vajragarbha āha— gaganavat sarvadharmeṣu sāgare tumbikā yathā | sattvāḥ kathaṃ sidhyante sveṣṭadevatarūpataḥ || 1 || bhagavān āha— nairātmyāyogayuktena athavā śrīherukodyataḥ | kṣaṇam apy anyacittaḥ san na tiṣṭhet siddhikāṅkṣakaḥ || 2 || prathamābhyāsakālasya sthānaṃ vai kalpitaṃ śubham | yatrasthaḥ sidhyate mantrī ekacittaḥ samāhitaḥ || 3 || svagṛheṣu niśākāle siddho 'ham iti cetasā | bhāvayed yoginīṃ prājño 'thavā śrīherukākṛtim || 4 || aṅghriṃ prakṣālayan bhuñjann ācaman pūga bhakṣayan | candanair hastaṃ mardayan kaupinaiś chādayan kaṭim || 5 || niḥsaran bhāṣayan bhāṣāṃ gacchaṃs tiṣṭhan ruṣan hasan | bhagavatīṃ sevayan prājño yoginīṃ bhāvayed vratī || 6 || kṣaṇam apy anyarūpeṇa avidyāduṣṭacetasā | na sthātavyaṃ budhair yatnāt siddhyarthaṃ siddhikāṅkṣibhiḥ || 7 || vajragarbha mayākhyātaṃ dhyānaṃ kilbiṣanāśanam | siddhyarthaṃ kautukenāpi pakṣam ekaṃ parīkṣatām || 8 || sarvacintāṃ parityajya devatāmūrticetasā | dinam ekam avicchinnaṃ bhāvayitvā parīkṣatha || 9 || nānyopāyo 'sti saṃsāre svaparārthaprasiddhaye | sakṛd abhyāsitā vidyā sadyaḥ pratyayakāriṇī || 10 || bhayonmādais tathā duḥkhaiḥ śokapīḍādyupadravaiḥ | rāgadveṣamahāmohaiḥ sādhako naiva kliśyate || 11 || evaṃ vimṛṣyamāṇā vai hitāhitaphalodayam | kathaṃ te kṣaṇam apy ekaṃ yoginaḥ santi raurave || 12 || pañcānantaryakārī ca prāṇivadhe ratāś ca ye | api tu ye janmahīnā ye mūrkhāḥ krūrakarmiṇaḥ || 13 || kurūpā vikalagātrāś ca sidhyante te 'pi cintayā | daśakuśalābhyāsī ca gurubhakto jitendriyaḥ || 14 || mānakrodhavinirmuktaḥ sa tāvat sidhyate dhruvam | satatābhyāsayogena siddhilabdhaḥ samāhitaḥ || 15 || māsam ekaṃ cared guptaṃ yāvan mudrā na labhyate | ādeśaṃ labhate mantrī yoginībhir ādiśyate || 16 || gṛhītvā amukīṃ mudrāṃ sattvārthaṃ kuru vajradhṛk | tāṃ ca prāpya viśālākṣīṃ rūpayauvanamaṇḍitām || 17 || sihlakarpūrasaṃyuktāṃ bodhicittena saṃskaret | daśakuśalād ārabhya tasyāṃ dharmaṃ prakāśayet || 18 || devatārūpacittaṃ ca samayaṃ caikacittatām | māsam ekena bhavyā sā bhaven naivātra saṃśayaḥ || 19 || varalabdhā yato nārī sarvasaṃkalpavarjitā | athavā cātmanaḥ śaktyā kṛṣṭvā mudrāṃ prakalpayet || 20 || devāsuramanuṣyebhyo yakṣebhyaḥ kinnarād api | tāṃ ca gṛhya carec caryām ātmano dhairyapratyayāt || 21 || na caryā bhogataḥ proktā yā khyātā bhīmarūpiṇī | svacittapratyavekṣāya sthiraṃ kiṃ vā calaṃ manaḥ || 22 || vajragarbha āha— nairātmyāyogayuktena mudrātvaṃ viśiṣyate katham | mudrayā mudrayā dvābhyāṃ mudrāsiddhiḥ kathaṃ bhavet || 23 || bhagavān āha— strīrūpaṃ vihāyānyad rūpaṃ kuryād bhagavataḥ | stanaṃ hṛtvā bhaved bolaṃ kakkolamadhyasaṃsthitam || tīradvayaṃ bhaved ghaṇṭā kiñjalkaṃ bolakaṃ bhavet | śeṣarūpaṃ mahātmāno herukasya mahārateḥ || 25 || herukayogasya puṃsaḥ puṃstvam āyāty ayatnataḥ | mudrāsiddhir bhavet tasmād vyaktaśaktasya yoginaḥ || 26 || utpattipralayābhyāṃ ca prajñopāyaṃ na bādhyate | upāyaḥ sambhavo yasmāl layaṃ prajñā bhavāntakī || 27 || tena pralayaṃ nāsyāsti utpādo naiva tattvataḥ | pralayāl līyate kaścil layābhāvān na ca kṣayaḥ || 28 || utpattikramayogena prapañcaṃ bhāvayed vratī | prapañcaṃ svapnavat kṛtvā prapañcair niṣprapañcayet || 29 || yathā māyā yathā svapnaṃ yathā syād antarābhavam | tathaiva maṇḍalaṃ bhāti sātatyābhyāsayogataḥ || 30 || mahāmudrābhiṣekeṣu yathā jñātaṃ mahat sukham | tasyaivaitat prabhāvaḥ syān maṇḍalaṃ nānyasambhavam || 31 || sukhaṃ kṛṣṇaṃ sukhaṃ pītaṃ sukhaṃ raktaṃ sukhaṃ sitam | sukhaṃ śyāmaṃ sukhaṃ nīlaṃ sukhaṃ kṛtsnaṃ carācaram || 32 || sukhaṃ prajñā sukhopāyaḥ sukhaṃ kundurujaṃ tathā | sukhaṃ bhāvaḥ sukhābhāvo vajrasattvaḥ sukhaḥ smṛtaḥ || 33 || vajragarbha āha— utpannakramayogo 'yaṃ satsukhaṃ mahāsukhaṃ matam | utpanno bhāvanāhīno utpattyā kiṃ prayojanam || 34 || bhagavān āha— aho śraddhāvegena naṣṭo mahābodhisattva iti | dehābhāve kutaḥ saukhyaṃ saukhyaṃ vaktuṃ na śakyate | vyāpyavyāpakarūpeṇa sukhena vyāpitaṃ jagat || 35 || yathā puṣpāśritaṃ gandhaṃ puṣpābhāvān na gamyate | tathā rūpādyabhāvena saukhyaṃ naivopalabhyate || 36 || bhāvo 'haṃ naiva bhāvo 'haṃ buddho 'haṃ vastubodhanāt | māṃ na jānanti ye mūḍhāḥ kausīdyopahatāś ca ye || 37 || vihare 'haṃ sukhāvatyāṃ sadvajrayoṣidbhage | ekārākṛtirūpe tu buddharatnakaraṇḍake || 38 || vyākhyātāham ahaṃ dharmaḥ śrotāhaṃ svagaṇair yutaḥ | sādhyo 'haṃ jagataḥ śāstā loko 'haṃ laukiko 'py aham || 39 || sahajānandasvabhāvo 'haṃ paramāntaviramādikam | tathā ca pratyayaṃ putra andhakāre pradīpavat || 40 || dvātriṃśallakṣaṇī śāstā aśītyanuvyañjanī prabhuḥ | yoṣidbhage sukhāvatyāṃ śukranāmnā vyavasthitaḥ || 41 || vinā tena na saukhyaṃ syāt saukhyaṃ hitvā bhaven na saḥ | sāpekṣam asamarthatvād devatāyogataḥ sukham || 42 || tasmād buddho na bhāvaḥ syād abhāvarūpo 'pi naiva saḥ | bhujamukhākārarūpī ca arūpī paramasaukhyataḥ || 43 || tasmāt sahajaṃ jagat sarvaṃ sahajaṃ svarūpam ucyate | svarūpam eva nirvāṇaṃ viśuddhyākāracetasā || 44 || devatārūpayogaṃ tu jātamātre vyavasthitam | bhujamukhavarṇasaṃsthānāt kiṃtu prākṛtavāsanā || 45 || yenaiva viṣakhaṇḍena mriyante sarvajantavaḥ | tenaiva viṣatattvajño viṣeṇa sphoṭayed viṣam || 46 || yathā vātagṛhītasya māṣabhakṣyaṃ pradīyate | vātena hanyate vātaṃ viparītauṣadhikalpanāt | bhavaḥ śuddho bhavenaiva vikalpaṃ pratikalpataḥ || 47 || karṇe toyaṃ yathā viṣṭaṃ pratitoyena kṛṣyate | tathā bhavavikalpo 'pi ākāraiḥ śodhyate khalu || 48 || yathā pāvakadagdhāś ca svidyante vahninā punaḥ | tathā rāgāgnidagdhāś ca svidyante rāgavahninā || 49 || yena yena hi badhyante jantavo raudrakarmaṇā | sopāyena tu tenaiva mucyante bhavabandhanāt || 50 || rāgeṇa badhyate loko rāgeṇaiva vimucyate | viparītabhāvanā hy eṣā na jñātā buddhatīrthikaiḥ || 51 || kundureṣu bhavet pañca pañcabhūtasvarūpataḥ | eka eva mahānandaḥ pañcatāṃ yānti bhedanaiḥ || 52 || bolakakkolayogena sparśāt kāṭhinyavāsanā | kaṭhinasya mohadharmatvān moho vairocano mataḥ || 53 || bodhicittaṃ dravaṃ yasmād dravam abdhātukaṃ matam | apām akṣobhyarūpatvād dveṣo akṣobhyanāyakaḥ || 54 || dvayor gharṣaṇasaṃyogāt tejo jāyate sadā | rāgo 'mitābhavajraḥ syād rāgas tejasi sambhavet || 55 || kakkolake yac cittaṃ tat samīraṇarūpakam | īrṣyā amoghasiddhiḥ syād amogho vāyusambhavaḥ || 56 || sukhaṃ rāgaṃ bhaved raktaṃ raktir ākāśalakṣaṇā | ākāśaṃ piśunavajraḥ syāt piśunam ākāśasambhavam || 57 || ekam eva mahac cittaṃ pañcarūpeṇa lakṣitam | pañcasu kuleṣūtpannās tatrānekasahasraśaḥ || 58 || tasmād ekasvabhāvo 'sau mahāsukhaḥ paramaśāśvataḥ | pañcatāṃ yāti bhedena rāgādipañcacetasā || 59 || daśagaṅgānadivālukatulyā ekakuleṣu tathāgatasaṅghāḥ | saṅghakuleṣu anekakulāni teṣu kuleṣu kulāni śatāni || 60 || tāni ca lakṣakulāni mahānti koṭikuleṣu asaṃkhya bhavanti | tatra kuleṣu asaṃkhyakulāni paramānandakulodbhavāni || 61 ||

hevajre ḍākinījālaśaṃvare siddhinirṇayanāmā dvitīyaḥ paṭalaḥ || ||