British Library MS IO 329 India Office Sanskrit Manuscripts British Library London United Kingdom IO SAN 329 IO 707 F[10] L This manuscript was part of the private collection of H. T. Colebrooke, who then presented it to the East India Company Library in 1819 (Rocher & Rocher 2012, 139). It is now held in the India Office collection at the British Library. The manuscript extends from the beginning of the Jātisamuddeśa to the end of the Kriyāsamuddeśa. The writing is very neat and legible, boxed in by a carefully rendered red, yellow, and black border. Corrections have been made using yellow paste. The manuscript has been bound into book form. The colophon dates it to the third month of saṃvat 1862 (1805 CE). Bhartṛhari Helārāja Dravyasamuddeśa Prakīrṇaprakāśa oṁ śrīgaṇeśāya namaḥ || sŕīpataṃjalaye namaḥ || oṁ yasmin sanmukhatāṃ prayāti ruciraṃ ko py aṃtarujjṛṃbhate nedīyān mahimā manasy abhinavaḥ puṃsaḥ prasannātmanaḥ || sāmānyaviśeṣād atyaṃtabhedābhāvāt sakalaviśeṣaparihāreṇa sāmānyarūpānupapatter iti sarvatra siddhiḥ || || iti śrībhūtirājatanayahelārājakṛte prakīrṇaprakāśe kriyāsamuddeśo ṣṭamaḥ || || || || oṁ || || || śubham astu lekhakapāṭhakayoḥ || || || oṁ || || || saṃvat 1862 jyeṣṭhaśuddhaikādaśyāṃ samāptīkṛtam idam || || || || Sanskrit in Devanāgarī script. 15.2 28.6 Devanāgarī numerals, top-left margin, verso. Devanāgarī numerals, bottom-right margin, verso. Complete, in good condition.

The written area is framed by a border of black, red, and yellow lines. There is an additional, larger black frame that includes the foliation.

Devanāgarī in black ink, with daṇḍas in red.

On the recto side of the first folio, in faded red ink, is written Presented by H. T. Colebrooke.The numer 246 has been crossed out.

The stamp of the East India Company Library (E. I. Comp Library) is on the first and last folios.

An additional folio at the end reads helārājakṛte prakīrṇaprakāśe kriyāsamuddeśo ṣṭama॰ patra 221 śloka 9000 vyā॰. The number 112 is written to the left side.

Running marginal title (he॰ rā॰), top-left margin, verso.

Bound as a book.

 1862 Saṃvat / 1805 CE India Acquired by H. T. Colebrooke and presented to the East India Company Library. Descriptions of the manuscript Descriptions of the manuscript Catalogue of the Sanskrit manuscripts in the library of the India Office Julius Eggeling London 1935 p. 187 The Making of Western Indology: Henry Thomas Colebrooke and the East India Company Rosane Rocher Ludo Rocher London 2012 Charles Li

|| jātir vā dravyaṃ vā padārthāv ity uktaṃ tatra vājapyāyanadarśanena jātiṃ viśeṣaṇabhūtāṃ padārthaṃ vyavasthāpya vyāḍidarśanena viśeṣyarūpaṃ dravyam iti padārthaṃ vyavasthāpayituṃ tathā darśanaṃ tad eva paryāyāṃtarair uddiśati ||

ātmā vastu svabhāvāś ca śarīraṃ tatvam ity api || dravyam ity asya paryāyās tatvamiśram iti smṛtaṃ ||

ihārthakriyāyāṃ dravyam evopayujyata iti tad eva pravartakam arthināṃ || ataḥ śabdena tad evocyate || anabhidhīyamānā tu jātir avachedikā guḍaśabde mādhuryādaya iveti dravyavādināṃ darśanaṃ dravyaṃ ca dvividhaṃ pāramārthikaṃ sāṃvyavahārikaṃ ca tatra dvitīyaṃ bhedyabhedakaprastāvena guṇasamuddeśe vakṣyati vastūpalakṣaṇaṃ yatretyādinā || anena dravyeṇa vyāḍidarśane sarve śabdā dravyābhidhāyino bhavaṃti ||

iha tu pāramārthikaṃ dravyaṃ nirūpyate tathā hi | ātmādvaitavādibhir ātmaśabdena tad dravyayuktam ātmaiva hy upādhibhinnaṃ pratibhāsamānaṃ dravyaṃ padānām artha iti teṣāṃ darśanam ihaiva vakṣyamāṇaṃ

vastu svarūpam arthakriyākāri dravyam iti śākyair uktaṃ

svabhāvam iti sattādvaitavādibhiḥ svabhāva ātmabhūtā satteti kṛtvā || tathā hi | kramarūpopasaṃhāre sattaiva sattvam iti svasaṃbaṃdhibhir upādhibhir upahitabhedā sattaiva dravyaṃ

prakṛter ekadeśaḥ cetanaḥ puruṣas taddvāreṇa śarīraśarīriṇor avyatirekā śarīraṃ dravyaṃ pradhānam eveti prākṛtikaiḥ | śarīram evaika ātmā yeṣāṃ taiḥ śarīrātmabhir ucyate

ta¦ttvam iti caturbhūtatatvādibhiś cārvākair dravyam ucyate pṛthivyaptejovāyur iti tattvāni tatsamudāye śarīreṃdriyaviṣayasaṃjñā iti vacanāt || tad evam etaiḥ paramārtha ekam eva vastūcyate

dravyam ity asyeti dravyaṃ nāma yaḥ padārthaḥ || tasyaita eva paryāyā eteṣām eva pāramārthikarūpābhidhāyitvāt_ nānye ghaṭādiśabdāḥ || saty a¦pi tadabhidhāyitve vakṣyamāṇanayenātmādiśabdānām eva sarvatra ghaṭādāv avyāhataprasyatvaṃ tathā ca bhāṣyaṃ || eko yam ātmā udakaṃ nāmeti atrātmaśabda udake prayujyamāno dravyavacanaḥ sākṛtidvāreṇa cānye śabdāḥ dravye vartaṃte || ime tu tatparityāgena mukhyayā vṛttyeti viśeṣaḥ || siddhe śabdārthasaṃbaṃdha ity atra dravyaṃ nityam ākṛtir anyā cānyā ca bhavatīti vadatā bhāṣyakāreṇa nityaṃ dravyaṃ smṛtaṃ saṃgrahoktasya tasyārthasyānuvādāt smṛtam ity āha |

yady api śākyādidarśane nityaṃ bhavati dravyaṃ tathāpi tanmatasyānabhyupagamāt_ adoṣaḥ | kevalaṃ yad asmākaṃ dravyam iti tad anyair evam abhidhīyate ity evam atropanyāsaḥ || yac ca bhāṣyānusāreṇa svarūpānyathātvānāpattiḥ | vikārabhede pi nityatvaṃ vivakṣitam atreti sarvatra tat siddhiḥ ||

evaṃ darśanāntarāśrayaṇenoddiṣṭeṣv api dravyaebhedeṣu svasiddhāṃtāśrayeṇa sārvatrikīṃ dravyapadārthavyavasthāṃ kartum āha ||

satyaṃ vastu tadākārair asatyair avadhāryate || asatyopādhibhiḥ śabdaiḥ satyam evābhidhīyate ||

iha sarvaśabdānāṃ paramārthikaṃ tatvaṃ sākṣāt spraṣṭum aśaktānāṃ anekopādhiviṣayavihitapadānāṃ tadrūpāliṃganaṃ vyavahāre samālakṣyate upādhīnāṃ vāgamāpāyavaśavidhuritanijasvarūpāṇām arthisārthasamāśāpūraṇapratihataśaktitvān na tāvaty eva paryavasānam ity upalakṣitapṛṣṭhapātinaḥ śabdā vyavasthāpane avadhṛtarūpaniveśitvāc ca śabdānām avadhāraṇānusāram arthe prakṛti avadhṛtiś cākāradvāreṇa nirākārasya buddhyupārohāyogād yathāpratyayaṃ bhedāvasāyasya bādhyamānatvād anupāyy abhinnam eva rūpaṃ paramārthaḥ || tad eva brahmarūpaṃ satyaṃ ||

syād etat || upādhiṣu śabdānāṃ viśrāṃtyabhāve śabdārthopādhitvaṃ teṣāṃ na syāt | avācyasya tadupādhitvāyogāt | ity etad vicārayitum āha ||

adhruveṇa nimittena devadattagṛhaṃ yathā || gṛhītaṃ gṛhaśabdena śuddham evābhidhīyate ||

ado devadattasya gṛhaṃ yatrāsau kākaḥ prativasatīty atra niyatasvāmikagṛhopalakṣaṇāyopalakṣaṇabhūtasya kākasya utpatite pi tasminn upalakṣaṇasvakṛtatvād adhruvatvam anityatvam iti tadanādareṇaiva tadupalakṣitaṃ gṛham abhidhīyate gṛhaśabdena tathā tathā prakṛtisaṃbaṃdhād asatyāyādhyupalakṣitaṃ satyam upādhirūpānādareṇa śabdair abhidhīyamānasyāpy abhidhānaviṣayaniyāmakatvād upalakṣaṇe saty upādhitvaṃ nidarśanena samarthitaṃ || tathā hi ktaktavatū niṣṭhety anubaṃdhasyāprayogasamavāyitvād radhruvasyopalakṣaṇe tadrahitasya śuddhasya pratyayarūpasya saṃjñāprasaṃga ity atredaṃ bhāṣye nidarśanam uktaṃ ||

nanu kāko tivilakṣaṇād gṛhād bhedenāvadhāryamāṇo mā bhūd gṛhaśabdābhidheyaḥ || ghaṭādayas tv ākārāḥ pṛthaganupalabhyamānatatvāḥ katham iva tacchabdair nābhidhīyeran || anyo py upādhir upalakṣaṇabhūtaḥ sāmānādhikaraṇyenāvachedakaḥ || tad yathā || dṛtiharir anyatra paśuḥ || anyat tu viśeṣaṇam apṛthak_śabdavācyaṃ paraṃ janakaṃ tad yathā neyam udakaṃm iti vanasaṃbaṃdhopadhīyamānarūpaviśeṣaṇam abhidhīyata iti vanaśarīrasaṃbaṃdho viśeṣaṇam uparaṃjakatadābhidheyakam āpy apadyata iti || tathā coktaṃ | arthaviśeṣa upādhitādaṃtavācyaḥ samānaśabdo yaḥ | anupādhir ato nyasmāt_ ślāghādiviśeṣaṇaṃ yadvad ity āśaṃkya sadṛśataram atra nidarśanam āha |

suvarṇādi yathā yuktaṃ svair ākārair apāyibhiḥ || rucakādyabhidhānānāṃ śuddham eveti vācyatāṃ ||

rucakakuṃḍalādyākāraviśeṣo bhidhāyamānarūpābhedam api suvarṇam ity eva sarvatrānapāyirūpaṃ satyam iti apāyibhir ākāraviśeṣais tatsādhyārthakriyākāraṇān na tatraiva rucakādiśabdāḥ kṛtapadasaṃbaṃdhāḥ kiṃ tu tadatiricyamānam arthavastv abhidheyakatana samāviśaṃti || tadvat prakṛtipratyayasaṃbaṃdhād āropihitanānātvam api paratvaṃ śabdagocaram ity arthaḥ || tatra cāpāyibhir iti hetunirdeśaḥ śākyasamakakṣatayā kṛtaḥ || tataś copādhīnām avācyatvam asatyatvaṃ ca siddhyati || asatyatvād evārthakriyākaraṇāt tadarthaṃ ca śabdavyavahārād avācyatvaṃ teṣām ity arthaḥ ||

nanu ca kāryādau prakṛtyanvayo vadhāryata eva ihāpi vastūnāṃ jñāyamānatvena satvāt || jñānasya vaikalpikārānavasthānān nirākāraśuddhasaṃvinmātrānugamasya svasaṃvitsiddhatvād aśeṣaḥ || nanu viśeṣaṇoparaktaṃ viśeṣyābhidhānam ity upasarjanībhūtasyābhidhānaṃ kā kṣatiḥ | na kācit kevalam upādhiṣv evātra tātparyadṛṣṭyā padabaṃdho nivāryate guṇatvena tv abhidhānam astu na tāvaty eva viśrāṃtir iti dravyasiddhiḥ

ata eva viśeṣaṇoparāgāt sāṃkaryadoṣaṃ parihartum āha ||

ākāraiś ca vyavachedāt sāmārthyam avarudhyate || yathaiva cakṣurādīnāṃ sāmarthyaṃ nāḍikādibhiḥ ||

sarvabhāveṣu brahmaṇo dravyalakṣaṇasyābhedāt tadabhidhā¦yitve śabdānāṃ sarvatra tasya bhāvāt sārvārthyaṃ śabdābhidhīyamānārthatvaṃ sāṃkaryyaṃ prasajyetety atredam ucyate pratiniyatakāraparichinnavṛttitvāt sarvārthatvapratibaṃdhād asaṃkara ity arthaḥ |

ghaṭākāropadhānapuraḥsara ghaṭaśabdena brahmadravyam abhimukhīkriyate || paṭākāropadhānena tu paṭaśabdenetyādi upādhirūpopahitavivekitvaṃm abhidhānīyaṃ || tad yathā || nāḍikāsuṣiravartmanihitanayanās tadavakāśāvasthitam evarthabhāgaṃ vaśyaṃti yathācadhinaṃ dṛk_śaktibhir ākārabhedair eva vastūpalakṣyate tathaiva yathādhyavasāyaṃ śabdaniveśāchabdair abhidhīyata ity arthaḥ ||

yathācaraṇādineṃdriyasyaiva prakāśaśaktiḥ pratibadhyate na viṣayo vikriyate | tathānādyavidyāvachedaprakalpitavibhāgānāṃ jijñānām eva saṃvedanaśaktir niyamyate yena vichinnāyābhidhānena bhedaviṣayāsmābhidhānāni prayuṃjate | na tu tatvam avidyayā balīkriyate iti nāḍikānidarśanena sūcayati || nāḍikādibhir ity ādigrahaṇāvadhānapratighātamartyabhijanādyavirodhaḥ | yatraivavye hy avadhānaṃ tad eva hy avadhāryate mūrtyabhijano saudaryaṃ tenāpahṛto nyaṃ na paśyati

ye tarhy ākāramātranirveśataḥ saṃniveśādiśabdās te dharmamātram abhidadhyuḥ || iti sārvatrikī dravyapadārthavyavasthā viśīryetety āśaṃkyāha |

teṣv ākāreṣu yaḥ śabdas tathābhūteṣu vartate || tatvātmakatvāt tenāpi nityam evābhidhīyate ||

upādhimātrasvabhāve kvāpi saṃniveśādyākāreṣu saṃniveśādiśabdā vartamānāḥ paramārthatas tatvād avyatirekād upādhīnāṃ tannikarṣe svarūpasyāsvarūpatvād ātmanaiva sattvāt tad eva nityam upādhimadravyam evam apy abhidhāne bhihitatvam ātmā hy upādhīnāṃ na tu te tat syāt māne iti vyāpakatvāt sarva evopādhayas tadātmanā saṃtas tathaivābhidhīyaṃte yadā hy upādhyadhīnatā tadopādheya upādhayo na bhavaṃti || tatas tu pūrve dharmāṃtarāśrayatayā svātaṃtryād upādhimatva va nopādhitvam ity arthaḥ ||

yady evaṃ dharmāṇām avasthāṃtare dharmiṇi rūpatvānityatve satyatve cākārāṇāsasatyatvaṃ dravyasya tu satyatvam ity etasya niyamesyānupapattir ity āśaṃkyāha ||

nanv atasya yo bheda iti dhravebhya āgamaḥ || atatvam iti maṃnyate tatvam ivāvicāritaṃ ||

ayam atrārthaḥ || nehī dvaitanaye satyāsatye dve satye rūpe staḥ || advaitahāniprasaṃgāt_ kiṃ tu paramārthikam ekam evādvayaṃ tac cānādisiddhāvidyāvilaṃbitasahapramāpramātṛviṣayatayā yathātvam anavabhāsamānam anekaviṣayavikalpaparighaṭanākārarūpatayā vyavahāram avatarati tathā ca tad evākāranānātvonīyamānasvarūpabhedaṃ cakāsti nānyat_ tadvyatiriktasyānyasyābhāvāt ||

tatra ca yo yaṃ prakāśaḥ sa vidyā aprakāśas tu tamo vidyā prakāśābhāvo prakāśo nāma kaścit pramāṇasiddho nirūpyaḥ || tataś ca yo yaṃ bhedaprakāśaḥ saivaikaghanaprakāśābhāvaḥ prakāśāvichedo viyā tatra ca vichinnānvayo vachedo vadhāryate iti vichinnaprakāśa satyo vidyaiva chinne mātraṃ tv apradhānasvabhāvaṃ na kiṃcid avidyo paramārthatvavicāre kiṃcid atatvaṃ ca tiṣṭhate tatvam eva yathāpratibhāsaṃ bhedena cakāsad avicāritaramaṇīyaṃ prapaṃco tatvam iti vyavahriyata iti brahmavidaḥ | tathā pratibhāsaṃ bhedena cakāsad avicāritaramaṇīyaṃ prapaṃco pakṣayā vyavasthitaṃ tatvam evābhinnatārthikā bhedadarśanavyavasthitā bhedātmakatamatvaṃ manyaṃta iti vicāreṇāvidyāvilaye brahmaikaniṣṭhatā darśanaṃ || ta uktaṃ satyā viśuddhis tatroktā vidyā vetyādi |

evaṃ tena rūpeṇa brahmaiva vikalpitaṃ bhavatīti sarvavidyānāṃ tadupādhimukhaṃ tad eva viṣayaḥ siddha ity āha ||

vikalparūpaṃ bhajate tatvam evāvikalpitaṃ || na cātra kālabhedas tu gṛhyate

paramārthataḥ || avikalpitaṃ vikalpānām aviṣayo yat tatvaṃ tad eva vyavahāre nyasyābhāvād vikalpayānaṃ vikalparūpaṃ nānāvidhabhedāvasāsamānādisiddhāvidyāvaśāt samavalaṃbate jīvātmabhedenāvatiṣṭhamānaṃ tadgatatveneti mūrtivivartā¦śrayād eva śaktivibhaktadeśanānātvaṃ nimittapaurvāparyāvalaṃbanasahaṃ | evam akālakalitam api tatvam anādinidhanaṃ kālākhyasvataṃtraśaktiviniveśitapratibaṃdhābhyanujñāvaśāj janmādibhāvayikārābhidhīyamānapaurvāparyaṃ cakāstīty arthaḥ ||

nanv avidyamānasya tattve pratibhāsanam ayuktam ity āśaṃkya dṛṣṭāṃtenopapādayati ||

yathā viṣayadharmāṇāṃ jñāne tyaṃtam asaṃbhavan || tadātmeva ca tat siddham atyaṃtam atadātmakam ||

vijñānavāde viṣayākāra¦sya tāvato satyatvān nīlādis tarhi te dharmo jaḍe jñāne saṃbhāvatair atyatam iti jaḍājaḍayor na kenacid aṃśena sādṛpyam ity āha | tathā coktaṃ || ekadeśena sārūpye sarvaṃ syāt sarvavedanaṃ || sarvātmanā tu sārūpye jñānam ajñānatāṃ vrajed iti ||

athavā saṃtavadharmācchuritaṃ vijñānaṃ viśuddhabodhasvabhāvam apy anujñāyā vyavahāre vabhāsata iti || itthaṃ nidarśanāṃtaram āha ||

tathā vikārarūpāṇāṃ tattve tyaṃtam asaṃbhavaḥ || tadātmeva ca tat tatvam anyaṃ tam atadātmakam ||

sāṃkhyāvikṛtaṃ pradhānatatvaṃ sarvavikāragraṃthi bījāvastham abhinnam anupasṛṣṭam eva mahadādivikārarūpaiḥ paramārthataḥ | tad dhi mahadādivikāraśaktiyuktaṃ guṇasāmāvasthātmakaṃ guṇavaiṣamyavimardavaśopajāyamānavikāranānātvād vilakṣaṇam eva || ayaṃ ca vyavahāre mahadādivikārarūpāvadhāraṇena vinā tadupalaṃbhāsaṃbhava iti sarvadeśeṣu avidyātvavinī evam apy ākāro pradhānena tattvapratibhāsaḥ siddha iti sārthānvayo gṛhītaḥ ||

kathaṃ punar etad anugamamyate ākārā asatyās tato nyat satyam ity āha ||

satyam ākṛtisaṃhāre yad aṃte vyavatiṣṭhate || tan niśajñavācyaṃ tac chabdāt tac ca na vidyate ||

tad eva hi nityaṃ yasmiṃs tatvaṃ na vihanyata iti bhāṣyānusāreṇaitad ucyate || tathā hy atroktaṃ kanam ity eva satyaṃ punar aparayākṛtyā khadirāṃgāraḥ suvarṇakuṃḍale bhavata ity anenaiva dṛṣṭāṃtena vikārāpekṣayā bhinnasya brahmaṇaḥ satyatocyate | tathā hi tatra rucakādyākāropamardena suvarṇam ity eva satyam evam anaṃtavikāragrāmāpāye sarvāṃte ca pramāṇam anayāpi brahmarūpaṃ satyaṃ tad eva ca bhāvato nityam āpekṣyaṃ tu nānyādīnāṃ sarvavyavahāre nityatvam ucyate || tathā hi vyaktyapāye jātir iveti mamānā gotvādikā nityā || tatrāpy aśvatvādibhedatyāye pṛthivīty eva satyaṃ || tatrāpy avādibhedāpāye vastv ity eva sarvanāmapratyāyyaṃ tatrāpi saṃvidrūpatvānapāyino nugamāviṣayākāraviveke tad eva vyāramārthikaṃ satyam iti neti nety upā¦sīteti bhāvanayā codyate || saṃvic ca paramaṃtīrūpā parā vākyaśabdabrahmamayīti brahmatatvaṃ śabdāt pāramā¦rthikān na bhidyate vivattaṃ daśāyāṃ tu vaikharyātmanā bhedaḥ || tatra ca tad eva nityaṃ jātyādirūpeṇa śabdavācyaṃ | tatrāṃtare pādānaviśrāṃtyā vācakatvasya vyavasthāpanāt svarūpāṃtargatasyārthasya vācyatvād vācyavācakayor avibhāgaḥ siddha iti prathamakāṃḍe nirṇītaṃ || ata evānaṃtaram ihābhidhāsyati || tasya śabdārthasaṃbaṃdhaṃ rūpam ekasya naśyata iti

yad uktaṃ tadātmeva ca tat tatvam atyaṃtam atadātmakam iti tatrātyaṃtam atadātmakatāṃ tāvad vyācaṣṭe ||

na tad a¦sti na tan nāsti na tad ekaṃ na tat pṛthak || na saṃsṛṣṭaṃ vibhaktaṃ na vikṛtaṃ na ca nānyathā ||

vaikārikasarvavyavahāramatīgatvāt pāramārthikena rūpeṇa vikārātmakaṃ tatvaṃ na bhavati || tathā hi || astī na śakyatve vyavahartu satvopā¦dhikasya svarūpasya tatvasya bhāvayogāt tenātmanā vyavahārānavatārāt || nāpi nāstīty abhāvopādhikasyātathā pramāṇena bhāvātmakasya tatvasyāveditatvād

ekasaṃkhyopādhīyamānasvarūpam aviśeṣaṃ tatvaṃ na bhāta nirūpitas tatvasya vastutvābhinnasya tathātvād ekam ity apratīteḥ || nāpi pṛthaktvāhitaviśeṣaṃ tadbhinnasyāsatvāt_

nāpi saṃsargopādhikaṃ vibhāgopādhikaṃ vā tato dvitīyasya pramāṇenānupapatteḥ || kuto bhinnaṃ vibhaktaṃ ca kena vā saṃsṛṣṭaṃ syāt

parimāṇaniṣedhena vivartābhyupagamāt_ na vikṛtaṃ anekabhāvagrāmarūpatayā cādbhutasya vṛttyā vivartanād adhikṛtam ity ucyate vyavahartum iti sarvavyapadeśātītatvaṃ paraṃ brahma

atha ca tadātmikāviṣāyām avadhāryata ity āha |

tan nāsti vidyate tac ca tad ekaṃ tat pṛthak pṛthak || saṃsṛṣṭaṃ ca vibhaktaṃ ca vikṛtaṃ ta tad anyathā ||

bhāvābhāvādhikārāvabhāsajanaśakti tad evāsti ca sattāsattopādhikavyavahāramahāram ahaṃbhāvas tu niḥsattāsattaṃ niḥsadasat paraṃ brahma vyavahārikaṃ vaikānekavyavahāraṃ jātivyaktyātmanā tad eva vartayati saṃkhyopādhikam api ca evaṃ saṃoyogopādhikam api tu anyasaṃsargitayāvabhāsanāt || evaṃ vivekāvasāyas tatra tathā samastavikārātmanā janyamānam ivākāśādyātmanā kūṭasthayā tad evāvabhāsa iti tadātmaiva tatvam ity uktaṃ ||

evaṃ ca kṛtvā sarvasya tanmayatvād virodhino pi vyavahārās tatraivopalīyaṃta ity āha

tasya śabdārthasaṃbaṃdhaṃ rūpam ekasya dṛśyate || tad dṛśyadarśanaṃ draṣṭā darśane ca prayojanaṃ ||

vācyavācakasaṃbaṃdhānā bhāvato dvayarūpato tatra hy āṃtare tatvaśrutyarthaśaktī saṃsṛjyeta iti vivartadaśāyāṃ śrutyarthaśākhātmanā ta¦syaiva vikāsād vācyavācakarūpatayā bhedāvasāyau jñānajñeyaivabhidyeti brahmakāṃḍa eva prapaṃco yam artho smā¦bhir nirṇīta iti tata evāvadhāryaṃ ||

dṛśyarūpatayā tasyaiva vivartaḥ || tathā hi dṛśyaṃ tāvad bhāvajātaṃ saṃvidrūpārūḍha vedyatvād eva cedam ekam aparārthaprakāśasya prakāśatayā yogād iti pūrvakāṃḍe dvitīyasiddhau ca vitatya vicāritaṃ draṣṭāpi jīvātmā avidyākṛtāvachedo niyataḥ satvaṃ sārī bhoktā brahmaiva cetanatvād bhāvato bhedānupapatter iti | tatraivāveditaṃ || anena ca pradhānakartṛkarmarūpakārakaniścayena kārakatirasyāpekṣan_ si¦ddharūpo vivartaḥ pratipāditaḥ ||

darśanaśabdena ca pradhānakriyānirdeśakena kriyāṃtarasyāpekṣāt sādhyakriyā¦vivarto py uktaḥ kālaśaktyuvachinnā hi kriyāvivartaḥ || divaśaktyavachinnasya mūrtivivarta iti mūrtikriyā¦vivartarūpaṃ viśvaṃ pratipāditaṃ ||

prayojanaśabdena ca samatikriyāphala iti nidarśana iti sādhyasādhanaphalarūpatayā viśvaṃ sakalānāyām aśeṣavivartānuguṇyaṃ brahmaṇaḥ pratipāditaṃ || ekasya sarvabījasya ceyam anekadhā noktabhoktavyarūpeṇa bhogarūpeṇa sthitir iti brahmakāṃḍe pratipāditaṃ || tatraiva ca satatvanirṇayo smābhir vyavadhāyi prakhyopākhyātmakatvāt || vyavahārasya dvitve śabdārthasaṃbaṃdharūpaṃ tad dṛśyaṃ darśanaṃ ceti bhedenātra nirdeśaḥ etac cāviyyāmayaṃ rūpaṃ kathyete pāramārthikaṃ tu prakāśītaprapaṃcarūpaṃ vakṣyati || yatra iṣyāvasā dṛśyaṃ ca darśanaṃ cāvikalpitaṃ tasyaivārthasya śrityatvaṃ śritās traiṣyaṃtavedina ity

uktam idaṃ ākṛtisaṃhāre ṃte yad avatiṣṭhate tat satyam iti tatraitat syād ante na kiṃcid avatiṣṭhate asadam apadam evaitad viśram āvirbhavatīti āśaṃkyāpi hetunā'bhinnakāraṇapūrvakatvam anvayamukhena dṛṣṭāṃtopakramaṃ sādhayitum āha ||

vikārāpagame satyaṃ suvarṇaṃ kuṃḍale yathā || vikārāpagame satyāṃ tathāhuḥ prakṛtiṃ parām ||

kuṃḍalasvātmakavikārāpāye dve kuṃḍale suvarṇam ekaṃ satyam avatiṣṭhate yathā tathā pṛthivyādivikāravigame nvayinī prakṛtir abhinnā saty avatiṣṭhata iti upeyaṃ āhur ity āgamapramāṇasiddhatāṃ dhvanati brahmaṇaḥ || tathā coktaṃ || ekam eva yad āmnātaṃm iti || ātmaivedaṃ satyam iti hi śrutiḥ || upodbalamātraṃ cānumānaṃ hi tathā hi | nirupākhyād asato parāt prādurbhāvo na yuktaḥ || abhāvasya bhāvarūpatvavirodhān na hi śaśaśṛṃgāt kasyacid udbhavo dṛśyate || asti ca vijñānarūpatayā jagaty anvaya iti tatpūrvam evaitat || tathā ca vakṣyati || nā¦bhāvo jāyato bhāvo naikabhāvo nupākhyatām iti || tasya cidrūpasya cicchaktir apariṇāminīti vikārā¦bhāvān nedaṃ sāṃkhyanayavatpariṇāmadarśanaṃ || api tu vivartapakṣaḥ || viśeṣaś cānayor vākyapadīye smābhir vyākhyātam iti tata evāvadhāryaṃ ihāpi saṃbaṃdhasamuddeśe vakṣyate kāraṇāṃtaravyudāsaś cādvayasiddhau abhihita iti saty arthitve tata evāvagaṃtavyaḥ ||

tad evam ātmaśabdābhidheyasya brahmaṇaḥ padārthaparamārtharūpatvād dravyarūpatvam upapādya sarvaśabdavācyatvaṃ tasyaiva nigamiyitum āha |

vāyā sā sarvaśabdānāṃ śabdāś ca na pṛthak_ yataḥ | apṛthaktve ca saṃbaṃdhatayor nānātmanor iva ||

tattadupādhiparikalpitabhedabahutayā vyavahārasyāpi vidyābhūyastve pratiniyatākāro sthīyamānarūpabhedaṃ brahmaiva sarvaśabdaviṣaya ity ukto rtha ātmā brahma tatvam ityādayo pi hi¦ śabdāḥ samavalaṃbitopādhayo 'py ātmānam unu parivartaṃte nirupādhino vāgviṣayātītatvād vā manasātītaṃ¦ hi tattvam ity upadiśaṃti brahmavida kyayadiśabdāpekṣayā tv ātmādiśabdāḥ pratyāsannāḥ sarvasya ca tanmayatvāc chabdā api tadātmikāḥ | yathāvibhaktaṃ prāk_ abhede pi ca pāramārthikasaṃvṛto lokayātrāyāṃ bhedo satya itīvaśabdaḥ ata eva dvipsasaṃbaṃdhopapattiḥ ||

nanu ceṃdraijālam idraṃ padavivṛtarūpabhedānām api bhāvānām anāvṛtya tattvam avasīya¦mānāparamārthatopadeśanam ity āśaṃkya dṛṣṭāṃtenaitat sādhayitum āha ||

ātmā yadi priyo dveṣyo vakāvācyaṃ prayojanaṃ | viruddhāni yathaikasya svapne rūpāṇi cetasaḥ || ajanmani tathā nitye paurvāparyavivakṣite || tattve janmādirūpatvaṃ viruddham upalabhyate ||

svapnāvasthāgataḥ prapaṃco jāgarayā bādhyamānatvād asatya iti sarvavādyabhyupagamaḥ | tenaiva dṛṣṭāṃtena jāgarāyām api bhāvabhedapurītati daśāyām ananuvṛtter asatyo vasthāpyate || yat kila sarvāvasthāsv anugataṃ tad eva satyaṃ tac ca saṃvinmātraṃ rūpam abādhyamānam avasthābhedas tv āgamāpāyitvād bādhite sat sukhaduḥkhā¦divat || tathā hi rāgādayaḥ sukhādayaś cāsvabhāvatvāt saṃvinmātraṃ rūpaṃ na vikurvati | tathāvasthābhedo py anekākāramuṣyopahataḥ ||

tatra svapne viruddhakāro vairavo vaikalpikī dṛṣṭiḥ pratimātṛniyatā vaikalpikīti ko bhimāno vyāpārānusārī bhoktā samavabhāvatad acetanatvāt_ brahmaiva | tathā ca tāvati svātaṃtryānimittāpīśvaro pādānābhāvāt_ nābhāsyāpannakriyā priyāpriyarūpatayā rāgadveṣādimayena saṃsāramohena paravibhāgābhāgānusārī parasaṃkathādiṣu || tadāhuḥ | vedāṃtatatvanipuṇāḥ pravibhajyātmanātmānaṃ sṛṣṭvā bhāvāt pṛthagvidhā¦t sarveśvaraḥ sarvamayaḥ svapne bhoktā pravartate iti | bhokteti pratyagātmasṛṣṭir iyum uktā tasya ca sarveśvaratvāt || brahmarūpatve sṛṣṭisāmarthyam uktaṃ sarvamayatvāc cānanyopādānavicitrabhāvaracanām ātmopājñānam āhuḥ | ata eva pravibhajyātmanātmānam iti kartṛkarmabhedābhāvāc ca vaikalpikatvam asya sṛṣṭeḥ spaṣṭam uktaṃ || bāhyopādānā tu jāgarāyām aiśvarī sṛṣṭir viśvaśabdavācyā sarvapramātṛsādhāraṇī ||

sthitatvāt sthiratvagrahāvedānimittas tu bhedaḥ || avidyāpravṛttirūpatvāt punar asatyatā samānaiva kevalaṃ satyām avidyām aparo mohaś cichakter āvārako nidrā nāma tadvaśād atraiva bhaḥ || tatvābhimāne ryāgdaśā paramārthadaśāṃ tu jananamaraṇarahitaiḥ pravibhakte kūṭasthe parasmin brahmaṇi cidānaṃdarūpe sarvam eva jagaj jāgratsvapnāvasthāgataṃ mūrtikriyāvivartarūpaṃ sa sṛtsam anvayicitsāmānyamātraṃ tu paramārtha iti siddhaṃ viruddham upalabhyata iti vadann avidyāyāṃ virodham upaiti | etad eva hy avidyāyāḥ svarūpaṃ yad anupapadyamānam apy āsopagamaṃ nayati upalabdhatve vidyaiva syāt || tasmād asatyaprapaṃcaprakārānaśaktir brahmaṇo nādisiddhā grāhyagrāhakayugalasyānurūpam uparacanā jagalādyam ātanotīty avicāritaramaṇīyām imām apanayaṃti tatvadṛśaḥ ||

|| iti bhūtirājatanayahelārājakṛte prakīrṇaprakāśe dravyasamuddeśo dvitīyaḥ || || || 2 || ||