atha cchommāpaṭalaṃ vyākhyāsyāmaḥ— yena vijñāyate bhrātā bhaginī cāpi saṃśayaḥ || 1 ||

ekāṅguliṃ darśayed yas tu dvābhyāṃ susvāgato bhavet | kṣemamudrāṃ vijānīyād vāmāṅguṣṭhanipīḍanāt || 2 || anāmikāṃ tu yo dadyād dadyāt tasya kaniṣṭhikām | madhyamāṃ darśayed yas tu dadyāt tasya pradeṣikām || 3 || anāmikāṃ darśayed yas tu grīvāṃ tasya pradarśayet | paṭṭisaṃ darśayed yas tu triśūlaṃ tasya pradarśayet || 4 || stanaṃ darśayed yas tu sīmāntaṃ tasya pradarśayet | medinīṃ darśayed yas tu cakraṃ tasya pradarśayet || 5 || bhṛkuṭīṃ darśayed yas tu śikhāmokṣo 'bhidhīyate | lalāṭaṃ darśayed yas tu pṛṣṭhaṃ tasya pradarśayet || 6 || pādatalaṃ darśayed yas tu krīḍate nandakena tu | mudrāṃ pratimudreṇa bhedayet samayena tu || 7 || vadanti yoginyas tatra aho putra mahākṛpa | yadi mālāhastaṃ darśayanti militavyam iti kathayanti || 8 || mālābhipreṣitaṃ kṛtvā samaye tiṣṭha suvrata | bāhye tatra melāyāṃ divyagocaram āśritāyām | tatra melāyāṃ yad yad vadanti yoginyas tat sarvaṃ kartavyam || 9 ||

he bhagavan ke te melāpakasthānāḥ | bhagavān āha— pīṭhaṃ copapīṭhaṃ ca kṣetropakṣetram eva ca | chandohaṃ copacchandohaṃ melāpakopamelāpakaṃ tathā || 10 ||

pīlavopapīlavaṃ caiva śmaśānopaśmaśānaṃ ca etā dvādaśa bhūmayaḥ || daśabhūmīśvaro nātha ebhir anyair na kathyate || 11 ||

he bhagavan ke te pīṭhādayaḥ | bhagavān āha— pīṭhaṃ jālandharaṃ khyātam uḍḍyāyanaṃ tathaiva ca | pīṭhaṃ porṇagiriṃ caiva kāmarūpaṃ tathaiva ca || 12 ||

upapīṭhaṃ mālavaṃ proktaṃ sindhur nagaram eva ca | kṣetraṃ munmuni khyātaṃ kṣetraṃ kāruṇyapāṭakam | devikoṭaṃ tathā kṣetraṃ kṣetraṃ karmārapāṭakam || 13 || upakṣetraṃ kulatā proktam arbudaṃ ca tathaiva ca | godāvarī himādriś ca upakṣetraṃ hi saṃkṣipet || 14 || chandohaṃ harikelaṃ ca lavaṇasāgaramadhyajam | lampākaṃ kāñcikaṃ caiva saurāṣṭraṃ ca tathaiva ca || 15 || kaliṅgam upacchandohaṃ dvīpaṃ cāmīkarānvitam | koṅkaṇaṃ copacchandohaṃ samāsenābhidhīyate || 16 || pīlavaṃ grāmāntasthaṃ pīlavaṃ nagarasya ca | caritraṃ kośalaṃ caiva vindhyā kaumārapaurikā | upapīlavaṃ tatsanniveśaṃ vajragarbha mahākṛpa || 17 || śmaśānaṃ pretasaṃhātaṃ śmaśānaṃ codadhes taṭam | udyānaṃ vāpikātīram upaśmaśānaṃ nigadyate || 18 || divasaṃ caiva pravakṣyāmi yoginīnāṃ sumelakam | hevajre yoginītantre sarvasattvārthahetunā || 19 ||

he bhagavan ke te divasāḥ | bhagavān āha— pretapakṣe caturdaśyām aṣṭamyāṃ ca tathaiva ca || 20 ||

dhvajaṃ śastrahataṃ caiva saptāvartaṃ ca khādyate | kṛpām utpādya yatnena māraṇaṃ kriyate viduḥ || 21 || kṛpāhīnā na sidhyanti tasmāt karuṇām upārjayet | duṣṭāvatāraṇe sarvo vidhir mukhyāt pratiṣidhyate || 22 ||

tatraivaṃ mantavyam | dinas tu bhagavān vajrī naktaṃ prajñā prakalpyate || 23 ||

nākāryaṃ vidyate kiñcin nābhakṣyaṃ vidyate sadā | nācintyaṃ vidyate hy atra nāvācyaṃ yac chubhāśubham || 24 || yathātmani tathā sattve tathātmani ahaṃ param | iti sañcintya yogātmā khānapānādim ārabhet || 25 || yāvanto hy aṅgavikṣepā vacasaḥ prasarāṇi ca | tāvanto mantramudrāḥ syuḥ śrīherukapade sthite || 26 || śrīkāram advayaṃ jñānaṃ heti hetvādiśūnyatā | rukārāpagataṃ vyūhaṃ ka iti na kvacit sthitam || 27 || yeṣāṃ yeṣāṃ tu jantūnāṃ piśitam aśnīyate budhaiḥ | te te sattvā vaśaṃ yānti vajrakapālayogataḥ || 28 ||

chommāpīṭhanirṇayapaṭalaḥ saptamaḥ || ||