ataḥ paraṃ pravakṣyāmi caryāṃ pāraṅgatāṃ varām | gamyate yena siddhāntaṃ hevajre siddhihetunā || 1 || bhāvakena vidhartavyaṃ karṇayor divyakuṇḍalam | śirasi cakrī dhartavyā hastayo rucakadvayam || 2 || kaṭyāṃ vā mekhalaṃ caiva pādayor nūpuraṃ tathā | bāhumūle ca keyūraṃ grīvāyām asthimālikā || 3 || paridhānaṃ vyāghracarma bhakṣaṇaṃ daśārdhāmṛtam | herukayogasya puṃso vihāraḥ pañcavarṇeṣu || 4 || pañcavarṇasamāyuktam ekavarṇan tu kalpitam | anekenaikavarṇena yasmād bhedo na lakṣyate || 5 || ekavṛkṣe śmaśāne vā bhāvanā kathyate śubhā | mātṛgṛhe tathā ramye 'thavā vijane prāntare || 6 || kiñcid ūṣme tu saṃprāpte caryāṃ kartuṃ yadīṣyate | siddhiṃ gantuṃ yadīcchāsti caryayā tv anayā caret || 7 || cāruvaktrāṃ viśālākṣīṃ rūpayauvanamaṇḍitām | nīlotpalaśyāmāṅgīṃ ca svābhiṣiktāṃ kṛpāvatīm | vajrakanyām imāṃ gṛhya caryāṃ kartuṃ vibudhyate || 8 ||

vajrakulābhāvāt sveṣṭadevakulena krīyate | athavānyakulodbhavā bodhibījanikṣepeṇa saṃskṛtām imāṃ gṛhṇīyat || 9 ||

yadi gītaṃ gīyata ānandāt tarhi vajrānvitaṃ param | yady ānande samutpanne nṛtyate mokṣahetunā | tarhi vajrapadaiḥ nāṭyaṃ kuryād yogī samāhitaḥ || 10 || akṣobhyaś cakrīrūpeṇāmitābhaḥ kuṇḍalātmakaḥ | ratneśaḥ kaṇṭhamālāyāṃ haste vairocanaḥ smṛtaḥ || 11 || mekhalāyāṃ sthito 'moghaḥ prajñā khaṭvāṅgarūpiṇī | ḍamarūpāyarūpeṇa yogī dveṣaviśuddhitaḥ || 12 || mantraviśuddhyā sthitā gītā nartanā bhāvanā smṛtā | tasmād gītañ ca nāṭyañ ca kuryād yogī sadā sadā || 13 || bhakṣitavyaṃ tu bhaiṣajyaṃ pātavyaṃ vāri nityatām | jarāmṛtyur na bādheta rakṣābhūtaḥ sadā bhavet || 14 || cauryakeśakṛtāṃ mukuṭīṃ tatra hūṁbhavo yojayet | pañcabuddhakapālāni dhartavyaṃ yogacaryayā || 15 || pañcāṅgulakapālakhaṇḍaṃ kṛtvā mukuṭyāṃ dhriyate sadā | kacaḍorī dvivetā ca prajñopāyasvabhāvataḥ | bhasma keśapavitraṃ ca yogī vibharti caryayā || 16 || jāpo ḍamarukaśabdaḥ prajñākhaṭvāṃgo bhāvanā | jāpyaṃ bhāvyaṃ bhaved etad vajrakapālacaryayā || 17 || lobhaṃ mohaṃ bhayaṃ krodhaṃ vrīḍākāryañ ca varjayet | nidrām ātmānam utsṛjya caryāṃ kuryān na saṃśayaḥ || 18 || śarīraṃ dānaṃ datvā ca paścāc caryāṃ samārabhet | bhāgābhāgavicāreṇa tasmād dānaṃ na dīyate || 19 || bhakṣyaṃ bhojyaṃ tathā pānaṃ yathāprāptaṃ tu bhakṣayet | grahaṇaṃ nātra karttavyaṃ iṣṭāniṣṭavikalpataḥ || 20 || bhakṣyābhakṣyavicāraṃ tu peyāpeyaṃ tathaiva ca | gamyāgamyaṃ tathā mantrī vikalpaṃ naiva kārayet || 21 || siddhilabdho 'pi yaḥ śiṣyaḥ samyagjñānāvabhāsakaḥ | abhivandayati guruṃ siddho 'vīcyā tyājyahetunā || 22 || śikṣādīkṣāvinirmukto lajjākāryaṃ tathaiva ca | sarvabhāvasvabhāvena vicared yogī mahākṛpaḥ || 23 || homayāgatapo'tīto mantradhyānavivarjitaḥ | samayasaṃvaravinirmuktaś caryāṃ kurute suyogavān || 24 || śakratulyo 'pi yo daityaḥ purato bhavati niścitam | bhayaṃ tatra na kurvīta siṃharūpeṇa paryaṭet || 25 || karuṇā pīyate nityaṃ sarvasattvārthahetunā | yogapānarato yogī nānyapānena majjanam || 26 ||

caryāpaṭalaḥ ṣaṣṭḥaḥ |