athātaḥ saṃpravakṣyāmi saṃpuṭodghātalakṣaṇam | yena vijñātamātreṇa sādhakaḥ siddhim āpnuyāt | sādhyasya nābhimūle tu hastenotpāṭayed vratī || 1 || herukapratirūpeṇādhyātmaka krūracetasā | bhāvanāmātrakenaiva buddho 'pi naśyate dhruvam || 2 || māraṇaṃ kriyate kṛpayā śrāvayitvā gurau munau | śāsanāyāpacārī ca gurubuddhasya nāśakaḥ || 3 || yatra dṛṣṭvā yathārūpam adhomukhaṃ tu bhāvayet | raktam udvamantaṃ caiva kampayantaṃ samūrdhajam || 4 || tasya mārge sūcīṃ dhyāyāt praviśantīṃ vahnirūpiṇīm | hṛdaye hutāśanabījaṃ dṛṣṭvā mārayet tatkṣaṇāt || 5 || asmin tantre na hotavyaṃ mudrābandhakriyā na ca | paṭhitasiddhaṃ mahātantraṃ dhyānamātreṇa sidhyati || 6 || rahasyaṃ paramaṃ vakṣye śṛṇu devi varānane | bhavasya śodhanaṃ ramyam avikalpasiddhidāyakam || 7 || paśya devī mahāratnaṃ jvālāmālākulaṃ vapuḥ | ayogyaḥ syād aviddhena viddhaḥ san rucidāyakaḥ || 8 || tadvat saṃsārakaṃ ratnaṃ pañcakāmaguṇair yutam | aviśuddhaṃ viṣatāṃ yāti viśuddhaṃ pīyūṣavad bhavet || 9 || saṃsāraṃ herukākāraṃ jagaduttāraṇaṃ prabhum | yena rūpeṇa saṃbhūtaṃ tad ahaṃ vacmi śṛṇvatām || 10 || kṛpayā locane rakte kṛṣṇāṅgo maitricittataḥ | saṃgrahavastucatuṣkena catvāraś caraṇāḥ smṛtāḥ || 11 || aṣṭāsyā vimokṣā aṣṭau śūnyatāḥ ṣoḍaśabhujāḥ | mudreṇa pañcabuddhāḥ syuḥ kruddho duṣṭavineyataḥ || 12 || māṃsena pukkasī khyātā śavarī raktena kalpitā | caṇḍālī śukram ity uktaṃ ḍombī ca medamajjayoḥ || carma bodhyaṅgasaptaṃ tu asthi satyacatuṣṭayam || 13 || devy uvāca— mantroddhāraṃ bhavet kīdṛk kathayasva mahāsukha | yena mantreṇa jantūnāṃ karmāṇi yānti siddhitām || 14 || bhagavān āha mahāvajrī vajrasāravapur mahān | śṛṇu devi mahābhāge mantraṃ te kathayāmy aham || 15 || ādau vairocanaṃ dattvā ūṣmāṇāṃ ca caturthakam | pukkasīśobhanaṃ divyaṃ śūnyākrāntaṃ śuklavarṇam | svāhāntaṃ niyojayet | anena lakṣajāpena stambhayej jagat sarvadā || 16 || ādau varṇādhipaṃ dattvā tadanu khecarīṃ tataḥ | svāhāntaṃ yojitaṃ kṛtvā buddhān api vaśīkaret || 17 || vedānām ādimaṃ dattvā prathamasya dvitīyakam | śūnyaṃ svāhāntaṃ yojayed buddhānām apy uccāṭayet || 18 || ādau vairocanaṃ dattvā dvitīyasya tṛtīyakam | *rayuktaṃ vāribhūṣitaṃ śūnyaṃ svāhāntasaṃyuktam || dveṣayet sarvamānuṣān || 19 || *ādau varṇeśvaraṃ dattvā pañcamasya tṛtīyakam* | saśūnyaṃ ḍākinīyuktaṃ svāhāntam abhicārukam || 20 || varṇajyeṣṭhaṃ punar dattvā hūṃkāraraktasannibham | svāhāntaṃ kārṣayet sadya rambhādīnāṃ tilottamām || 21 || ādau mohakulaṃ dattvā ghukāraṃ saṃprayojayet | svāhāntaṃ ca punaḥ kṛtvā mārayet suramānuṣān || 22 || prathamasya prathamaṃ tu *vajraḍākinīyogitam | ādau vairocanaṃ dattvā antasthānāṃ dvitīyakam || 23 || vajraḍākinīsaṃyuktaṃ punaḥ prathamasyāgrakam* | vajraḍākinīsaṃyuktaṃ antasthānāṃ tṛtīyakam || 24 || punas tenaiva saṃyuktam upari caurībhūṣitam | hrīḥkāraṃ yojayet tatra svāhāntaṃ punar ācaret | kurukullāmantraḥ || 25 || oṃkārādi caturthasya tṛtīyaṃ caurībhūṣitam | antasthānāṃ caturthakaṃ picuvajraprayojitam || 26 || ūṣmāṇāṃ ca caturthakaṃ pukkasyāś ca vibhūṣitam | śūnyākrāntaṃ triguṇitaṃ pañcamasya dvitīyakam | tṛtīyasya prathamaṃ svāhāntaṃ hevajrasya hṛdayam || 27 || vairocanādi jvalajvalayojitaṃ pañcamasya caturthaṃ tu | antasthānāṃ prathamena yuktaṃ ghasmarībhūṣitam || 28 || uṣmāṇāṃ ca caturthakaṃ vajraḍākinībhūṣitam | śūnyākrāntaṃ triguṇitaṃ pañcamasya dvitīyakam | tṛtīyasya prathamaṃ svāhāntaṃ caturbhujasya mantraḥ || 29 || vairocanādi prathamasya ca prathamam abhyantaragaurīśobhitam | tṛtīyasya ca prathamam abhyantaragaurībhūṣitam || 30 ||

dviguṇīkṛtya pañcamasya tṛtīyaṃ dvitīyasya tṛtīyaṃ vahnibhūṣitam | hūṃkāratrayayojitam | pañcamasya dvitīyaṃ tṛtīyasya prathamaṃ svāhāntaṃ ṣaḍbhujasya mantraḥ || 31 ||

vairocanādi caturthasya prathamaṃ hutāśanasaṃyuktaṃ vetālīvibhūṣitam | antasthānāṃ tṛtīyakaṃ ghasmarībhūṣitam | prathamasya prathamam antasthānāṃ prathamena yuktaṃ vajrābhūṣitam || 32 ||

kṣakāraṃ caurībhūṣitam | pañcamasya prathamam | ūṣmāṇāṃ caturthakaṃ vajraḍākinībhūṣitam | śūnyākrāntaṃ triguṇitaṃ phaṭ svāhāntaṃ dvibhujasya || 33 ||

nairātmyā prathamasya prathamaṃ dvitīyasya prathamaṃ tṛtīyasya prathamaṃ caturthasya prathamaṃ pañcamasya prathamam antasthānāṃ prathamam ūṣmāṇāṃ prathamaṃ vairocanādi svāhāntam | purakṣobhanamantro lakṣajāpaḥ || 34 ||

antasthānāṃ dvitīyaṃ tu kṣakāradvayam | *madhye punar antasthānāṃ dvitīyakam* | hūṃkāratrayaṃ vairocanādi phaṭkāravidarbhitaṃ svāhāntam | bhūmiśodhanamantraḥ || 35 ||

vairocanādi tadanu vajrā hūṃkārāntam | khānapānādhiṣṭhānamantraḥ || 36 ||

vairocanādi tadanu akāro mukham | ūṣmāṇāṃ tṛtīyakam | antasthānāṃ caturthakaṃ upari vahnibhūṣitam | dharmāṇāṃ tadanu vajrā cādyanutpannatvāt oṃ āḥ hūṃ phaṭ svāhā | sarvabhautikabalimantraḥ || 37 ||

mantroddhārapaṭalo navamaḥ ||