ataḥ paraṃ pravakṣyāmi caryāṃ pāraṅgatāṃ varām | gamyate yena siddhāntaṃ hevajre siddhihetunā || 1 || bhāvakena vidhartavyaṃ karṇayor divyakuṇḍalam | śirasi cakrī vidhartavyā hastayo rucakadvayam || 2 || kaṭyāṃ mekhalaṃ caiva pādayor nūpuraṃ tathā | bāhumūle ca keyūraṃ grīvāyām asthimālikā || 3 || paridhānaṃ vyāghracarmaṃ ca bhakṣaṇaṃ daśārdhāmṛtam | herukayogasya puṃso viharaṇaṃ pañcavarṇasu || 4 || pañcavarṇasamāyuktam ekavarṇaṃ tu kalpitam | anekenaikavarṇena yasmād bhedo na lakṣyate || 5 || ekavṛkṣe śmaśāne vā bhāvanā kathyate śubhā | mātṛgṛhe tathā rātrau 'thavā vijane prāntare || 6 || kiñcid ūṣme tu saṃprāpte caryāṃ kartuṃ yadīṣyate | siddhiṃ gantuṃ yadīcchāsti caryayā tv anayā caret || 7 || cāruvaktrāṃ viśālākṣīṃ svābhiṣiktāṃ kṛpāvatīm | vajrakanyām imāṃ gṛhya caryāṃ kartuṃ tu budhyate || 8 ||

vajrakulābhāvāt sveṣṭadevatāyāḥ kulena kriyate | athavānyakulodbhavāṃ bodhibījanikṣepeṇa saṃskṛtām gṛhya || 9 ||

yadi gītaṃ gīyata ānandāt tarhi vajrānvitaṃ param | yady ānande samutpanne nṛtyate mokṣahetunā | tarhi vajrapadair nāṭyaṃ kurute yogī samāhitaḥ || 10 || akṣobhyaś cakrirūpeṇāmitābhaḥ kuṇḍalātmakaḥ | ratneśaḥ kaṇṭhamālāyāṃ haste vairocanaḥ smṛtaḥ || 11 || mekhalāyāṃ sthito 'moghaḥ prajñā khaṭvāṅgarūpiṇī | ḍamarukopāyarūpeṇa yogī dveṣaviśuddhitaḥ || 12 || mantraviśuddhyā sthitā gītā nartanā bhāvanā smṛtā | tasmād gītaṃ ca nāṭyaṃ ca kurute yogī sadā sadā || 13 || bhakṣitavyaṃ tu bhaiṣajyaṃ pātavyaṃ vāri nityatām | jarāmṛtyur na bādheta rakṣābhūtaḥ sadā bhavet || 14 || cauryakeśakṛtā mukuṭī tatra hūṁbhava yojayet | pañcabuddhakapālāni dhartavyaṃ yogacaryayā || 15 || pañcāṅgulakapālakhaṇḍaṃ kṛtvā mukuṭyāṃ dhriyate sadā | kacaḍorī dviveḍhā ca prajñopāyasvabhāvataḥ | bhasma keśapavitraṃ ca yogī vibharti caryayā || 16 || jāpaṃ ḍamarukāśabdaṃ prajñā khaṭvāṃgabhāvanā | jāpyaṃ bhāvyaṃ bhaved etad vajrakāpālacaryayā || 17 || lobhaṃ mohaṃ bhayaṃ krodhaṃ vrīḍāṃ kāryaṃ ca varjayet | nidrām ātmānam utsṛjya caryā kriyate na saṃśayaḥ || 18 || śarīraṃ dānaṃ dattvā paścāc caryāṃ samārabhet | bhāgābhāgavicāreṇa tasmād dānaṃ na dīyate || 19 || bhakṣyabhojyaṃ tathā pānaṃ yathāprāptaṃ tu bhakṣayet | graham atra na kartavyaṃ miṣṭāmiṣṭavikalpataḥ || 20 || bhakṣyābhakṣyavicāraṃ tu peyāpeyaṃ tathaiva ca | gamyāgamyaṃ tathā mantrī vikalpaṃ naiva kārayet || 21 || siddhilabdho 'pi yaḥ śiṣyaḥ samyagjñānāvabhāsakaḥ | abhivandayati guruṃ siddho 'vīcyās tyājyahetunā || 22 || śikṣādīkṣāvinirmukto lajjākāryaṃ tathaiva ca | sarvabhāvasvabhāvena vicared yogī mahākṛpaḥ || 23 || homayāgatapotīto mantradhyānavivarjitaḥ | samayasaṃvaravinirmuktaś caryāṃ kurute suyogavān || 24 || śakratulyo 'pi yo daityaḥ purato bhavati niścitam | bhayaṃ tatra na kurvīta siṃharūpeṇa paryaṭet || 25 || karuṇā pīyate nityaṃ sarvasattvārthahetunā | yogapānarato yogī nānyapānena majjanam || 26 ||

caryāpaṭalaḥ ṣaṣṭḥaḥ || ||