evaṃ mayā śrutam | ekasmin samaye bhagavān sarvatathāgatakāyavākcittahṛdayavajrayoṣidbhageṣu vijahāra || 1 ||

tatra bhagavān āha sarvatathāgatakāyavākcittahṛdayaṃ bhaṭṭārakaṃ guhyātiguhyataram | aho vajragarbha sādhu sādhu mahākṛpa mahābodhisattva vajrasattvasya mahāsattvasya mahāsamayasattvasya hṛdayaṃ hevajrākhyaṃ śṛṇu || 2 ||

vajragarbha uvāca— vajrasattvo bhavet kasmān mahāsattvo bhavet katham | samayasattvo bhavet kena kathayatu bhagavān mayi || 3 || bhagavān āha— abhedyaṃ vajram ity uktam sattvaṃ tribhavasyaikatā | anayā prajñayā yuktyā vajrasattva iti smṛtaḥ || 4 || mahājñānarasaiḥ pūrṇo mahāsattveti nigadyate | nityaṃ samayapravṛttatvāt samayasattvo 'bhidhīyate || 5 || vajragarbha uvāca— hevajraṃ tu bhavet kena īdṛśaṃ nāmasaṃgraham | hekāreṇa kim ākhyātaṃ vajreṇāpi tathā kimu || 6 || bhagavān āha— hekāreṇa mahākaruṇā vajraṃ prajñā ca bhaṇyate | prajñopāyātmakaṃ tantraṃ tan me nigaditaṃ śṛṇu || 7 || dṛṣṭyākrṣṭimahācchomaṃ sāmarthyaṃ bahuvidhaṃ viduḥ | stambhanoccāṭanaṃ caiva sainyastambhābhicārukam || 8 || yoginīnāṃ yathānyāyam utpattisthitikāraṇam | sāmarthyaṃ jñānavijñānaṃ devatānāṃ yathodayam || 9 || prathamaṃ tāvad bhaved ekaṃ herukotpattikāraṇam | bhāvenaiva vimucyante vajragarbha mahākṛpa || 10 || badhyante bhāvabandhena mucyante tatparijñayā | bhāvaṃ bhāvyaṃ bhavet prājña abhāvaṃ ca parijñayā | tadvad dherukaṃ bhāvyam abhāvaṃ ca parijñayā || 11 || dehasthaṃ mahājñānaṃ sarvasaṃkalpavarjitam | vyāpakaḥ sarvavastūnāṃ dehastho 'pi na dehajaḥ || 12 || vajragarbha uvāca—he bhagavan | vajradehe katamā nāḍyaḥ | bhagavān āha—dvātriṃśan nāḍyaḥ | dvātriṃśad bodhicittāvahā mahāsukhasthāne sravantyaḥ | tāsāṃ madhye trīṇi nāḍyaḥ pradhānāḥ lalanā rasanāvadhūtī ceti || 13 || lalanā prajñāsvabhāvena rasanopāyena saṃsthitā | avadhūtī madhyadeśe tu grāhyagrāhakavarjitā || 14 || akṣobhyāvahā lalanā rasanā raktavāhā tathā | prajñācandrāvahākhyātāvadhūtī sā prakīrtitā || 15 || abhedyā sūkṣmarūpā ca divyā vāmā tu vāmanī | kūrmajā bhāvakī sekā doṣā viṣṭā ca mātarā || 16 || sarvarī śītadā coṣmā lalanāvadhūtī rasanā | pravaṇā kṛṣṇavarṇā ca sāmānyā hetudāyikā || 17 || viyogā premaṇī siddhā pāvakī sumanās tathā | tṛvṛttā kāminī gehā caṇḍikā māradārikā || 18 ||

vajragarbha uvāca—etā dvātriṃśan nāḍyo bhagavan kīdṛśāḥ || 19 ||

bhagavān āha— tribhavapariṇatāḥ sarvā grāhyagrāhakavarjitāḥ | athavā sarvopāyena bhāvalakṣaṇakalpitāḥ || 20 ||

saṃvarabhedaś ca kathyate | ālikāli prajñopāya | dharmasambhoganirmāṇa kāyavākcittam || 21 ||

evaṃ mayā | ekāreṇa locanādevī vaṃkāreṇa māmakī smṛtā | makāreṇa pāṇḍarādevī yākāreṇa tāriṇī smṛtā || 22 ||

nirmāṇacakre padmaṃ catuḥṣaṭidalaṃ | dharmacakre aṣṭadalam | sambhogacakre ṣoḍaśadalam | mahāsukhacakre dvātriṃśaddalaṃ | cakrasaṃkhyākrameṇa vyavasthāpanam || 23 ||

catvāraḥ kṣaṇāḥ | vicitra vipāka vimarda vilakṣaṇa || 24 ||

caturāryasatyāni | duḥkha samudaya nirodha mārga || 26 ||

catvāni tattvāni | ātmatattvaṃ mantratattvaṃ devatātattvaṃ jñānatattvaṃ ceti || 27 ||

catvāra ānandāḥ | ānandaḥ paramānando viramānandaḥ sahajānandaś ceti || 28 ||

catvāro nikāyāḥ | sthāvarī sarvāstivādaḥ saṃvidī mahāsaṅghī ceti || 29 ||

candrasūrya ālikāli | ṣoḍaśasaṃkrāntiś catuḥṣaṣṭidaṇḍo dvātriṃśannāḍī catvāraḥ praharāḥ | evaṃ sarve catvāraḥ || 30 ||

caṇḍālī jvalitā nābhau dahati pañcatathāgatān | dahati locanādīnāṃ dagdhe haṃ sravate śaśī || 31 ||

vajrakulapaṭalaḥ prathamaḥ ||