraṃ tanu yac cāpi śukravattadupācaret || ut.15.18 carmābhaṃ bahulaṃ yattu snāyumāṃsaghanāvṛtam | chedyam eva tadarma syāt kṛṣṇamaṇḍalagaṃ ca yat || ut.15.19 viśuddhavarṇam akliṣṭaṃ kriyāsvakṣi gataklamam | chinne 'rmaṇi bhavet samyag yathāsvamanupadravam || ut.15.20 sirājāle sirā yās tu kaṭhināstāś ca buddhimān | ullikhenmaṇḍalāgreṇa baḍiśenāvalambitāḥ || ut.15.21 sirāsu piḍakā jātā yā na sidhyanti bheṣajaiḥ | armavan maṇḍalāgreṇa tāsāṃ chedanamiṣyate || ut.15.22 rogayoś caitayoḥ kāryamarmoktaṃ pratisāraṇam | vidhiś cāpi yathādoṣaṃ lekhanadravyasaṃbhṛtaḥ || ut.15.23 sandhau saṃsvedya śastreṇa varṇīkāṃ vicakṣaṇaḥ | uttare ca tribhāge ca baḍiśenāvalambitām || ut.15.24 chindyāttato 'rdhamagre syād aśrunāḍī hy ato 'nyathā | pratisāraṇam atrāpi saindhavakṣaudramiṣyate || ut.15.25 lekhanīyāni cūrṇāni vyādhiśeṣasya bheṣajam | śaṅkhaṃ samudraphenaṃ ca maṇḍūkīṃ ca samudrajām || ut.15.26 sphaṭikaṃ kuruvindaṃ ca pravālāśmantakaṃ tathā | vaidūryaṃ pulakaṃ muktāmayas tāmrarajāṃsi ca || ut.15.27 samabhāgāni saṃpiṣya sārdhaṃ srotoñjanena tu | cūrṇāñjanaṃ kārayitvā bhājane bheṣaśṛṅgaje || ut.15.28 saṃsthāpyobhayataḥ kālamañjayet satataṃ budhaḥ | armāṇi piḍakāṃ hanyāt sirājālāni tena vai || ut.15.29 arśas tathā yac ca nāmnā śuṣkārśo 'rbudam eva ca | abhyantaraṃ vartmaśayā vidhānaṃ teṣu vakṣyate || ut.15.30 vartmopasvedya nirbhujya sūcyotkṣipya prayatnataḥ | maṇḍalāgreṇa tīkṣṇena mūle bhindyād bhiṣagvaraḥ || ut.15.31 tataḥ saindhavakāsīsakṛṣṇābhiḥ pratisārayet | sthite ca rudhire vartma dahet samyak śalākayā || ut.15.32 kṣāreṇāvalikhec cāpi vyādhiśeso bhaved yadi | tīkṣṇair ubhayatobhāgais tato doṣam adhikṣipet || ut.15.33 vitarec ca yathādoṣam abhiṣyandakriyāvidhim | śastrakarmaṇy uparate māsaṃ ca syāt suyantritaḥ ||

iti suśrutasaṃhitāyām uttaratantrāntargate śālākyatantre chedyarogapratiṣedho nāma pañcadaśo 'dhyāyaḥ ||15 ||

ṣoḍaśo 'dhyāyaḥ | ut.16.1 athātaḥ pakṣmakopapratiṣedhaṃ vyākhyāsyāmaḥ || ut.16.2 yathovāca bhagavān dhanvantariḥ || ut.16.3 yāpyas tu yo vartmabhavo vikāraḥ pakṣmaprakopo 'bhihitaḥ purastāt | tatropaviṣṭasya narasya carma vartmopariṣṭād anutiryag eva || ut.16.4 bhruvor adhastāt parimucya bhāgau pakṣmāśritaṃ caikam ato 'vakṛntet | kanīnakāpāṅgasamaṃ samantād yavākṛti snigdhatanor narasya || ut.16.5 utkṛtya śastreṇa yavapramāṇaṃ bālena sīvyodbhiṣagapramattaḥ | dattvā ca sarpirmadhunāvaśeṣaṃ kuryād vidhānaṃ vihitaṃ vraṇe yat || ut.16.6 lalāṭadeśe ca nibaddhapaṭṭaṃ prāk syūtam atrāpy aparaṃ ca baddhvā | sthairyaṃ gate cāpy atha śastramārge bālān vimuñcet kuśalo 'bhivīkṣya || ut.16.7 evaṃ na cec chāmyati tasya vartma nirbhujya doṣopahatāṃ valiṃ ca | tato 'gninā vā pratisārayettāṃ kṣāreṇa vā samyag avekṣya dhīraḥ || ut.16.8 chittvā samaṃ vāpyupapakṣmamālāṃ samyag gṛhītvā baḍiśaistribhis tu | pathyāphalena pratisārayet tu ghṛṣṭena vā tauvarakeṇa samyak || ut.16.9 catvāra ete vidhayo vihantuṃ pakṣmoparodhaṃ pṛthageva śastāḥ | virecanāś cyotanadhūmanasyalepāñjanasneharasakriyāś ca ||

iti suśrutasaṃhitāyām uttaratantrāntargate śālākyatantre pakṣmagatarogapratiṣedho nāma ṣoḍaśo 'dhyāyaḥ ||16 ||

saptadaśo 'dhyāyaḥ | ut.17.1 athāto dṛṣṭigatarogapratiṣedhaṃ vyākhyāsyāmaḥ || ut.17.2 yathovāca bhagavān dhanvantariḥ || ut.17.3 trayaḥ sādhyāstrayo 'sādhyā yāpyāḥ ṣaṭ ca bhavanti hi | tatraikasya pratīkāraḥ kīrtito dhūmadarśinaḥ || ut.17.4 dṛṣṭau pittavidagdhāyāṃ vidagdhāyāṃ kaphena ca | pittaśleṣmaharaṃ kuryād vidhiṃ śastrakṣatād ṛte || ut.17.5 nasyasekāñjanālepapuṭapākaiḥ satarpaṇaiḥ | ādye tu traiphalaṃ peyaṃ sarpis traivṛtam uttare || ut.17.6 tailvakaṃ cobhayoḥ pathyaṃ kevalaṃ jīrṇam eva vā | gairikaṃ saindhavaṃ kṛṣṇā godantasya maṣī tathā || ut.17.7 gomāṃsaṃ maricaṃ bījaṃ śirīṣasya manaḥśilā | vṛntaṃ kapitthān madhunā svayaṅguptāphalāni ca || ut.17.8 catvāra ete yogāḥ syur ubhayor añjane hitāḥ | kubjakāśokaśālāmrapriyaṅgunalinotpalaiḥ || ut.17.9 puṣpair hareṇukṛṣṇāhvāpathyāmalakasaṃyutaiḥ | sarpirmadhuyutaiś cūrṇair veṇunāḍyām avasthitaiḥ || ut.17.10 añjayed dvāv api bhiṣak pittaśleṣmavibhāvitau | āmrajambūdbhavaṃ puṣpaṃ tadrasena hareṇukām || ut.17.11 piṣṭvā kṣaudrājyasaṃyuktaṃ prayojyam athavāñjanam | nalinotpalakiñjalkagairikair gośakṛdrasaiḥ || ut.17.12 guḍikāñjanam etad vā dinarātryandhayor hitam | rasāñjanarasakṣaudratālīśasvarṇagairikam || ut.17.13 gośakṛdrasasaṃyuktaṃ pittopahatadṛṣṭaye | śītaṃ sauvīrakaṃ vāpi piṣṭvātha rasabhāvitam || ut.17.14 kūrmapittena matimān bhāvayed rauhitena vā | cūrṇāñjanam idaṃ nityaṃ prayojyaṃ pittaśāntaye || ut.17.15 kāśmarī puṣpamadhukadārvīrodhrarasāñjanaiḥ | sakṣaudram añjanaṃ tadvad dhitam atrāmaye sadā || ut.17.16 srotojaṃ saindhavaṃ reṇukāṃ cāpi peṣayet | ajāmūtreṇa tā vartyaḥ kṣaṇadāndhyāñjane hitāḥ || ut.17.17 kālānusārivāṃ kṛṣṇāṃ nāgaraṃ madhukaṃ tathā | tālīśapatraṃ kṣaṇade gāṅgeyaṃ ca yakṛdrase || ut.17.18 kṛtās tā vartayaḥ piṣṭāś chāyāśuṣkāḥ sukhāvahāḥ | manaḥśilābhayāvyoṣabalākālānusārivāḥ || ut.17.19 saphenā vartayaḥ piṣṭāś chāgakṣīrasamanvitāḥ | gomūtrapittamadirāyakṛddhātrīrase pacet || ut.17.20 kṣudrāñjanaṃ rasenānyadyakdtastraiphale 'pi vā | gomūtrājyārṇavamalapippalīkṣaudrakaṭphalaiḥ || ut.17.21 saindhavopahitaṃ yuñjyān nihitaṃ veṇugahvare | medo yakṛd ghṛtaṃ cājaṃ pippalyaḥ saindhavaṃ madhu || ut.17.22 rasam āmalakāc cāpi pakvaṃ samyaṅ nidhāpayet | kośe khadiranirmāṇe tadvat kṣudrāñjanaṃ hitam || ut.17.23 hareṇumagadhājāsthimajjailāyakṛdanvitam | yakṛdrasenāñjanaṃ vā śleṣmopahatadṛṣṭaye || ut.17.24 vipācya godhāyakṛd ardhapāṭitaṃ supūritaṃ māgadhikābhir agninā | niṣevitaṃ tad yakṛd añjanena nihanti naktāndhyam asaṃśayaṃ khalu || ut.17.25 tathā yakṛcchāgabhavaṃ hutāśane vipācya samyaṅmagadhāsamanvitam | prayojitaṃ pūrvavadāśvasaṃśayaṃ jayet kṣapāndhyaṃ sakdṛañjanānnṛṇām || ut.17.26 plīhā yakṛc cāpy upabhākṣite ubhe prakalpya śūlye ghṛtatailasaṃyute | te sārṣapasnehasamāyute 'ñjanaṃ naktāndhyam āśveva hataḥ prayojite || ut.17.27 nadīja śimbī trikaṭūny athāñjanaṃ manaḥśilā dve ca niśe ya(śa)kṛdgavām | sacandaneyaṃ guṭikāthavāñjanaṃ praśasyate vai divaseṣv apaśyatām || ut.17.28 bhavanti yāpyāḥ khalu ye ṣaḍāmayā hared asṛkteṣu sirāvimokṣaṇaiḥ | virecayec cāpi purāṇasarpiṣā virecanāṅgopahitena sarvadā || ut.17.29 payovimiśraṃ pavanodbhave hitaṃ vadanti pañcāṅgulatailam eva tu | bhaved ghṛtaṃ traiphalam eva śodhanaṃ viśeṣataḥ śoṇitapittarogayoḥ || ut.17.30 trivṛdvirekaḥ kaphaje praśasyate tridoṣaje tailam uśanti tatkṛtam | purāṇasarpis timireṣu sarvaśo hitaṃ bhaved āyasabhājanasthitam || ut.17.31 hitaṃ ca vidyāt triphalāghṛtaṃ sadā kṛtaṃ ca yan meṣaviṣāṇanāmabhiḥ | sadāvalihyāt triphalāṃ sucūrṇitāṃ ghṛtapragāḍhāṃ timire 'tha pittaje || ut.17.32 samīraje tailayutāṃ kaphātmake madhupragāḍhāṃ vidadhīta yuktitaḥ | gavāṃ śakṛtkvāthavipakvam uttamaṃ hitaṃ tu tailaṃ timireṣu nāvanam || ut.17.33 hitaṃ ghṛtaṃ kevala eva paittike hy ajāvikaṃ yan madhurair vipācitam | tailaṃ sthirādau madhure ca yadgaṇe tathāṇutailaṃ pavanāsṛgutthayoḥ || ut.17.34 sahāśvagandhātibalāvarīśṛtaṃ hitaṃ ca nasye trivṛtaṃ yadīritam | jalodbhavānūpajamāṃsa saṃskṛtād ghṛtaṃ vidheyaṃ payaso yad utthitam || ut.17.35 sasaindhavaḥ kravyabhugeṇa māṃsayor hitaḥ sasarpiḥ samadhuḥ puṭāhvayaḥ | vasātha gṛdhroragatāmracūḍajā sadā praśastā madhukānvitāñjane || ut.17.36 pratyañjanaṃ srotasi yat samutthitaṃ kramād rasakṣīraghṛteṣu bhāvitam | sthitaṃ daśāhatrayam etad añjanaṃ kṛṣṇoragāsye kuśasaṃpraveṣṭite || ut.17.37 tanmālatīkorakasaindhavāyutaṃ sadāñjanaṃ syāt timire 'tha rāgiṇi | subhāvitaṃ vā payasā dinatrayaṃ kācāpahaṃ śāstravidaḥ pracakṣate || ut.17.38 havir hitaṃ kṣīrabhavaṃ tu paittike vadanti nasye madhurauṣadhaiḥ kṛtam | tat tarpaṇe caiva hitaṃ prayojitaṃ sajāṅgalasteṣu ca yaḥ puṭāhvayaḥ || ut.17.39 rasāñjanakṣaudrasitāmanaḥśilāḥ kṣudrāñjanaṃ tanmadhukena saṃyutam | samāñjanaṃ vā kanakākarodbhavaṃ sucūrṇitaṃ śreṣṭham uśanti tadvidaḥ || ut.17.40 bhilloṭagandhodakasekasecitaṃ pratyañjane cātra hitaṃ tu tutthakam | sameṣaśṛṅgāñjanabhāgasaṃmitaṃ jalodbhavaṃ kācamalaṃ vyapohati || ut.17.41 palāśarohītamadhūkajā rasāḥ kṣaudreṇa yuktā madirāgramiśritāḥ | uśīralodhratriphalāpriyaṅgubhiḥ pacet tu nasyaṃ kapharogaśāntaye || ut.17.42 viḍaṅgapāṭhākiṇihīṅgudītvacaḥ prayojayed dhūmam uśīrasaṃyutāḥ | vanaspatikvāthavipācitaṃ ghṛtaṃ hitaṃ haridrānalade ca tarpaṇam || ut.17.43 samāgadho mākṣikasaindhavāḍhyaḥ sajāṅgalaḥ syāt puṭapāka eva ca | manaḥśilātryūṣaṇaśaṅkhamākṣikaiḥ sasindhukāsīsarasāñjanaiḥ kriyāḥ || ut.17.44 hite ca kāsīsarasāñjane tathā vadanti pathye guḍanāgarair yute | yad añjanaṃ vā bahuśo niṣecitaṃ samūtravarge triphalodake śṛte || ut.17.45 niśācarāsthisthitam etad añjanaṃ kṣipec ca māsaṃ salile 'sthire punaḥ | meṣasya puṣpair madhukena saṃyutaṃ tad añjanaṃ sarvakṛte prayojayet || ut.17.46 kriyāś ca sarvāḥ kṣatajodbhave hitaḥ kramaḥ parimlāyini cāpi pittahṛt | kramo hitaḥ syandaharaḥ prayojitaḥ samīkṣya doṣeṣu yathāsvam eva ca || ut.17.47 doṣodaye naiva ca viplutiṃ gate dravyāṇi nasyādiṣu yojayed budhaḥ | punaś ca kalpe 'ñjanavistaraḥ śubhaḥ pravakṣyate 'nyastam apīha yojayet || ut.17.48 ghṛtaṃ purāṇaṃ triphalāṃ śatāvarīṃ paṭolamudgāmalakaṃ yavān api | niṣevamāṇasya narasya yatnato bhayaṃ sughorarāttimirān na vidyate || ut.17.49 śatāvarīpāyasa eva kevalas tathā kṛto vāmalakeṣu pāyasaḥ | prabhūtasarpistriphalodakottaro yavaudano vā timiraṃ vyapohati || ut.17.50 jīvantiśākaṃ suniṣaṇṇakaṃ ca sataṇḍulīyaṃ varavāstukaṃ ca | cillī tathā mūlakapotikā ca dṛṣṭerhitaṃ śākunajāṅgalaṃ ca || ut.17.51 paṭolakarkoṭakakāravellavārtākutarkārikarīrajāni | śākāni śigrvārtagalāni caiva hitāni dṛṣṭerghṛtasādhitāni || ut.17.52 vivarjayet sirāmokṣaṃ timire rāgamāgate | yantreṇotpīḍito doṣo nihanyādāśu darśanam || ut.17.53 arāgi timiraṃ sādhyam ādyaṃ paṭalamāśritam | kṛcchraṃ dvitīye rāgi syāt tṛtīye yāpyam ucyate || ut.17.54 rāgaprāpteṣv api hitāstimireṣu tathā kriyāḥ | yāpanārthaṃ yathoddiṣṭāḥ sevyāś cāpi jalaukasaḥ || ut.17.55 ślaiṣmike liṅganāśe tu karma vakṣyāmi siddhaye | na ced ardhendugharmāmbubindumuktākṛtiḥ sthiraḥ || ut.17.56 viṣamo vā tanur madhye rājimān vā bahuprabhaḥ | dṛṣṭistho lakṣyate doṣaḥ sarujo vā salohitaḥ || ut.17.57 snigdhasvinnasya tasyātha kāle nātyuṣṇaśītale | yantritasyopaviṣṭasya svāṃ nāsāṃ paśyataḥ samam || ut.17.58 matimān śuklabhāgau dvau kṛṣṇān muktvā hy apāṅgataḥ | unmīlya nayane samyak sirājālavivarjite || ut.17.59 nādho nordhvaṃ na pārśvābhyāṃ chidre daivakṛte tataḥ | śalākayā prayatnena viśvastaṃ yavavakrayā || ut.17.60 madhyapradeśinyaṅguṣṭhasthirahastagṛhītayā | dakṣiṇena bhiṣak savyaṃ vidhyet savyena cetarat || ut.17.61 vāribindvāgamaḥ samyag bhavec chabdes tathā vyadhe | saṃsicya viddhamātraṃ tu yoṣitstanyena kovidaḥ || ut.17.62 sthire doṣe cale vāpi svedayed akṣi bāhyataḥ | samyak śalākāṃ saṃsthāpya bhaṅgair anilanāśanaiḥ || ut.17.63 śalākāgreṇa tu tato nirlikhed dṛṣṭimaṇḍalam | vidhyato yo 'nyapārśve 'kṣṇastaṃ ruddhvā nāsikāpuṭam || ut.17.64 ucchiṅghanena hartavyo dṛṣṭimaṇḍalagaḥ kaphaḥ | nirabhra iva gharmāṃśuryadā dṛṣṭiḥ prakāśate || ut.17.65 tadāsau likhitā samyag jñeyā yā cāpi nirvyathā | (evaṃ tv aśakye nirhartuṃ doṣe pratyāgate 'pi vā || ut.17.66 snehād yair upapannasya vyadho bhūyo vidhīyate |) tato dṛṣṭeṣu rūpeṣu śalākām āharec chanaiḥ || ut.17.67 ghṛtenābhyajya nayanaṃ vastrapaṭṭena veṣṭayet | tato gṛhe nirābādhe śayītottāna eva ca || ut.17.68 udgārakāsakṣavathuṣṭhīvanotkampanāni ca | tatkālaṃ nācared ūrdhvaṃ yantraṇā snehapītavat || ut.17.69 tryahāt tryahāc ca dhāveta kaṣāyair anilāpahaiḥ | vāyor bhayāt tryahād ūrdhvaṃ svedayed akṣi pūrvavat || ut.17.70 daśāham evaṃ saṃyamya hitaṃ dṛṣṭiprasādanaṃ | paś cāt karma ca seveta laghvannaṃ cāpi mātrayā || ut.17.71 sirāvyadhavidhau pūrvaṃ narā ye ṛca vivarjitāḥ | na teṣāṃ nīlikāṃ vidhyed anyatrābhihitādbhiṣak || ut.17.72 pūryate śoṇitenākṣi sirāvedhād visarpatā | tatra strīstanyayaṣṭyāhvapakvaṃ seke hitaṃ ghṛtam || ut.17.73 apāṅgāsannaviddhe tu śophaśūlāśruraktatāḥ | tatropanāhaṃ bhrūmadhye kuryāc coṣṇājyasecanam || ut.17.74 vyadhen āsannakṛṣṇena rāgaḥ kṛṣṇaṃ ca pīḍyate | tatrādhaḥśodhanaṃ sekaḥ sarpiṣā raktamokṣaṇam || ut.17.75 athāpy upari viddhe tu kaṣṭā ruk saṃpravartate | tatra koṣṇena haviṣā pariṣekaḥ praśasyate || ut.17.76 śūlāśrurāgās tv atyartham adhovedhena picchilaḥ | śalākāmanu cāsrāvas tatra pūrvacikitsitam || ut.17.77 rāgāśruvedanāstambhaharṣāś cātivighaṭṭite | snehasvedau hitau tatra hitaṃ cāpy anuvāsanam || ut.17.78 doṣastvadho 'pakṛṣṭo 'pi taruṇaḥ punarūrdhvagaḥ | kuryāc chuklāruṇaṃ netraṃ tīvraruṅnaṣṭadarśanam || ut.17.79 madhurais tatra siddhena ghṛtenākṣṇaḥ prasecanam | śirobastiṃ ca tenaiva dadyānmāṃsaiś ca bhojanam || ut.17.80 doṣas tu saṃjātabalo ghanaḥ saṃpūrṇamaṇḍalaḥ | prāpya naśyec chalākāgraṃ tanvabhramiva mārutam || ut.17.81 mūrdhābhighātavyāyāmavyavāyavamimūrcchanaiḥ | doṣaḥ pratyeti kopāc ca viddho 'titaruṇaś ca yaḥ || ut.17.82 śalākā karkaśā śūlaṃ kharā doṣapariplutim | vraṇaṃ viśālaṃ sthūlāgrā tīkṣṇā hiṃsyād anekadhā || ut.17.83 jalāsrāvaṃ tu viṣamā kriyāsaṅgam athāsthirā | karoti varjitā doṣais tasmād ebhir hitā bhavet || ut.17.84 aṣṭāṅgulāyatā madhye sūtreṇa pariveṣṭitā | aṅguṣṭhaparvasamitā vaktrayor mukulākṛtiḥ || ut.17.85 tāmrāyasī śātakumbhī śalākā syād aninditā | rāgaḥ śopho 'rbudaṃ coṣo budbudaṃ śūkarākṣitā || ut.17.86 adhimanthādayaś cānye rogāḥ syur vyadhadoṣajāḥ | ahitācārato vāpi yathāsvaṃ tān upācaret || ut.17.87 rujāyām akṣirāge vā yogān bhūyo nibodha me | gairikaṃ sārivā dūrvā yavapiṣṭaṃ ghṛtaṃ payaḥ || ut.17.88sukhālepaḥ prayojyo 'yaṃ vedanārāgaśāntaye | mṛdubhṛṣṭais tilair vāpi siddhārthakasamāyutaiḥ || ut.17.89 mātuluṅgarasopetaiḥ sukhālepastadarthakṛt | payasyāśārivāpatramañjiṣṭhāmadhukair api || ut.17.90 ajākṣīrānvitair lepaḥ sukhoṣṇaḥ pathya ucyate | dārupadmakaśuṇṭhībhir evam eva kṛto 'pi vā || ut.17.91 drākṣāmadhukakuṣṭhair vā tadvat saindhavasaṃyutaiḥ | rodhrasaindhavamṛdvīkāmadhukair vāpy ajāpayaḥ || ut.17.92 śṛtaṃ seke prayoktavyaṃ rujārāganivāraṇam | madhukotpalakuṣṭhair vā drākṣālākṣāsitāyutaiḥ | sasaindhavaiḥ śṛtaṃ kṣīraṃ rujārāganibarhaṇam || ut.17.93 śatāvarīpṛthakparṇīmustāmalakapadmakaiḥ | sājakṣīraiḥ śṛtaṃ sarpir dāhaśūlanibarhaṇam || ut.17.94 vātaghnasiddhe payasi siddhaṃ sarpiś caturguṇe | kākolyādipratīvāpaṃ tad yuñjyāt sarvakarmasu || ut.17.95 śāmyaty evaṃ na cec chūlaṃ snigdhasvinnasya mokṣayet | tataḥ sirāṃ dahed vāpi matimān kīrtitaṃ yathā || ut.17.96 dṛṣṭer ataḥ prasādārtham añjane śṛṇu me śubhe | meṣaśṛṅgasya puṣpāṇi śirīṣadhavayor api || ut.17.97 sumanāyāś ca puṣpāṇi muktā vaidūryam eva ca | ajākṣīreṇa saṃpiṣya tāmre saptāham āvapet || ut.17.98 pravidhāya ca tadvartīr yojayec cāñjane bhiṣak | srotojaṃ vidrumaṃ phenaṃ sāgarasya manaḥśilām || ut.17.99 maricāni ca tad vartīḥ kārayec cāpi pūrvavat | dṛṣṭisthairyārtham etat tu vidadhyād añjane hitam || ut.17.100 bhūyo vakṣyāmi mukhyāni vistareṇāñjanāni ca | kalpe nānāprakārāṇi tānyapīha prayojayet || iti suśrutasaṃhitāyām uttaratantrāntargate śālākyatantre dṛṣṭigatarogavijñānīyo nāma saptadaśo 'dhyāyaḥ ||17 ||

aṣṭādaśo 'dhyāyaḥ | ut.18.1 athātaḥ kriyākalpaṃ vyākhyāsyāmaḥ || ut.18.2 yathovāca bhagavān dhanvantariḥ || ut.18.3 sarvaśāstrārthatattvajñas tapodṛṣṭir udāradhīḥ | vaiśvāmitraṃ śaśāsātha śiṣyaṃ kāśipatir muniḥ || ut.18.4 tarpaṇaṃ puṭapākaś ca seka āścyotanāñjane | tatra tatropadiṣṭāni teṣāṃ vyāsaṃ nibodha me || ut.18.5 saṃśuddhadehaśiraso jīrṇānnasya śubhe dine | pūrvāhṇe vāparāhṇe vā kāryam akṣṇos tu tarpaṇam || ut.18.6 vātātaparajohīne veśmany uttānaśāyinaḥ | ādhārau māṣacūrṇena klinnena parimaṇḍalau || ut.18.7 samau dṛḍhāvasaṃbādhau kartavyau netrakośayoḥ | pūrayed ghṛtamaṇḍasya vilīnasya sukhodake || ut.18.8 āpakṣmāgrāt tataḥ sthāpyaṃ pañca tadvākśatāni tu | svasthe kaphe ṣaṭ pitte 'ṣṭau daśa vāte taduttamam || ut.18.9 rogasthānaviśeṣeṇa kecit kālaṃ pracakṣate | yathākramopadiṣṭeṣu trīṇyekaṃ pañca sapta ca || ut.18.10 daśa dṛṣṭyām athāṣṭau ca vākśatāni vibhāvayet | tataś cāpāṅgataḥ snehaṃ srāvayitvākṣi śodhayet || ut.18.11 svinnena yavapiṣṭena snehavīryeritaṃ tataḥ | yathāsvaṃ dhūmapānena kapham asya viśodhayet || ut.18.12 ekāhaṃ vā tryahaṃ vāpi pañcāhaṃ ceṣyate param | tarpaṇe tṛptiliṅgāni netrasyemāni lakṣayet || ut.18.13 sukhasvapnāvabodhatvaṃ vaiśadyaṃ varṇapāṭavam | nirvṛtir vyādhividhvaṃsaḥ kriyālāghavam eva ca || ut.18.14 gurvāvilam atisnigdham aśrukaṇḍūpadehavat | jñeyaṃ doṣasamutkliṣṭaṃ netram atyarthatarpitam || ut.18.15 rūkṣam āvilam asrāḍhyam asahaṃ rūpadarśane | vyādhivṛddhiś ca tajjñeyaṃ hīnatarpitamakṣi ca || ut.18.16 ajayor doṣabāhulyāt prayateta cikitsite | dhūmanasyāñjanaiḥ sekai rūkṣaiḥ snigdhaiś ca yogavit || ut.18.17 tāmyatyativiśuṣkaṃ yadrūkṣaṃ yaccātidāruṇam | śīrṇapakṣmāvilaṃ jihmaṃ rogakliṣṭaṃ ca yad bhṛśam || ut.18.18 tadakṣi tarpaṇādeva labhetorjāmasaṃśayam | durdinātyuṣṇaśīteṣu cintāyāsabhrameṣu ca || ut.18.19 aśāntopadrave cākṣiṇa tarpaṇaṃ na praśasyate | puṭapākas tathaiteṣu nasyaṃ yeṣu ca garhitam || ut.18.20 tarpaṇārhā na ye proktāḥ snehapānākṣamāś ca ye | tataḥ praśāntadoṣeṣu puṭapākakṣameṣu ca || ut.18.21 puṭapākaḥ prayoktavyo netreṣu bhiṣajā bhavet | snehano lekhanīyaś ca ropaṇīyaś ca sa tridhā || ut.18.22 hitaḥ snigdho 'tirūkṣasya snigdhasyāpi ca lekhanaḥ | dṛṣṭer balārthamaparaḥ pittāsṛgvraṇavātanut || ut.18.23 snehamāṃsavasāmajjamedaḥsvādvauṣadhaiḥ kṛtaḥ | snehataḥ puṭapākas tu dhāryo dve vākśate tu saḥ || ut.18.24 jāṅgalānāṃ yakṛnmāṃsairlekhanadravyasaṃbhṛtaiḥ | kṛṣṇaloharajastāmraśaṅkhavidrumasindhujaiḥ || ut.18.25 samudraphenakāsīsasrotojadadhimastubhiḥ | lehano vākśataṃ tasya paraṃ dhāraṇamucyate || ut.18.26 stanyajāṅgalamadhvājyatiktadravyavipācitaḥ | lekhanāt triguṇaṃ dhāryaḥ puṭapākas tu ropaṇaḥ || ut.18.27 vitarettarpaṇoktaṃ tu dhūmaṃ hitvā tu ropaṇam | snehasvedau dvayoḥ kāryau kāryo naiva ca ropaṇe || ut.18.28 ekāhaṃ vā dvyahaṃ vāpi tryahaṃ vāpyavacāraṇam | yantraṇā tu kriyākālād dviguṇaṃ kālam iṣyate || ut.18.29 tejāṃsyanilamākāśamādarśaṃ bhāsvarāṇi ca | nekṣeta tarpite netre puṭapākakṛte tathā || ut.18.30 mithyopacārād anayor yo vyādhirupajāyate | añjanāś cyotanasvedairyathāsvaṃ tamupācaret || ut.18.31 prasannavarṇaṃ viśadaṃ vātātapasahaṃ laghu | sukhasvapnāvabodhyakṣi puṭapākaguṇānvitam || ut.18.32 atiyogādrujaḥ śophaḥ piḍakāstimirodgamaḥ | pāko 'śru harṣaṇaṃ cāpi hīne doṣodgamas tathā || ut.18.33 ata ūrdhvaṃ pravakṣyāmi puṭapākaprasādhanam | dvau bilvamātrau ślakṣṇasya piṇḍau māṃsasya peṣitau || ut.18.34 dravyāṇāṃ bilvamātraṃ tu dravāṇāṃ kuḍavo mataḥ | tadaikadhyaṃ samāloḍya patraiḥ supariveṣṭitam || ut.18.35 (kāśmarīkumudairaṇḍapadminīkadalībhavaiḥ | ) mṛdāvaliptamaṅgāraiḥ khādirairavakūlayet || ut.18.36 katakāśmantakairaṇḍapāṭalāvṛṣabādaraiḥ | sakṣīradrumakāṣṭhair vā gomayair vāpi yuktitaḥ || ut.18.37 svinnamuddhṛtya niṣpīḍya rasamādāya taṃ nṛṇām | tarpaṇoktena vidhinā yathāvadavacārayet || ut.18.38 kanīnake niṣecyaḥ syānnityamuttānaśāyinaḥ | rakte pitte ca tau śītau koṣṇau vātakaphāpahau || ut.18.39 atyuṣṇatīkṣṇau satataṃ dāhapākakarau smṛtau | aplutau śītalau cāśrustambharuggharṣakārakau || ut.18.40 atimātrau kaṣāyatvasaṅkocasphuraṇāvahau | hīnapramāṇau doṣāṇām utkleśajananau bhṛśam || ut.18.41 yuktau kṛtau dāhaśopharuggharṣasrāvanāśanau | kaṇḍūpadehadūṣīkāraktarājivināśanau || ut.18.42 tasmāt pariharan doṣān vidadhyāttau sukhāvahau | vyāpadaś ca yathādoṣaṃ nasyadhūmāñjanairjayet || ut.18.43 ādyantayoś cāpy anayoḥ sveda uṣṇāmbucailikaḥ | tathā hito 'vasāne ca dhūmaḥ śleṣmasamucchritau || ut.18.44 yathādoṣopayuktaṃ tu nātiprabalam ojasā | rogamāś cyotanaṃ hanti sekas tu balavattaram || ut.18.45 tau tridhaivopayujyete rogeṣu puṭapākavat | lekhane sapta cāṣṭau vā bindavaḥ snaihike daśa || ut.18.46 āś cyotane prayoktavyā dvādaśaiva tu ropaṇe | sekasya dviguṇaḥ kālaḥ puṭapākāt paro mataḥ || ut.18.47 athavā kāryanirvṛtter upayogo yathākramam | pūrvāparāhṇe madhyāhne rujākāleṣu cobhayoḥ || ut.18.48 yogāyogāt snehaseke tarpaṇoktān pracakṣate | rogāñ chirasi saṃbhūtān hatvātiprabalān guṇān || ut.18.49 karoti śiraso bastiruktā ye mūrdhatailikāḥ | śuddhadehasya sāyāhne yathāvyādhyaśitasya tu || ut.18.50 ṛjvāsīnasya badhnīyādbastikośaṃ tato dṛḍham | yathāvyādhiśṛtasnehapūrṇaṃ saṃyamya dhārayet || ut.18.51 tarpaṇoktaṃ daśaguṇaṃ yathādoṣaṃ vidhānavit || vyaktarūpeṣu doṣeṣu śuddhakāyasya kevale || ut.18.52 netra eva sthite doṣe prāptam añjanam ācaret | lekhanaṃ ropaṇaṃ cāpi prasādanam athāpi vā || ut.18.53 tatra pañca rasān vyastānādyaikarasavarjitān | pañcadhā lekhanaṃ yuñjyād yathādoṣam atandritaḥ || ut.18.54 netravartmasirākośasrotaḥśṛṅgāṭakāśritam | mukhanāsākṣibhir doṣam ojasā srāvayet tu tat || ut.18.55 kaṣāyaṃ tiktakaṃ vāpi sasnehaṃ ropaṇaṃ matam | tatsnehaśaityādvarṇyaṃ syād dṛṣṭeś ca balavardhanam || ut.18.56 madhuraṃ snehasaṃpannam añjanaṃ tu prasādanam | dṛṣṭidoṣaprasādārthaṃ snehanārthaṃ ca taddhitam || ut.18.57 yathādoṣaṃ prayojyāni tāni rogaviśāradaiḥ | añjanāni yathoktāni prāhṇasāyāhnarātriṣu || ut.18.58 guṭikārasacūrṇāni trividhānyañjanāni tu | yathāpūrvaṃ balaṃ teṣāṃ śreṣṭham āhur manīṣiṇaḥ || ut.18.59 hareṇumātrā vartiḥ syāllekhanasya pramāṇataḥ | prasādanasya cādhyardhā dviguṇā ropaṇasya ca || ut.18.60 rasāñjanasya mātrā tu yathāvartimitā matā | dvitricatuḥśalākāś ca cūrṇasyāpyanupūrvaśaḥ || ut.18.61 teṣāṃ tulyaguṇānyeva vidadhyādbhājanānyapi | sauvarṇaṃ rājataṃ śārṅgaṃ tāmraṃ vaidūryakāṃsyajam || ut.18.62 āyasāni ca yojyāni śalākāś ca yathākramam | vaktrayor mukulākārā kalāyaparimaṇḍalā || ut.18.63 aṣṭāṅgulā tanurmadhye sukṛtā sādhunigrahā | audumbaryaśmajā vāpi śārīrī vā hitā bhavet || ut.18.64 vāmenākṣi vinirbhujya hastena susamāhitaḥ | śalākayā dakṣiṇena kṣipet kānīnam añjanam || ut.18.65 āpāṅgyaṃ vā yathāyogaṃ kuryāc cāpi gatāgatam | vartmopalepi vā yattadaṅgulyaiva prayojayet || ut.18.66 akṣi nāsyantayor añjyādbādhamāno 'pi vā bhiṣak | na cānirvāntadoṣe 'kṣṇi dhāvanaṃ saṃprayojayet || ut.18.67 doṣaḥ pratinivṛttaḥ san hanyād dṛṣṭerbalaṃ tathā | gatadoṣamapetāśru paśyed yat samyag ambhasā || ut.18.68 prakṣālyākṣi yathādoṣaṃ kāryaṃ pratyañjanaṃ tataḥ | śramodāvartaruditamadyakrodhabhayajvaraiḥ || ut.18.69 vegāghātaśirodoṣaiś cārtānāṃ neṣyate 'ñjanam | rāgaruktimirāsrāvaśūlasaṃrambhasaṃbhavāt || ut.18.70 nidrākṣaye kriyāśaktiṃ pravāte dṛgbalakṣayam | rajodhūmahate rāgasrāvādhīmanthasaṃbhavam || ut.18.71 saṃrambhaśūlau nasyānte śiroruji śirorujam | śiraḥsnāte 'tiśīte ca ravāv anudite 'pi ca || ut.18.72 doṣasthairyād apārthaṃ syād doṣotkleśaṃ karoti ca | ajīrṇe 'py evam eva syāt srotomārgāvarodhanāt || ut.18.73 doṣavegodaye dattaṃ kuryāt tāṃstānupadravān | tasmāt pariharan doṣān añjanaṃ sādhu yojayet || ut.18.74 lekhanasya viśeṣeṇa kāla eṣa prakīrtitaḥ | vyāpadaś ca jayed etāḥ sekāś cyotanalepanaiḥ || ut.18.75 yathāsvaṃ dhūmakavalair nasyaiś cāpi samutthitāḥ | viśadaṃ laghvanāsrāvi kriyāpaṭu sunirmalam || ut.18.76 saṃśāntopadravaṃ netraṃ viriktaṃ samyag ādiśet | jihmaṃ dāruṇadurvarṇaṃ srastaṃ rūkṣam atīva ca || ut.18.77 netraṃ virekātiyoge syandate cātimātraśaḥ | tatra saṃtarpaṇaṃ kāryaṃ vidhānaṃ cānilāpaham || ut.18.78 akṣi mandaviriktaṃ syād udagrataradoṣavat | dhūmanasyāñjanais tatra hitaṃ doṣāvasecanam || ut.18.79 snehavarṇabalopetaṃ prasannaṃ doṣavarjitam | jñeyaṃ prasādane samyag upayukte 'kṣi nirvṛtam || ut.18.80 kiñcid dhīnavikāraṃ syāt tarpaṇād dhi kṛtādati | tatra doṣaharaṃ rūkṣaṃ bheṣajaṃ śasyate mṛdu || ut.18.81 sādhāraṇam api jñeyam evaṃ ropaṇalakṣaṇam | prasādanavadācaṣṭe tasmin yukte 'tibheṣajam || ut.18.82 snehanaṃ ropaṇaṃ vāpi hīnayuktamapārthakam | kartavyaṃ mātrayā tasmād añjanaṃ siddhim icchatā || ut.18.83 puṭapākakriyādyāsu kriyāsv eṣaiva(kriyāsvekaiva) kalpanā | sahasraśaś cāñjaneṣu bījenoktena pūjitāḥ || ut.18.84 dṛṣṭer balavivṛddhyarthaṃ yāpyarogakṣayāya ca | rājārhānyañjanāgryāṇi nibodhemānyataḥ param || ut.18.85 aṣṭau bhāgān añjanasya nīlotpalasamatviṣaḥ | auḍumbaraṃ śātakumbhaṃ rājataṃ ca samāsataḥ || ut.18.86 ekādaśaitān bhāgāṃs tu yojayet kuśalo bhiṣak | mūṣākṣiptaṃ tadādhmātamāvṛtaṃ jātavedasi || ut.18.87 khadirāśmantakāṅgarairgośakṛdbhir athāpi vā | gavāṃ śakṛdrase mūtre dadhni sarpiṣi mākṣike || ut.18.88 tailamadyavasāmajjasarvagandhodakeṣu ca | drākṣārasekṣutriphalāraseṣu suhimeṣu ca || ut.18.89 sārivādikaṣāye ca kaṣāye cotpalādike | niṣecayet pṛthak cainaṃ dhmātaṃ dhmātaṃ punaḥ punaḥ || ut.18.90 tato 'ntarīkṣe saptāhaṃ plotabaddhaṃ sthitaṃ jale | viśoṣya cūrṇayenmuktāṃ sphaṭikaṃ vidrumaṃ tathā || ut.18.91 kālānusārivāṃ cāpi śucirāvāpya yogataḥ | etac cūrṇāñjanaṃ śreṣṭhaṃ nihitaṃ bhājane śubhe || ut.18.92 dantasphaṭikavaidūryaśaṅkhaśailāsanodbhave | śātakumbhe 'tha śārṅge vā rājate vā susaṃskṛte | sahasrapākavat pūjāṃ kṛtvā rājñaḥ prayojayet || ut.18.93 tenāñjitākṣo nṛpatir bhavet sarvajanapriyaḥ | adhṛṣyaḥ sarvabhūtānāṃ dṛṣṭirogavivarjitaḥ || ut.18.94 kuṣṭhaṃ candanamelāś ca patraṃ madhukam añjanam | meṣaśṛṅgasya puṣpāṇi vakraṃ ratnāni sapta ca || ut.18.95 utpalasya bṛhatyoś ca padmasyāpi ca keśaram | nāgapuṣpamuśīrāṇi pippalī tuttham uttamam || ut.18.96 kukkuṭāṇḍakapālāni dārvīṃ pathyāṃ sarocanām | maricānyakṣamajjānaṃ tulyāṃ ca gṛhagopikām || ut.18.97 kṛtvā sūkṣmaṃ tataś cūrṇaṃ nyased abhyarcya pūrvavat | etad bhadrodayaṃ nāma sadaivārhati bhūmipaḥ || ut.18.98 vakraṃ samaricaṃ caiva māṃsīṃ śaileyam eva ca | tulyāṃśāni samānais taiḥ samagraiś ca manaḥśilā || ut.18.99 patrasya bhāgāś catvāro dviguṇaṃ sarvato 'ñjanam | tāvac ca yaṣṭīmadhukaṃ pūrvavac caitad añjanam || ut.18.100 manaḥśilāṃ devakāṣṭhaṃ rajanyau triphaloṣaṇam | lākṣālaśunamañjiṣṭhāsaindhavailāḥ samākṣikāḥ || ut.18.101 rodhraṃ sāvarakaṃ cūrṇamāyasaṃ tāmram eva ca | kālānusārivāṃ caiva kukkuṭāṇḍadalāni ca || ut.18.102 tulyāni payasā piṣṭvā guṭikāṃ kārayed budhaḥ | kaṇḍūtimiraśuklārmaraktarājyupaśāntaye || ut.18.103 kāṃsyāpamārjanamasī madhukaṃ saindhavaṃ tathā | eraṇḍamūlaṃ ca samaṃ bṛhatyaṃśadvayānvitam || ut.18.104 ājena payasā piṣṭvā tāmrapātraṃ pralepayet | saptakṛtvas tu tā vartyaś chāyāśuṣkā rujāpahāḥ || ut.18.105 pathyātutthakayaṣṭyāhvaistulyairmaricaṣoḍaśā | pathyā sarvavikāreṣu vartiḥ śītāmbupeṣitā || ut.18.106 rasakriyāvidhānena yathoktavidhikovidaḥ | piṇḍāñjanāni kurvīta yathāyogamatandritaḥ ||

iti suśrutasaṃhitāyām uttaratantrāntargate śālākyatantre kriyākalpo nāmāṣṭadaśo 'dhyāyaḥ ||18 ||

ekonaviṃśatitamo 'dhyāyaḥ | ut.19.1 athāto nayanābhighātapratiṣedhaṃ vyākhyāsyāmaḥ || ut.19.2 yathovāca bhagavān dhanvantariḥ || ut.19.3ab abhyāhate tu nayane bahudhā narāṇāṃ saṃrambharāgatumulāsu rujāsu dhīmān | ut.19.3cd nasyāsyalepapariṣecanatarpaṇādyam uktaṃ punaḥ kṣatajapittajaśūlapathyam || ut.19.4ab dṛṣṭiprasādajananaṃ vidhimāśu kuryāt snigdhair himaiś ca madhuraiś ca tathā prayogaiḥ | ut.19.4cd svedāgnidhūmabhayaśokarujābhighātairabhyāhatām api tathaiva bhiṣak cikitset || ut.19.5ab sadyohate nayana eṣa vidhistadūrdhvaṃ syanderito bhavati doṣamavekṣya kāryaḥ | ut.19.5cd abhyāhataṃ nayanamīṣadathāsyabāṣpasaṃsveditaṃ bhavati tannirujaṃ kṣaṇena || ut.19.6ab sādhyaṃ kṣataṃ paṭalamekamubhe tu kṛcchre trīṇi kṣatāni paṭalāni vivarjayat tu | ut.19.6cd syāt piccitaṃ ca nayanaṃ hy ati cāvasannaṃ srastaṃ cyutaṃ ca hatadṛk ca bhavet tu yāpyam || ut.19.7ab vistīrṇadṛṣṭitanurāgamasatpradarśi sādhyaṃ yathāsthitamanāviladarśanaṃ ca | ut.19.7cd prāṇoparodhavamanakṣutakaṇṭharodhair unnamyamāśu nayanaṃ yadatipraviṣṭam || ut.19.8ab netre vilambini vidhirvihitaḥ purastāducchiṅghanaṃ śirasi vāryavasecanaṃ ca | ut.19.8cd ṣaṭsaptatirnayanajā ya ime pradiṣṭā rogā bhavantyamahatāṃ mahatāṃ ca tebhyaḥ || ut.19.9ab stanyaprakopakaphamārutapittaraktairbalākṣivartmabhava eva kukūṇako 'nyaḥ | ut.19.9cd mṛdnāti netramatikaṇḍumathākṣikūṭaṃ nāsālalāṭam api tena śiśuḥ sa nityam || ut.19.10ab sūryaprabhāṃ na sahate sravati prabaddhaṃ tasyāharedrudhiramāśu vinirlikhec ca | ut.19.10cd kṣaudrāyutaiś ca kaṭubhiḥ pratisārayet tu mātuḥ śiśor abhihitaṃ ca vidhiṃ vidadhyāt || ut.19.11 taṃ vāmayet tu madhusaindhavasaṃprayuktaiḥ pītaṃ payaḥ khalu phalaiḥ kharamañjarīṇām || ut.19.12ab syāt pippalīlavaṇamākṣikasaṃyutair vā nainaṃ vamantam api vāmayituṃ yateta | ut.19.12cd dattvā vacāmaśanadugdhabhuje prayojyamūrdhvaṃ tataḥ phalayutaṃ vamanaṃ vidhijñaiḥ || ut.19.13ab jambvāmradhātryaṇudalaiḥ paridhāvanārthaṃ kāryaṃ kaṣāyamavasecanam eva cāpi | ut.19.13cd āścyotane ca hitamatra ghṛtaṃ guḍūcīsiddhaṃ tathāhurapi ca triphalāvipakvam || ut.19.14ab nepālajāmaricaśaṅkharasāñjanāni sindhuprasūtaguḍamākṣikasaṃyutāni | ut.19.14cd syād añjanaṃ madhurasāmadhukāmrakair vā kṛṣṇāyasaṃ ghṛtapayo madhu vāpi dagdham || ut.19.15ab vyoṣaṃ palāṇḍu madhukaṃ lavaṇottamaṃ ca lākṣāṃ ca gairikayutāṃ guṭikāñjanaṃ vā | ut.19.15cd nimbacchadaṃ madhukadārvi satāmralodhram icchanti cātra bhiṣajo 'ñjanam aṃśatulyam || ut.19.16ab srotojaśaṅkhadadhisaindhavamardhapakṣaṃ śukraṃ śiśornudati bhāvitamañjanena | ut.19.16cd syande kaphād abhihitaṃ kramam ācarec ca bālasya rogakuśalo 'kṣigadaṃ jighāṃsuḥ || ut.19.17ab samudra iva gambhīraṃ naiva śakyaṃ cikitsitam | ut.19.17cd vaktuṃ niravaśeṣeṇa ślokānām ayutair api || ut.19.18ab sahasrair api vā proktam artham alpamatir naraḥ | ut.19.18cd tarkagranthārtharahito naiva gṛhṇātyapaṇḍitaḥ || ut.19.19ab tad idaṃ bahugūḍhārthaṃ cikitsābījam īritam | ut.19.19cd kuśalenābhipannaṃ tad bahudhābhiprarohati || ut.19.20ab tasmānmatimatā nityaṃ nānāśāstrārthadarśinā | ut.19.20cd sarvam ūhyam agādhārthaṃ śāstram āgamabuddhinā ||

iti suśrutasaṃhitāyām uttaratantrāntargate śālākyatantre nayanābhighātacikitsitaṃ nāmaikonaviṃśo 'dhyāyaḥ ||19 ||

viṃśatitamo 'dhyāyaḥ | ut.20.1 athātaḥ karṇagatarogavijñānīyam adhyāyaṃ vyākhyāsyāmaḥ || ut.20.2 yathovāca bhagavān dhanvantariḥ || ut.20.3 karṇaśūlaṃ praṇādaś ca bādhiryaṃ kṣveḍa eva ca | karṇasrāvaḥ karṇakaṇḍūḥ karṇavarcas tathaiva ca || ut.20.4 kṛmikarṇapratināhau vidradhirdvividhas tathā | karṇapākaḥ pūtikarṇastathaivārśaś caturvidham || ut.20.5 karṇārbudaṃ saptavidhaṃ śophaś cāpi caturvidhaḥ | ete karṇagatā rogā aṣṭāviṃśatirīritāḥ || ut.20.6 samīraṇaḥ śrotragato 'nyathācaraḥ samantataḥ śūlamatīva karṇayoḥ | karoti doṣaiś ca yathāsvamāvṛtaḥ sa karṇaśūlaḥ kathito durācaraḥ || ut.20.7 yadā tu nāḍīṣu vimārgamāgataḥ sa eva śabdābhivahāsu tiṣṭhati | śrṇoti śabdān vividhāṃstadā naraḥ praṇādamenaṃ kathayanti cāmayam || ut.20.8 sa eva śabdānuvahā yadā sirāḥ kaphānuyāto vyanusṛtya tiṣṭhati | tadā narasyāpratikārasevino bhavet tu bādhiryamasaṃśayaṃ khalu || ut.20.9 śramāt kṣayādrūkṣakaṣāyabhojanāt samīraṇaḥ śabdapathe pratiṣṭhitaḥ | viriktaśīrṣasya ca śītasevinaḥ karoti hi kṣveḍamatīva karṇayoḥ || ut.20.10 śirobhighātād athavā nimajjato jale prapākādayavāpi vidradheḥ | sravet tu pūyaṃ śravaṇo 'nilāvṛtaḥ sa karṇasaṃsrāva iti prakīrtitaḥ || ut.20.11 kaphena kaṇḍūḥ pracitena karṇayor bhṛśaṃ bhavet srotasi karṇasaṃjñite | viśoṣite śleṣmaṇi pittatejasā nṛṇāṃ bhavet srotasi karṇagūthakaḥ || ut.20.12 sa karṇaviṭko dravatāṃ yadā gato vilāyito ghrāṇamukhaṃ prapadyate | tadā sa karṇapratināhasaṃjñito bhaved vikāraḥ śiraso 'bhitāpanaḥ || ut.20.13 yadā tu mūrcchanty athavāpi jantavaḥ sṛjanty apatyānyathavāpi makṣikāḥ | tadañjanatvāc chravaṇo nirucyate bhiṣagbhir ādyaiḥ kṛmikarṇako gadaḥ || ut.20.14 kṣatābhighātaprabhavas tu vidradhir bhavet tathā doṣakṛto 'paraḥ punaḥ | saraktapītāruṇam asram āsravet pratodadhūmāyanadāhacopavān || ut.20.15 bhavet prapākaḥ khalu pittakopato vikothavikledakaraś ca karṇayoḥ | sthite kaphe srotasi pittatejasaḥ vilāyyamāne bhṛśasaṃpratāpavān || ut.20.16 avedano vāpy athavā savedano ghanaṃ sravet pūti ca pūtikarṇakaḥ | pradiṣṭaliṅgānyaraśāṃsi tattvatas tathaiva śophārbudaliṅgamīritam | mayā purastāt prasamīkṣya yojayed ihaiva tāvat prayato bhiṣagvaraḥ ||

iti suśrutasaṃhitāyām uttaratantrāntargate śālākyatantre karṇagatarogavijñānīyo nāma viṃśatitamo 'dhyāyaḥ ||20 ||

ekoviṃśatitamo 'dhyāyaḥ | ut.21.1 athātaḥ karṇagatarogapratiṣedhaṃ vyākhyāsyāmaḥ || ut.21.2 yathovāca bhagavān dhanvantariḥ || ut.21.3 sāmānyaṃ karṇarodheṣu ghṛtapānaṃ rasāyanam | avyāyāmo 'śiraḥsnānaṃ brahmacaryamakatthanam || ut.21.4 karṇaśūle praṇāde ca bādhiryakṣveḍayor api | caturṇām api rogāṇāṃ sāmānyaṃ bheṣajaṃ viduḥ || ut.21.5 snigdhaṃ vātaharaiḥ svedairnaraṃ snehavirecitam | nāḍīsvedair upacaret piṇḍasvedais tathaiva ca || ut.21.6 bilvairaṇḍārkavarṣābhūdadhitthonmattaśigrubhiḥ | bastagandhāśvagandhābhyāṃ tarkārīyavaveṇubhiḥ || ut.21.7 āranālaśṛtairebhir nāḍīsvedaḥ prayojitaḥ | kaphavātasamutthānaṃ karṇaśūlaṃ nirasyati || ut.21.8 mīnakukkuṭalāvānāṃ māṃsajaiḥ payasāpi vā | piṇḍaiḥ svedaṃ ca kurvīta karṇaśūlanivāraṇam || ut.21.9 aśvatthapatrakhallaṃ vā vidhāya bahupatrakam | tadaṅgāraiḥ susaṃpūrṇaṃ nidadhyāchravaṇopari || ut.21.10 yattailaṃ cyavate tasmāt khallādaṅgāratāpitāt | tat prāptaṃ śravaṇasrotaḥ sadyo gṛhṇāti vedanām || ut.21.11 kṣaumaguggulvagurubhiḥ saghṛtair dhūpayec ca tam | bhaktopari hitaṃ sarpir bastikarma ca pūjitam || ut.21.12 niranno niśi tatsarpiḥ pītvopari pibet payaḥ | mūrdhvastiṣu nasye ca mastiṣke pariṣecane || ut.21.13 śatapākaṃ balātailaṃ praśastaṃ cāpi bhojane | kaṇṭakārīmajākṣīre paktvā kṣīreṇa tena ca || ut.21.14 vipacet kukkuṭavasāṃ karṇayostatprapūraṇam | taṇḍulīyakamūlāni phalamaṅkolajaṃ tathā || ut.21.15 ahiṃsākendukānmūlaṃ saralaṃ devadāru ca | laśunaṃ śṛṅgaveraṃ ca tathā vaṃśāvalekhanam || ut.21.16 kalkair eṣāṃ tathāmlaiś ca pacet snehaṃ caturvidham | vedanāyāḥ praśāntyarthaṃ hitaṃ tatkarṇapūraṇam || ut.21.17 laśunārdrakaśigrūṇāṃ muraṅgyā mūlakasya ca | kadalyāḥ svarasaḥ śreṣṭhaḥ kaduṣṇaḥ karṇapūraṇe || ut.21.18 śṛṅgaverarasaḥ kṣaudraṃ saindhavaṃ tailam eva ca | kaduṣṇaṃ karṇayor deyam etad vā vedanāpaham || ut.21.19 vaṃśāvalekhanāyukte mūtre cājāvike bhiṣak | sarpiḥ pacet tena karṇaṃ pūrayet karṇaśūlinaḥ || ut.21.20 mahataḥ pañcamūlasya kāṇḍam aṣṭādaśāṅgulam | kṣaumeṇāveṣṭya saṃsicya tailenādīpayet tataḥ || ut.21.21 yat tailaṃ cyavate tebhyo dhṛtebhyo bhājanopari | jñeyaṃ taddīpikātailaṃ sadyo gṛhṇāti vedanām || ut.21.22 kuryād evaṃ bhadrakāṣṭhe kuṣṭhe kāṣṭhe ca sārale | matimān dīpikātailaṃ karṇaśūlanibarhaṇam || ut.21.23 arkāṅkurānamlapiṣṭāṃstailāktān lavaṇānvitān | sannidadhyāt sruhīkāṇḍe korite tacchadāvṛte || ut.21.24 puṭapākakramasvinnān pīḍayed ārasāgamāt | sukhoṣṇaṃ tadrasaṃ karṇe dāpayec chūlaśāntaye || ut.21.25 kapitthamātuluṅgāmlaśṛṅgaverarasaiḥ śubhaiḥ | sukhoṣṇaiḥ pūrayet karṇaṃ tacchūlavinivṛttaye || ut.21.26 karṇaṃ koṣṇena cukreṇa pūrayet karṇaśūlinaḥ | samudraphenacūrṇena yuktyā cāpy avacūrṇayet || ut.21.27 aṣṭānāmiha mūtrāṇāṃ mūtreṇānyatamena tu | koṣṇena pūrayet karṇaṃ karṇaśūlopaśāntaye || ut.21.28 mūtreṣv amleṣu vātaghne gaṇe ca kvathite bhiṣak | pacec caturvidhaṃ snehaṃ pūraṇaṃ tac ca karṇayoḥ || ut.21.29 etā eva kriyāḥ kuryāt pittaghnaiḥ pittasaṃyute | kākolyādau daśakṣīraṃ tiktaṃ cātra hitaṃ haviḥ || ut.21.30 kṣīravṛkṣapravāleṣu madhuke candane tathā | kalkakvāthe paraṃ pakvaṃ śarkarāmadhukaiḥ saraiḥ || ut.21.31 iṅgudīsarṣapasnehau sakaphe pūraṇe hitau | tiktauṣadhānāṃ yūṣāś ca svedāś ca kaphanāśanāḥ || ut.21.32 surasādau kṛtaṃ tailaṃ pañcamūle mahatyapi | mātuluṅgarasaḥ śuktaṃ laśunārdrakayo rasaḥ || ut.21.33 ekaikaḥ pūraṇe pathyastailaṃ teṣv api vā kṛtam | tīkṣṇā mūrdhavirekāś ca kavalāś cātra pūjitāḥ || ut.21.34 karṇaśūlavidhiḥ kṛtsnaḥ pittaghnaḥ śoṇitāvṛte | śūlapraṇādabādhiryakṣveḍānāṃ tu prakīrtitam || ut.21.35 sāmānyato viśeṣeṇa bādhirye pūraṇaṃ śṛṇu | gavāṃ mūtreṇa bilvāni piṣṭvā tailaṃ vipācayet || ut.21.36 sajalaṃ ca sadugdhaṃ ca bādhirye karṇapūraṇam | sitāmadhukabimbībhiḥ siddhaṃ vāje payasyapi || ut.21.37 bimbīkvāthe vimathyoṣṇaṃ śītībhūtaṃ taduddhṛtam | punaḥ paced daśakṣīraṃ sitāmadhukacandanaiḥ || ut.21.38 bilvāmbugāḍhaṃ tat tailaṃ bādhirye karṇapūraṇam | vakṣyate yaḥ pratiśyāye vidhiḥ so 'py atra pūjitaḥ || ut.21.39 vātavyādhiṣu yaś cokto vidhiḥ sa ca hito bhavet | karṇasrāve pūtikarṇe tathaiva kṛmikarṇake || ut.21.40 samānaṃ karma kurvīta yogān vaiśeṣikān api | śirovirecanaṃ caiva dhūpanaṃ pūraṇaṃ tathā || ut.21.41 pramārjanaṃ dhāvanaṃ ca vīkṣya vīkṣyāvacārayet | rājavṛkṣāditoyena surasādigaṇena vā || ut.21.42 karṇaprakṣālanaṃ kāryaṃ cūrṇair eṣāṃ ca pūraṇam | kvāthaṃ pañjcakaṣāyaṃ tu kapittharasayojitam || ut.21.43 karṇasrāve praśaṃsanti pūraṇaṃ madhunā saha | sarjatvakcūrṇasaṃyuktaḥ kārpāsīphalajo rasaḥ || ut.21.44 yojito madhunā vāpi karṇasrāve praśasyate | lākṣā rasāñjanaṃ sarjaś cūrṇitaṃ karṇapūraṇam || ut.21.45 saśaivalaṃ mahāvṛkṣajambvāmraprasavāyutam | kulīrakṣaudramaṇḍūkīsiddhaṃ tailaṃ ca pūjitam || ut.21.46 tindukānyabhayā rodhraṃ samaṅgāmalakaṃ madhu | pūraṇaṃ cātra pathyaṃ syātkapittharasayojitam || ut.21.47 rasamāmrakapitthānāṃ madhūkadhavaśālajam | pūraṇārthaṃ praśaṃsanti tailaṃ vā tairvipācitam || ut.21.48 priyaṅgumadhukāmbaṣṭhādhātakīśilaparṇibhiḥ | mañjiṣṭhālobhralākṣābhiḥ kapitthasya rasena vā || ut.21.49 pacet tailaṃ tadāsrāvam avagṛhṇāti pūraṇāt | ghṛtaṃ rasāñjnaṃ nāryāḥ kṣīreṇa madhusaṃyutam || ut.21.50 tatpraśastaṃ cirotthe 'pi sāsrāve pūtikarṇake | nirguṇḍīsvarasastailaṃ sindhurdhūmarajo guḍaḥ || ut.21.51 pūraṇaḥ pūtikarṇasya śamano madhusaṃyutaḥ | kṛmikarṇakanāśārthaṃ kṛmighnaṃ yojayed vidhim || ut.21.52 vārtākudhūmaś ca hitaḥ sārṣapasneha eva ca | kṛmighnaṃ haritālena gavāṃ mūtrayutena ca || ut.21.53 gugguloḥ karṇadaurgandhye dhūpanaṃ śreṣṭhamucyate | chardanaṃ dhūmapānaṃ ca kavalasya ca dhāraṇam || ut.21.54 karṇakṣveḍe hitaṃ tailaṃ sārṣapaṃ caiva pūraṇam | vidradhau cāpi kurvīta vidradhyuktaṃ cikitsitam || ut.21.55 prakledya dhīmāṃstailena svedena pravilāyya ca | śodhayet karṇaviṭkaṃ tu bhiṣak samyak śalākayā || ut.21.56 nāḍīsvedo 'tha vamanaṃ dhūmo mūrdhavirecanam | vidhiś ca kaphahṛtsarvaḥ karṇakaṇḍūm apohati || ut.21.57 atha karṇapratīnāhe snehasvedau prayojayet | tato viriktaśirasaḥ kriyāṃ prāptāṃ samācaret || ut.21.58 karṇapākasya bhaiṣajyaṃ kuryāt pittavisarpavat | karṇacchidre vartamānaṃ kīṭaṃ kledamalādi vā || ut.21.59 śṛṅgeṇāpahared dhīmān athavāpi śalākayā | śeṣāṇāṃ tu vikārāṇāṃ prāk cikitsitamīritam ||

iti suśrutasaṃhitāyām uttaratantrāntargate śālākyatantre karṇagatarogapratiṣedho nāmaikaviṃśo 'dhyāyaḥ ||21 ||

dvāviṃśatitamo 'dhyāyaḥ || ut.22.1 athāto nāsāgatarogavijñānīyam adhyāyaṃ vyākhyāsyāmaḥ || ut.22.2 yathovāca bhagavān dhanvantariḥ || ut.22.3 apīnasaḥ pūtinasyaṃ nāsāpākas tathaiva ca | tathā śoṇitapittaṃ ca pūyaśoṇitam eva ca || ut.22.4 kṣavathur bhraṃśathur dīpto nāsānāhaḥ parisravaḥ | nāsāśoṣeṇa sahitā daśaikāś ceritā gadāḥ || ut.22.5 catvāry arśāṃsi catvāraḥ śophāḥ saptārbudāni ca | pratiśyāyāś ca ye pañca vakṣyante sacikitsitāḥ | ekatriṃśanmitāste tu nāsārogāḥ prakīrtitāḥ || ut.22.6 ānahyate yasya vidhūpyate ca praklidyate śuṣyati cāpi nāsā | na vetti yo gandharasāṃś ca jantur juṣṭaṃ vyavasyet tam apīnasena || ut.22.7 taṃ cānilaśleṣmabhavaṃ vikāraṃ brūyāt pratiśyāyasamānaliṅgam | doṣair vidagdhair galatālumūle saṃvāsito yasya samīraṇas tu || ut.22.8 nireti pūtir mukhanāsikābhyāṃ taṃ pūtināsaṃ pravadanti rogam | ghrāṇāśritaṃ pittam arūṃṣi kuryād yasmin vikāre balavāṃś ca pākaḥ || ut.22.9 taṃ nāsikāpākam iti vyavasyed vikledakothāvapi yatra dṛṣṭau | caturvidhaṃ dviprabhavaṃ vakṣyāmi bhūyaḥ khalu raktapittam || ut.22.10 doṣair vidagdhair atha vāpi jantor lalāṭadeśe 'bhihatasya tais tu | nāsā sravet pūyam asṛgvimiśraṃ taṃ pūyaraktaṃ pravadanti rogam || ut.22.11 ghrāṇāśrite marmaṇi saṃpraduṣṭe yasyānilo nāsikayā nireti || ut.22.12 kaphānuyāto bahuśaḥ saśabdastaṃ rogam āhuḥ kṣavathuṃ vidhijñāḥ | tīkṣṇopayogād atijighrato vā bhāvān kaṭūn arkanirīkṣaṇād vā || ut.22.13 sūtrādibhir vā taruṇāsthimarmaṇy udghāṭite 'nyaḥ kṣavathur nireti | prabhraśyate nāsikayaiva yaś ca sāndro vidagdho lavaṇaḥ kaphas tu || ut.22.14 prāk saṃcito mūrdhani pittataptastaṃ bhraṃśathuṃ vyādhim udāharanti | ghrāṇe bhṛśaṃ dāhasamanvite tu viniḥsared dhūma iveha vāyuḥ || ut.22.15 nāsā pradīpteva ca yasya jantor vyādhiṃ tu taṃ dīptam udāharanti | kaphāvṛto vāyur udānasaṃjño yadā svamārge viguṇaḥ sthitaḥ syāt || ut.22.16 ghrāṇaṃ vṛṇotīva tadā sa rogo nāsāpratīnāha iti pradiṣṭaḥ | ajasram acchaṃ salilaprakāśaṃ yasyāvivarṇe sravatīha nāsā || ut.22.17 rātrau viśeṣeṇa hi taṃ vikāraṃ nāsāparisrāvam iti vyavasyet | ghrāṇāśrite śleṣmaṇi mārutena pittena gāḍhaṃ pariśoṣite ca || ut.22.18 samucchvasityūrdhvamadhaś ca kṛcchrādyastasya nāsāpariśoṣa uktaḥ | doṣais tribhis taiḥ pṛthag ekaśaś ca brūyāt tathārśāṃsi tathaiva śophān || ut.22.19 śālākyasiddhāntam avekṣya cāpi sarvātmakaṃ saptamamarbudaṃ tu | rogaḥ pratiśyāya ihopadiṣṭaḥ sa vakṣyate pañcavidhaḥ purastāt || ut.22.20 (nāsāsrotogatā rogās triṃśad ekaś ca kīrtitāḥ | srotaḥpathe yad vipulaṃ kośavac cārbudaṃ bhavet ||) ut.22.21 śophās tu śophavijñānā nāsāsrotovyavasthitāḥ | nidāne 'rśāṃsi nirdiṣṭānyevaṃ tāni vibhāvayet ||

iti suśrutasaṃhitāyām uttaratantrāntargate śālākyatantre nāsāgatarogavijñānīyo nāma dvāviṃśo 'dhyāyaḥ ||22 ||

trayoviṃśatitamo 'dhyāyaḥ | ut.23.1 athāto nāsāgatarogapratiṣedhaṃ vyākhyāsyāmaḥ || ut.23.2 athovāca bhagavān dhanvantariḥ || ut.23.3 pūrvoddiṣṭe pūtinasye ca jantoḥ snehasvedau chardanaṃ sraṃsanaṃ ca | yuktaṃ bhaktaṃ tīkṣṇamalpaṃ laghu syāduṣṇaṃ toyaṃ dhūmapānaṃ ca kāle || ut.23.4 hiṅgu vyoṣaṃ vatsakākhyaṃ śivāṭī lākṣā bījaṃ saurabhaṃ kaṭphalaṃ ca | ugrā kuṣṭhaṃ tīkṣṇagandhā viḍaṅgaṃ śreṣṭhaṃ nityaṃ cāvapīḍe karañjam || ut.23.5 etair dravyaiḥ sārṣapaṃ mūtrayuktaṃ tailaṃ dhīmānnasyahetoḥ paceta | nāsāpāke pittahṛtsaṃvidhānaṃ kāryaṃ sarvaṃ bāhyam ābhyantaraṃ ca || ut.23.6 hṛtvā raktaṃ kṣīravṛkṣatvacaś ca sājyāḥ sekā yojanīyāś ca lepāḥ | vakṣyāmy ūrdhvaṃ raktapītopaśāntiṃ nāḍīvatsyāt pūyarakte cikitsā || ut.23.7 vānte samyak cāvapīḍaṃ vadanti tīkṣṇaṃ dhūmaṃ śodhanaṃ cātra nasyam | kṣepyaṃ nasyaṃ mūrdhavairecanīyairnāḍyā cūrṇaṃ kṣavathau bhraṃśathau ca || ut.23.8 kuryāt svedān mūrdhni vātāmayaghnān snigdhān dhūmān yadyanyaddhitaṃ ca | dīpte roge paittikaṃ saṃvidhānaṃ kuryāt sarvaṃ svādu yacchītalaṃ ca || ut.23.9 nāsānāhe snehapānaṃ pradhānaṃ snigdhā dhūmā mūrdhabastiś ca nityam | balātailaṃ sarvathaivopayojyaṃ vātavyādhāv anyad uktaṃ ca yad yat || ut.23.10 nāsāsrāve ghrāṇataś cūrṇamuktaṃ nāḍyā deyaṃ yo 'vapīḍaś ca tīkṣṇaḥ | tīkṣṇaṃ dhūmaṃ devadārvagnikābhyāṃ māṃsaṃ vājaṃ yuktamatrādiśanti || ut.23.11 nāsāśoṣe kṣīrasarpiḥ pradhānaṃ siddhaṃ tailaṃ cāṇukalpena nasyam | sarpiḥpānaṃ bhojanaṃ jāṅgalaiś ca snehaḥ svedaḥ snaihikaś cāpi dhūmaḥ || ut.23.12 śeṣān rogān ghrāṇajān sanniyacched uktaṃ teṣāṃ yad yathā saṃvidhānam ||

iti suśrutasaṃhitāyām uttaratantrāntargate śālākyatantre nāsāgatarogapratiṣedho nāma trayoviṃśo 'dhyāyaḥ ||23 ||

caturviṃśatitamo 'dhyāyaḥ | ut.24.1 athātaḥ pratiśyāyapratiṣedhaṃ vyākhyāsyāmaḥ || ut.24.2 yathovāca bhagavān dhanvantariḥ || ut.24.3 nārīprasaṅgaḥ śiraso 'bhitāpo dhūmo rajaḥ śītamatipratāpaḥ | saṃdhāraṇaṃ mūtrapurīṣayoś ca sadyaḥ pratiśyāyanidānamuktam || ut.24.4 cayaṃ gatā mūrdhani mārutādayaḥ pṛthak samastāś ca tathaiva śoṇitam | prakopyamāṇā vividhaiḥ prakopaṇairnṛṇāṃ pratiśyāyakarā bhavanti hi || ut.24.5 śirogurutvaṃ kṣavathoḥ pravartanaṃ tathāṅgamardaḥ parihṛṣṭaromatā | upadravāś cāpy apare pṛthagvidhā nṛṇāṃ pratiśyāyapuraḥsarāḥ smṛtāḥ || ut.24.6 ānaddhā pihitā nāsā tanusrāvapravartinī | galatālvoṣṭhaśoṣaś ca nistodaḥ śaṅkhayos tathā || ut.24.7 svaropaghātaś ca bhavet pratiśyāye 'nilātmake | uṣṇaḥ sapītakaḥ srāvo ghrāṇāt sravati paittike || ut.24.8 kṛśo 'tipāṇḍuḥ santapto bhavettṛṣṇānipīḍitaḥ(tṛṣṇābhipīḍitaḥ) | sadhūmaṃ sahasā vahniṃ vamatīva ca mānavaḥ || ut.24.9 kaphaḥ kaphakṛte ghrāṇācchuklaḥ śītaḥ sravenmuhuḥ | śuklāvabhāsaḥ śūnākṣo bhavedguruśiromukhaḥ || ut.24.10 śirogalauṣṭhatālūnāṃ kaṇḍūyanamatīva ca | bhūtvā bhūtvā pratiśyāyo yo 'kasmādvinivartate || ut.24.11 saṃpakvo vāpyapakvo vā sa sarvaprabhavaḥ smṛtaḥ | liṅgāni caiva sarveṣāṃ pīnasānāṃ ca sarvaje || ut.24.12 raktaje tu pratiśyāye raktāsrāvaḥ pravartate | tāmrākṣaś ca bhavejjantururoghātaprapīḍitaḥ || ut.24.13 durgandhocchvāsavadanastathā gandhān na vetti ca | mūrcchanti cātra kṛmayaḥ śvetāḥ snigdhāstathāṇavaḥ || ut.24.14 kṛmimūrdhavikāreṇa samānaṃ cāsya lakṣaṇam | praklidyati punarnāsā puanaś ca pariśuṣyati || ut.24.15 muhurānahyate cāpi muhurvivriyate tathā | niḥśvāsocchvāsadaurgandhyaṃ tathā gandhān na vetti ca || ut.24.16 evaṃ duṣṭapratiśyāyaṃ jānīyāt kṛcchrasādhanam | sarva eva pratiśyāyā narasyāpratikāriṇaḥ || ut.24.17 kālena rogajananā jāyante duṣṭapīnasāḥ | bādhiryamāndhyamaghrāṇaṃ ghorāṃś ca nayanāmayān | kāsāgnisādaśophāṃś ca vṛddhāḥ kurvanti pīnasāḥ || ut.24.18 navaṃ pratiśyāyamapāsya sarvamupācaret sarpiṣa eva pānaiḥ | svedairvicitrairvamanaiś ca yuktaiḥ kālopapannair avapīḍanaiś ca || ut.24.19 apacyamānasya hi pācanārthaṃ svedo hito 'mlairahimaṃ ca bhojyam | niṣevyamāṇaṃ payasārdrakaṃ vā saṃpācayed ikṣuvikārayogaiḥ || ut.24.20 pakvaṃ ghanaṃ cāpy avalambamānaṃ śirovirekairapakarṣayettam | virecanāsthāpanadhūmapānairavekṣya doṣān kavalagrahaiś ca || ut.24.21 nivātaśayyāsanaceṣṭanāni mūrdhno gurūṣṇaṃ ca tathaiva vāsaḥ | tīkṣṇā virekāḥ śirasaḥ sadhūmā rūkṣaṃ yavānnaṃ vijayā ca sevyā || ut.24.22 śītāmbuyoṣicchiśirāvagāhacintātirūkṣāśanavegarodhān | śokaṃ ca madyāni navāni caiva vivarjayet pīnasarogajuṣṭaḥ || ut.24.23 chardyaṅgasādajvaragauravārtamarocakāratyatisārayuktam | vilaṅghanaiḥ pācanadīpanīyair upācaret pīnasinaṃ yathāvat || ut.24.24 bahudravair vātakaphopasṛṣṭaṃ pracchardayet pīnasinaṃ vayaḥstham | upadravāṃś cāpi yathopadeśaṃ svairbheṣajairbhojanasaṃvidhānaiḥ | jayed viditvā mṛdutāṃ gateṣu prāglakṣaṇeṣūktamathādiśec ca || ut.24.25 vātike tu pratiśyāye pibet sarpiryathākramam | pañcabhir lavaṇaiḥ siddhaṃ prathamena gaṇena ca || ut.24.26 nasyādiṣu vidhiṃ kṛtsnamavekṣetārditeritam | pittaraktotthayoḥ peyaṃ sarpirmadhurakaiḥ śṛtam || ut.24.27 pariṣekān pradehāṃś ca kuryād api ca śītalān | śrīsarjarasapattaṅgapriyaṅgumadhuśarkarāḥ || ut.24.28 drākṣāmadhūlikāgojīśrīparṇīmadhuphais tathā | yujyante kavalāś cātra vireko madhurair api || ut.24.29 dhavatvaktriphalāśyāmātilvakairmadhukena ca | śrīparṇīrajanīmiśraiḥ kṣīre daśaguṇe pacet || ut.24.30 tailaṃ kālopapannaṃ tannasyaṃ syādanayor hitam | kaphaje sarpiṣā snigdhaṃ tilamāṣavipakvayā || ut.24.31 yavāgvā vāmayed vāntaḥ kaphaghnaṃ kramamācaret | ubhe bale bṛhatyau ca viḍaṅgaṃ satrikaṇṭakam || ut.24.32 śvetāmūlaṃ sadābhadrāṃ varṣabhūṃ cātra saṃharet | tailamebhir vipakvaṃ tu nasyamasyopakalpayet || ut.24.33 saralākiṇihīdārunikumbheṅgudibhiḥ kṛtāḥ | vartayaś copayojyāḥ syurdhūmapāne yathāvidhi || ut.24.34 sarpīṃṣi kaṭutiktāni tīkṣṇadhūmāḥ kaṭūni ca | bheṣajānyupayuktāni hanyuḥ sarvaprakopajam || ut.24.35 rasāñjane sātiviṣe mustāyāṃ bhadradāruṇi | tailaṃ vipakvaṃ nasyārthe vidadhyāccātra buddhimān || ut.24.36 mustā tejovatī pāṭhā kaṭphalaṃ kaṭukā vacā | sarṣapāḥ pippalīmūlaṃ pippalyaḥ saindhavāgnikau || ut.24.37 tutthaṃ karañjabījaṃ ca lavaṇaṃ bhadradāru ca | etaiḥ kṛtaṃ kaṣāyaṃ tu kavale saṃprayojayet || ut.24.38 hitaṃ mūrdhavireke ca tailamebhir vipācitam | kṣīramardhajale kvāthyaṃ jāṅgalairmṛgapakṣibhiḥ || ut.24.39 puṣpairvimiśraṃ jalajair vātaghnairauṣadhair api | hime kṣīrāvaśiṣṭe 'smin ghṛtamutpādya yatnataḥ || ut.24.40 sarvagandhasitānantāmadhukaṃ candanaṃ tathā | āvāpya vipacedbhūyo daśakṣīraṃ tu tadghṛtam || ut.24.41 nasye prayuktamudriktān pratiśyāyān vyapohati | yathāsvaṃ doṣaśamanais tailaṃ kuryāc ca yatnataḥ || ut.24.42 samūtrapittāś coddiṣṭāḥ kriyāḥ kṛmiṣu yojayet | yāpanārthaṃ kṛmighnāni bheṣajāni ca buddhimān ||

iti suśrutasaṃhitāyām uttaratantrāntargate śālākyatantre pratiśyāyapratiṣedho nāma caturviṃśatitamo 'dhyāyaḥ ||24 ||

pañcaviṃśatitamo 'dhyāyaḥ | ut.25.1 athātaḥ śirorogavijñānīyam adhyāyaṃ vyākhyāsyāmaḥ || ut.25.2 yathovāca bhagavān dhanvantariḥ || ut.25.3 śiro rujati martyānāṃ vātapittakaphais tribhiḥ | sannipātena raktena kṣayeṇa krimibhis tathā || ut.25.4 sūryāvartānantavātārdhāvabhedakaśaṅkhakaiḥ | ekādaśaprakārasya lakṣaṇaṃ saṃpravakṣyate || ut.25.5 yasyānimittaṃ śiraso rujaś ca bhavanti tīvrā niśi cātimātram | bandhopatāpaiś ca bhaved viśeṣaḥ śirobhitāpaḥ sa samīraṇena || ut.25.6 yasyoṣṇam aṅgāracitaṃ yathaiva dahyeta dhūpyeta śiroksināsam | śītena rātrau ca bhaved viśeṣaḥ śirobhitāpaḥ sa tu pittakopāt || ut.25.7 śirogalaṃ yasya kaphopadigdhaṃ guru pratiṣṭabdham atho himaṃ ca | śūnākṣikūṭaṃ vadanaṃ ca yasya śirobhitāpaḥ sa kaphaprakopāt || ut.25.8 śirobhitāpe tritayapravṛtte sarvāṇi liṅgāni samudbhavanti | raktātmakaḥ pittasamānaliṅgaḥ sparśāsahatvaṃ śiraso bhavec ca || ut.25.9 vasābalāsakṣatasaṃbhavānāṃ śirogatānām iha saṃkṣayeṇa | kṣayapravṛttaḥ śiraso 'bhitāpaḥ kaṣṭo bhavedugrarujo 'timātram || ut.25.10 saṃsvedanacchardanadhūmanasyair asṛgvimokṣaiś ca vivṛddhim eti | nistudyate yasya śiro 'timātraṃ saṃbhakṣyamāṇaṃ sphuṭatīva cāntaḥ || ut.25.11 ghrāṇāc ca gacchetsalilaṃ saraktaṃ śirobhitāpaḥ kṛmibhiḥ sa ghoraḥ | sūryodayaṃ yā prati mandamandamakṣibhruvaṃ ruk samupaiti gāḍham || ut.25.12 vivardhate cāṃśumatā sahaiva sūryāpavṛttau vinivartate ca | śītena śāntiṃ labhate kadācid uṣṇena jantuḥ sukham āpnuyāc ca || ut.25.13 taṃ bhāskarāvartam udāharanti sarvātmakaṃ kaṣṭatamaṃ vikāram | doṣās tu duṣṭās traya eva manyāṃ saṃpīḍya ghāṭāsu rujāṃ sutīvrām || ut.25.14 kurvanti sākṣibhruvi śaṅkhadeśe sthitiṃ karoty āśu viśeṣatas tu | gaṇḍasya pārśve tu karoti kampaṃ hanugrahaṃ locanajāṃś ca rogān || ut.25.15 anantavātaṃ tam udāharanti doṣatrayotthaṃ śiraso vikāram | yasyottamāṅgārdham atīva jantoḥ saṃbhedatodabhramaśūlajuṣṭam || ut.25.16 pakṣāddaśāhād athavāpy akasmāt tasyārdham edaṃ tritayād vyavasyet | śaṅkhāśrito vāyur udīrṇavegaḥ kṛtānuyātraḥ kaphapittaraktaiḥ || ut.25.17 rujaḥ sutīvrāḥ pratanoti mūrdhni viśeṣataś cāpi hi śaṅkhayos tu | sukaṣṭamenaṃ khalu śaṅkhakākhyaṃ maharṣayo vedavidaḥ purāṇāḥ || ut.25.18 vyādhiṃ vadanty udgatamṛtyukalpaṃ bhiṣaksahasrair api durnivāram ||

iti suśrutasaṃhitāyām uttaratantrāntargate śālākyatantre śirorogavijñānīyo nāma pañcaviṃśo 'dhyāyaḥ ||25 ||

ṣaḍviṃśatitamo 'dhyāyaḥ | ut.26.1 athātaḥ śirorogapratiṣedhaṃ vyākhyāsyāmaḥ || ut.26.2 yathovāca bhagavān dhanvantariḥ || ut.26.3 vātavyādhividhiḥ kāryaḥ śiroroge 'nilātmake | payo nupānaṃ seveta ghṛtaṃ tailam athāpi vā || ut.26.4 mudgān kulatthānmāṣāṃś ca khādec ca niśi kevalān | kaṭūṣṇāṃś ca sasarpiṣkānuṣṇaṃ cānu payaḥ pibet || ut.26.5 pibedvā payasā tailaṃ tatkalkaṃ vāpi mānavaḥ | vātaghnasiddhaiḥ kṣīraiś ca sukhoṣṇaiḥ sekamācaret || ut.26.6 tatsiddhaiḥ pāyasair vāpi sukhoṣṇairlepayec chiraḥ | svinnair vā matsyapiśitaiḥ kṛśarair vā sasaindhavaiḥ || ut.26.7 candanotpalakuṣṭhair vā suślakṣṇairmagadhāyutaiḥ | snigdhasya tailaṃ nasyaṃ syāt kulīrarasasādhitam || ut.26.8 varuṇādau gaṇe kṣuṇṇe kṣīramardhodakaṃ pacet | kṣīraśeṣaṃ ca tanmathyaṃ śītaṃ sāramupāharet || ut.26.9 tato madhurakaiḥ siddhaṃ nasye tat pūjitaṃ haviḥ | tasmin vipakve kṣīre tu peyaṃ sarpiḥ saśarkaram || ut.26.10 dhūmaṃ cāsya yathākālaṃ snaihikaṃ yojayed bhiṣak | pānābhyañjananasyeṣu basikarmaṇi secane || ut.26.11 vidadhyāt traivṛtaṃ dhīmān balātailam athāpi vā | bhojayec ca rasaiḥ snigdhaiḥ payobhir vā susaṃskṛtaiḥ || ut.26.12 pittaraktasamutthānau śirorogau nivārayet | śirolepaiḥ sasarpiṣkaiḥ pariṣekaiś ca śītalaiḥ || ut.26.13 kṣīrekṣurasadhānyāmlamastukṣaudrasitājalaiḥ | nalavañjulakahlāracandanotpalapadmakaiḥ || ut.26.14 vaṃśaśaivalayaṣṭyāhvamustāmbhoruhasaṃyutaiḥ | śiraḥpralepaiḥ saghṛtairvaisarpaiś ca tathāvidhaiḥ || ut.26.15 madhuraiś ca mukhālaipairnasyakarmabhir eva ca | āsthāpanairvirekaiś ca pathyaiś ca snehabastibhiḥ || ut.26.16 kṣīrasarpirhitaṃ nasyaṃ vasā vā jāṅgalā śubhā | utpalādivipakvena kṣīreṇāsthāpanaṃ hitam || ut.26.17 bhojanaṃ jāṅgalarasaiḥ sarpiṣā cānuvāsanam | madhuraiḥ kṣīrasarpis tu snehane ca saśarkaram || ut.26.18 pittaraktaghnamuddiṣṭaṃ yaccānyadapi taddhitam | kaphotthitaṃ śirorogaṃ jayet kaphanivāraṇaiḥ || ut.26.19 śirovirekair vamanais tīkṣṇair gaṇḍūṣadhāraṇaiḥ | acchaṃ ca pāyayet sarpiḥ svedayec cāpy abhīkṣṇaśaḥ || ut.26.20 śiro madhūkasāreṇa snigdhaṃ cāpi virecayet | iṅgudasya tvacā vāpi meṣaśṛṅgasya vā bhiṣak || ut.26.21 ābhyām eva kṛtāṃ vartiṃ dhūmapāne prayojayet | ghreyaṃ kaṭphalacūrṇaṃ ca kavalāś ca kaphāpahāḥ || ut.26.22 saralākuṣṭhaśārṅgeṣṭādevakāṣṭhaiḥ sarohiṣaiḥ | kṣārapiṣṭaiḥ salavaṇaiḥ sukhoṣṇairlepayec chiraḥ || ut.26.23 yavaṣaṣṭikayoś cānnaṃ vyoṣakṣārasamāyutam | paṭolamudgakaulatthairmātrāvadbhojayed rasaiḥ || ut.26.24 śiroroge tridoṣotthe tridoṣaghno vidhirhitaḥ | sarpiḥpānaṃ viśeṣeṇa purāṇaṃ vā diśanti hi || ut.26.25 kṣayaje kṣayamāsādya kartavyo bṛṃhaṇo vidhiḥ | pāne nasye ca sarpiḥ syādvātaghnamadhuraiḥ śṛtam || ut.26.26 kṣayakāsāpahaṃ cātra sarpiḥ pathyatamaṃ viduḥ | kṛmibhir bhakṣyamāṇasya vakṣyate śirasaḥ kriyā || ut.26.27 nasye hi śoṇitaṃ dadyāttena mūrcchanti jantavaḥ | mattāḥ śoṇitagandhena samāyānti yatastataḥ || ut.26.28 teṣāṃ nirharaṇaṃ kāryaṃ tato mūrdhavirecanaiḥ | hrasvaśigrukabījair vā kāṃsyanīlīsamāyutaiḥ || ut.26.29 kṛmighnairavapīḍaiś ca mūtrapiṣṭair upācaret | pūtimatsyayutān dhūmān kṛmighnāṃś ca prayojayet || ut.26.30 bhojanāni kṛmighnāni pānāni vividhāni ca | sūryāvarte vidhātavyaṃ nasyakarmādibheṣajam || ut.26.31 bhojanaṃ jāṅgalaprāyaṃ kṣīrānnavikṛtirghṛtam | tathārdhabhedake vyādhau prāptam anyac ca yad bhavet || ut.26.32 śirīṣamūlakaphalair avapīḍo 'nayor hitaḥ | vaṃśamūlakaphalair avapīḍo 'nayor hitaḥ || ut.26.33 avapīḍo hitaś cātra vacāmāgadhikāyutaḥ | madhukenāvpīḍo vā madhunā saha saṃyutaḥ || ut.26.34 manaḥśilāvapīḍo vā madhunā candanena vā | teṣāmante hitaṃ nasyaṃ sarpirmadhurasānvitam || ut.26.35 sārivotpalakuṣṭhāni madhukaṃ cāmlapeṣitam | sarpistailayuto lepo dvayor api sukhāvahaḥ || ut.26.36 eṣa eva prayoktavyaḥ śiroroge kaphātmake | anantavāte kartavyaḥ sūryāvartaharo vidhiḥ || ut.26.37 sirāvyadhaś ca kartavyo 'nantavātapraśāntaye | āhāraś ca vidhātavyo vātapittavināśanaḥ || ut.26.38 madhumastakasaṃyāvaghṛtapūraiś ca bhojanam | kṣīrasarpiḥ praśaṃsanti nasye pāne ca śaṅkhake || ut.26.39 jāṅgalānāṃ rasaiḥ snigdhairāhāraś cātra śasyate | śatāvarīṃ tilān kṛṣṇān madhukaṃ nīlamutpalam || ut.26.40 dūrvāṃ punarnavāṃ caiva lepe sādhv avacārayet | mahāsugandhām athavā pālindīṃ cāmlapeṣitām || ut.26.41 śītāṃś cātra parīṣekān pradehāṃś ca prayojayet | avapīḍaś ca deyo 'tra sūryāvartanivāraṇaḥ || ut.26.42 kṛmikṣayakṛtau hitvā śirorogeṣu buddhimān | madhutailasamāyuktaiḥ śirāṃsyativirecayet || ut.26.43 paś cātsarṣapatailena tato nasyaṃ prayojayet | na cec chāntiṃ vrajanty evaṃ snigdhasvinnāṃstato bhiṣak || ut.26.44 paś cādupācaretsamyak sirāṇāmatha mokṣaṇaiḥ | ṣaṭsaptatirnetrarogā daśāṣṭādaśa karṇajāḥ || ut.26.45 ekatriṃśad ghrāṇagatāḥ śirasyekādaśaiva tu | iti vistarato dṛṣṭāḥ(diṣṭāḥ) salakṣaṇacikitsitāḥ || ut.26.46 etāvanto yathāsthūlamuttamāṅgagatā gadāḥ | asmiñchāstre nigaditāḥ saṅkhyārūpacikitsitaiḥ ||

iti suśrutasaṃhitāyām uttaratantrāntargate śālākyatantre śirorogapratiṣedho nāma ṣaṅviṃśo 'dhyāyaḥ ||26 ||

saptaviṃśatitamo 'dhyāyaḥ | ut.27.1 athāto navagrahākṛtivijñānīyam adhyāyaṃ vyākhyāsyāmaḥ || ut.27.2 yathovāca bhagavān dhanvantariḥ || ut.27.3 bālagrahāṇāṃ vijñānaṃ sādhanaṃ cāpy anantaram | utpattiṃ kāraṇaṃ caiva suśrutaikamanāḥ śṛṇu || ut.27.4 skandagrahas tu prathamaḥ skandāpasmāra eva ca | śakunī revatī caiva pūtanā cāndhapūtanā || ut.27.5 pūtanā śītanāmā ca tathaiva mukhamaṇḍikā | navamo naigameṣaś ca yaḥ pitṛgrahasaṃjñitaḥ || ut.27.6 dhātrīmātroḥ prākpradiṣṭāpacārācchaucabhraṣṭānmaṅgalācārahīnān | trastān hṛṣṭāṃtarjitān tāḍitān vā pūjāhetorhiṃsyurete kumārān || ut.27.7 aiśvaryasthāste na śakyā viśanto dehaṃ draṣṭuṃ mānuṣairviśvarūpāḥ | āptaṃ vākyaṃ tatsamīkṣyābhidhāsye liṅgānyeṣāṃ yāni dehe bhavanti || ut.27.8 śūnākṣaḥ kṣatajasagandhikaḥ stanadviḍ vakrāsyo hatacalitaikapakṣmanetraḥ | udvigraḥ sululitacakṣuralparodī skandārto bhavati ca gāḍhamuṣṭivarcāḥ || ut.27.9 niḥsaṃjño bhavati punar bhavet sasaṃjñaḥ saṃrabdhaḥ karacaraṇaiś ca nṛtyatīva | viṇmūtre sṛjati vinadya jṛmbhamāṇaḥ phenaṃ ca prasṛjati tat sakhābhipannaḥ || ut.27.10 srastāṅgo bhayacakito vihaṅgagandhiḥ saṃsrāvivraṇaparipīḍitaḥ samantāt | sphoṭaiś ca pracitatanuḥ sadāhapākair vijñeyo bhavati śiśuḥ kṣataḥ śakunyā || ut.27.11 raktāsyo haritamalo 'tipāṇḍudehaḥ śyāvo vā jvaramukhapākavedanātaḥ | revatyā viyathitatanuś ca karṇanāsaṃ mṛdgāti dhruvam abhipīḍitaḥ kumāraḥ || ut.27.12 srastāṅgaḥ svapiti sukhaṃ divā na rātrau viḍ bhinnaṃ sṛjati ca kākatulyagandhiḥ | chardyārto hṛṣitatanūruhaḥ kumāras tṛṣṇālur bhavati ca pūtanāgṛhītaḥ || ut.27.13 yo dveṣṭi stanamatisārakāsahikkācchardībhir jvarasahitābhir ardyamānaḥ | durvarṇaḥ satatam adhaḥśayo 'mlagandhistaṃ brūyur bhiṣaja ihāndhapūtanārtam || ut.27.14 udvigro bhṛśam ativepate prarudyāt saṃlīnaḥ ssvapiti ca yasya cāntrakūjaḥ | visrāṅgo bhṛśam atisāryate ca yastaṃ jānīyād bhiṣag iha śītapūtanārtam || ut.27.15 mlānāṅgaḥ surucir apāṇipādavaktro bahvāśī kaluṣasirāvṛtodaro yaḥ | sodvego bhavati ca mūtratulyagandhiḥ sa jñeyaḥ śiśur iha vaktramaṇḍikārtaḥ || ut.27.16 yaḥ phenaṃ vamati vinamyate ca madhye sodvegaṃ vilapati cordhvamīkṣamāṇaḥ | jvaryeta pratatamatho vasāsagandhir niḥsaṃjño bhavati hi naigameṣajuṣṭaḥ || ut.27.17 prastabdho yaḥ stanadveṣī muhyate cāviśanmuhuḥ | taṃ bālamacirāddhanti grahaḥ saṃpūrṇalakṣaṇaḥ || ut.27.18 viparītamataḥ sādhyaṃ cikitsedacirārditam | gṛhe purāṇahaviṣābhyajya bālaṃ śucau śuciḥ || ut.27.19 sarṣapān prakiretteṣāṃ tailairdīpaṃ ca kārayet | sadā sannihitaṃ cāpi juhuyāddhavyavāhanam || ut.27.20 sarvagandhauṣadhībījairgandhamālyairalaṅkṛtam | agnye kṛttikābhyaś ca svāhā svāheti saṃtatam || ut.27.21 namaḥ skandāya devāya grahādhipataye namaḥ | śirasā tvābhivande 'haṃ pratigṛhṇīṣva me balim | nīrujo nirvikāraś ca śiśurme jāyatāṃ drutam ||

iti suśrutasaṃhitāyām uttaratantrāntargate kumāratantre navagrahākṛtivijñānīyo nāma (prathamo 'dhyāyaḥ, āditaḥ) saptaviṃśo 'dhyāyaḥ ||27 ||

aṣṭāviṃśatitamo 'dhyāyaḥ | ut.28.1 athātaḥ skandhagrahapratiṣedhaṃ vyākhyāsyāmaḥ || ut.28.2 yathovāca bhagavān dhanvantariḥ || ut.28.3 skandagrahopasṛṣṭānāṃ kumārāṇāṃ praśasyate | vātaghnadrumapatrāṇāṃ niṣkvāthaḥ pariṣecane || ut.28.4 teṣāṃ mūleṣu siddhaṃ ca tailamabhyañjane hitam | sarvagandhasurāmaṇḍakaiḍaryāvāpamiṣyate || ut.28.5 devadāruṇi rāsnāyāṃ madhureṣu drumeṣu ca | siddhaṃ sarpiś ca sakṣīraṃ pānamasmai prayojayet || ut.28.6 sarṣapāḥ sarpanirmoko vacā kākādanī ghṛtam | uṣṭrājāvigavāṃ caiva romāṇyuddhūpanaṃ śiśoḥ || ut.28.7 somavallīmindravallīṃ śamīṃ bilvasya kaṇṭakān | mṛgādanyāś ca mūlāni grathitānyeva dhārayet || ut.28.8 raktāni mālyāni tathā patākā raktāś ca gandhā vividhāś ca bhakṣyāḥ | ghaṇṭā ca devāya balirnivedyaḥ sukukkuṭaḥ skandagrahe hitāya || ut.28.9 snānaṃ trirātraṃ niśi catvareṣu kuryāt puraṃ śāliyavairnavais tu | adbhiś ca gāyatryabhimantritābhiḥ prajvālanaṃ vyāhṛtibhiś ca vahneḥ || ut.28.10 rakṣāmataḥ pravakṣyāmi bālānāṃ pāpanāśinīm | ahanyahani kartavyā yā bhiṣagbhir atandritaiḥ || ut.28.11 tapasāṃ tejasāṃ caiva yaśasāṃ vapuṣāṃ tathā | nidhānaṃ yo 'vyayo devaḥ sa te skandaḥ prasīdatu || ut.28.12 grahasenāpatirdevo devasenāpatirvibhuḥ | devasenātipuharaḥ pātu tvāṃ bhagavān guhaḥ || ut.28.13 devadevasya mahataḥ pāvakasya ca yaḥ sutaḥ | gaṅgomākṛttikānāṃ ca sa te śarma prayacchatu || ut.28.14 raktamālyāmbaraḥ śrīmān raktacandanabhūṣitaḥ | raktadivyavapurdevaḥ pātu tvāṃ krauñcasūdanaḥ ||

iti suśrutasaṃhitāyām uttaratantrāntargate kumāratantre skandapratiṣedho nāmā (dvitīyo 'dhyāyaḥ, ādito+)aṣṭāviṃśo 'dhyāyaḥ ||28 ||

ekonatriṃśattamo 'dhyāyaḥ | ut.29.1 athātaḥ skandāpasmārapratiṣedhaṃ vyākhyāsyāmaḥ || ut.29.2 yathovāca bhagavān dhanvantariḥ || ut.29.3 bilvaḥ śirīṣo golomī surasādiś ca yo gaṇaḥ | pariṣeke prayoktavyaḥ skandāpasmāraśāntaye || ut.29.4 sarvagandhavipakvaṃ tu tailamabhyañjane hitam | kṣīravṛkṣakaṣāye ca kākolyādau gaṇe tathā || ut.29.5 vipaktavyaṃ ghṛtaṃ cāpi pānīyaṃ payasā saha | utsādanaṃ vacāhiṅguyuktaṃ skandagrahe hitam || ut.29.6 gṛdhrolūkapurīṣāṇi keśā hastinakhā ghṛtam | vṛkṣabhasya ca romāṇi yojyāny uddhūpane 'pi ca || ut.29.7 anantāṃ kukkuṭīṃ bimbīṃ markaṭīṃ cāpi dhārayet | pakvāpakvāni māṃsāni prasannā rudhiraṃ payaḥ || ut.29.8 bhūtaudano nivedyaś ca skandāpasmāriṇe 'vaṭe | catuṣpathe ca kartavyaṃ snānamasya yatātmanā || ut.29.9 skandāpasmārasaṃjño yaḥ skandasya dayitaḥ sakhā | viśākhasaṃjñaś ca śiśoḥ śivo 's tu vikṛtānanaḥ ||

iti suśrutasaṃhitāyām uttaratantrāntargate kumāratantre skandāpasmārapratiṣedho nāma (tṛtīyo 'dhyāyaḥ, āditaḥ) ekonatriṃśo 'dhyāyaḥ ||29 ||

triṃśattamo 'dhyāyaḥ | ut.30.1 athātaḥ śakunīpratīṣedhaṃ vyākhyāsyāmaḥ || ut.30.2 yathovāca bhagavān dhanvantariḥ || ut.30.3 śakunyabhiparītasya kāryo vaidyena jānatā | vetasāmrakapitthānāṃ niṣkvāthaḥ pariṣecane || ut.30.4 kaṣāyamadhurais tailaṃ kāryamabhyañjane śiśoḥ | madhukośīrahrīberasārivotpalapadmakaiḥ || ut.30.5 rodhrapriyaṅgumañjiṣṭhāgairikaiḥ pradihec chiśum | vraṇeṣūktāni cūrṇāni pathyāni vividhāni ca || ut.30.6 skandagrahe dhūpanāni tānīhāpi prayojayet | śatāvarīmṛgair vārunāgadantīnidigdhikāḥ || ut.30.7 lakṣmaṇāṃ sahadevāṃ ca bṛhatīṃ cāpi dhārayet | tilataṇḍulakaṃ mālyaṃ haritālaṃ manaḥśilā || ut.30.8 balirepa karañjeṣu nivedyo niyatātmanā | niṣkuṭe ca prayoktavyaṃ snānamasya yathāvidhi || ut.30.9 skandāpasmāraśamanaṃ ghṛtaṃ cāpīha pūjitam | kuryāc ca vividhāṃ pūjāṃ śakunyāḥ kusumaiḥ śubhaiḥ || ut.30.10 antarīkṣacarā devī sarvālaṅkārabhūṣitā | ayomukhī tīkṣṇatuṇḍā śakunī te prasīdatu || ut.30.11 durdarśanā mahākāyā piṅgākṣī bhairavasvarā | lambodarī śaṅkukarṇī śakunī te prasīdatu ||

iti suśrutasaṃhitāyām uttaratantrāntargate kumāratantre śakunīpratiṣedho nāma (caturtho 'dhyāyaḥ, āditaḥ) triṃśo 'dhyāyaḥ || 30 ||