athātaḥ sarvvabhūtacintāṃ śārīraṃ vyākhyāsyāmaḥ || sarvvabhūtānāṅ kāraṇam akāraṇaṃ satvarajastamo lakṣaṇam aṣṭarūpam akhilasyāsya jagataḥ sa|| ||mbhavahetur avyaktan nāma || tad ekam anekeṣāṃ kṣetrajñānām adhiṣṭhānāṃ | samudra ivodakaujasām bhāvānāṃ tasmād avyaktān mahān utpadyate talliṅga eva | talliṅgāc ca mahatas tallakṣaṇa evāhaṅkāra utpadyate | sa trividho vaikārikas taijaso bhūtādir iti | tatra vaikārikād ahaṃkārāt tallakṣaṇāny evaikādaśendriyāṇy utpadyante || tad yathā || śrotraṃ tvak cakṣur jjihvā ghrāṇo vāgghastopastha pāyu pāda manānsīti | tatra pūrvvāṇi pañca vuddhīndriyāṇi | itarāṇi pañca karmmendriyāṇi | ubhayātmakam manaḥ | bhūtādes tallakṣaṇāny eva pañcatanmātrāṇy utpadyante || tad yathā || śabdatanmātraṃ | sparśatanmātraṃ | rūpatanmātraṃ | rasatanmātraṃ | gandhatanmātram iti | tebhyo bhūtāni vyomānilānalajalorvvyas tebhyas tadviśeṣāḥ śabdasparśarūparasagandhāḥ | evam etāni caturvviṃśati tatvāni vyākhyātāni bhavanti | tatra buddhīndriyāṇāṃ śabdādayo viṣayāḥ | karmmendriyāṇāṃ yathāsaṃkhyā vacanādānānandavisarggaviharaṇāni | avyaktam mahān ahaṃkāraḥ pañca tanmātrāṇi cety aṣṭau prakṛtayaḥ śeṣāḥ ṣoḍaśa vikārāḥ svaṃ svaṃ svaiṣāṃ viṣaye vibhutvaṃ | svayam adhyātmam adhidevan tu | atha vuddher vvrahmā | ahaṃkārasyeśvaraḥ | manasaś candramāḥ | diśaḥ śrotrasya | tvaco vāyuḥ | sūryaś cakṣuṣaḥ | rasanāpaḥ | pṛthivī ghrāṇasya | vāco 'gniḥ | hastayor indra | pādayor vviṣṇuḥ | pāyor mmitraḥ | prajāpatir upasthasyeti | tatra sarvva evācetanaḥ | eṣa varggaḥ | puruṣaś ca pañcaviṃśatitamaś cetayitā | sa tu karaṇakāryasaṃprayuktaḥ saty apy acaitanye pradhānasya puruṣakaivalyārthān pravṛttim upadiśanti | kṣīrādīm̐ś cātra hetūn udāharanti || ata ūrdhvam prakṛtipuruṣayoḥ sādharmmyavaidharmmye vyākhyāsyāmaḥ || ubhāv apy anādī ubhāv apy anantau | ubhāv apy anityau | ubhāv apy aparau ubhāv apy aliṅgau ubhau ca sarvvagatāv iti || ekā tu prakṛtir acetanā triguṇā vījadharmmiṇī prasavadharmminī madhyadharmmiṇī ceti | vahavas tu puruṣāś cetanāvantaḥ | aguṇā avījadharmmiṇo prasavadharmmiṇo 'madhyasthadharmmiṇaś ceti | tatra kāraṇānurūpaṃ kāryam iti kṛtvā sarvva evaite ca viśeṣāḥ | satvarajastamomayā bhavanti | tadañjanatvāt tanmayatvāc ca tadguṇa eva puruṣo bhavatīty eke bhāṣante vaidyake tu || svabhāvo niyatiḥ kālaḥ pariṇāmas tatheśvaraḥ | yadṛcchati ca manyante prakṛtim pṛthudarśiṇaḥ || tato jātāni bhūtāni tadguṇāny eva nirddiśet | tebhyas tallakṣaṇaḥ kṛtsno bhūtagrāmaḥ prajāyate || tasyopayogo bhihitaś cikitsām prati sarvvadā | bhūtebhyo pi paran tasmān nāsti cintā cikitsite || yato 'bhihitaṃ tatsambhavadravyasamūho bhūtādir ukta iti | bhautikāni cendriyāṇy āyurvvede varṇṇyante tathaivendriyārthāḥ || bhavati cātra || indriyair indriyārthaṃ tu svaṃ svaṃ gṛhṇāti mānavaḥ | niyataṃ tulyayonitvān nāmyenānyam iti sthitiḥ || na cāyurvvedaśāstreṣūpadiśyante || sarvvagatā kṣetrajña nityāś ca asarvvagateṣu ca kṣetrajñeṣv anityeṣu ca puruṣākhyāpakān hetūn udāharanti | āyurvvedasiddhāntād asarvvagatā kṣetrajñā nityāś ca | tiryagyonimānuṣadeveṣu ca sañcaranti | dharmmādharmmanimittaṃ tu ete numānagrāhyāś carāḥ paramaśūkṣmāś cetanāvantaḥ śāśvatāḥ śukrārttavayoḥ sannipāteṣv abhivyajyante | yato 'bhihitam pañcamahābhūtaḥ śarīrasamavāyaḥ puruṣa iti | sa khalv eṣa karmmapuruṣaś cikitsāyām adhikṛtaḥ | tasya khalu sukhaduḥkhecchādveṣaprayatnaḥ prāṇāpānau nimeṣonmeṣau vuddhir mmanaḥ saṃkalpo vicāraṇānusmṛtijñānam adhyavasāyo viṣayopalabdhiś ca guṇāḥ | sātvikās tu ānṛśaṃsyaṃ samvibhāgarucitā titikṣā satyan dharmma āstikyaṃ jñānaṃ vuddhir mmedhā smṛtir anabhiṣvaṅgatā ca || rājasās tu duḥkha vahulatā pradānaṃ duḥśīlatvam akāruṇyam ānṛtikatvam ahaṃkāro dambho māno harṣaḥ kāmakrodhaś ceti || tāmasās tu viṣāditvaṃ nāstikyam adharmmaśīlatā vuddhinirodho 'jñānaṃ durmmedhastvam akarmmaśīlatā nidrālutvañ ceti || antarikṣās tu śabdaśabdendriyaṃ sarvvacchidrasamūho viviktatā ca | vāyavyās tu sparśaḥ sparśendriyaṃ sarvvaceṣṭāsamūhaḥ sarvvaśarīraspandanaṃ laghutā ca | taijasās tu rūpaṃ rūpendriyaṃ varṇṇasantāpo bhrājiṣṇutā paktir amarṣas taikṣṇyañ ca | āpyās tu raso ca rasendriyaṃ sarvvadravasamūho gurutā śaityaṃ sneho retaś ca | pārthivās tu gandho gandhendriyaṃ sarvvamūrttisamūho gurutā ca | tatra satvavahulam ākāśaṃ | rajovahulo vāyuḥ | satvarajovahulo 'gniḥ | satvatamovahula āpaḥ | tamovahulā pṛthivī || bhavati cātra || anyonyāni praviṣṭāni sarvvāṇy etāni nirddiśet | sve sve dravyeṣu sarvveṣāṃ vyaktalakṣaṇam iṣyate || aṣṭau prakṛtayaḥ proktā vikārāś caiva ṣoḍaśa | kṣetrajñāś ca samāsena svatantraparatantrata iti || śārīrasya prathamo 'dhyāyaḥ || o ||

athātaḥ śukraśoṇitaviśuddhiṃ śārīraṃ vyākhyāsyāmaḥ || vāta pitta śleṣma śoṇita kuṇapa granthi pūti pūya kṣīṇa mūtra purīṣa retāṃsi prajotpādaneṣv asamarthāni bhavanti | teṣu vātavarṇṇavedanaṃ vātena | pittavarṇṇavedanaṃ pittena | śleṣmavarṇṇavedanaṃ śleṣmaṇā | śoṇitavarṇṇam pittavedanaṃ | śoṇitena | kuṇapañ ca raktena | granthibhūtaṃ śleṣmavātābhyāṃ | pūtipūyanibhaṃ pittaśoṇitābhyāṃ | kṣīṇaśukraṃ pittamārutābhyāṃ | mūtrapurīṣagandhi sannipātena | teṣu kuṇapa granthi pūti pūya retasaḥ kṛcchrasādhyāḥ | mūtrapurīṣaretasas tv asādhyā iti | ārttavam api tribhir ddoṣaiḥ śoṇitacaturthaih pṛthak dvandvais tribhiḥ samastaiś copasṛṣṭam avījan na bhavati | tad api doṣavarṇṇavedanābhir vvijñeyaṃ | teṣu kuṇapagranthi pūtipūya prakāśan tad asādhyaṃ sādhyam anyac ceti || bhavati cātra || teṣv ādyāḥ śukradoṣās trī snehasvedādibhir jjayet | kriyāviśeṣair mmatimān tathaivottaravastibhiḥ || tatra vātātmake retasi bilvavidārīkṣīram āsthāpanaṃ | madhūka rāsnā devadāru sarala vipakvan tailan tad uttaravastiṣu vidadhyāt || dāḍima mātulaṅga phala saindhava kṣāra vasukava-sira siddhaṃ sarppiḥ pāyayet || pittātmake retasi payasyāśrīparṇṇīmadhukavipakvaṃ kṣīram āsthāpanaṃ | sarjjadhavakalkaṃ yonyā dhārayet | madhukavipakvaṃ tailam anuvāsanaṃ | tad evottaravastiñ ca vidadhyāt | kāṇḍekṣu śvadaṃṣtrā guḍūcī madhuparṇṇī bhṛṇa pañcamūla siddhaṃ sarppiḥ pāyayet || śleṣmātmake retasi rājavṛkṣakaṣāyam āsthāpanaṃ | pippalīviḍaṃgamadhuvipakvan tailam anuvāsanan tad evottarava-stiñ ca vidadhyāt | pāṣāṇabheda kāśmaryāmalaka pippalī vasuka vasira siddhaṃ ghṛtam prayacchet pā-nārthaṃ || bhavanti cātra ślokāḥ || pāyayen manujaṃ sarpir bhbhiṣak choṇita retasi | dhātakīpuṣpakhadira dāḍimārjjuna sādhitaṃ || kuṇapākhye pibet sarppiḥ śāla-sārādisādhitaṃ || granthibhūte 'śmabhiḥ siddhaṃ pālāse cā pi bhasmani || parūṣakavaṭādibhyām pūyābhe cāpi sādhitaṃ || prāguktaṃ vakṣyate yac ca tat kāryaṃ kṣīṇaretasi || viṭprabhe pāyayet sarppiś citrakośīrahiṅgubhiḥ | snehādīnāṃ kramaṃ kuryāt ṣaṭsv ateṣu paṇḍitaḥ || asevanāc ciraṃ strīṇāṃ kriyāyogāt tathaiva ca | kaṣāyakaṭutiktānāṃ drvyāṇām atisevanāt || tathāslaṃlavaṇaṃ rūkṣaṃ śuktaṃ paryuṣitan tathā | vegād yātāc ca yogīnāṃ gamanāc ca praduṣyati || tathārttavadoṣe ca snehādikarmmam upadiśet | yathaivoktan tathaivottaravastiñ ca vidadhyāt | tatrāśaṇavātātmake bhaṅgābhadradārukāśmaryaphalasiddhaṃ ghṛtam pāyayet | payasyā kāśmarya phala kṣīra vidārī kṣīrodaka siddhaṃ vā kṛsarapāyasapiṇḍaṃ yonyān dhārayet | madhukamuṅgaparṇṇīkaṣāyam ācamanaṃ || pittātmake cārttave | kākolīkṣīravidārīkvāthaṃ śarkkarāyuktam pāyayet | madhukapuṣpa-kāśmaryaphalakvātham phānitayuktam vā candanapayasyākalkaṃ yonyān dhārayet | nimbagairikakaṣāyam ācamanaṃ || śleṣmātmake bhadraśriyakaṭukarohiṇīkaṣāyam pā-yayet | kṣīravṛkṣapravālakalkam vā | tindukakapithaśalāṭucūrṇṇam vā kṣaudreṇa lehayet | sarjjadhavakalkaṃ yonyān dhārayet | lādhratindukakaṣāyam ācamanaṃ || granthibhūte śṛṅgaverapāṭhācūrṇṇayuktaṃ śvetasurasām prayacchet | kuṣṭhabhadradārukalkaṃ yonyāndhārayet | teṣām eva kaṣāyam ācamanaṃ || kuṇapākhye mañjiṣṭhābhadraśriyakaṣāyaṃ pāyayet || kuṭajaphalabhadraśriyacandanam vā śarkkarāyuktaṃ || pūyābhe vā tad eva prayacchet | khadirārjjunakalkaṃ yonyāṃ hārayet | tayor eva kaṣāyam ācamanaṃ || krimijāte vidañgapāribhadrakamañjiṣṭhākaṣāyam pāyayet | kṣaudrayuktaṃ surāṣṭāṣṭrārocanākalkam bhadraśriyakalkaṃ yonyān dhāryet | tayor eva kaṣāyam ācamanam bhavati || bhavati cātra || vidhim uttarabastyantaṃ kuryād ārtavaśuddhaye | kuryāt kalkam picūṃś cāpi pathyāny ācamanāni ca || durggandhapūtisaṃkāśe majjābhe vāpi śoṇite | pibed bhadraśriyakvāthañ candanakvātham eva vā || granthibhūte pibet pāṭhāṃ tryūṣaṇaṃ vṛkṣakāṇi ca | kṣāranāgarahiṃgūnān nikvāthaṃ surasām pibet || evam aduṣṭaśukraḥ śuddhārtavām || ṛtau prathama divasāt prabhṛti brahmacāriṇīṃ snānānulepanālaṅkāra vilekhana virahitān divāsvapnāñjanāśru pātābhyaṅga nakha cchedana pradhāvana hasana kathanātiśabda śravaṇāyāsām pariharet | kiṃ kāraṇaṃ divā svapatyā vikṛtadṛṣṭiḥ | snānānulepanād duḥśīlaḥ | vadhiraḥ | añjanād andhaḥ | rodanād tailābhyaṅgāt kuṣṭhī | nakhāvakarttanāt kunakhaḥ | pralepanāt khalatiḥ | mārutāyāsasevanād utmatto garbhbho bhavatīty evam etām pariharet || darbhbha saṃstaraṇa śāyinīṃ karatala śarāva parṇṇānām anyatama bhojinīṃ haviṣyaṃ tryahaṃ bharttā rakṣet tataḥ śuddhasnātān tu caturthyām anāhata vastravāsinīm alaṅkṛtāṃ kṛtamaṅgalasvasti vācanām bharttāran darśayed| api | tat kasya hetoḥ? || pūrvvam paśyed ṛtu-snātā yādṛśan naram aṅganā | tādṛśañ janayet putram bharttāran darśayet tataḥ || tato vidheyaṃ putrīyam upādhyāyaḥ samācaret | karmānte ca kramaṃ hy etam avekṣyeta vicakṣa-ṇaḥ || tato 'parāhṇe pumān sarppiḥkṣīrābhyāṃ śālyodanam abhiprāśya māsaṃ brahmacārī | tailamāṣottarāhārān nārīm upagacched rātrau sāmabhir abhiviśvāsya vikalpam evaṃ caturthyāṃ ṣāṣṭhyām aṣṭamyān daśamyāṃ dvādaśyāñ copeyā-d ataḥ | param māsād upeyāl | labdha garbha nni va ca | teṣv evāhaḥsu lakṣmaṇā vaṭa śuṅgā sahadevā viśva devānām anyatamam abhiṣūyāt | trīṃś caturo vā bindūn dadyād dakṣiṇe nāsāpuṭe putrakāmāyai vāme strīkāmāyai na cainan niṣṭhīved iti || ślokāḥ || sphaṭikābhaṃ dravaṃ snigdhaṃ madhuram madhugandhi ca | śukram icchanti kecit tu kṣaudratailasamaprabhaṃ || śaśāsṛkpratimaṃ yat tu yad vā lākṣārasopamaṃ | tad ārtavam praśansanti yac cā na virajyate || tad evātiprasaṅgena pravṛttam anṛtāv api | asṛgdaram vijānīyād raktalakṣaṇalakṣitaṃ || asṛgdaraṃ bhavet sarvvan sāṅgamarddan savedanaṃ | atipravṛttau daurbbalyam bhramamūrcchā tamas tṛṣā || dāhaḥ pralāpaḥ pāṇḍutvan tandrā rogāś ca vātajāḥ | taruṇyā hitasevinyās tad alpopadravam bhavet || doṣair āvṛtam ārggatvād ārttavan naśyati striyāḥ | tatra māṃsa kulatthāmla tila-māṣasurā hitāḥ || pāne mūtram udaśvic ca dadhiśuktañ ca bhojane | kṣīṇam prāgīritaṃ raktaṃ salakṣa-ṇacikitsitaṃ || tathāpy asya vidhātavyam vidhānaṃ raktapittavat | dhruvañ caturṇṇāṃ sānnidhye garbhbhaḥ syād vidhipūrvvakaḥ || kṣettrabījodakatṛṇāṃ sāmagryād aṅkuro yathā || evaṃ jātā rūpavanto mahāsattvāś cirāyuṣaḥ || bhavanty ṛṇapramoktāras saputrāḥ putriṇāṃ hitāḥ || tatra tejodhātur varṇṇānām prabhavaḥ iti kṛtvā | yadā garbbhotpattāv apāabdhātuprāyam āhāram bhavati | tadā garbhbhasya gauratvaṃ | pṛthivīdhātuprāyaḥ kṛṣṇatvaṃ | pṛthivyākāśadhātuprāyaḥ śyāmatvaṃ | yādṛkvarṇṇam āhāram upasevate garbhbhiṇī tadvarṇṇaḥ prasavo bhavatīty eke bhāṣante | yathā kṛṣṇapītasvetāsu bhūmiṣu sarppa vṛścika galagoṇḍikādayaḥ satvāḥ kṛṣṇapītasvetā iti || tatra dṛṣṭibhāgam apratipannan tejodhātur jjātyandhaṃ karoti | tad eva raktānugataṃ raktākṣaṃ | śleṣmānugataṃ śuklākṣaṃ | pittānugatam piṅgākṣaṃ | vātānugatam vikṛtākṣaṃ || bhavanti cātra || viśuddhaḥ pavano yasya nayane pratipadyate | jāyate nayane tasya- nimne kṛṣṇe site tathā || pittaṃ kaphayutaṃ yasya nirmmalaṃ yāti locane | haripiṃglasamjñā vai jāyete tasya locane || vinirddhūtamalaḥ śleṣmā yadā vraja-ti locane | tasya netre prakāśete śuklamaṇḍalamaṇḍale || raktaṅ kaphayutaṃ yasya yadā vrajati locane || kapotanīle nayane rakte vā jāyate nṛṇāṃ || ghṛtakumbho yathā hy agnim āśritaḥ pravilīyate | prasarpped ārttavan nāryāḥ puruṣasya samāgamāt || bīje tu vāyunā bhinne dvau jīvau kukṣim āgatau | yamāv ity abhidhīyete dharmmetarapurā kṛtau || miśrībhāve yadā puṃso retas subahunirmmalaṃ | tadā prasūyate nārī garbhbhiṇī dārakadvayaṃ || miśrībhāve striyāś caiva bahuśukraṃ yadā bhavet | kanyādvayan tadā nārī sūyate nātra saṃśayaḥ || āsekyo nāma bhavati strīpuṃsor alpabījayoḥ || sa śuklaṃ prāsya- labhate dhvajocchrāyam asaṃśayaḥ || yaḥ pūtiyonau jāyeta sa saugandhikasaṃjñitaḥ || sa yoniśephasor ggandham āghrāya labhate balaṃ || sve gude brahmacaryād yā strīṣu svāsu pravartate | kumbhīkaḥ sa tu vijñeya īrṣyakaṃ śṛṇu cāparaṃ || dṛṣṭvā vyavāyam anyeṣāṃ vyavāyāya pravarttate | īrṣyakaḥ sa tu vijñeyaḥ ṣaṇḍhakaṃ śṛṇu pañcamaṃ || kaumāryāṃ yas tv ṛtau mohād aṅganeva pravartate | tatra strīce-ṣṭitākāro jāyate ṣaṇḍhasaṃjñakaḥ || ṛtau puruṣavac cāpi yadi yoṣit prapadyate | tatra kanyā yadi bhavet sā bhaven naraceṣṭitā || āsekyaś ca sugandhī ca kumbhīkaś cerṣyakas tathā | saśukrakās tv amī jñeyā hy aśukraḥ ṣaṇḍhasaṃjñakaḥ || anayor vviprakṛtyā tu teṣāṃ śukravahā- sirā || harṣāt sphuṭatvam āyāṃti dhvajocchrāyan tato bhavet || ākārācāracintābhir yādṛśībhiḥ samanvitau | strīpuṃsau tu bhaveyātāṃ tayor ggarbbho 'pi tādṛśaḥ || yadā tu nārī- nārī ca maithunāyopakalpataḥ | muñcantaḥ śukram anyonyam anasthis tatra jāyate || sarppa vṛścika kuṣmāṇḍa vikṛtākṛtayas tu te | garbhbhā evamvidhāś cānye jñeyāḥ pāpa-kṛto bhṛśaṃ || garbhbho vātaprakopeṇa dauhṛdena vimānitaḥ | bhave-t kubjo thavā kūni paṅgur mmūko tha mirmmiṇaḥ || mātāpitror anācārād aśubhaiś ca purākṛtaiḥ | vātādīnām prakopeṇa garbhbho vaikṛtam āpnuyāt || malālpatvād ayogāc ca vāyoḥ pakvāsayasya ca | vātamūtrapurīṣāṇi na garbhbhasthaḥ karoti ha || jarāyunā mukhe cchanne kaṇṭhe- ca kaphaveṣṭite | vāyor ggatinirodhāc ca na garbhbhasthaḥ prarodi-ti || niśvāsocchvāsa saṃkṣobhaḥ svapnāṅ garbhbho 'tha gacchati | mātur nniḥśvasitocchvāsasaṃkṣobhasvapnasaṃbhavān || sanniveśaḥ śarīrāṇāṃ dantānāṃ patanodbhavau | taleṣv asaṃbhavo yac ca romnām etat svabhāvataḥ || bhāvitā pūrvvadeheṣu satataṃ śāstrabuddhayaḥ | bhavanti sttāna bahulāḥ pūrvvajātismarā narāḥ || iti śārīraṃ dvitīyo 'dhyāyaḥ || ||

athāto garbbhāvakrāntiṃ śārīraṃ vyākhyāsyāmaḥ || saumyaṃ śukram ārttavam āgneyam itareṣām apy atra bhūtānāṃ sānnidhyam asty anunā viśeṣeṇa parasparopakārāt parasparānupraveśāc ca || tatra dampatyoḥ samprayoge tejaḥ śarīrād vāyus samīrayati | tatra tejo'nila sannipātāc chukraṃ cyutaṃ yonim abhiprapadyate | saṃsṛjyate cārttavena tato 'gnīṣomasaṃyogāt saṃsṛjyamāno garbbhāsayam anuprapadyate kṣettrajñaś cetayitā spraṣṭā ghrātā draṣṭā śrotā rasayitā puruṣo gantā sākṣī dhātā vaktā yaḥ ko 'sāv ādya āyur ity evam ādibhiḥ paryāyavācakair nnāmabhir abhidhīyate | daivasaṃyogād akṣayo 'vyayo cintyo bhūtātmā satvarajastamobhir ddevāsurair aparaiś ca saha bhāvair vvāyunā preryamāṇo garbbhāsayam anupraviśati || tatra śukrabāhulyāt pumān ārttavabāhulyāt strī sāmyād ubhayor napuṃsakaṃ || tatra ṛtudvādaśarātraṃ bhavati | tatra prathame divase ṛtumatyāṃ maithunagamanam anāyuṣyam punso bhavati | yac ca tatrādhīyate garbbhaḥ saprasavato vipadyate | dvitīye tivāgṛhe vipadyate || tṛtīye 'py evam asampūrṇṇo 'ṅgo 'lpāyuś ca bhavati | tasmāt trirātram pariharet | na ca pravarttati raktabījaṃ pradiṣṭaṃ guṇakaraṃ bhavati | yathā nadyām pratisrotasi pla cidravyaṃ pratikṣiptaṃ na pratinivarttate | tadvad bījaṃ draṣṭavyan tasmāt trirātran niyamavantīm pariharet | tatra ṛtudvādaśarātran dṛṣṭvānārttavā bhavati | adṛṣṭārttavās tān eke bhāṣante || bhavati cātra || dine vyatīte niya taṃ maṃ3 saṃkucaty ambujaṃ yathā | ṛtau vyatīte nāryās tu yoniḥ saṃkucatis tathā || pīnaprasaṃnavadanāṃ praklinnātmamukhadvijāṃ | narakāmām priyakathāṃ srastakukṣyakṣimūrddhajāṃ || sphuradbhujakucaśroṇinābhyūru jaghana sphicāṃ || harṣautsukyaparāṃś caiva vidyād ṛtumatīṃ striyaṃ || māsenopacitaṃ kāle dhamanībhyāṃ yad āgataṃ || īṣatkṛṣṇam vigandhañ ca vāyur yonimukhan nayet || tad varṣād dvādaśāt kāle varttamānam asṛk punaḥ | jarāpakvaśarīrāṇām pañcāśād vinivarttate || yugmeṣu tu pumān prokto divaseṣv anyathābalā | puṣpakāle śucis tasmād apatyārthī striyaṃ vrajet || tatra sadyo gṛhītagarbbhāyāḥ śramo glāniḥ pipāsā sakthi sadanam āṭopaḥ śukraśoṇitayor anubandhaḥ kharasphuraṇaṃ yonyāḥ || bhavati cātra || stanayoḥ kṛṣṇamukhatā romarājyuṅgamas tathā | prasekaḥ sadanañ cāpi garbbhiṇyā liṃgam ucyate || tataḥ prabhṛty eva ca vyavāyaṃ vyāyāmam atikarṣaṇaṃ | divāsvapnaṃ rātrijāgaraṇaṃ śokaṃ yānārohaṇam bhayam utkaṭakāsanañ caikāntataḥ snehādikramaṃ śoṇitamokṣaṇañ cākāle nā seveta | tatra prathame māse kalalañ jāyate || dvitīye śoṇitoṣṇānilaiḥ pacyamāno mahābhūtānāṃ saṃjāto ghanañ jāyate | granthir yadi pumān | strī cet peśī | napuṃsakaṃ ced arbbudam bhavati || tṛtīye hastapādaśirasām pañca piṭakā abhinirvarttante | sarvvāṅgapratyaṅgavibhāgaś ca sūkṣmo bhavati || caturthe sarvvāṅgapratyaṅgavibhāgaś ca pravyakto bhavati || pañcame sarvvāṅgapratyaṅgavibhāgaś ca pravyaktataro bhavati | garbbhahṛdapravyaktibhāvāc cetanādhātur abhivyakte kasmāt tatsthānatvād garbbhaś caturthe māse abhiprāyam indriyārtheṣu karoti | dvihṛdayā ca nārī bhavati nimittāny ācakṣate | dvauhṛdayavimānanān javjakūnīṃ ṣaṇḍam vāmanavikṛtākṣam anakṣam vā nārī sutañ janayati | tasmāt sā yad icchet tat tasmai dāpayet | labdhadauhṛdāhivīryavantaṃ cirāyuṣañ janayati || bhavati cātra || indriyārthām̐s tu yān yāṃ sā bhoktum icchati garbbhiṇī | garbbhābādhabhayāt tām̐s tām bhiṣag āhṛtya dāpayet || samprāptadauhṛdam putram prajāyeta guṇānvitaṃ | alabdhadauhṛdāgarbbhe labhate cātmani vā bhayam || yeṣu yeṣv indriyārtheṣu dauhṛde¦ yā vimānitā | prajāyeta sutaṃ sārttin tasmin tasmin tathaindriye || rājā sandarśane yasyā dauhṛdañ jāyate striyaḥ | arthavantam mahābhāgaṃ kumāraṃ sā prasūyate || dukūlapaṭṭa kauṣeya bhūṣaṇādiṣu dauhṛdā | alaṅkāreṣiṇam putraṃ lalitaṃ sā prasūyate || āsrame saṃyatātmānaṃ dharmmaśīlaṃ prajāyate | devatāpratimāyāṃ tu prasūto harṣadopamam || darśane vyāḍajātīnāṃ hiṃsāśīlaṃ prajāyate || godhāmāṃsāśinīputraṃ suṣupsur mmāraṇātmakaṃ || gavāṃ māṃsena balinaṃ sarvvakleśasahaṃ sutaṃ | māhiṣe dauhṛdāc chūraṃ raktākṣaṃ lomaśaṃ sutaṃ || ato nukteṣu yā nārīm abhidhyāyati dauhṛdam | || śarīrāhāraśīlaiḥ sā samānañ janayiṣyati || karmmaṇā coditañ jantor bbhavitavyam punar bbhavet | yathā tathā daivayogād dauhṛdañ janayed dhṛdi || pañcame manaḥ pratibuddhataram bhavati || ṣaṣṭhe buddhiḥ saptame sarvvapravyaktaṃ śarīraṃ || aṣṭame sthirībhavaty ojas tatra jāto na jīvati || nairṛtabhāgadheyatvāt tato balim mānsodanaṃ bhāgadheyan tasmai dāpayet || navamadaśamaikādaśadvādaśānām anyatamasmiñ jāyate | atho nyathā vikārī bhavati || mātus tu khalu rasavahāyān nābhyāṃ garbbhanāḍī pratibaddhā bhavati | sāsya mātur āhārarasavīryam abhyavaharati || tenopasnehenābhivṛddhir asya bhavati | asañjātāṅgavibhāgam api niḥṣekān prabhṛti sarvvaśarīrānusāriṇīnāṃ rasavahānāṃ tiryaggatīnān dhamanīnām upasnehena jīvayati || garbbhasya khalu sambhavataḥ || pūrvvaṃ śiraḥ sambhavatīty āha śaunakas tanmūlatvāt | pradhānendriyāṇāṃ hṛdayam iti kṛtavīryaḥ | buddher manasaś ca sthānaṃ nābhir iti pārāsaryas tato varddhate dehadehinaḥ | prāṇaḥ pāṇipādam iti mārkkaṇḍeyas tanmūlatvāc ceṣṭāyāḥ | garbbhasya śarīram iti || subhūtigautamas tatra nibandhatvāt sarvvagātrasambhavasya tan tu na samyak sarvvāṇy aṅgapratyaṅgāni yugapat sambhavanti | kāle garbbhasya sūkṣmatvān nopalabhyante | vaṃśāṅkuravac cūtaphalavac ca | tad yathā cūtaphale vipakve keśara mānsāsthi majjānaḥ pṛthak pṛthag dṛśyante kālaprakarṣāt tāny eva taruṇe nopalabhyante || sūkṣmatvāt teṣāṃ sūkṣmāṇāṃ keśarādīnām pravyaktaṃ kālaḥ karoti | etenaiva vaṃśāṃkuro vyākhyātaḥ | evaṃ garbbhasya tāruṇye sarvveṣv aṅgapratyaṅgeṣu satsv api saukṣmyād anupalabdhis tāny eva kālaprakarṣāt pravyaktāni bhavanti | pūrvvottarakālayogo nāstīti kevalan tu saukṣmyān nābhivyajyante | yathākālaṃ pravyaktāni bhavanti | tatra pitṛjamātṛja rasajātmaja satvasātmyajāni śarīre lakṣaṇāni vakṣyāmaḥ || tatra keśasmaśru danta nakha romāsthi retaḥ prabhṛtīni pitṛjāni || māṃsaśoṇitamedomajjā hṛnnābhi yakṛtplīhāntragudaprabhṛtīni mṛdūni mātṛjāni | śarīropacayo balavṛddhir vvarṇṇasthitihāniś ca rasajāni | indriyāṇi jñānam āyuḥ sukhaduḥkhādikaṃ cātmanaḥ satvajāny uttaratra vakṣyāmaḥ | vīryam ārogyam balaṃ varṇṇo medhā ca sātmyajaṃ || tatra yasyā dakṣiṇe stane prāk payaso darśanaṃ | dakṣiṇakukṣimahatvañ ca pūrvvadakṣiṇaṃ sakthi utkarṣayati | bāhulyāc ca punnāmadheyeṣu dravyeṣu dauhṛdam abhidhyāyati | svapne copalabhate padmotpalakumudāmrāmrātakādīni punnāmany eva vā prasannamukhavarṇṇā ca bhavetāṃ vrūyāt putram iyam prajanayiṣyatīti || tadviparyaye kanyāṃ || yasyāḥ pārśvadvayam avanatam purastān nirggatam udaraṃ prāgabhihitañ ca lakṣaṇan tasyāḥ | napuṃsakam iti vidyāt | yasyā madhye nimno droṇīprābhūtam uda yugmaṃ prasūyata iti || bhavati cātra || devatābrāhmaṇaparāḥ śucyo hitamitāśanāḥ | mahāguṇāḥ prasūyante viparītās tu nirgguṇāḥ || aṅgapratyaṅganirvṛttiḥ svabhāvād eva jāyate | aṃgapratyaṃganirvṛttā ye bhavanti guṇāguṇāḥ || te vai garbbhasya vijñeyā dharmmādharmmanimittajāḥ || iti śārīratṛtīyo 'dhyāyaḥ ||

athāto garbbhavyākaraṇaṃ śārīraṃ vyākhyāsyāmaḥ || agnīṣomo vāyuḥ satvaṃ rajas tamaḥ | pañcendriyāṇi bhūtātmā manaś ceti prāṇāḥ | tasya khalu śukraśoṇitasyābhipacyamānasya kṣīrasyeva hi santānikāḥ sapta tvaco bhavanti || tāsāṃ prathamo vabhāsinī nāma yā sarvvavarṇṇān avabhāsayati | pañcavidhāñ ca cchāyām prakāśayati | sā vrīher aṣṭādaśabhāgapramāṇā | dvitīyā lohitā nāma ṣoḍaśabhāgapramāṇā | tṛtīyā śvetā dvādaśabhāgapramāṇā | carurthī tāmrāṣṭabhāgapramāṇā | pañcamī vedanī nāma pañcabhāgapramāṇā | ṣaṣṭhī rohiṇī nāma vrīhipramāṇā | saptamī śukradharā nāma vrīhidvayapramāṇā || yato vakṣyaty udare vrīhimukhenāṅgulam aṅguṣṭhodaramātram vāvagāhyeti kalāḥ khalv api sapta sambhavanti dhātvāntarāśayamaryādāḥ || ślokau || yathā hi sāraḥ kāṣṭheṣu chidyamāneṣu dṛśyate | tathā hi dhātur mmāṃseṣu cchidyamāneṣu dṛśyate || snāyubhiś ca praticchannāṃ santatāṃś ca jarāyuṇā | śleṣmaṇā veṣṭitām̐ś cāpi kalābhāgām vidur vvudhāḥ || tāsaṃ prathamā māṃsadhārā nāma | tasyā māṃsasirāsnāyudhamanīsrotasān navanavapratānāni bhavanti || bhavati || yathā viṣamṛṇālāni vivarddhante samantataḥ | bhūmau paṃkodakasthāni tathā mānse sirādayaḥ || dvitīyā raktadharā nāma mānsasyābhyantaratas tasyā śoṇitam viśeṣataḥ sirāsu ca yakṛtplīhnoś ca bhavati || || bhavati cātra || vṛkṣādyathā hi prahatāt kṣīriṇaḥ kṣīram āsrayet | mānsād evaṃ kṣatāt kṣipraṃ śoṇitaṃ sampravartate || tṛtīyā medodharā nāma medas tu khalu sarvvabhūtānām udareṣv asthiṣu ca mahatsu cāntar mmajjā ca bhavati || bhavati cātra || sthūlāsthiṣu viśeṣeṇa majjā tv abhyantarāsritaḥ | athetareṣu sarvveṣu saraktaṃ meda ucyate || caturthī śleṣmadharā nāma yā sarva sandhiṣu sarvvaprāṇapratām bhavati || bhavati cātra || snehābhyakte yathā hy akṣe cakraṃ sādhu pravarttate | sandhayaḥ sādhu varttante saṃśliṣṭā śleṣmaṇā tathā || pañcamī purīṣadharā nāma yā caturvvidham apy annam āmāśayāt pracyutam pakvāsayopasthitaṃ dhārayati | koṣṭham vibhajati pakvāsayasthā || bhavati cātra || yakṛt samantāt koṣṭhañ ca tathāntrāṇi samāsritāḥ | uṇḍukastham vibhajate malam maladharāᳵ kalāḥ || ṣaṣṭhī pittadharā nāma yā caturvvidham aśitapītakādita līḍham iti pacati || bhavati cātra || aśitaṃ khāditaṃ pītaṃ līḍhaṃ yat koṣṭhagataṃ || taj jīryati yathākālaṃ śoṣitam pittatejasā || saptamī śukradharā nāma yā sarvvaprāṇināṃ sarvvaśarīravyāpinī bhavati || bhavati cātra || yathā payasi sarppis tu guḍaś cekṣurase yathā | śarīreṣu tathā śukraṃ nṛṇām vidyād bhiṣagvaraḥ || dvyaṅgule dakṣiṇe pārśve vastidvārasya cāpy avāṅ | mūtrasrotas tataḥ śukraṃ puruṣasya pravarttate || gṛhītagarbbhāṇām ārttavavahānāṃ srotasāṃ vartmāṇy uparuddhāni garbheṇa bhavanti || tasmād gṛhītagarbbhāṇām ārttavaṃ na tu dṛśyate | tatas tad adhaḥpratihatagaty ūrddhvabhāgam upari copacīyamānam udare mucyate | śeṣaṃ corddhatarabhāgam āgatam payodharāv abhiprapadyete | tasmād garbbhiṇyaḥ pīnonnatapayodharā bhavanti || yakṛtplīhānau śoṇitajau | śoṇitaphenaprabhavaḥ phupphusaḥ śoṇitakiṭṭaprabhavaḥ | uṇḍukaḥ || bhavati cātra || asṛjaḥ śleṣmaṇaś cāpi yaḥ prasādaḥ paro mataḥ | taṃ pacyamānaṃ pittena vātaś cāpy anudhāvati || tato 'syāntrāṇi jāyante gude vastiś ca dehinaḥ | tatrāsya mathyamānasya dhāmyamānasya rugmavat || jantoḥ saṃjāyate jihvā yayā vedayate rasān || śoṇitakaphaprasādajaṃ hṛdayaṃ | yadāsrayā hi dhamanyaḥ prāṇavahās tadviśeṣeṇa cetanāsthānam uktaṃ || tasmim̐s tamasāvṛte sarvvaprāṇinaḥ svapanti || nidrān tu vaiṣṇavīṃ pāpmānam upadiśanti | sā svabhāvataḥ sarvvaprāṇino nispṛśati | tatra yadā saṃjñāvahāni srotānsi tamobhūyiṣṭhaḥ śleṣmā pratipadyate || tadā tāmasī nāma nidrā bhavaty anavabodhinī sā pralayakāle tamobhūyiṣṭhānām ahaḥsu ca niśāsu bhavati | rajobhūyiṣṭhānām animitta satvabhūyiṣṭhānām ardharātre kṣīṇaśleṣmaṇām anilavahulānām manobhighātāc ca vaikārikī || bhavanti cātra || hṛdayañ cetanāsthānaṃm uktaṃ suśruta dehinām | tamobhibhūte tasmiṃs tu nidrā viśati dehinaḥ || nidrāhetus tamaḥ sattvaṃ bodhane hetur ucyate | svabhāva eva vā hetur ggarīyān parikīrtyate || pūrvvadehānubhūtām̐s tu bhūtātmā svapiti prabhuḥ || rajoyuktena manasā gṛhṇīte rthāṃ śubhāśubhāṃ || karaṇānāṃ tu vaiguṇye tamasābhipravarttate | asvapann api bhūtātmā prasupta iti cocyate || sarvvarttuṣu ca divāsvapnam pratiṣiddho 'nyatra grīṣmāt | pratiṣiddheṣv api pratiṣiddho vāla vṛddha kṣatakṣīṇa madya pīta strīyāna vāhanādhva karmma pariśrāntānām | abhuktavatāṃ medomārutakapharasakṣīṇānāṃ muhūrttam praśaṃsanti | rātrāv api khalu jāgaritavatāṃ jāgaraṇakālārddhan divā svapet | vikṛtis tu divāsvapno nāma tatra svapatām adharmmaḥ sarvvadoṣaprakopaś ca tatprakopāt kāsaśvāsapratiśyāyaśirogauravāṅgamarddārocakāgnidaurvvalyāni bhavanti | rātrāv api khalu jāgaritavatān tannimittās ta eva doṣāḥ prādur bbhavanti || bhavanti cātra ślokāḥ || tasmān na jāgṛyād rātrau divāsvapnañ ca varjjayet | jñātvā doṣakarāv etau vudhaḥ svapnamitaś caret || tathā hy arogaḥ sumanā valavarṇṇānvitā bhṛśaṃ | nātisthūlakṛṣaḥ śrīmān naro jīvet samāśataṃ || mūrcchā pittatamaḥprāyā rajaḥpittānilād bhramaḥ | tamovātakaphā tandrā nidrā śleṣmatamodbhavā || nidrānāśo nilāt pittāt manastāpāt kṣayād api | abhighātāc ca bhavati pratyanīkaiḥ sa śāmyati || nidrātiyoge vamanaṃ hitaṃ saṃśodhanāni ca | laṃghanaṃ raktamokṣaś ca manovyākulanāni ca || kaphamedoviṣārttānāṃ rātrau jāgaraṇaṃ hitam | divāsvapnaś ca tṛṭchūlahikkājīrṇṇātisāriṇāṃ || indriyārtheṣv asamvittir jjṛmbhanaṃ gauravaṃ klamaḥ | nidrārttasyaiva yasyeha tasya tandrā vinirddiśet || garbbhasya khalu rasaguṇanimittātmāt mātur āhāranimittāc ca parivṛddhir bbhavati || bhavati cātra || dṛṣṭiś ca romakūpāś ca varddhante na kadācana | dhruvāṇy etāni marttyānām iti dhanvantarer mmataṃ || śarīre kṣīyamāṇe pi varddhate dvāv imau sadā | svabhāvam prakṛtiṅ kṛtvā nakhakeśāv iti sthitiḥ || tisraḥ prakṛtayo bhavanti vātapittakaphanimittāḥ || bhavati cātra śuklaśoṇitasaṃyoge yo doṣas tūtkaṭo bhavet | prakṛtir jjāyate tena tāsāṃ me lakṣaṇaṃ śṛṇu || tatra vāta prakṛti jāgarūkaḥ śītadveṣī durbbhagasteno nāryo mastaro gāndharvvaḥ | sphuṭitacaraṇau rūkṣālpakeśasmaśruḥ kaṭhinakrodhī dantakhādī alpavalo 'lpāyuś ca bhavati || bhavati cātra || adhṛtir adṛḍhāsauhṛdayaḥ kṛtaghnaḥ kṛṣaparuṣo dhamanītataḥ pralāpī | drutagatir aṭano navasthitātmā nabhasi ca gacchati saṃbhrameṇa suptaḥ || avyavasthitamatiś calacitto mandadantadhanasañcayamitraḥ || kiñ cid eva vilapaty anivaddhaṃ mārutaprakṛtir eṣa manuṣyaḥ || pittaprakṛtis tu svedanaḥ śītasaho durggandhī pītaḥ kālo vā śithilāṅgas tāmranakhanayanatālujihvauṣṭhapādapāṇitalo durbbhago valīpalito sṛṣṭo vahubhug uṣṇadveṣī kṣiprakrodhaprasādaśīlo madhyamāyuś ca bhavati || bhavati cātra || medhāvī nipuṇamatir nnigṛhyavaktā tejasvī samitiṣu durnnivāravīryaḥ | suptaḥ saṃ kanakapalāśakarṇṇikārāṃ saṃpaśyed api ca hutāśavidyudulkāṃ || na bhayāt praṇamet praṇateṣu mṛduḥ praṇateṣu ca sāṃtvanadānaruciḥ | bhavatīha sadā vyathitāsyagatiḥ sa bhaved iha pittakṛtaprakṛtiḥ || śleṣmaprakṛtis tu durvvedīsvaranistriṃśārddrāriṣṭakaśarakāṇḍānām anyatamavarṇaḥ subhagaḥ priyadarśano madhurapriyaḥ | kṛtajño dhṛtimān sahiṣṇur alolupo valavāṃś ciragrāhī dṛḍhavairo dīrghāyuś ca bhavati || snighdāṅgaḥ sthirasuvibhaktacārugātro lakṣmīvān jaladamṛdaṅgasiṃhaghoṣaḥ | suptaḥ san sakamalahaṃsacakravākān sampaśyed api ca jalāśrayān manojñāṃ || dṛḍhaśāstramatiḥ sthiramitrama miḥ naḥ parigaṇya cirāc ca dadāti vahuḥ pariniṣṭatavākyapadaḥ satataṃ gurumānakaraś ca kaphaprakṛtiḥ || dṛśyate prakṛtau rūpaṃ yadā doṣadvayasya tu || saṃsarggan tam vijānīyāt saṃsarggas trividhaś ca yaḥ || prakopo vānyatobhāvo kṣayo vā nopajāyate | prakṛtīnāṃ svabhāvena jñāyante tu gatāyuṣaḥ || viṣajāto yathā kīṭo viṣeṇa na vipadyate | tadvat prakṛtibhir ddehas tajjātatvān na vādhate || prakṛtir iha narāṇāṃ bhautikī kecid āhuḥ pavanadahanatoyaiḥ kīrttitās sas tu tisraḥ | sthiravipulaśarīraḥ pārthivaś cet kṣamāvān śucir atha cirajīvī nābhasaḥ khair mmahadbhiḥ || śaucam āstikyam ābhyāso vedeṣu gurupūjanaṃ | priyātithitvam ijyā ca vrahmakāyasya lakṣaṇam || sauryam ājñā mahābhāgyaṃ satataṃ śāstravuddhitā | bhṛtyānāṃ bharaṇañ caiva māhendraṃ kāyalakṣaṇaṃ || sahiṣṇutatā śītasevā paiṅgākhyaṃ hari keśatā | priyodakatvañ ca tathā vāruṇaṅ kāyalakṣaṇaṃ || madhyasthatā sahiṣṇutvam arthasyāgamasañcayau | mahāprasavaśaktiś ca kauveraṃ kāyalakṣaṇam || gandhamālyapriyatvañ ca nṛtyavāditrakāmatā | vihāraśīlatā caiva gāndharvvaṅ kāyalakṣaṇam || prāptakārī dṛḍhotthāno dhṛtimān smṛtimāñ chuciḥ | rāgadveṣabhayājñānair vvirjjito yāmyasatvavān || vrahmacaryavratajapaṃ homādhyayanasevinaṃ | jñānavijñānasampannam ṛṣisatvaṃ vidur naraṃ || saptaite sātvikāḥ kāyā rajasās tu nivodha me | aiśvaryavantaṃ raudrañ ca śūraṃ caṇḍam asūyakaṃ | ekāśinaṃ tv aupadhikam āsuraṃ satvam īdṛśaṃ || ekāntagrāhitā raudryam asūyādharmmavākyatā | bhṛśam ātmastavaś cāpi rākṣasaṃ kāyalakṣaṇaṃ || utsṛṣṭācāratā raukṣṇyaṃ sāhasapriyatā tathā || strīlaulupatvaṃ nairllajjyaṃ paiśāco guṇasaṃgrahaḥ || tīkṣṇam āyāsavakulaṃ krodhanaṃ satvabhīrukaṃ | vihārāhāra capalaṃ sarppasatvam vidur nnaraṃ || asamvibhāgam alasan duḥśīlamasūcakam | laulupañ cāpy adātāraṃ pretasatvam vidur nnaram || pravuddhakāmāmasevī vā jasrāsāhāra eva ca | amarṣaṇo navasthānaḥ śākunaṃ satvam ucyate || ṣaḍ ete rājasāḥ kāyāḥs tāmasās tu nivodha me || durmmedhastvaṃ mandatā ca svapna maithunanity atā | nirākaṣṇutā śūcā vijñeyāḥ pāśavā guṇāḥ || anavasthitatā maurkhyaṃ bhīrutvaṃ toyakāmatā || parasparābhimarṣaś ca matsyasarvvātmakā guṇāḥ || satvavudhāṅgahīnaḥ syād āhāre kevale rataḥ | priyārthakāmarahitaḥ satva vānaspate sthitaḥ naraḥ || ity ete trividhāḥ kāyāḥ proktā vairājasādayaḥ | vijñāya kāyaprakṛtim anurūpāṃ kriyāṃ cared iti || iti śārīraṃ caturtho dhyāyaḥ ||

athātaḥ śarīravyākaraṇaṃ śārītam vyākhyāsyāmaḥ || śukraśoṇitaṅ garbhāsa ya stham āmaprakṛtivikārasammūrcchito garbha ity ucyate || tad acetanāvasthitam vāyur vvibhajate teja enam pacati | āpaḥ kledayati | pṛthivī saṃhanti | ākāśam vivarddhayati | evam vivarddhitaḥ sa yadā hastapādajihvāghrāṇavadanakarṇṇādibhir upetas tadā śarīram iti saṃjñāṃ labhate | tac ca ṣaḍ aṅgaṃ śākhāś catvāraḥ | madhyaṃ ṣaṣṭhaṃ śira iti || ataḥ param pratyaṅgāni vakṣyante | mastakodarapṛṣṭhanābhilalāṭanāsācivukagrīvā ity ete ekaikāḥ || karṇṇanetrabhrū vā ca sagaṇḍakakṣastanavaṃkṣyaṇavṛṣaṇapārśvasphikjānukurpparavāhuprabhṛtayo dve dve viṃśatir aṅgulyaḥ srotānsi vakṣyante || ity etat pratyaṅgavibhāgam uktaṃ tvayābhihitāḥ kalā dhātavo maladharoś ca || āsayās tu vātapittaśleṣmāmapakvāgnisūtrāṇāṃ sapta | strīṇāṃ garbhāsayoṣṭama iti | sārddhatrivyāyāmānyantrāṇi puṃṣāṃ strīṇām arddhavyāyāmahīnāni | śravaṇanayanavadanaghrāṇagudameḍhrāṇi nava srotānsi narāṇām vahir mmukhāni | tāny eva strīṇām aparāṇi ca trīṇi | dve stanayor aparam adhastād raktavāhi ca | ṣoḍaśa kaṇḍarās tāsāñ catasraḥ pādayos tāvanta eva hastagrīvāpṛṣṭheṣu | tatra hastapādagatānāṅ kaṇḍarāṇāṃ nava nava prarohā grīvāhṛdayanivandhanīnām meḍhraśoṇipṛṣṭhanivandhanīnāmadhogatānām nita mvam ūruvandhotkapiṇdīnāñ ca māṃsasirāsnā yvasthidhamannījālāni praty ekaṃ catvāri tāni maṇivandhanagulphasaṃśritāni | yair vagākṣitam idaṃ śarītaṃ | ṣaṭ kūrccās te hastapādagrīvāmeḍhreṣu | mahatyo mānsarajjavals catasraḥ peśīnivandhanārtham pṛṣṭhavaṃśam ubhayato dve vāhye abhyantare ca dve | sapta sīmanyastatra vibhaktāḥ śirasi pañca jihvāśepasorekaikās tāḥ parihartavyāḥ śastreṇa | caturddaśās saṃhatās teṣāṃ trayo gulphajānuvaṃkṣaṇeṣu | etenetarasakthi vāhu ca vyākhyā tau | trikaśirasorekaikaḥ | caturddaśaiva sīmantāḥ | yair mmuktaḥ saṃhātās te khalv akadaśaikeṣāṃ | triṇi ṣaṣṭyā śatāny asthām iti || vedavādino pabhāṣante | śalyatantreṣu trīṇy ava śatāni | teṣāṃ saviṃśaty sthiśataṃ śākhāsu | saptadaśottaraṃ śataṃ śroṇīpārśvapṛṣṭhoras su | grīvāyāṃ praty ūrddvan triṣaṣṭhir | ekaikasyāṃ pādāṅgulyāṃ trīṇi triṇi tāni pañcadaśa talakūrccagulphasaṃśritāni | daśa pārṣṇyām ekaṃ jaṃghāyāṃ dve jānuny ekam ekam ūrūbhyāṃ | triṃśad evam ekasmin sakthini bhavanti | etena itarasakthi vāhu vyākhyātau || śroṇyām pañca | teṣāṃ gudabhaganitamveṣu catvāri trikasaṃśritam ekaṃ pārśve ṣaṭtriṃśad ekasmin tāvantyeva dvitīye | pṛṣṭhe dvātriṃśad evāṣṭhāvurasi | dve akṣakasaṃjñe grīvāyāṃ nava kaṇṭanāḍyāṃ catvāti | dve hanusaṃjñe dantā triṃśan nāsāyān trīṇy ekatāluni gaṇḍakarṇṇaśaṃkheṣv ekaikaṃ ṣaṭ chirasīti | tān etān asthīni paṃcavidhāni bhavanti || tad yathā || kapālarūcakataruṇavalayanalakasaṃjñāni bhavanti | teṣāṃ jānurpparanitamvāḥ sagaṇḍutālumadhyaśiraḥ su kapālāni | daśanās tu rucakāḥ | ghrāṇakaṇṭhakarṇṇākṣikūṭeṣu taruṇāni | pādahastagrīvāpṛṣṭheṣu valayāni | bhavati cātra || yathā hi sāro vṛkṣasya tiṣṭhaty abhyantarāśritaḥ | evam asthīni jantūnāṃ śarīran dhriyate tu taiḥ || tasmāc ciravinaṣṭe pi tvagmāṃse tu śarīriṇāṃ | asthīni na viśyanti sāroṣa vidhīyate || māṃsāny atra nivaddhāni sirābhiḥ snāyubhis tathā | asthīny ālambanaṃ kṛtvā na śīryanti patanti vā || sandhayo dvividhāś ceṣṭāvantaḥ sthirāś ca | saṃkhyātās tu dve śate daśottare teṣāṃ śākhā aṣṭaṣaṣṭir ekonaṣaṣṭiḥ koṣṭhe grīvā yāṃty urddhan tryāśītiḥ | ekaikasyān tu pādāṅgulyāṃ trayas trayaḥ | dvāvaṅguṣṭhe te caturddaśagulphajānuvaṃkṣyaṇeṣṭhekaikaḥ saptadaśaikasmin sakthini bhavanti | etena itarasakthi vāhu ca vyākhyātau || trayaḥ kaṭīkapāleṣu caturvviṃśatiḥ pṛṣṭhavaṃśe | tāvantya eva pārśvayoḥ | aṣṭāvūrasi | tāvantya eva grīvāyān tu yaḥ kaṇṭhanāṇḍyāṃ hṛdayaklomāsa nāḍīṣv aṣṭādaśatāsvevanivaddhā | dantaparimāṇā dantamūleṣv ekaikaḥ | kākalake nāsāyāñ caikkekaḥ | dvau dvauva rtmmamaṇḍala yor nnetrāśritau | gaṇḍakarṇṇaśaṃkheṣv ekaikaḥ | dvau hanusaṃdhī dvāvupariṣṭād bhuvau śaṃkhayoś ca pañca śiraḥ kapāleṣv eko mūrddhri | ta ete saṃdhayoṣṭavidhā bhavanti | tad yathā | korodūkhalasāmudgaprataratūnasīvanī vāyasatuṇḍamaṇḍalaśaṃkhāvartāḥ | teṣām aṅgulimaṇivandhagulphajānukūrppareṣu korāḥ saṃdhayaḥ | kakṣavaṃkṣaṇadaśaneṣū dūkhalasaṃjñā | aṃsam pīṭhagudabhaganitamveṣu sāmudrāḥ | grīvāpṛṣṭhavaṃśeṣu pratarāḥ | śiraḥ kaṭīkapāleṣu tūna sīvanī saṃjñāḥ | hanvorūbhaya ta stu vāyasa tuṇḍāḥ | kaṇṭhahṛdayanetravartmmaklomanāḍīṣu maṇḍalasaṃjñāḥ | srotaśṛṃgāṭakeṣu śaṃkhāvartāḥ || teṣāṃ nāmabhir evākṛtayaḥ prāyeṇa vyākhyātāḥ || bhavati cātra || asnthāṃ tu saṃdhayo hyete kevalaṃ parikīrtitāḥ | peśīsnāyusirāṇān tu sandhisaṃkhyān na vidyate || nava snāyu śatāni bhavanti | teṣāṃ śākhāsu ṣaṭ chatāni | dve śate triṃśac ca koṣṭhe grīvāyāṃ pratyurdhvaṃ saptatiḥ | ekaikasyāṃ pādāṅgulyāṃ ṣaṭnicitāni triṃśac ca | tāvatya eva talakūrccagulpheṣu tāvatya eva jaṃghāyāṃ | daśa jānuni | catvāriṃśadūrvvāḥ | daśavaṃkṣaṇe | pañcāśat chatam evam ekasmin sakchini bhavanti | etena itarasakthi vahū vyākhyātau || ṣaṣṭiḥ kaṭyāḥ pṛṣṭhetvaśītiḥ | pārśvayoḥ | ṣaṣṭiḥ | urasi triṃśat | ṣaṭtriṃśad grīvāyāṃ | mūrddhri catustriṃśat | eva navasnāyuśatāni vyākhyātāni bhavanti | mahāsnāyuṣu kaṇḍareti saṃjñā || bhavanti cātra ślokāḥ || caturvvidhāni snāyūni nāsateṣān nivodha me | pratānavanti vṛtāni susirāṇi pṛthūni ca || pratānavanti śākhāsu sarvvasaṃdhi ṣu cāpy atha | vṛtāni kaṇḍarāḥ sarvvā vijñeyā kuśalair iha || āmapakvāsayānteṣu susirāṇi pṛthūni ca | pārśvorasi tathā pṛṣṭhe pṛthūlāni śiras ca || naur yathā phalakās tīrṇṇā vandhanair vahubhir yutāḥ | bhaved bhārasahā dṛḍhasandhisamāśritāḥ || eva, eva śarīresmin yāvantaḥ sandhayaḥ smṛtāḥ | snāyubhir vvahubhir vvaddāstena bhārasahāḥ smṛtā || na hy asthīni na peśyo vā na sirā na ca sandhayaḥ | vyāpāditās tathā hanyur yathā snāyūni dehināṃ || yaḥ snāyūni vijānāni sa vāhyāsyantarāṇi ca | sa guḍhāṃ śalyamudvarntun dehāc chakroti mānavaḥ || pañca peśīśatāni tāsāñ ca catvāt iṃ śaktāni śākhāsu | koṣṭhe ṣaṣṭhiḥ | grīvāyāṃ pratyurddhañ catvāriṃśat || ekaikasyāṃ pādāṃgulyāṃ tisrastisrastāḥ pañcadaśa | pañcadaśaprapede pādopari | kurccasanniviṣṭās tāvantya eva | daśagulphatalayoḥ | gulphajānvontare viṃśatiḥ | pañca jānini | ūrvoddaśa | vaṃkṣaṇe daśa | śatam ekasmin sakthini bhavantye na itara sakthi vāhū ca vyākhyātau || ekā meḍhra sevanyāṃ | apare dve vṛṣaśayoḥ | gude tisraḥ | sphicoś ca pañca pañca | dve vasti śirasi | saptodare nābhyām ekā | pṛṣṭhorddhasaṃniviṣṭāḥ pañca pañca dīrghāḥ | pārśvayor daśa | dve vakṣasi | akṣakāṃ saṃpratisamaṃtāt sapta | dve hṛdyāmāsaye | ekābhyantarataḥ koṣṭhe | grīvāyāñ ca tasra | ekaikā galakālayoḥ | dve tāluni | jihvāyāṃ ṣaṭ | dve joṣṭhayoḥ | nāsāyāṃ dve | gaṇḍayoś catasraś catasraḥ | netrayor ddha | karṇṇayor dve | catasro lalāṭe | ṣaṭ chirasīti | tāny etāni pañca peśīśatāni puṃsām bhavanti | strīṇāñ caturddaśāsyadhikā | daśa tāsāṃ stanayor ekaikasmin pañca pañca | yauvane tāsāṃ parivṛddhir bhavati | apatyapathe catasras tāsāṃ dve prasṛte bhyantarataḥ | dve mukhāsrite ca | vṛtte dve garbbham āśritāḥ | tisraḥ śukrār bhavaḥ praveśinyaḥ | tisra eva garbbhaśayyāyāṃ yatra garbbhas tiṣṭhati | marmmasirādhamanīsrotasām anyatra vibhāgaḥ | bhavati cātra || śaṃkhanābhyo kṛtir yonis trir āvartā prakīrtitā | tasyās tṛtīye tv āvarte garbbhaśayyā pratiṣṭhitā || yathā rohitamatsyasya mukham bhavati rūpataḥ | tat sthānañ ca yathārūpaṃ garbbhaśayyām vidurvvudhā || ābhugno 'bhimukhaḥ śete garbbho garbbhāśaye striyāḥ | sa yoniṃ yāti śirasā svabhāvāt prasavam prati || tvakparyantasya dehasya yo yam aṅgaviniścayaḥ | śalyajñānād ṛte nāyaṃ varṇyate ṅgeṣu keṣucit || tasmān nisaṃśayaṃ jñānaṃ śalya harttābhivāñcchatā | dhāvayitvā mṛtaṃ samyag draṣṭavyo ṅgaviniścayaḥ || pratyakṣato hi yad dṛṣṭaṃ śāstradṛṣṭañ ca yad bhavet | samāgatan tad ubhayam bhūyo jñānam vivarddhayet || tasmāt samastagātram avihatam adīrghavyādhipīḍitaṃ puruṣam apahṛtyāpagāyāṃ | vivaddhaṃ muñja valvajaiḥ pañjarastham aprakāśe deśe kothayet | samyak prakuthitañ coddhṛtyāyatadehaṃ kṛtvośīra tṛṇa veṇu kurccādīnām anyatamena śanaiḥ śanair eva ghṛṣya tvagādīn sarvvān eva vāhyābhyantarān aṅgapratyaṅgaviśeṣān yathoktān upalakṣayec cakṣuṣā || ślokau || na śakyañ cakṣuṣā draṣṭuṃ saukṣmyāsaukṣmyataraṃ viduḥ | dṛśyate jñānacakṣurbhis tapaścakṣurbbhir eva3 vā | śarīre cāpi śāstre ca dṛṣṭārthas tu viśāradaḥ | dṛṣṭaśrutābhyāṃ sandehaṃ vyapohyārabhate kriyām iti || ||

iti śārīre pañcamo dhyāyaḥ || ||

athātaḥ pratyekamarmmanirddeśaṃ śārīram vyākhyāsyāmaḥ || saptottaram marmmaśataṃ | tāni pañcavidhāni marmmāṇi bhavanti | tad yathā | mānsamarmmāṇi | śirāmarmmāṇi | snāyumarmmāṇi, asthimarmmāṇi | sandhimarmmāṇi | na khalu māṃsaśirāsnāyvasthisandhivyatirekeṇānyāni marmmāṇi bhavanti || yasmān nopalabhyante || tatraikādaśa māṃsamarmmāṇi, ekacatvāriṃśac chirāmarmmāṇi | saptāviṃśatiḥ snāyumarmmāṇi | aṣṭāv asthimarmmāṇi | viṃśatiḥ sandhimarmmāṇīti | tad etat saptottaram marmmaśataṃ || eṣām ekādaśaikasmin sakthini bhavanti | etenetarasakthi bāhū ca vyākhyātau ca bhavataḥ | udarorasor ddvādaśa | caturddaśa pṛṣṭhe | grīvāyām pratyūrddhvaṃ saptatriṃśat | tatra sakthimarmmāṇi | kṣipratalahṛdayakurccakūrccaśirogulphendrabastijānuścāṇyūrvīlohitākṣāṇi ciṭipañ ceti | etenetaratsakthibāhū vyākhyātau || udarorasos tu marmmāṇy anuvyākhyāsyāmaḥ || gudo bastir nnābhir hṛdayaṃ stanamūle stanalohite apālāye apastambhe ceti || pṛṣṭhamarmmāṇi tu | kaṭīkataruṇa | kukundaranitambe pārśvasandhibṛhatyaṃsaphalakrakanyāsau ceti || jatruṇa ūrdhvaṃ catasro dhamanyo ṣṭau mātṛkāḥ | dve kṛkāṭike | dve vidhure | dve phaṇe | dvāv apāṅgau | dvau śaṃkhau | dvāv āvartau | dvāv utkṣepau | ekā sthapaṇī | pañca sīmantāḥ | catvāri śṛṃgāṭakānyeko 'dhipatir iti || tatra talahṛdayendrabastigudastanarohitāni | māṃsamarmmāṇi | nīladhamanī | mātṛkā sirāḥ śṛṅgāṭakāpāṅgasthapaṇīphaṇastanamūlāpalāpāpastambhahṛdayanābhipārśvasandhibṛhatīlohitākṣāṇy ūrvvyās sirāmarmmāṇi | ciṭipakakṣadharakurccaḥ | kūrccaśirobastikukṣāṇy ansavidhurotkṣepāḥ snāyumarmmāṇi | kaṭīkataruṇanitambānsaphalakaśaṃkhāny asthimarmmāṇi | jānukurpparasīmantā'dhipatigulphamaṇibandhakukundarāvarttakṛkāṭikāś ceti | sandhimarmmāṇi || tāny etāni marmmāṇi pañcavidhāni bhavanti || tad yathā | sadyaḥprāṇaharāṇi | kālāntaraprāṇaharāṇi | viśalyaghnāni | vaikalyakarāṇi | rujākarāṇi ceti || tatra sadyaḥprāṇaharāṇy ekonaviṃśatiḥ | kālāntaraprāṇaharāṇi trayastriṃśat | viśalyaghnāni trīṇi | catuścatvāriṃśad vaikalyakarāṇi | aṣṭau rujākarāṇīti || bhavanti cātra || śṛṅgāṭakāny adhipatiḥ śaṃkhau kaṇṭhasirā gudaḥ | hṛdbasti saha vai nābhyāṃ ghnanti sadyo hatāni tu || vakṣomarmmāṇi sīmantās talaḥ kṣiprendrabastayaḥ | kaṭīkataruṇe sandhī pārśvajo bṛhatī ca ye || nitambāv iti caitāni kālāntaraharāṇi tu | utkṣepau sthapaṇī caiva, viśalyaghnāni nirddiśet || lohitākṣaś ca jānūrvvīkurccāciṭipakurpparā | kukundare kakṣadhare vidhure sakṛkāṭike || ansānsaphalakāpāṅge, nīle manye phaṇe tathā | vaikalyakaraṇāny āhu,r āvarttau dvau tathaiva ca || gulphau dvau maṇibandhau dvau dve dve kurccaśirāṃsi ca | rujākarāṇi jānīyād aṣṭāv etāni buddhimān || pañcoktāni vikalpāni marmmaṇāṃ karmmaṇām pṛthak || marmmāṇi nāma mānsasirāsnāyvasthisandhisannipātāḥ | teṣu svabhāvata eva prāṇās tiṣṭhanti | marmmasv abhihatās tām̐s tān bhāvān āpadyante || tatra sadyaḥprāṇaharāṇi | āgneyāni | agniguṇeṣu kṣīṇeṣv āyuḥ kṣapayanti | viśalyaghnāni vāyavīyāni śastramukhāvaruddho yāvad atra vāyus tiṣṭhati tāvaj jīvaty uddhṛtamātre tu śalye | marmmasthānāśrayo vāyur nniṣkrāmati | tasmāt saśalyo jīvaty uddhṛtaśalyo mriyate | vaikalyakarāṇi | saumyāni | somo hi śaityāt sthiratvāc ca prāṇāvalambanaṃ karoti | rujākarāṇi | agnimārutabhūyiṣṭhāni viśeṣeṇa tau rujākarau pāñcabhautikīñ ca rujām apare tv āhuḥ | kecid āhur mmānsādīnāṃ samastānāṃ samṛddhānāñ ca samavāyāt | sadyaḥprāṇaharāṇi | ekahīnānām alpānāñ ca samavāyakālāntaraprāṇaharāṇi | dvihīnānāṃ tu viśalyaprāṇaharāṇi | trihīnānān tu vaiguṇyakarāṇi | ekasminn eva rujākarāṇīti || yataś caivamato sthimarmmasv api kṣateṣu śoṇitāgamanam bhavati || bhavanti cātra || caturvvidhā yās tu sirāḥ śarīre, prāyeṇa tā marmmasu sanniviṣṭāḥ | snāyvasthimāṃsāni tathaiva sandhī, santarppayantyopacayanti dehaṃ || tataḥ kṣate marmmaṇi tāḥ pravṛddhaḥ samantato vāyur abhistṛṇoti | vivarddhamānas tu sa mātariśvā rujāḥ sutīvrāḥ pratanoti kāye || rujābhibhūtas tu tataḥ śarīraṃ, pralīyate naśyati cāsya saṃjñā || etena śeṣaṃ vyākhyātaṃ || tatra sadyaḥprāṇaharam ante viddhaṃ kālāntareṇa mārayati | kālāntaraprāṇaharam ante viddhaṃ vaikalyakaram bhavati | viśalyaghnañ ca vaikalyakaram bhavati | nānātīvrāṃ vedanāñ janayaṃti | vaikalyakaraṃ kālāntareṇa kleśayati | rujām vā karoti rujākaraṃ cālpavedanāṃ karoti | tatra sadyaḥprāṇaharāṇi saptarātrābhyantarāt mārayanti | kālāntaraprāṇaharāṇi pakṣāt māsād vā | teṣv api tu kṣiprāṇi kadācid āśu mārayanti | viśalyaprāṇaharāṇi vaikalyakarāṇi ca kadācid atyabhihatāni mārayanti || uta ūrdhvaṃ sakthimarmmāṇy anuvyākhyāsyāmaḥ || tatra pādasyāṅguṣṭhāṅgulyor mmadhye kṣipraṃ nāma marma madhyamāṅgulim anupūrvveṇa madhye pādatalasya talahṛdayan nāma marmma tatra rujāyām maraṇaṃ | kṣipratyopariṣṭād aṅgulam ubhayataḥ kūrcco nāma | ṇavepane bhavataḥ | gulphasandher adhaḥ kūrccaśiro nāma tatra rujāśophau bhavataḥ || pādajaṃghayos tu sandhāne gulpho nāma tatra rukastabdhasakthitā ca kuṇatā vā pārṣṇim prati jaṃghāmadhye ndrabastir nnāma marmma tatra śoṇitakṣaye maraṇaṃ | jaṃghorvvoḥ sandhāne jānur nnāma tatra khañjatā bhavati | jānos tryaṅgulād ūrddhvaṇir nnāma marmma tatra śophābhivṛddhiḥ stabdhasakthitā ca | ūrūmadhye ūrvvī nāma marmma tatra śoṇitakṣayāt sakthiśoṣaḥ | ūrvvyās tūrdhvam adho vaṃkṣaṇasale lohitākṣan nāma marmma tatra śoṇitakṣaye maraṇam pakṣāghāto vā || vaṃkṣaṇavṛṣaṇayor antare ciṭipan nāma marmma tatra sāṃḍhyam alpaśukratā ca bhavati | evam etāny ekādaśa sakthimarmmāṇi vyākhyātāni | etenetarasakthi bāhū ca vyākhyātāḥ || viśeṣatas tu yāni sakthini gulphajānuvaṃkṣaṇaciṭipāni tāni bāhau maṇibandhakurpparakakṣadharāṇi bhavanti | yathā ca pādajaṃghayos tu sandhau gulphau nāma marmma | evaṃ hastatalaprakoṣṭhayoḥ sandhau maṇibandho nāma marmma | yathā ca jaṃghorvvoḥ sandhāne jānu nāma marmma | evaṃ prahastabāhvoḥ sandhāne kurpparo nāma marmma | yathā ca vaṃkṣaṇavṛṣaṇayor mmadhye ciṭipan nāma marmma | evam akṣakakṣayor mmadhye kakṣadharo nāma marmma | tatra viddheṣu ta evopadravā bhavanti | viśeṣatas tu maṇibandhe kuṇṭhatā | kurppare pakṣāghātaḥ | kuṇitvaṃ kakṣadhare ceti | evam etāni catuścatvāriṃśac chākhāmarmmāṇi vyākhyātāni bhavanti || ata ūrdhvam udarorasor dvādaśa marmmāṇy anuvyākhyāsyāmaḥ || tatra vātavarcconiḥsaraṇī sthūlāntrapratibaddham mahāgudo nāma | tatra sadyo maraṇaṃ | alpamāṃsaśoṇitam abhyantarataḥ | kaṭyāmutrāsayayor bbastir nnāma marmma | tatrāpi sadyo maraṇaṃ | aśmarīvraṇād ṛte tatrāpy ubhayato viddhe maraṇam ekato bhinne mūtrāsrāvī vraṇo bhavati | sa tu yatnenopakrānto rohati || pakvāmāśayayor mmadhye śirāprabhāvo nābhir nnāma marmma tatrāpi sadyo maraṇaṃ | stanayor mmadhyam adhiṣṭhāyorasi āmāśayadvāraṃ sattvarajastamasām adhiṣṭhānaṃ hṛdayan nāma marmma tatrāpi sadyo maraṇaṃ | stanayor adhastād dvyaṅgulam ubhayataḥ stanamūle nāma marmaṇī | tatra kaphapūrṇṇakoṣṭhatayā maraṇaṃ | stanacūcukayor ūrddhve stanarohite nāma marmmaṇī | tatra raktapūrṇṇakoṣṭhatayā kāsaśvāsābhyām maraṇaṃ | aṃsakūṭayor adhastāt pārśvayor uparibhāgayor apālāpau nāma marmmaṇī | tatra pūyabhāvam āpanne śoṇite maraṇaṃ | ubhayatroraso nāḍyo vātavahe | apastambhau nāma marmmaṇī | tatra vātapūrṇṇakoṣṭhatayā kāsaśvāsābhyām maraṇaṃ | evam etāny udarorasor dvādaśa marmmāṇi vyākhyātā2ni || ata ūrdhvam pṛṣṭhamarmmāṇy anuvyākhyāsyāmaḥ || tatra pṛṣṭhavaṃśam ubhayataḥ pratiśroṇīkarṇṇāvasthinī kaṭīkataruṇe nāma marmmaṇī | tatra śoṇitakṣayāt pāṇḍuvivarṇṇo hīnarūpo vā maraṇaṃ | pārśvayor jjaghanabahirbbhāge pṛṣṭhavaṃśam ubhayato kukundare nāma marmmaṇī | tatra sparśājñānam adhaḥkāye daurbbalyaṃ ceṣṭānāśaś ca bhavati | śroṇīkarṇṇayor upary āmāśayāc chādane pārśvāntaraprativahe nitambe nāma marmmaṇī | tatrādhaḥkāyaśoṣo daurbbalyam maraṇañ ca | adhaḥpārśvāntarapratibaddhe jaghanapārśvamadhye tiryag ūrddhvajaghanāt pārśvasandhī nāma marmmaṇī | tatra śoṇitapūrṇṇakoṣṭhatayā mriyate | stanamūlādṛjūbhayataḥ pṛṣṭhavaṃśasya bṛhatī nāma marmmaṇī | tatra śoṇitātipravṛttinimittair upadravair mmriyate | pṛṣṭhopari pṛṣṭhavaṃśam ubhayataḥ | trikasaṃbandhe 'nsaphale nāma marmmaṇī | tatra bāhuś cāpaśoṣaḥ | bāhuśīrṣagrīvāmadhye 'ṃśapīṭhaskandhasaṃdhāne krakanyāse nāma marmmaṇī | tatra tabdhabāhur bbhagnapṛṣṭhatā vā bhavati | evam etāni caturddaśa pṛṣṭhamarmmāṇi vyākhyātāni || ata ūrddhvam ūrddhajatrugatāni marmmāṇy anuvyākhyāsyāmaḥ || tatra kaṇṭhanāḍīm ubhayataś catasro dhamanyo vyatyāsena | dve nīle dve ca manye nāma marmmaṇī | tatra mūkatā svaravaikṛtya maraṇam arasagrāhitā ca bhavati | grīvāyām ubhayataś catasraḥ sirāmātṛkā nāma marmmaṇī | tatra sadyo maraṇaṃ | śirogrīvayoḥ kṛkāṭikā nāma marmmaṇī | tatra calaśīrṣatā maraṇam vā | karṇṇapṛṣṭhato 'dhaḥsaṃsrite vidhure nāma marmmaṇī | tatra bādhiryaṃ | ghrāṇamārggam ubhayataḥ srotomārggapratibaddhe 'bhyantarataḥ phaṇe nāma marmmaṇī | tatra gandhājñānam āpādayati | bhruvoḥ pucchāntayor adhaḥ | netrayor bbāhyataḥ | apāṅgau nāma marmmaṇī | tatrāndhyadṛṣṭyupaghāto vā | bhruvoḥ pucchayor upary anukarṇṇalalāṭo śaṃkhau nāma marmmaṇī | tatra sadyo maraṇaṃ | bhruvor antare upari nimnayor āvarttau nāma marmmaṇī | tatrāpy āndhyaṃ dṛṣṭyupaghāto vā | āvarttaśaṃkhayor upari keśānte utkṣepau nāma marmmaṇī | tatra saśalyaḥ pākāt patitaśalyo vā jīve noddhṛtaśalyaḥ | bhruvor mmadhye sthapaṇir nnāma marmma | tatrotkṣepavat pañca sandhayaḥ śirasi vibhaktāḥ sīmantā nāma marmmaṇī | tatrotmādacittanāsābhyāṃ maraṇaṃ | ghrāṇasrotrākṣisandhijihvātarppaṇīnāṃ sirāṇāṃ madhye śiraḥ srotaḥ sannipātas tāni catvāri śṛṅgāṭakāni marmmāṇi | tatrāpi sadyo maraṇaṃ | mastakābhyantaram upariṣṭāt sirāsandhisannipāto romāvarttaḥ so 'dhipatir nnāma marmma | tatrāpi sadyo maraṇaṃ | evam etāny ūrddhvajatrugatāni saptatriṃśad marmmāṇi vyākhyātāni bhavanti || bhavanti cātra ślokāḥ || ūrvvyaḥ śirānsi ciṭipe sahakakṣapārśve ekaikamaṅgulamitā stanamūlagulphāḥ | jñeyā dvir aṅgulamitā maṇibandhaṣaṣṭhā trīṇy eva jānuni paraṃ saha kurpparābhyāṃ || hṛdbastikurccagudanābhi vadanti mūrddhni catvāri pañca ca gale daśa yāni ca dve || tāni ścapāṇitalakuñcitasanmitāni, śeṣāṇy avaihi parivartti tato gulārddhaṃ || cchinneṣu pāṇicaraṇeṣu sirā mukhānāṃm ākuñcanāt khalu nṛṇām asṛg alpam eti | chinneṣu pāṇicaraṇeṣu bhavanty atas tu, nāleṣu vṛttamathiteṣu yathotpalāni || kṣipreṣu vatsatalajeṣu ca bhedadoṣāṅgacchatyasṛgbahurujañ ca karoti vāyuḥ | evaṃ vināśam upayānti hi tatra viddhā kiñjalkapatramathanād iva paṅkajāni || marmmāṇi śalyaviṣayādrdham udāharanti yasmād dhi marmmasu hatā na bhavanti marttyāḥ | jīvanti tatra yadi vaidyaguṇena ke cit te prāpnuvanti vikalatvam asaṃśayaṃ hi || sambhinnajarjjaritakoṣṭhaśiraḥkapālā jīvanti śastravihataiś ca śarīradeśaiḥ | chinnaiś ca sakthibhujapādakarair aśeṣaṃ yeṣān na marmmapatitā vividhāḥ prahārāḥ || agnīṣomānilāḥ sattvaṃ rajaś ca tama eva ca | prāyeṇa marmmasu nṛṇāṃ, santi bhūtātmanā saha || tasmāt marmmasv abhihatā na jīvanti śarīriṇaḥ | indriyārtheṣv asamvittir mmanobuddhiviparyayaḥ || rujaḥ sutīvrā vividhā bhavanty asuhate nare || hate kālāntare cāpi, dhruvo dhātukṣayo nṛṇāṃ || tato dhātukṣayāj jantur vvedanābhiś ca naśyati | hate vaikalyajanake, kevalaṃ vaidyanaipuṇāt || śarīrakṣayam āsādya vikalatvam avāpnuyāt | viśalyaghneṣu vijñeyo yo hetuḥ prāg udīritaḥ || rujākarāṇi marmmāṇi kṣatāni vividhā rujaḥ | kurvvanty ante ca vaikalyaṃ, kuvaidyavaśago yadi || chedabhedābhighātebhyo dahanād dāraṇāt tathā | upaghātam vijānīyāt marmmaṇāṃ tulyalakṣaṇaṃ || marmmābhighātas tu ca kaś cid asti yo 'lpātyayo vāpi niratyayo vā | prāyeṇa marmmasv abhitāḍitās tu, vaikalyam arcchanty atha vā mriyante || marmmāṇy adhiṣṭhāya hi ye vikārā mūrcchanti kāye vividhā narāṇām | prāyeṇa te kṛcchratamā bhavanti narasya yatnair api sādhyamānāḥ || || iti śārīre ṣaṣṭho 'dhyāyaḥ || 0 ||

athātaḥ sirāvarṇṇanavibhaktiṃ śārīram vyākhyāsyāmaḥ || sapta śirāśatāni bhavanti | yābhir idaṃ śarīram ārāma iva jalaharaṇībhiḥ | kedāra iva ca kulyābhir upasnihyate cākuñcanaprasāraṇābhir vviśeṣair ddrumapatrasevanīnām iva cāsām pratānām tāsāṃ khalu nābhimūlan tataḥ prasaranty urdhvam adhas tiryak ca || bhavati cātra || yāvantyas tu sirāḥ kāye sambhavanti śarīriṇaḥ | nābhyāṃ sarvvāṇi vaddhās tāḥ pratanvati samantataḥ || tāsāṃ khalu mūlasirāś catvāriśat tāsu daśavātavahāḥ | daśa pittavahāḥ | daśa śleṣmavahāḥ | daśa raktavahā iti | tāsāṃ khalu vātavahānāṃ sirāṇāṃ vātasthānaga tānām pañcasaptatiśataṃ bhavati | tāvanty eva pittavahāḥ pittasthāne | raktavahāś ca yakṛtplīhāḥ | kaphavahāś ca kaphasthāne | evam etāni sapta śirāśatāni bhavanti | tatra vātavahānām ekasmin sakthini pañcaviṃśatiḥ sirāḥ bhavanti | etenetarasakti vāhū ca vyākhyātau | koṣṭhe catustriṃśat tāsāṃ gudameḍhrasaṃśritāḥ śroṇyām aṣṭau dve dve pārśvayoḥ ṣaṭpṛṣṭhe tāvantya evodare daśa vakṣasi | jatruṇa ūrddhvam ekacatvāriṃśat tāsām aṣṭau jihvāyāṃ | nava nāsāyāṃ | dve grīvāyāṃ | hanvoś catasraḥ | netrayoḥ ṣaṭ lalāṭe tisraḥ karṇṇayoś catasraḥ | dve śaṃkhayoḥ | tisraḥ śirasītyevam etat pañcasaptatiśataṃ | vātavahānāṃ śirāṇāṃ vyākhyātaṃ | eṣa eva vibhāgaḥ śeṣāṇām evam etāni sapta śirāśatāni vyākhyātāni bhavanti | bhavanti cātra || yadā vāyur aduṣṭas tu sevate svavahāḥ sirāḥ | tadāstuvalavarṇṇaujaḥ prasīdec ca manas tathā || kriyānām apratighātam amohaṃ vuddhikarmmaṇāṃ | karoty anyān guṇām̐ś cāpi sirāḥ pavanasvaścaran || yadā tu kupito vāyuḥ stāḥ śirā pratipadyate | tadāsya rogā jāyante vividhā vātasambhavāḥ || yadā tvakupitam pittaṃ sevate svavahāḥ sirāḥ | avyāpannas tadāgnis tu samyak carati bhojanaṃ || bhrājiṣṇutām annarucim agner ddīptim arogatāṃ | karoty anyān guṇām̐ś cāpi pittam atmasirāś caran || yadā tu kupitam pittaṃ tāḥ sirāḥ pratipadyate | tadāsya rogā jāyante vividhā pittasambhavāḥ || yadā tv akupitaḥ śleṣmā svāḥ sirāḥ saṃprapadyate | āśayāḥ sandhayaś caiva varttantesya nirāmayāḥ || sneham aṅgeṣu sandhīnāṃ sthairyam valam adīnatāṃ | karoty anyān guṇām̐ś cāpi valāsa svasirāś caran || yadā tu kupitaḥ śleṣmā tāḥ sirāḥ pratipadyate | tadāsya rogā jāyante vividhāḥ śleṣmasambhavāḥ || yadā tv akupitaṃ raktaṃ sevate svavahāḥ sirāḥ | tadāsya samyag jānāti sparśānāṃ tu śubhāśubhaṃ || varṇṇaprasādanaṃ sthairyaṃ dhātūnāṃ puṣṭim eva ca | karoty anyān guṇām̐ś cāpi raktam ātmasirāś caran || yadā tu kupitaṃ raktaṃ tāḥ sirāḥ pratipadyate | tadāsya rogā jāyante vividhā raktasambhavāḥ || apraduṣṭāḥ śarīrāṇi dhārayanti rasair hitaiḥ | kalpante ca vikārāya praduṣṭā nātra saṃśayaḥ || na hi vātasirāḥ kaścit na pittaṃ kevalaṃ sirāḥ | śleṣmāṇañ ca vahanty etāḥ sarvvāḥ sarvvavahāḥ sirāḥ || praduṣṭānān tu doṣāṇāṃ mūrcchitānām pradhānatān | dhruvam unmārggagamanaṃ sarvvāḥ sarvvavahā hyataḥ || tatrāruṇā vātavahā nīlāḥ pittavahāḥ sirāḥ | asṛgvahāś ca rohiṇyo gauryaḥ śleṣmavahāḥ sirāḥ || ata ūrddhvaṃ pravakṣyāmi yās tv avadhyāḥ sirā nṛṇāṃ | śākhāsu ṣoḍaśā vyadhyāḥ koṣṭhe dvātriṃśad eva tu | jatrorūrddhvan tu pañcāśad avyadhyāḥ parikīrttitāḥ | vaikalyaṃ maraṇam vāśu vyadhyāt tāsāṃ dhruvam bhavet || tatra sirāḥ śatam ekasmin sakthini bhavanti | tāsāṃ jaladhārā tvekā tisraś cābhyantarataḥ | tatrorvvīsaṃjñe dve lohitākṣa saṃjñakā tās tv avyadhyāḥ | etenetarasakthi vāhū ca vyākhyātau | evam aśastrakṛtyāḥ ṣoḍaśaśākhāsu | śroṇyāṃ dvātriṃśat | tāsām aṣṭāvaśastrakṛtyāḥ | dve dve vaṃkṣaṇaciṭipayor evaṃ kaṭīkataruṇayoś ca | aṣṭāvaṣṭāv ekaikasmin pārśve tāsām ekaika ūrddhvage ubhayato dve pārśve sandhisaṃśrite ca pariharet | caturvviṃśatiḥ pṛṣṭhe pṛṣṭhavaṃśam ubhayataḥ | tāsāṃ vṛhatī saṃjñe ūrddhvagāminye dve pariharet | tāvantya evodare tāsāṃ meḍhropari romarājīm ubhayato dve dve pariharet | catvāriśaṃd vakṣasi tāsāṃ caturddaśāśastrakṛtyā hṛdi dve stanamūle saṃśrite tu dve dve pariharet | stanam ubhayataś catasraḥ pariharet | dve dve cāpālāpe stambheṣv ity e va dvātriṃśadaśastrakṛtyāḥ | śroṇī pṛṣṭhodaroraḥsu bhavanti catiḥṣaṣṭiśataṃ mūrddhani tāsāṃ viṃśatiḥ | śirodharāyāṃ tāsām aṣṭau catasraś ca marmmasaṃjñāḥ | dve kṛkāṭikayos tāvantya eva vidhurayoḥ hanvor ubhayato aṣṭāvaṣṭau tāsāṃ tu sandhinivaṃdhanyau dve dve pariharet | ṣaṭtriṃśaj jihvāyāṃ tāsām adhaḥ ṣoḍaśāśastrakṛtyā rasavāhinyaḥ | catuvviṃśatir nnāsāyāṃ tāsām aupanāsyāś catasraḥ parihare tāsām eva ca tāluny ekā ṣaṭtriṃśad ubhayor nnetrayoḥ | tāsām ekaikām apāṅgayoḥ pariharet | lalāṭe ṣaṣṭistāsāṃ keśāntānugatāś catasraḥ pariharet | āvarttayor ekaikāsthapaṇyāś caikā pariharttavyāḥ karṇṇayoḥ pañ ca pañca | tāsāṃ śabdavahām ekaikāṃ pariharet | śaṃkhayoś ca tāvantya eva tāsāṃ śaṃkhasandhigatām ekaikām pariharet | dvādaśamūrddhani tāsām utkṣepayoḥ | dve dve sīma manteṣv ekaikām adhipatau parihared iti || bhavanti cātra ślokāḥ || sirāśatānāṃ saptānāṃ śarīreṣu śarīriṇāṃ | aśastrakṛtyā navatis tathāṣṭau ca vinirddiśet | || spandinyau jaladhāriṇyau yāś ca marmma samāśritāḥ | avyadhyās tā vijānīyāt snāyusandhigatāśca yāḥ || vaikalpamaraṇañ cāpi vyadhādāsāṃ dhruvaṃ bhavet | vyāpnuyād vākhilaṃ dehaṃ nābhitaḥ prasṛtāḥ sirāḥ || pratānāḥ padminī kandā dvisādīnāṃ yathājalaṃ || iti śārīre saptamo dhyāyaḥ ||

athāto vyadhavidhiṃ śārīraṃ vyākhyāsyāmaḥ || tatra bālasthavirabhīrurūkṣakṣatakṣīṇamadyādhvastrīkarṣitānāsitavāntaviraktadantabastiklībagarbbhiṇīkāsaśvāsaśoṣapravṛddhajvarātīsārākṣepakapakṣāghātopavāsapīḍitānāṃ sirānavyadhyāḥ || kiṃ kāraṇameṣāṃ tu khalu vedhādindriyasaṃmohaḥ śoṣo vā bhavati | raktapittino raktātyayād vātakopo mṛtyurvvā | garbbhiṇyas tu garbbhaśoṣapatanahīnāṃgānāyuṣkatā vā garbbhasya || bhavati cātra || pratiṣiddhānāvaśekāṃ tu śeṣāṇām api dehināṃ | vyādhervvivṛddhir mṛtyurvvā sirāvedhena sambhavet || yāś cāvyadhyā dṛṣṭādṛṣṭāś cāyantritāyantritā notthitā iti || śoṇitamokṣasādhyāś ca vikārāḥ prāgabhihitāḥ | teṣv apakṣeṣu cānyeṣu cānubhukteṣu yathābhyāsam anatyayañ ca sirāṃ vyadhayet || pratiṣiddhānām api ca viṣopasargge sirāvyadhanam apratiṣiddhaṃ tatra snigdhasvinnam āturaṃ yathā doṣapratyanīkaṃ dravaprāyam annaṃ bhuktavantaṃ yavāgūm pītam vā yathākālam upasthāpyāsīnaṃ sthitam vā prāṇān abādhamānaḥ | plotapaṭṭaś carmmāntarvvalkalalatānām anyatamena yantreṇa yantrayitvā nātigāḍhannātiśithilaṃ śarīrapradeśam āsādya vidhivacchastramādāya yathoktāṃ sirāṃ vyadhayet | tatra vyadhyasirāṃ | naivātiśīte nātyuṣṇe na pravāte na ca durddine | sirāṇāṃ vyadhanaṃ kāryam aroge vā kadācana || tatra vyadhyasirāṃ puruṣaṃ pratyād ity amukhamarannimātrocchrite niveśyāsane sakthnor ākuñcitayor nniveśya kurpparasandhidvayaṃ hastāvantagūḍhāṅguṣṭhakṛtamuṣṭīm anyayoḥ sthāpayitvā yantraśāṭakena parikṣipya grīvāyām anyena paścāt sthitena puruṣeṇa vāmahastena śāṭakāntadvayaṃ grāhayitvā sirotthāpanārtham asṛksrāvaṇārthañ ca yantram pramāṇena pīḍayet | karmmapuruṣaś ca mukhaṃ vāyunā pūrayet | uttamāṅgagatānām eṣa sirotthāpam ayantravidhiḥ | sthitasakthim īṣet kuñcitapādam uccaiḥ sthāpayitvā vyadhapradeśasyopari samyag yantram badhvā pādasirām vidhyet | upaviṣṭasya hastaṃ gūḍhāṃṣṭhaguṣṭhanibaddhamuṣṭiṃ samyagāsane sthāpayitvā hastasirāṃ vidhyet | gṛdhrasīviśvacyorākuñcitajānukurpparasya śroṇīpṛṣṭhaskandheṣūnnamitapṛṣṭhasya udarorasau prasārito rasaḥ sphurjjitadehasya bāhūbhyām avalambamānasya pārśvayoḥ | avanamitameḍhrasya meḍhraṃ | unnāmitavidaṣṭajihvāsyādhojihvāyām | ativyātānānanasya tāluni dantamūle ca | evaṃ yantropāyān anyām̐ś ca sirotthāpanahetūn buddhyāvekṣya śarīravaśena vyādhivaśena ca vidadhyād iti | māṃsaleṣv avakāseṣu vrīhimukhena yavamātraṃ nidadhyād vrīhimātram vā | ato nyathārddhayavamātram asthnām upari kuṭhārikayā || bhavaṃti cātra || vyabhre varṣāsu vidhyeta grīṣmakāleṣu śītale | hemantakāle madhyāhne śastrakālās trayaḥ smṛtāḥ || dviprakārapramathitadhārayā yāsravedasṛk | muhūrttaṃ ruddhvā tiṣṭhec ca suviddhāntāṃ vinirddiśet || yathā kusumbhapuṣpebhyaḥ pūrvvaṃ sravati pītikā | tathā sirāsu viddhāsu duṣṭam agre pravarttate || kṣīṇasya bahudoṣasya mūrcchayopadrutasya vā | bhūyo 'parāhṇe visrāvyāt tūttare 'hani vāyunaḥ || saśeṣadoṣarudhiram api kuryād vicakṣaṇaḥ | na cātinisṛtaṃ kuryāc cheṣaṃ saṃśamanair jjayet || tatra pādadāhapādaharṣacipyavātaśoṇitapādakaṇṭakavipādikāpādadārīprabhṛtiṣu rogeṣu kṣipramarmmopariṣṭād dvyaṅgule vrīhimukhena sirāṃ vyadhayet | ślīpadeṣu yathoktaṃ kroṣṭukaśirṣavātavedanāsu sakthisaṃsritāṃ | gulphasandher upari caturaṅgule apacyāmindrabaster adhastād dvyaṅgule | jānusandher upari caturaṃgule gṛdhrasyāmūrusaṃdhisanniviṣṭāṃ | galagaṇḍe śroṇipratisamantāt pravāhikāṃyāṃśūlinyāṃ parivarttikopadaṃśaśūkavyāpatsu meḍhramadhye | etenetarasakthibāhūvyākhyātau || viśeṣatas tu vāmabāhukurpparasandhāvabhyantarato bāhumadhye plīhni etām eva dakṣiṇabāhuyakṛddālye | etām eva ca kāsaśvāsayor apyādiśanti | gṛdhrasyāmiva vipaṃcyām vāmapārśvakakṣastanāntarayor antarasthām vidradhau pārśvaśūle ca | etām eva ca kaphodare | dakṣiṇapārśve bāhuśoṣāpabāhukayor bbāhumadhye eke vadanty aṃsamadhye trikasandhimadhyagatān tṛtīyake | skandhasandhigatānām anyatarapārśvasaṃsthitānāñ caturthake | hanusandhimadhyagatām apasmāre | śaṃkhasandhigatānām unmāde | jihvārogedī 3ṣv adhojihvāyāṃ | dantavyādhiṣu dantamūle | tāluni tālavye ca | karṇṇayor upari samantāt karṇṇaśūle tadroge ca | gandhāghrāṇe nāsārogeṣu nāsāgre | timirākṣipākaprabhṛtiṣv akṣcāmayeṣūpanāsyāṃ lālāṭīm āpāṃgī vā | etām eva śirorogādhimanthaprabhṛtiṣu ca rogeṣu | tatra durvviddhātividdhākuñcitā piccitā kuṭṭitā aprasrutānutīrṇṇā anteviddhāpariśuṣkākūṇitā vepitā anutthitaviddhā | avyadhyaviddhā śastrahatā tiryagviddhā | aviddhā vidrutā dhenukā punaḥ punarvviddhā marmmasirāsnāyvasthisandhiṣu viddhā ceti | viṃśatiṃ duṣṭavyadhyā bhavanti || tatra sūkṣmaśastrapraṇidhānān nāsṛgvyaktaṃ sravati | tatra rujā śophau bhavataḥ | sā durvviddhā nāma | pramāṇātiriktaviddhāyāmantaḥ śoṇitam praviśatyatipravṛttirvvā bhavati sātividdhā nāma kuñcitāyām apyevaṃ | kuṇṭhaśastrapramathitāpṛthulabhāvam āpannā piccitā nāma anāsāditamantayoś ca bahuśaḥ | kuṭṭitākuṭṭitā nāma śītabhayāsmamūrcchābhir apravṛttaśoṇitā aprasrūtā nāma tīkṣṇamahāmukhaśastraviddhā anudīrṇṇā nāma alparaktasrāvinyanteviddhā nāma| kṣīṇaśoṇitānilapūrṇṇāpariśuṣkā nāma | caturthabhāgamāsāditā kiñcitpravṛttaśoṇitākūṇitā nāma | dutthānabandhodvepiṇyāśoṇitasaṃmoho bhavati | sā vepitā nāma | anusthitāyām apyevamaśastrakṛtyā avyadhyā nāma | chitvāt ipravṛttaśoṇitā kriyāsaṃgrahakarī śastrahatā nāma | tiryakpraṇihitaśastrākiñciccheṣātiryagviddhā nāma | bahuśaḥ kṣatā hīnaśastrapraṇidhānenāviddhā nāma | anavasthitaviddhā vidrutā nāma | vyadhapradeśasya bahuśovaghaṭṭanādasaṃārohamāṇavyadhā raktasrāvinyatyarthaṃ dhenukā nāma | punaḥ punaḥ praṇidhānā sirāmarmmasnāyvasthisaṃdhiṣu viddhā rujāśophau vaikalyam maraṇam vā bhavati || bhavanti cātra || sirāsuśikṣito nāsti calāhyetāḥ svabhāvataḥ | matsyavat parivarttante tasmād yatnena tāḍayet || ajānatā gṛhīte tu śastre kāyanipātite | bhavanti vyāpadastv etā bahavaś cāpy upadravāḥ || snehādibhiḥ kriyāyogair nna tathā lepanair api | yāṃty āśu vyādhayaḥ śāntiṃ yathā samyak sirāvyadhāt || sirāvyadhaṃ cikitsārthaṃ śalyatantre vidhīyate | yathā samyak praṇihitā bastiḥ kāyacikitsite || tatra snigdhasvinnavāntaviriktānuvāsitāsthāpitaviddhasirair mmanuṣyaiḥ pariharttavyāni || krodhāyāsamaithunadivāsvapnoccairbbhāṣyavyāyāmayānāsanāni sthānacaṃkramaṇaśītavātātapaciruddhāsātmyājīrṇṇāny ābalalābhāt māsam eke manyante | vistaram eṣām upariṣṭād vakṣyāmaḥ || bhavati cātra || sirāviṣāṇatumbībhir jjalaukābhiḥ padais tathā | avagāḍhaṃ yathāpūrvvaṃ kriyate duṣṭaśoṇitaṃ || iti śārīre 'ṣṭamo 'dhyāyaḥ ||

athāto dhamanīvyākaraṇaṃ śārīraṃ vyākhyāsyāmaḥ || caturvviṃśatir ddhamanyo bhavanti | tās tu nābhiprabhavāḥ | tatra kecid āhur ācāryāḥ | sirādhamanīsrotasām avibhāgaḥ | sirāvikārā eva hi dhamanyaḥ srotānsi ceti | tat tu na samyagatrocyate | anyā eva hi dhamanyaḥ srotānsi sirāśceti | kasmād vyañjanānyatvāt mūlasanniyamāt karmmavaiśeṣyād āgamāc ca | kevalaṃ tu parasparapratānasannikarṣāt sadṛśakarmmatvāt saukṣmyāc ca vibhaktakarmmaṇām apy avibhāga eva karmmasu bhavati | tāsāṃ khalu nābhiprabhavānām ūrddhvagā daśa daśa cādhogāminyaś catasras tiryaggāḥ | ūrddhvagāḥ | khalu śabda sparśa rūpa rasa gandha praśvāsocchvāsa prekṣita kṣut jṛmbhita hasita kathita ruditādīn viśeṣān abhivahantyaḥ śarīran dhārayanti | tās tu hṛdayam abhiprapannās tridhā tridhā jāyante | tās triṃśat tāsāṃ tu vātapittaśleṣmaśoṇitarasān vahata dve dve vahatas tā daśa | śabdasparśarūparasagandhān aṣṭābhir gṛhīte | dvābhyāṃ bhāṣate dvābhyāṃ ghoṣaṃ karoti | dvābhyāṃ svapiti dvābhyāṃ prativudhyate | dve asravāhinyo dve stanyastriyā vahataḥ stanasaṃśritā | eva śukraṃ narasya stanayor abhivahatas tās tv etās triṃśat savibhāgā vyākhyātāḥ | etābhir ūrddhvan nābher udarapārśvapṛṣṭhoraḥ skandhagrīvāśīrṣavāhavo dhāryante yāpyante || bhavati cātra || pañcādhibhūtās tv atha pañcakṛtvaḥ pañcendriyam pañcādha bhāvayanti | pañcendriyaṃ pañcādha bhāvayitvā paṃcatvam āyānti vināśakāle || a vyā dho gamātās tu vātamūtrapurīṣaśukrārttavān abhivahanti | tās tu pittāśayam abhiprapannās tatrasthām annapānarasam abhipakvam auṣṇād vivecayantyo 'bhivahantyas tarpayanti || ūrddhvagānān tiryaggānāñ ca rasasthānāñ cābhipūrayanti | tatra mūtrapurīṣasvedām̐ś ca vivecayaṃty āmapakvāśayāntare tridhā tridhā prajāyante tāṃs triśat | tāsān tu vātapittakaphaśoṇitarasān dve dve vahatas tā daśa | dve annavāhinyau | antrāsrite toyavahe dve dve mūtravastim abhiprapanne | śukraprādurbbhāvāya ca dve | evaṃ raktam abhivahate | nārīṇām ārttavasaṃjñe dve | varcconiḥsarataḥ sthūlāntraprativaddhe dve | aṣṭāv anyas tiryaggās tāḥ svedam arppayanti | tās tv etās triṃśat saṃvibhāgā vyākhyātāḥ | tābhir adho nābheḥ pakvāsayakaṭīmūtravastigudameḍhrasakthīni dhāryante | bhavati cātra adhogatāmās tu kurvvanti karmmāṇy etāni sarvvaśaḥ | tiryaggās tv eva vakṣyāmi karmma cāsāṃ yathātathaṃ || tiryaggānāṃ tu catasṛṇām ekaikā śatadhā sahasradhā ca bhidyante | tās tv asaṃkhyeyā tābhir idaṃ śarīraṃ gavākṣitaṃ vivaddham ātatañ ca tāsāñ ca mukhāni romakūpaprativaddhāni yaiḥ sveda prasravati rasaś cābhisantarppayati | antar vvahiś ca tābhir eva cābhyaṃgapariśekāvagāhāvalepanavīryāṇy antaḥśarīram abhiprapadyante | tvaci vipakvāni tābhir eva ca sparśaṃ śubham aśubham vā gṛhīte tāś catasro dhamanyaḥ sarvvāṅgagatāḥ savibhāgā vyākhyātāḥ || bhavataś cātra ślokau || dhamanyaḥ sarvva evās tāḥ prativaddhā yathendriyaṃ | jāgratāṃ svapatām vāpi vahatīndriyagocare || yathā svabhāvataḥ khāni mṛṇāleṣu viśeṣu ca | tathaiva tāsāṃ dvārāṇi raso yair upacīyate || ata ūrddhvaṃ srotasāṃ mūlaṃ viddhalakṣaṇaṃ vyākhyāsyāmaḥ | tāni tu prāṇānnodakarasaraktamāṃsamedomūtrapurīṣaśukrārttavavahāni yeṣv adhīkāraḥ | eṣāṃ viśeṣāvahavaḥ | teṣāṃ mūlaṃ hṛdayaṃ rasavahinyaś ca dhamanyas tatra viddhasya krośana vinamana bhramaṇāni saṃjñānāśo maraṇañ ca | annavahe dve tayor mmūlamāmāsayo nnavāhinyaś ca dhamanyaḥ | tatra viddhasya prāṇavahaviddhavat maraṇaṃ | talliṅgaś ca raktavahe dve tayor mūlaṃ yakṛtplīhānau tatra viddhasya śyāvāṅgatā jvaraḥ pāṇḍutā dāhaḥ śoṇitābhigamanañ ca | mānsavahe dve tayor mmūlaṃ snāyustvagraktavahāś ca nāḍyas tatra viddhasya śvayathur mmāṃsaśoṣaḥ śirāgranthayor mmaraṇañ ca | medovahe dve tayor mmūlaṃ kaṭīvṛkkau ca tatra viddhasya svedāgamanaṃ snigdhāṅgan tāluśoṣaś ca | mūtravahe dve tayor mmūlaṃ vastimeḍhrañ ca | tatra viddhasyānaddhavastitā mūtranirodhastavdhameḍhratā ca | purīṣavahe dve tayor mmūlam pakvāśayo gudaś ca tatra viddhasyānāho durggandhatā grathitāntratā ca | śukravahe dve tayor mmūlaṃ stanau vṛṣaṇau ca | tatra viddhasya klaivyaṃ cirād vā prasekaḥ praseke cālpaśukradarśanaṃ sevanīcchedā prādurbbhāvo maraṇañ ca | srotoviddhan tu pratyākhyāyopakrameta | uddhṛtaśalyaṃ tu kṣatavidhānenopakramed iti | ślokau || ya evaṃ na prajānāti srotasām mūlaniścayaṃ | mahadbhayam avāpnoti na sa karmmasu siddhyati || yaḥ samyag etaṃ jānīyāt sa bhaved rājasammataḥ | pūjārho bhiṣajāṃ hy eṣa iti dhanvantarer mmataṃ ||

iti dhamanīvyākaraṇaṃ śārīrannavamodhyāyaḥ || ||

athāto garbbhiṇīvyākaraṇaṃ śārīram vyākhyāsyāmaḥ || tatra garbbhiṇīm prathamadivasāt prabhṛtyādi sennityaṃ hṛṣṭaśucyalaṃkṛtavāsasā śāntimaṅgaladevatāvrāhmaṇaguruparā ca bhavitavyaṃ | malinavikṛtahīnagātrāṇi ca na spṛśet | durggandhadurddaśanāni ca dūrata eva pariharet | vahin nniḥkṛṭāśūnyāgāracaity aśmaśānacaity avṛkṣasevāś ca krodhāyāsakarāṃś ca bhāvān uccair bbhāṣyādikaṃ ca pariharet | udvejanīyāś ca kathāḥ śuṣkam paryuṣitaṃ kuthitaṃ klinnaṃ cānnanopayuñjīta yāni ca garbbham vyāpādayanti | na ca tailābhyaṅgotsā danādīni niśeveta | na cāyāsayec charīraṃ pūrvvoktāni ca pariharet | śayanāsanañ ca samṛddhās taraṇaṃ nātyucchritam apāśrayopetam asaṃvādham vidadhyāt | hṛdyaṃ dravamadhuraprāyasnigdhan dīpanīyaṃ saṃskṛtabhojanañ ca bhojayet sāmānyam etad ā prasavakālāt | viśeṣatas tu garbbhiṇī prathamadvitīyatṛtīyeṣu māseṣu madhuraśītadravaprāyamāhāramā āseveta | caturthe māse payo navanītam āhāram āharet | pañcame kṣīrasarppiḥ saṃsṛṣṭaṃ | ṣaṣṭhe svadaṃṣṭrāsiddhasya sarppiṣā pakṣamātraṃ yuktyā yavāgūm pāyayet | saptame pṛthak parṇyādisiddham evam āpyāyyate garbbhaḥ | aṣṭame khalv enāṃ vadarodakena valātivalāpayodadhimas tu tailamadhughṛtaśatapuṣpāmiśreṇāsthāpayet purāṇapurīṣaśuddhyartham anulomārthañ ca vāyos tataḥ payo madhurasiddhena tailenānuvāsayet | anulome hi vāyau sukham prasūyate | nirupadravāś ca bhavanti | ata ūrddhvaṃ snigdhābhir yavāgūbhir jjāṅgalarasaiś copahared ā prasavakālāt | evam upakrāntāsnigdhāvalavatīsukham anupadravā prasūyate | navame māsi sūtikāgāram enāṃ praveśayet | praśaste tithyādau | tatreṣṭāgāraṃ vrāhmaṇakṣattriyavaiśyaśūdrāṇāṃ svetaraktakṛṣṇeṣu bhūmipradeśeṣu | vilvanyagrodhatindukanirmmitaṃ sarvvāgāran tat mayañ ca paryavanaddhaṃ samupaliptabhittiparicchadaṃ prāgdvāram udagdvāram vāṣṭahastāyata caturhastavistṛtaṃ rakṣāmaṃgalasampannam vidheyaṃ | tatropasthitaprasavāyāḥ kaṭīpṛṣṭhaṃ pratisamantād vedanā bhavati | mūtramabhīkṣṇam prasicyate | yonimukhāc ca śleṣmā prajāyiṣyamāṇāṃ tusvabhyaktām uṣṇodakapariṣiktagātrīṅ kṛtamaṅgalāmathenāṃ sa ghṛtāṃ yavāgūṃ kaṇṭhāt pītavatī mṛduni kṛtopadhānavistīrṇṇe śayane sthitāmābhugnasakthinīm uttānām aśaṅkanīyās tisraś catasraḥ pariṇatavayasaḥ | vrajananakuśalāḥ kalpitanakhyaḥ paricareyuriti || athāsyā viśikhāntaram anulomāyām anusukham abhyaṃjyāt | vrūyāc cainām etāḥ subhage pravāhayaś ceti | mā cāprāptāvīḥ pravāhiṣṭhāḥ | anāgatāsvāviṣu pravāhamāṇāḥ | vadhiraṃ mūkaṃ srastahanuṃ mūrddhābhighātinaṃ kāsaśvāsaśoṣopadrutaṃ kuvjaṃ vikaṭam vā janayati |tasmād anāgatāvī na pravāheta | sraste tu kukṣau vimukte garbbhanāḍī pravandhe samūle śroṇīvaṃkṣaṇavastiśiraḥ supravāheta śanaiḥ śanais tato garbbhayonimukhaṃ prapannagāḍhataram āviśalyabhāvāt | tatra pratilom anupānaṃ pāyayet śosayet | jātasyolvaṃ viśodhyāsyaṃ saindhavasarppiṣāṣṭāṃgulāvaśeṣāṃ nāḍīm vaddhayitvā kuṣṭhatailenābhyajya sūtreṇāvaddhya kumārasya grīvāyām vadhnīyāt | atha kumāraṃ śītābhir adbhir āśvāsya jātakarmmaṇi madhusarppiranantāmiśraṃ vrahmīrasena suvarṇṇamaṅgulyā nāsikayā lehayet | sūtikāñ ca ghṛtatailayor anyatarasya mātrāṃ pipalyādi kaṣāyam anupānam pāyayet | valavatīm avalāṃ yavāgūn trirātram pañcarātram vā || ata ūrddhvaṃ snigdhenānnasaṃsarggeṇopacaret snehanity ā ca syāt | prāyaścainām prabhūtenoṣṇodakena pariṣiñcet krodhāyāsamaithunādīm̐ś ca pariharet || bhavati cātra || mithyācārāt sūtikāyā yovyādhirupajāyate | sa kṛcchrasādhyo 'sādhyo vā bhaveddhātvapakarṣarṇāt || tasmāt tāṃ deśakālau tu vyādhisātmyena karmmaṇā | parīkṣyopacaren nityam evaṃ nātyayam āpnuyāt || athāmarāmapatantīm pātayet kaṇṭham asyāḥkeśaveṣṭitayāṅgulyā pramṛśet kaṭukā lāvukṛtavedhanasarṣapasarppanirmmocakair vvā kuṭatailair yonim udrūpayet | lāṅgalakīmūlakalkena vāsyāḥ pāṇipādatalam ālimpet | kuṣṭhalāṅgalakīmūlakalkam vā madyamūtrayor anyatareṇa pāyayet | śālimūlakalkam vā pi ppalyādikalkam vā madyena | siddhārthakakuṣṭhailālāṅgalakīmahāvṛkṣakṣīrasurāmaṇḍairāsthāpayet | etaiṣveva ca siddhena siddhārthakatailenottaracūrṇṇavastiś cāsyai dadyāt | hastena cāpaharet | prajātāyās tu vastiśirodarayoniśūlaṃ raktaṃ saṃruddhya vāyuḥ karoti sa makkalaḥ | tatra yavakṣāracūrṇṇaṃ sarppiṣā sukhodakena pāyayet || lavaṇacūrṇṇam vā surāmaṇḍena | purāṇaguḍam vā trikaṭuka trijātakakustumvurumiśram vā khādayet | pṛthakparṇṇyādikvāthaṃ bhadradārumaricavacāsaṃsṛṣṭam pāyayet | atha vālaṃ kṣaumaparihitaṃ kṣaumakārppāsās tṛtāyāṃ śāyayīta | nimva pīlu paruṣaka śākhābhiś cainaṃ parivījayet | mūrddhni cāsya tailapicum avatārayet | dhūpayec cainaṃ rakṣoghnair ddhūpaiḥ | rakṣoghnāni cāsya pāṇipādaśirogrīvāsvavasujet | tilātasīsarṣapakaṇāś cātra prakiret | adhiṣṭhāne cāgnim prajvālayet | vraṇitopāsanīyañ cāvekṣyeta tato daśamyāṃ mātāpitarau kṛtamaṅgalakautukau svastivācakapūrvvakaṃ nāma kuryāt āṃ | yathābhipretaṃ nakṣatran nāma vā | tato yathāvarṇṇaṃ dhātrīm upasthāpayet | kṛṣāmasthūlām vayaḥsthāmam avyādhitām prasannakṣīrāmavalamvorddhastanīm avyaṅgām avyasanaṃ nījīvavatsāṃvatsalāṃ dogdhīm akṣudrāṃkule jātamato bhūyiṣṭaiś ca guṇair anvitām ārogyavalavṛddhaye kumārasya | tatrātikṛṣātisthūlāninditā vyādhitāś ca vyākhyātās tāviṣamadhātutvād rogān āpādayanti vālasya viśeṣataḥ | ūrdhvastanī karālaṃ kumāraṃ kuryāl lamvastanī nāsikāmukhaṃ cchādayitvā maraṇam āpādayanti | atha praśastāṃ śirasnātā mahadvāsasām udaṅmukhīm upaveśya dakṣiṇaṃ stanaṃ kumāraṃ pūrvvam pāyayet || anena mantreṇābhimantrya || catvāraḥ sāgarāḥ puṇyāḥ stanānāṃ kṣīravāhināṃ | santu te śubhage nityaṃ vālasyānuvalapradāḥ | piven vālomṛtarasaṃ payas tava śubhānane | dīrgham āyur avāpnotu devāḥ prāśyāmṛtaṃ yathā || athāsyāḥ kṣīrasañjananārthaṃ yavagodhūmaśāliṣaṣṭikamāṃsakṣīrasurāsauvīrapiṇyāka rasonamatsyakaśerukāśṛṅgāṭakavidārīkandaśatāvarīviśamṛṇālanālikālāvukālaśākaprabhṛtīni vidadhyāt | atha tasyāḥ stanyam apsu parīkṣeta taccecchītalam amalaṃ tanuṃ śaṃkhāvabhāsaṃ apsu caikībhāvaṃ gacchatyaphenilam̐ matraṇḍulaṃ na plavate sīdati vā tacchuddham iti vindyāt | tena kumārasyārogyaṃ bhavati || bhavati cātra || dhātryās tu gurubhir bhojyair vviṣalais tathā | doṣā dehe prakupyanti tata stanyam praduṣyati || duṣṭaṃprāguktan tena śarīrāvyādhayaḥ prādurbbhavanti | teṣu ca yathābhihitaṃ mṛdvacchedanīyam auṣadham mātrayā kṣīrasya kṣīrasarppiḥ saṃyuktaṃ vidadhyāt | dhātryāś ca kevalaṃ | kṣīrānnād asya kalkī kṛtaṃ | dhātryāś ca pūrvvavat | annād asya kaṣāyādīnām ātmanyeva na dhātryāḥ || bhavati cātra || vālānāṃ gudapākeṣu pittaghnīṃ kārayet kriyāṃ | rasāñjanam viśeṣeṇa pānālepanayorhitaṃ || kṣīrāhārasya siddhārthakavacāpayasyāśārivāvrahmīkuṣṭhasaindhavasiddhaṃ sarppiḥ pātuṃ prayacchet | kṣīrānnād asya madhukavacātriphalāsiddhaṃ | annād asya dvipañcamūlīkṣīratagarabhadradāruviḍaṅga- drākṣādisiddhaṃ tena kumārasyārogyavalamedhāyūṃṣi bhavanti | vālaṃ punar ggātreṣu na gṛṅṇīyāt | na cainaṃ tarjjayet sahasā vā na pravodhayed vitrāsabhayāt | sahasā nāhared utkṣiped vātābhighātabhayān nopaveśayet kauvjabhayān nityaṃ cainam anuvartteta priyahitair eva m abhihitamanādyamapyabhivarddhate nityamudagrasatvasampannastv arogo bhavati || bhavati cātra || nāśucau visṛjed vālaṃ nākāse viṣameṇa ca | noṣṇamārutavarṣeṣu rajodhūmodakeṣu vā || kṣīrasātmyatayākṣīramājaṃ gavyam athāpi vā | dadyād astanyam aprāptau vālebhyo vīkṣya mātrayā || ṣaṇmāsāc cainam annam prāśayel laghuhitaṃ nityam avarodhaś ca | syāt kṛtarakṣaḥ | upasarggabhayā grahopasarggebhyo rakṣyā vālā bhavanti || atha kumāra udvijate trasyati roditi naṣṭasaṃjño bhavati || nakhadaśanair ddhātrīm ātmānañ ca paritudati dantān khādati kūjati jṛmbhate bhrūvāvutkṣipaty ūrddhvan nirīkṣate phenam udvamati sandaṣṭauṣṭhaḥ krūrabhinnārttasvaro niśi jāgartti durvvalomnāṅgo yathāpūrvvaṃ dhātryāḥ stanyan nābhilaṣatīti sāmānyaṃ grahopasṛṣṭalakṣaṇ uktaṃ | vistareṇotta re vakṣyāmaḥ || śaktimantaṃ cainaṃ jñātvā yathā svam vidyāṃ grāhayet | athāsmai pañcaviṃśativarṣāya ṣoḍaśavarṣām patnīm āvahen mitradharmmārthakāmaprajāḥ prāpsyāmīti || bhavati cātra || ūnaṣoḍaśavarṣāyām aprāptaḥ pañcaviṃśatiḥ | yady ādhatte pumān garbbhaḥ kukṣisthaḥ sa vipadyate | jātovā ni ciraṃ jīved vā durvvalendriyaḥ | tatra pūrvoktaiḥ kāraṇaiḥ prapatiṣyati garbbha | garbbhāsayaśroṇīvaṃkṣaṇavastiśūlāni bhavanti | raktadarśanañ ca | tāsām pariṣekāvagāhālepanair upacaret kṣīrapānaiś ca | alpālpasyandate kṣīramutpalādi siddham vā pāyayet | saṃsramāne savātapārśvaśūlānāha mūtrasaṅgāḥ sthānāt sthānaṃ cotkrāmati garbbhaḥ | tatra snigdhaṃ śītāḥ kriyāḥ | vedanāyāṃ mahāsahamadhukasvadaṃṣṭrakaṇṭakārikāsiddha payaḥ | kṣaudraśarkarāmiśram pāyayet | mūtrasaṅge darbbhādisiddhaṃ | ānāhe hiṃgusauvarccalaraso na siddhaṃ sravati rakte koṣṭhāt kaṇṭakārikāmṛtpiṇḍagairikasarjjarasāñjanacūrṇṇa yathālābhaṃnyagrodhāditvakpravālakalkan vā pāyayet | utpalādikasedi siddham vā | vṛhatīdvayotpalaśārivāpayasyāmadhukasiddham vā | etenopavarttate rujasu garbbhaś cāpy āyyate || māsānumāsikam ata ūrdhvaṃ vakṣyāmaḥ madhukaṃ śālivījañ ca payasyā suradāru ca | aśmantakaḥ kṛṣṇatilās tāmravallī śatāvarī || vṛkṣādanī payasyā ca latā sotpalaśārivā | anantā śārivā rāsnā padmam madhukam eva ca || vṛhatīdvayakāśmaryakṣīrīśuṃgātvaco ghṛtaṃ | pṛthakparṇṇī valā śigra śvadaṃṣṭrā madhuyaṣṭikā || śṛṅgāṭakamvisaṃ drākṣā kaseru madhukaṃ sitā | vatsaite saptayogāḥ syur arddhaślokasamāpanāḥ || yathākramaṃ prayoktavyā garbbhasrāve payoyutāḥ | kapitthavilvavṛhatīpaṭolekṣunidigdhikā || mūlāni kṣīrasiddhāni pāyayed bhiṣag aṣṭame | navame madhukānantā payasyāśārivām pivet || payas tu śritaśītam praśasyate || sakṣīrā vā hitā śuṇṭhī madhukaṃ devadāru ca | evam apyāyyate garbbhas tīvrā ruk copaśāmyati || vyavasthigavyenodumvaraśalāṭusiddhena payasā bhojayet | atīte lavaṇaṃ varjyābhir uddālukādīnāṃ pācanīyopasaṃbhṛtābhir upakrāmed yāvanto māsā garbhasya tāvanty ahāni vastyudaraśūle purāṇaguḍan dīpanīyasaṃyuktam pāyayed ariṣṭam vā | vātātapaśramasevinyā vātopahīhītatvāt srotasāṃ līyate garbhaḥ sotikālam avatiṣṭhamāno vyāpadyate | tāṃ mṛdunā snehādinā krameṇopacaret | utkrosarasaṃ yavāgūñ cālpasnehām prayacchet | kālātītasthāyini garbhaviśeṣato dhānyam udūkhalamusalenābhihanyāt | viṣamam vā yānāsanam upasevet | vātābhipanna eva śuṣyati garbhaḥ samātuḥ kukṣin na pūrayati | mandaṃ spandate ca taṃ vṛṃhaṇīyaḥ payobhir mmāṃsarasaiś copacaret | śukraśoṇitaṃ vāyunoparuddham anavaktrāntajīvam ādhmāpayaty udaran tat kadācid yadṛcchayopaśāntan naigameṣā pahṛtam iti vadanti | tam eva kadācit pravilīyamānam āpūryamāṇam vā nāgodaram ity āhus tatrāpi līnavat pratikāraḥ | nivṛttaprasavāyāḥ punaḥ ṣaḍbhyo varṣebhya ūrddhvam prasavatyāḥ kumāro 'lpāyur bhavati | atha garbbhiṇī vyādhyutpannā vātyaye ccharddayen madhurāmlenānnopahitena | anulomayec ca saṃśamanīyam mṛdu vidadhyāt | annapānayor iti | aśnīyāc ca mṛduvīryaṅ garbbhāviruddhām̐ś ca kriyāyogān vidadhīta iti || suvarṇṇaṃ rṇṇacūsukṛdaṃ kuṣṭham madhuvacā ghṛtaṃ | matsyākṣakaḥśaṃkhapuṣpī sarppiḥ kāñcanam eva ca || arkkapuṣpī madhughṛtaṃ cūrṇṇitaṃ kanakan tathā | suvarṇṇacūrṇṇavaiḍūryaṃ svetā dūrvvā ghṛtam madhuḥ || catvāro 'bhihitāḥ prāsyā arddhaślokasamāpanāḥ | kumārāṇām vapur mmedhā valārogyakarāḥ śubhā iti ||

iti garbbhiṇīvyākaraṇaṃ śārīre daśamo 'dhyāyaḥ || o ||

bhūtacintā śukraśuddhiṃ garbbhasaṅkramaṇan tathā | garbbhavyākaraṇañ caiva kāyavyākaraṇañ ca yat || marmmasirāvibhaktiś ca sirātāḍanam eva ca | dhamanīvyākaraṇa caiva garbbhiṇyāpūryate daśa || || iti śārīrasthānaṃ samāptaṃ || ❈ ||