devatāpaṭalaṃ vyākhyāsyāmaḥ— prathamaṃ bhāvayen maitrīṃ dvitīye karuṇāṃ tathā | tṛtīye bhāvayen modaṃ upekṣāṃ sarvaśeṣataḥ || 1 || tasmāt punar api prathamaṃ śūnyatābodhiṃ dvitīyaṃ bījasaṃgraham | tṛtīyaṃ bimbaniṣpattiṃ caturthaṃ nyāsam akṣaram || 2 || repheṇa sūryaṃ purato vibhāvya tasmin nābhau hūṃbhavaviśvavajram | tenaiva vajreṇa vibhāvayec ca prākārakaṃ pañjarabandhanaṃ ca || 3 || prathamaṃ bhāvayen mṛtakaṃ dharmadhātvātmakaṃ viduḥ | yogī tasyopari sthitvā herukatvaṃ vibhāvayet || 4 || tataḥ svahṛdi bhāvayed rephaṃ tadbhavaṃ sūryamaṇḍalam | tatraiva hūṁkṛtiṃ caiva prajñopāyasvabhāvakam || 5 || kṛṣṇavarṇaṃ mahāghoraṃ hūṁkāraṃ vajrasambhavam | vajravaraṭakamadhyasthaṃ hūṁtattvaṃ vibhāvayet || 6 || punaḥ | hūṁkārapariṇataṃ dṛṣṭvā dveṣātmakaṃ vibhāvayet | vajrajanmamahākṛṣṇaṃ nīlapaṅkajasannibham | athavā nīlāruṇābhaṃ ca bhāvayec chandayā khalu || 7 || vyomni bhaṭṭārakaṃ dṛṣṭvā vajrajanmamahākṛpam | pūjayed aṣṭadevībhiḥ sarvālaṅkāradhāribhiḥ || 8 || caurī mṛgalāñchanadhartrī gaurī mārtaṇḍabhājanam | vetālī vārihastā ca bhaiṣajyadhartrī ghasmarī || 9 || pukkasī vajrahastā ca śavarī rasadharī tathā | caṇḍālī ḍamaruṃ vādya etābhiḥ pūjyate prabhuḥ | ḍombyāliṅgitakandharo mahārāgānurāgitaḥ || 10 || candrālikālimārtaṇḍaṃ bījaṃ madhyagataṃ bhavet | sa eva sattva ity āhuḥ paramānandasvabhāvakaḥ || 11 || visphuranti svadehābhāḥ gaganamaṇḍalacchādakāḥ | saṃhāryānayed hṛdaye yogī dveṣātmako bhavat || 12 || nīlāruṇābhavarṇena raktabandhukanetravān | piṅgordhvakeśavartaś ca pañcamudreṇālaṅkṛtaḥ || 13 || cakrī kuṇḍala kaṇṭhī ca haste rucakamekhalā | pañcabuddhaviśuddhyā ca etā mudrāḥ prakīrtitāḥ || 14 || kruddhadṛṣṭir vyāgracarmā sa dviraṣṭavarṣākṛtiḥ | vāme vajrakapālaṃ ca khaṭvāṅgaṃ cāpi vāmataḥ | dakṣiṇe kṛṣṇavajraṃ ca hūṁkāroccāraṇātmakaḥ || 15 || śmaśāne krīḍate nātho 'ṣṭayoginībhiḥ parivṛtaḥ | śvasatīty anayā yuktyā śmaśānety abhidhīyate || 16 ||

caturbhujaś caturmāranirjitaviśuddhitaḥ | pūrvoktavarṇarūpo hūṁbhavaḥ prathamavāmabhuje narakapālaṃ devāsurānāṃ raktena pūritaṃ prathamadakṣiṇabhuje vajraṃ śeṣadvibhujābhyāṃ prajñāliṅgitaḥ | vajravārāhī prajñā bhagavadrūpiṇī || 17 ||

ṣaḍbhujas trimukho vāmaṃ raktaṃ dakṣiṇaṃ candrāruṇābhaṃ prathamaṃ nīlam | nagnoḥ (gnaḥ) pūrvoktavarṇarūpo bhujānāṃ ṣaṭpāramitāviśuddhiḥ | prathamavāmabhuje triśūlaṃ prathamadakṣiṇabhuje vajraṃ vāmadvitīyabhuje ghaṇṭā dakṣiṇadvitīyabhuje kartiḥ | śeṣadvibhujābhyāṃ vajraśṛṅkhalāsamāpannaḥ | yadvad bhagavān tadvat prajñā | savyāpasavye kartṛkapālam | traidhātukātmakamṛtakākrāntaḥ || 18 ||

sarvatathāgatakāyavākcittahevajradevatāpaṭalas tṛtīyaḥ ||